សត្តចត្តាលីសតិម បរិច្ឆេទ

បញ្ចរាជកោ

១. អច្ចយេ បិតុនោ រាជា, ឧបរាជា អហោសិ សោ;

សមត្ថោ សក្កុមិត្តានំ, កាតុំ និគ្គហ សំគហេ.

២. សេនា នាមសិ សប្បញ្ញា, មហេសី តស្ស រាជិនោ;

ខុទ្ទបុត្តា បីយា’តីវ, រញ្ញោ កល្យាណទស្សនា.

៣. អទាសិ យុវរាជត្តំ, ជេដ្ឋបុត្តស្ស អត្តនោ;

អាទិបាទេ’បរេកាសិ, រាជិនីបិ ច ធីតរោ.

៤. ទត្វា ឋានន្តរំ រាជា, តេសំ តេសំ យថារហំ;

ជនំ សង្គហវត្ថូហិ, សង្គហេសិ ចតូហិបិ.

៥. អថ កេនាបិ សោ គន្ត្វា, ហេតុនា មណិហីរកំ;

វសន្តោ កិរ អស្សោសិ, បច្ចន្តោ កុបិតោ ឥតិ.

៦. តតោ សេនាបតិញ្ចេវ, ជេដ្ឋបុត្តញ្ច អត្តនោ;

គន្ត្វា សាធេថ តំ ទេស-មីតិ បេសេសិ សជ្ជុកំ.

៧. តេសុ តត្ថោបយាតេសុ, បិសុនា ភេទចិន្តកា;

វត្វា យំកិញ្ចិ ភិន្ទិំសុ, តេ ឧភោបិ នរាធិបេ.

៨. តតោ ទ្វេ វេរិនោ ហុត្វា, ទេសំ គណ្ហិតុមារភុំ;

រាជា សុត្វា ខណេនេវ, ទុរតិស្ស មុបាគមិ.

៩. តេ ឧភោ តត្ថ ឃាតេត្វា, តេសំ សព្ពំ សមាទិយ;

ហន្ត្វា តំ បក្ខិយេ សព្ពេ, បុឡត្ថិនគរំ គមិ.

១០. តទា រោហណទេសម្ហិ, ភោគាធិបតិនោ សុតោ;

ទាឋាសិវាទិបាទស្ស, មហិន្ទោ នាម ខត្តិយោ.

១១. បិតុនោ សោ’បរិជ្ឈិត្វា, រញ្ញោ សន្តិកមាគមា;

ទិស្វា រាជាបិ សន្តុដ្ឋោ, តំ សង្គណ្ហិ យថារហំ.

១២. តេន មេត្តិំ ថិរំ កាតុំ, ធីតរំ ទេវ នាមិកំ;

តស្ស ទត្វាន បាហេសិ, ពលំ រោហណមេវសោ.

១៣. សោ គន្ត្វា រាជសេនាយ, មទ្ទាបេត្វាន រោហណំ;

ជម្ពុទីបំ បលាបេត្វា, បិតរំ រោហណំ លភិ.

១៤. មហាវិហារេ ការេសិ, សលាកគ្គំ ថិរំ សុភំ;

ខោលក្ខិយមុនិន្ទស្ស, បរិហារាយ ទាបយិ.

១៥. មហានាមវ្ហយំ គាមំ, បូជយិត្វា យថាពលំ;

វឌ្ឍមានទុមិន្ទស្ស, ជិណ្ណំ គេហញ្ច ការិយ.

១៦. រុក្ខណត្ថាយ តស្សា;ទា, កោដ្ឋាគាមំ ពហុទយំ;

នីលារាមស្ស បាទាសិ, កាឡុស្សំ នាម គាមកំ.

១៧. លោហរូបស្ស បាទាសិ, អារាមស្ស ច គាមកំ;

ជិណ្ណញ្ច បដិសង្ខាសិ, បដិមាយោ ច ការយិ.

១៨. បាសាទេ ចេតិយោ ចេវ, វិហារេ ច អនប្បកេ;

បុឡត្ថិនគរេ’កាសិ, វេជ្ជសាលំ មហាទយោ.

១៩. តថា បណ្ឌា វិយញ្ចេវ, ភោគគាមសមាយុតំ;

បិដ្ឋសប្បិនមន្ធានំ, សាលាយោ ច តហិំ តហិំ.

២០. បោត្ថកេសុ លិខាបេត្វា, អដ្ដេ សម្មា វិនិច្ឆិតេ;

រាជគេហេ ឋបាបេសិ, ឧក្កោដនភយេន សោ.

២១. នាគវឌ្ឍននាមស្ស, ភោគគាមេ ពហូ អទា;

លេខេ’បុព្ពេ ន វារេត្វា, បាលេត្វា បុព្ពសាសនំ.

២២. បិតរា ច មហាទានំ, បុញ្ញមញ្ញម្បិ វា កតំ;

សព្ពំ តមវិនាសេត្វា, និច្ចំ សោ រក្ខិ សាទរោ.

២៣. មហេសី ច មហារញ្ញោ, បុញ្ញានិ ពហុការយិ;

កណ្ដកំ ចេតិយំ កាសិ, ទេវី ចេតិយបព្ពតេ.

២៤. ការេត្វា ជយសេនញ្ច, បព្ពតំ គាមិកស្សទា;

ភិក្ខុសង្ឃស្ស សា គាមំ, មហុម្មារញ្ច តស្ស ទា.

២៥. សិលាមេឃវ្ហយំ កត្វា, ភិក្ខុនីនមុបស្សយំ;

សិលាមេឃវ្ហយេ ទាសិ, ភិក្ខុនីនញ្ច បច្ចយេ.

២៦. គាមាយេ’សុំ បុរាកីតា, វិហារោ តត្ថ សាធនំ;

ទត្វា តេ មេ ចយិត្វាន, វិហារស្សេវ ទាបយិ.

២៧. ឆាទយិត្វា មហារុក្ខេ, សព្ពេ ចេតិយបព្ពតេ;

នានារាគេ ធជេ ចេវ, បដាកាយោ ច បូជយិ.

២៨. បុព្ពារាមកភាគម្បិ, បាសាទំ បដិសង្ខរិ;

ឧស្សានវិដ្ឋិំ ទុព្ភោគំ, សុភោគំ តស្ស ការយិ.

២៩. វិហារំ គិរិភណ្ឌញ្ច, នដ្ឋំ បាកតិកំ ករិ;

ភោគគាមេ ច ទាបេសិ, ភិក្ខូនំ តន្និវាសិនំ.

៣០. អម្ពុយ្យានម្ហិ អាវាសំ, កត្វា ទប្បុឡបព្ពតំ;

ភិក្ខូនំ តិសតស្សា’ទា, សម្បន្នចតុបច្ចយំ.

៣១. ការេត្វា នីលគល្លញ្ច, អារាមំ សោ មនោរមំ;

ទកវារំ ពហុប្បាទំ, តស្ស ទាបេសិ ការិយ.

៣២. អរិការិ វិហារេ ច, បដិសង្ខាសិ ជិណ្ណកំ;

សលាកគ្គញ្ច បាសាទំ, អបុព្ពំយេវ ការយិ.

៣៣. វាហទីបេ សការេសិ, សេនគ្គពោធិបព្ពតំ;

ធម្មំ តីសុ និកាយេសុ, វាចយិត្ថ ពហុស្សុតេ.

៣៤. គណ្ហាបេសិ ច ភិក្ខូនំ, អយោបត្តេសុ គណ្ឋិកេ;

បុញ្ញន្តិ វុត្តំ សព្ពំ សោ, ន កិញ្ចិ បរិវជ្ជយិ.

៣៥. កុលីនានមនាថានំ, ឥត្ថីនំ’ទា បិឡន្ធនំ;

ភោជនំ ភោជនត្ថីនំ, ពហុ សោ ទាសិ រត្តិយំ.

៣៦. គុន្នំ សស្សានិ បាទាសិ, កាកាទីនញ្ច ភត្តកំ;

តណ្ឌុលញ្ច កុមារានំ, មធុផាណិតសំយុត្តំ.

៣៧. ឯវំ បុញ្ញានិ កត្វាន, នរិន្ទោ សោ សបារិសោ;

ភុត្វា បញ្ចសុ វស្សេសុ, មេទិនិំ សម្បរិច្ចជិ.

៣៨. តតោ តស្ស សុតោ អាសិ, សីហឡានំ រថេសតោ;

សព្ពរូបគុណោបេតោ, មហិន្ទោ នាម ខត្តិយោ.

៣៩. សោ ធម្មិកសីលាមេឃោ, ឥច្ចាសិ ធរណីតលេ;

ធម្មទីបោ ធម្មធជោ, សុទ្ធធម្មបរាយនោ.

៤០. បុព្ពកេហិ នរិន្ទេហិ, កតំ ធម្មបថានុគំ;

សព្ពំ កាសិ អហាបេត្វា, អធម្មំ តុ វិវជ្ជយិ.

៤១. រាជារតនបាសាទេ, កាតុំ សោ នវកម្មកំ;

សព្ពកាលេសុ ទាបេសិ, គេដ្ឋុម្ពទកវារកំ.

៤២. ជិណ្ណញ្ច បដិសង្ខាសិ, បុញ្ញកម្មមកាសិ ច;

រជ្ជំ កត្វាន ចតូសុ, វស្សេសុ និធនំ គតោ.

៤៣. អគ្គពោធិ តតោ រាជា, ឆត្តំ ឧស្សាបយិ បុរេ;

ការេន្តោ សព្ពសត្តានំ, ហិតំ សុខមសេសតោ.

៤៤. ធាតុបូជំ សការេសិ, សត្ថុសព្ពគុណារហំ;

បិតាមហកតស្សា’បិ, សម្ពុទ្ធស្ស មហាមហំ.

៤៥. ឧទយគ្គាទិពោធិញ្ច, បរិវេណំ សការយិ;

នាមំ គហេត្វា បិតុនោ, អត្តនោ ច នរាធិបោ.

៤៦. សភោគំ បរិវេណញ្ច, កត្វា តំ ភូតនាមកំ;

សកាចរិយកស្សា’ទា, ភិក្ខូនំ តិសតស្ស ច.

៤៧. រាជសាលាយ ទាបេសិ, ចូឡវាបិយគាមកំ;

គាមទ្វយញ្ច ទាបេសិ, កាឡូលមល្លវាតកេ.

៤៨. បវេសំ វិនិវារេសិ, ឧបោសថទិនេសុ សោ;

មច្ឆមំសសុរាទីនំ, អន្តោនគរមត្តនោ.

៤៩. ភិក្ខូ វា ចេតិយេ វា សោ, វន្ទិត្វា និក្ខមំ តតោ;

វាលុកា ហា វិនស្សន្តុ, ឥតិ បាទេសុ វោធយី.

៥០. យំ យំ សោវគ្គិយំ កម្មំ, កម្មំ និស្សរណវហំ;

វត្ថុត្តយេ បសន្នោ សោ, កម្មំ តំ សព្ពមាចរិ.

៥១. មាតុបដ្ឋាននិរតោ, រត្តិន្ទិវមហោសិសោ;

គន្ត្វា តស្សា ឧបដ្ឋានំ, បាតោវ កិរ ភូបតិ.

៥២. សីសំ តេលេន មក្ខេត្វា, ឧព្ពដ្ដេត្វាន ជល្លិកំ;

នខេ វិសុទ្ធេ កត្វាន, នហាបេត្វាន សាទរំ.

៥៣. អច្ឆាទេត្វា នវំ វត្ថំ, សុខសម្ផស្សមត្តនោ;

វត្ថំ ឆឌ្ឌិតមាទាយ, បេល្លេត្វា សយមេវ តំ.

៥៤. តស្ស តោយេន សិញ្ចិត្វា, សីសំ សមកុដំ សកំ;

គន្ធមាលាហិ តំ សម្មា, ចេតិយំ វិហ បូជិយ.

៥៥. នមស្សិត្វាន តិក្ខត្តុំ, កត្វា តំ សោ បទក្ខិណំ;

ទាបេត្វា បរិសាយ’ស្សា, វត្ថាទីនិ យថារុចិំ.

៥៦. សហត្ថេនេវ ភោជេត្វា, ភោជនំ តំ មហារហំ;

ភុត្ថាវសេសំ ភុញ្ជិត្វា, សមាកិរិយមត្ថកេ.

៥៧. ភោជេត្វា បរិសំ តស្សា, រាជភោជនមុត្តមំ;

សជ្ជេត្វា វាសគេហញ្ច, សុគន្ធបរិវាសិតំ.

៥៨. សហត្ថា បញ្ញបេត្វាន, សយនំ តត្ថ សាធុកំ;

បាទេ ធោវិយ មក្ខេត្វា, គន្ធតេលេន សណ្ហកំ.

៥៩. សម្ពាហេន្តោ និសីទិត្វា, កត្វា និទ្ទមុបេតកំ;

កត្វា បទក្ខិណំ មញ្ចំ, តិក្ខត្តុំ សាធុវន្ទិយ.

៦០. អារក្ខកេ និយោជេត្វា, ទាសេកម្មករេបិ ច;

តស្សា បិដ្ឋិមកត្វាន, អបក្កមេវ បិដ្ឋិតោ.

៦១. ឋត្វា អទស្សនេ ឋានេ, តិក្ខត្តុំ បុន វន្ទិយ;

សន្តុដ្ឋោ តេន កម្មេន, សរន្តោ តំ បុនប្បុនំ.

៦២. គេហំ យាតិ សជីវន្តំ, ឯវមេវ ឧបដ្ឋហិ;

ឯកទា ទាសវាទេន, វន្ទិត្វា ទាសមត្តនោ.

៦៣. តេនត្តនោ កថាបេសិ, ខមាបេតុំ សយំ វចោ;

អត្តានំ ភិក្ខុសង្ឃស្ស, ទាបយិត្វាន មាតរា.

៦៤. ធនមត្ថគ្ឃនំ ញត្វា, ភុជិស្សោ អាសិ ពុទ្ធិមា;

ឯវំ បុញ្ញបរោ ហុត្វា, កត្វា ទីបស្ស សង្គហំ.

៦៥. ឯកាទសហិ វស្សេហិ, ទេវលោកមុបាគមិ;

តស្សានុជោ ទប្បុឡោ’ថ, រាជា ហោសិ តទច្ចយេ.

៦៦. សព្ពំ បុព្ពករាជូនំ, ចរិយំ សោ សមាចរិ;

តទា មហិន្ទនាមស្ស, បុត្តារោហណសាមិនោ.

៦៧. បិតរា និហដា’គញ្ឆុំ, រាជានំ មាតុលំ សកំ;

សោ តេ ទិស្វា បវត្តិំ តំ, សុត្វា ទត្វា មហាពលំ.

៦៨. បាហេសិ បិតរា យុទ្ធំ, កាតុំ ពន្ធុ ហិតេ រតេ;

មហិន្ទោបិ តថាភាវំ, វិទិត្វា រោហណាធិបោ.

៦៩. យុទ្ធំ បដិបទេយេវ, តេសំ’កាសិ មហាពលោ;

តេ ឧភោបិ បលាយិំសុ, ទត្វា សេនាយ នាយកំ.

៧០. បុនាគន្ត្វា មហីបាលំ, សេវមានា ឥធា’វសុំ;

បិតាបិ តេន សន្តុដ្ឋោ, អញ្ញេន សកពន្ធុនា.

៧១. យុជ្ឈន្តោ មរណំ គញ្ឆិ, ញាតិសោបិ មតោ កិរ;

តទា’ទា ភាគិនេយ្យស្ស, រាជា កិត្តគ្គពោធិនោ.

៧២. សព្ពរូបគុណោបេតំ, ធិតរំ ទេវ នាមិកំ;

សោ ទប្បុឡំ ឋបេត្វាន, សេវត្ថំ តស្ស រាជិនោ.

៧៣. សយំ សេនង្គមាទាយ, រោហណំ សមុបាគមិ;

រោហណាធិបតិ ហុត្វា, សព្ពាការសមប្បិតោ.

៧៤. បុត្តធីតាហិ វឌ្ឍេន្តោ, វាសំ តត្ថេវ កប្បយិ;

រាជាកាសិ ទុមិន្ទស្ស, ឃរំ ជិណ្ណំ នវំ ថិរំ.