សត្តតិំសតិម បរិច្ឆេទ

បញ្ចរាជកោ

១. ជេដ្ឋតិស្សច្ចយេ តស្ស, មហាសេនោ កនិដ្ឋកោ;

សត្តវីសតិវស្សានិ, រាជា រជ្ជមការយិ.

២. តស្ស រជ្ជាភិសេកំ តំ,

ការេតុំ បរតីរតោ;

សោ សង្ឃមិត្តត្ថេរោ តុ,

កាលំ ញត្វា ឥធាគតោ.

៣. តស្សាភិសេកំ ការេត្វា, អញ្ញំ កិច្ចញ្ចនេកធា;

មហាវិហារ វិទ្ធំសំ, កាតុកាមោ អសញ្ញតោ.

៤. អវិនយវាទិនោ ឯតេ, មហាវិហារវាសិនោ;

វិនយវាទី មយំ រាជ, ឥតិ គាហិយ ភូបភិំ.

៥. មហាវិហារវាសិស្ស, អាហារំ ទេតិ ភិក្ខុនោ;

យោ សោ សតំ ទណ្ឌិយោ’តិ, រញ្ញា ទណ្ឌំ ឋបាបយិ.

៦. ឧបទ្ទុតា តេហិ ភិក្ខូ, មហាវិហារវាសិនោ;

មហាវិហារំ ឆឌ្ឌេត្វា, មលយំ រោហណំ អគុំ.

៧. តេន មហាវិហារោ’យំ, នវវស្សានិ ឆឌ្ឌិតោ;

មហាវិហារវាសីហិ, ភិក្ខូហិ អាសិ សុញ្ញកោ.

៨. ‘‘ហោតិ អស្សាមិកំ វត្ថុ, បុតុវិសាមិនោ’’ឥតិ;

រាជានំ សញ្ញាបេត្វា សោ, ថេរោ ទុម្មតិ ទុម្មតិំ.

៩. មហាវិហារំ នាសេតុំ, លទ្ធានុមតិ រាជតោ;

តថា កាតុំ មនុស្សេ សោ, យោជេសិ ទុដ្ឋមានសោ.

១០. សង្ឃមិត្តស្ស ថេរស្ស, សេវកោ រាជវល្លភោ;

សោណាមច្ចោ ទារណោ ច, ភិក្ខវោ ច អលជ្ជិនោ.

១១. ភិន្ទិត្វា លោហបាសាទំ, សត្តភូមក មុត្តមំ;

ឃរេ នានប្បការេ ច, ឥតោ’ភយគិរិំ នយុំ.

១២. មហាវិហារា នីតេហិ, បាសាទេហិ ពហូហិ ច;

អភយគិរិវិហារោយំ, ពហុបាសាទកោ អហុ.

១៣. សង្ឃមិត្តំ បាបមិត្តំ, ថេរំ សោណញ្ច សេវកំ;

អាគម្ម សុពហុំ បាបំ, អកាសិ សោ មហីបតិ.

១៤. មហាសិលាបដិមំ សោ, បាចិនតិស្សបព្ពតា;

អានេត្វា’ភយគិរិម្ហិ, បតិដ្ឋាបេសិ ភូបតិ.

១៥. បដិមាឃរំ ពោធិឃរំ, ធាតុសាលំ មនោរមំ;

ចតុសាលញ្ច ការេសី, សង្ខរី កុក្កុដវ្ហយំ.

១៦. សង្ឃមិត្តេន ថេរេន, តេន ទារុណកម្មុនា;

វិហារោ សោ’ភយគិរិ, ទស្សនេយ្យោ អហុ តទា.

១៧. មេឃវណ្ណាភយោ នាម, រញ្ញោ សព្ពត្ថ សាខកោ;

សខា អមច្ចោ កុជ្ឈិត្វា, មហាវិហារនាសនេ.

១៨. ចោរោ ហុត្វាន មលយំ, គន្ត្វា លទ្ធមហព្ពលោ;

ខន្ធាវារំ និវេសេសិ, ទុរតិស្សកវាបិយំ.

១៩. តត្រា’គតំ តំ សុត្វា, សហាយំ សោ មហីបតិ;

យុទ្ធាហ បច្ចុគ្គន្ត្វាន, ខន្ធាវារំ និវេសយិ.

២០. សាធុំ បានញ្ច មំសញ្ច, លភិត្វា មលយាគតំ;

‘‘ន សេវិស្សំ សហាយេន, វិនា រញ្ញា’’តិ ចិន្តិយ.

២១. អាទាយ តំ សយំយេវ, រត្តិំ និក្ខម្ម ឯកកោ;

រញ្ញោ សន្តិកមាគម្ម, តមត្ថំ បដិវេទយិ.

២២. តេនា’ភតំ តេន សហ, វិស្សត្ថោ បរិភុញ្ជិយ;

‘‘កស្មា ចោរោ អហុ មេ ត្វំ, ‘‘ឥតិ រាជា អបុច្ឆិតំ.

២៣. ‘‘តយា មហាវិហារស្ស, នាសិតត្តា’’តិ អព្រុវិ;

‘‘វិហារំ វាសយិស្សាមិ, ខេមមេតំ មមច្ចយំ.

២៤. ឥច្ឆេវ មព្រវី រាជា, រាជានំ សោ ខមាបយិ;

តេន សញ្ញាបិតោ រាជា, នគរំយេវ អាគមិ.

២៥. រាជានំ សញ្ញបេត្វា សោ, មេឃវណ្ណាភយោ បន;

រញ្ញា សហ ន អាគញ្ឆិ, ទព្ពសម្ភារការណា.

២៦. វលភា ភរិយា រញ្ញោ, ឯកំ លេខកធីតិកា;

មហាវិហារនាសម្ហិ, ទុក្ខិតំ តំ វិនាសកំ.

២៧. ថេរំ មារាបយិ កុទ្ធា, សំគហេត្វាន វឌ្ឍកិំ;

ថូបារាមំ វិនាសេតុំ, អាគតំ ទុដ្ឋមានសំ.

២៨. មារាបេត្វា សង្ឃមិត្ត-ត្ថេរំ ទារុណការកំ;

សោណាមច្ចទារណញ្ច, ឃាតយិំសុ អសញ្ញកា.

២៩. អានេត្វា ទព្ពសម្ភារំ, មេឃវណ្ណាភយោ តុ សោ;

មហាវិហារេនេកានិ, បរិវេណានិ ការយិ.

៣០. អភយេនភយោ តស្មិំ, វូបសន្តេ តុ ភិក្ខវោ;

មហាវិហារំ វាសេសុំ, អាគន្ត្វាន តតោ តតោ.

៣១. រាជា មហាពោធិឃរេ, បច្ឆិមាយ ទិសាយ តុ;

ការេត្វា លោហរូបានិ, ឋបាបេសិ ទុវេ តុ សោ.

៣២. ទក្ខិណារាមវាសិម្ហិ, កុហកេ ជិម្ហមានសេ;

បសីទិត្វា បាបមិត្តេ, តិស្សត្ថេរេ អសញ្ញតេ.

៣៣. មហាវិហារសីមន្តេ, ឧយ្យានេ ជោតិនាមកេ;

ជេតវនវិហារំ សោ, វារយន្តោបិ ការយិ.

៣៤. តតោ សីមំ សមុគ្ឃាតុំ, ភិក្ខុសង្ឃមយាចិសោ;

អទាតុកាមា តំ ភិក្ខូ, វិហារម្ហា អបក្កមុំ.

៣៥. ឥធ សីមាសមុគ្ឃាតំ, បរេហិ ករិយមានកំ;

កោបេតុំ ភិក្ខវោ កេចិ, និលីយិំសុ តហិំ តហិំ.

៣៦. មហាវិហារោ នវមាសេ, ឯវំ ភិក្ខូហិ វជ្ជិតោ;

‘‘សមុគ្ឃាតំ ករិម្ហា’’តិ-បរេ ភិក្ខូ អមញ្ញិសុំ.

៣៧. តតោ សីមាសមុគ្ឃាតេ, ព្យាបារេ បរិនិដ្ឋិតេ;

មហាវិហារំ វាសេសុំ, ឥធាគន្ត្វាន ភិក្ខវោ.

៣៨. តស្ស វិហារគាហិស្ស, តិស្សត្ថេរស្ស ចោទនា;

អន្តិមវត្ថុនា អាសិ, ភូតត្ថំ សង្ឃមជ្ឈគា.

៣៩. វិនិច្ឆិយ មហាមច្ចោ, តថា ធម្មិកសម្មតោ;

ឧប្បព្ពាជេសិ ធម្មេន, តំ អនិច្ឆាយ រាជិនោ.

៤០. សោយេវ រាជា ការេសិ, វិហារំ មណិហីរកំ;

តយោ វិហារេ ការេសិ, ទេវាលយំ វិនាសិយ.

៤១. គោកណ្ណំ ឯរកាបិល្លំ, កលន្ទព្រាហ្មណគាមកេ;

មិគគាមវិហារញ្ច, គង្គសេនកបព្ពតំ.

៤២. បច្ឆិមាយ ទិសាយាថ, ធាតុសេនញ្ច បព្ពតំ;

រាជា មហាវិហារញ្ច, កោកវាតម្ហិ ការយិ.

៤៣. រូបារម្មវិហារញ្ច, ចូឡវិដ្ដញ្ច ការយិ;

ឧត្តរាភយសវ្ហេ ច, ទុវេ ភិក្ខូនុបស្សយេ.

៤៤. កាលវេឡកយក្ខស្ស, ឋានេ ថូបញ្ច ការយិ;

ទីបម្ហិ ជិណ្ណកាវាសេ, ពហូ ច បដិសង្ខរិ.

៤៥. សង្ឃត្ថេរសហស្សស្ស, សហស្សគ្ឃមទាសិ សោ;

ថេរទានញ្ច សព្ពេសំ, អនុវស្សញ្ច ចីវរំ.

៤៦. អន្នបានាទិទានស្ស, បរិច្ឆេទោ ន វិជ្ជតិ;

សុភិក្ខត្ថាយ ការេសិ, សោ’វ សោឡស វាបិយោ.

៤៧. មណិហីរមហាវាបិំ, ជល្លុរំ ខាណុនាមកំ;

មហាមណិំ កោកវាតំ, មោរកបរកវាបិកំ.

៤៨. កុព្ពាហកំ វាហកញ្ច, រត្តមាលកណ្ឌកម្បិ ច;

តិស្សវឌ្ឍមានកញ្ច, វេឡង្គវិដ្ឋិកម្បិ ច.

៤៩. មហាគល្លចីរវាបិំ, មហាទារគល្លកម្បិ ច;

កាឡបាសាណវាបិញ្ច, ឥមា សោឡស វាបិយោ.

៥០. គង្គាយ បព្ពវវ្ហំសោ, មហាមាតិញ្ច ការយិ;

ឯវំ បុញ្ញមបុញ្ញញ្ច, សុពហុំ សោ ឧបាចិនីតិ.

៥១. អសាធុសង្គមេនេវំ, យាវជីវំ សុភាសុភំ;

កត្វា គតោ យថាកម្មំ, សោ មហាសេនភូបតិ.

៥២. តស្មា អសាធុសំសគ្គំ, អារកា បរិវជ្ជិយ;

អហិំ វា’សិ វិសំ ខិប្បំ, ករេយ្យ’ត្ថហិតំ ពុធោ.

៥៣. អហុ រាជា សិរិមេឃ-វណ្ណោ តស្ស សុតោ តតោ;

វន្ធាតា វិយ លោកស្ស, សព្ពសម្បត្តិទាយកោ.

៥៤. មហាសេនេន បាបានំ, វសគេន វិនាសិតេ;

មហាវិហារេ សព្ពេបិ, សន្និបាតិយ ភិក្ខវោ.

៥៥. ឧបសង្កម្ម វន្ទិត្វា, និសិន្នោ បុច្ឆិ សាទរោ;

‘‘បិតរា សង្ឃមិត្តស្ស, សហាយេន វិនាសិតំ.

៥៦. កិំ កិមេវា’’តិ អាហំសុ, ភិក្ខវោ តំ នរិស្សរំ;

‘‘សីមាយុគ្ឃាដនំ កាតុំ, វាយមិត្វាបិ តេ បិតា.

៥៧. នាសក្ខិ អន្តោសីមាយំ, ភិក្ខូនំ វិជ្ជមានតោ;

ភូមិគព្ភនិលីនាហិ, សត្តាសុំ ឯត្ថ ភិក្ខវោ.

៥៨. អមច្ចោ សោណាមច្ចោ ច, សង្ឃមិត្តោ ច បាបិយោ;

រាជានំ សញ្ញាបេត្វាន, អបុញ្ញំ តេន ការយុំ.

៥៩. ភិន្ទិត្វា លោហបាសាទំ, សត្តភូមកមុត្តមំ;

ឃរេ នានប្បការេ ច, ឥតោ’ភយគិរិំ នយុំ.

៦០. មាសកេ ចតុពុទ្ធេហិ, និវុត្ថេ ចេតិយង្គណេ;

វបាបេសុញ្ច ទុប្បញ្ញា, បស្ស ពាលសមាគមំ’’.

៦១. តំ សុត្វា បិតុកម្មំ សោ, និព្ពិន្នោ ពាលសង្គមេ;

បិតរា នាសិតំ តត្ថ, សព្ពំ បាកតិកំ អកា.

៦២. លោហបាសាទមគទោ’វ, កាសិ បាសាទមុត្តមំ;

រញ្ញោ មហាបនាទស្ស, ទស្សេន្តោ វិយ ភូតលេ.

៦៣. បរិវេណានិ សព្ពានិ, នាសិតានិ និវេសយិ;

ភោគេ អារាមិកានញ្ច, យថាឋានេ ឋបេសិ សោ.

៦៤. បិតរា បច្ចយានញ្ច, បច្ឆិន្នត្តា វិពុទ្ធិនា;

ឆិទ្ទាវាសំ ឃនាវាសំ, វិហារំ’កាសិ ពុទ្ធិមា.

៦៥. ការិតេ បិតរា ជោតិ វនេចេ’សោ វិហារកេ;

កម្មំ វិប្បកតំ សព្ពំ, និដ្ឋាបេសិ នរិស្សរោ.

៦៦. ថេរស្សា’ថ មហិន្ទស្ស, សមណិន្ទស្ស សុនុនោ;

សុត្វាន មនុជិន្ទោ សោ, បវត្តិំ សព្ពមាទិតោ.

៦៧. បសីទិត្វា គុណេ តស្ស, រាជា ទិប្បបសាទកេ;

‘‘ឥស្សរោ វត ទីបស្ស, ថេរោ’’ ឥតិ វិចិន្តិយ.

៦៨. បដិពិម្ពំ សុវណ្ណស្ស, កត្វា តម្មាណ និស្សិតំ;

បុព្ពកត្តិកមាសស្ស, បព្ពបក្ខេ តុ សត្តមេ.

៦៩. ទិនេ នេត្វា ចេតិយម្ព-ថលេ ថេរម្ពសញ្ញិតេ;

តត្រដ្ឋមេ និវាសេត្វា, តតោ តុ នវមេ បន.

៧០. មហាសេនំ គហេត្វា សោ, ទេវសេនា សមូបមំ;

ឱរោធេ នគរេ ចេវ, គេហរក្ខណកេ វិនា.

៧១. លំកាទីបេ ច សកលេ, សព្ពេ អាទាយ ភិក្ខវោ;

វិស្សជ្ជេត្វា មនុស្សេ ច, នគរេ ចារកដ្ឋិតេ.

៧២. បដ្ឋបេត្វា មហាទានំ, អយញ្ចាខិលបាណិនំ;

បូជំ សព្ពោបហារេហិ, ករោន្តោ ច អនូបមំ.

៧៣. បច្ចុគ្គមនមេតស្ស, ទីបសត្ថុស្ស សត្ថុនោ;

វរបុត្តស្ស សោ កត្វា, ទេវរាជា’វ សត្ថុនោ.