ទ្វត្តិំសតិម បរិច្ឆេទ

តុសិតបុរគមនំ

១. អនិដ្ឋិតេ ឆត្តកម្មេ, សុធាកម្មេ ច ចេតិយេ;

មារណន្តិករោគេន, រាជា អាសិ គិលានកោ.

២. តិស្សំ បក្កោសយិត្វា សោ, កនិដ្ឋំ ទីឃវាបិតោ;

‘‘ថូបេ អនិដ្ឋិតំ កម្មំ, និដ្ឋាបេហីតិ អព្រវិ.

៣. ភាតុនោ ទុព្ពលត្តាសោ, តុន្នវាយេហិ ការិយ;

កញ្ចុកំ សុទ្ធវត្ថេហិ, តេន ឆាទិយ ចេតិយំ.

៤. ចិត្តការេហិ ការេសិ, វេទិកំ តត្ថ សាធុកំ;

បន្តិបុណ្ណឃដានញ្ច, បញ្ចង្គុលកបន្តិកំ.

៥. ឆត្តាការេហិ ការេសិ, ឆត្តំ វេឡុមយំ តថា;

ខរបត្តមយេ ចន្ទ-សូរិយេ មុទ្ធវេទិយំ.

៦. លាខាកុង្កុមកេហេ’តំ, ចិត្តយិត្វា សុចិត្តិតំ;

រញ្ញោ និវេទយិ’’ថូបេ, កត្តព្ពំ និដ្ឋិតំ’’ឥតិ.

៧. សិវិកាយ និបជ្ជិត្វា, ឥធាគន្ត្វា មហីបតិ;

បទក្ខិណំ ករិត្វាន, សិវិកាយេ’វ ចេតិយំ.

៨. វន្ទិត្វា ទក្ខិណទ្វារេ, សយនេ ភូមិសន្ថតេ;

សយិត្វា ទក្ខិណបស្សេន, សោ មហាថូប មុត្តមំ.

៩. សយិត្វា វាមបស្សេស, លោហបាសាទ មុត្តមំ;

បស្សន្តោ សុមនោ អាសិ, ភិក្ខុសង្ឃបុរេក្ខតោ.

១០. គិលានបុច្ឆនត្ថាយ, អាគតាហិ តតោ តតោ;

ឆន្នវុតិកោដិយោ ភិក្ខូ, តស្មិំ អាសុំ សមាគមេ.

១១. គណសជ្ឈាយមករុំ, វគ្គពន្ធេន ភិក្ខវោ;

ថេរបុត្តាភយំ ថេរំ, តត្ថា’ទិស្វា មហីបតិ.

១២. អដ្ឋវីស មហាយុទ្ធំ, យុជ្ឈន្តោ អបរាជយំ;

យោ សោ ន បច្ចុទាវត្តោ, មហាយោធោ វសី មម.

១៣. មច្ចុយុទ្ធម្ហិ សម្បត្តេ, ទិស្វា មញ្ញេ បរាជយំ;

ឥទានិ សោ មំ នោ បេតិ, ថេរោ ថេរបុត្តភយោ.

១៤. ឥតិ ចិន្តយិ សោថេរោ, ជានិត្វា តស្ស ចិន្តិតំ;

ករិន្ទនទិយា សិសេ, វសំ បញ្ជលិបព្ពតេ.

១៥. បញ្ចខីណាសវសត-បរិវារេន ឥទ្ធិយា;

នភសាគម្ម រាជានំ, អដ្ឋាសិ បរិវារិយ.

១៦. រាជា ទិស្វា បសន្នោ តំ, បុរតោ ច និសីទិយ;

តុម្ហេ ទសមហាយោធេ, គណ្ហិត្វាន បុរេ អហំ.

១៧. យុជ្ឈិំ ឥទានិ ឯកោ’វ, មច្ចុនា យុទ្ធមារភិំ;

មច្ចុសត្តុំ បរាជេតុំ, ន សក្កោមី’’តិ អាហ ច.

១៨. អាហ ថេរោ ‘‘មហារាជ-មា ភាយិ មនុជាធិប;

កិលេសសត្តុំ អជិត្វា, អជេយ្យោ មច្ចុសត្តុកោ.

១៩. សព្ពម្បិ សង្ខារគតំ, អវស្សំយេវ ភិជ្ជតិ;

‘‘អនិច្ចា សព្ពសង្ខារា’’, ឥតិ វុត្តំហិ សត្ថុនា.

២០. លជ្ជា សារជ្ជរហិតា, ពុទ្ធេបេ’តិ អនិច្ចតា;

តស្មា អនិច្ចា សង្ខារា, ទុក្ខា’នត្តាតិ ចិន្តយ.

២១. ទុតិយេ អត្តាភាវេបិ, ធម្មច្ឆន្ទោ មហាហិតេ;

ឧបដ្ឋិតេ ទេវលោកេ, ហិត្វា ទិព្ពំ សុខំ តុវំ.

២២. ឥធាគម្ម ពហុំ បុញ្ញំ, អកាសិ ច អនេកធា;

ករណម្បេករជ្ជស្ស, សាសនុជ្ជោតនាយតេ.

២៣. មហាបុញ្ញកតំ បុញ្ញំ, យាវជ្ជទិវសា តយា;

សព្ពំនុស្សរមេវំ តេ, សុខំ សជ្ជុ ភវិស្សតិ.

២៤. ថេរស្សវចនំ សុត្វា, រាជា អត្តមនោ អហុ;

‘‘អវស្សយោ មច្ចុយុទ្ធេបិ, ត្វំ មេ សី’’តិ អភាសិតំ.

២៥. តទា ច អាហរាបេត្វា, បហដ្ឋោ បុញ្ញ បោត្ថកំ;

វាចេតុំ លេខកំ អាហ, សោ តំ វាចេសិ បោត្ថកំ.

២៦. ឯកូនសតវិហារា, មហារាជេន ការិតា;

ឯកូនវីសកោដីហិ, វិហារោ មរិច វដ្ដិ ច.

២៧. ឧត្តមោ លោហបាសាទោ,

តិំសកោដីហិ ការិតោ;

មហាថូបេ អនគ្ឃានិ,

ការិតា ចតុវីសតិ.

២៨. មហាថូបម្ហិ សេសានិ, ការិតានិ សុពុទ្ធិនា;

កោដិសហស្សំ អគ្ឃន្តិ, មហារាជា’’តិ វាចយិ.

២៩. ‘‘កោដ្ឋនាមម្ហិ មលយេ, អក្ខក្ខាយិក ឆាតកេ;

កុណ្ឌលានិ មហគ្ឃានិ, ទុវេ ទត្វាន គណ្ហិយ.

៣០. ខីណាសវានំ បញ្ចន្នំ, មហាថេរាន មុត្តមោ;

ទិន្នោ បសន្នចិត្តេន, កង្គុអម្ពិលបិណ្ឌកោ.

៣១. ចូឡង្គនិយ យុទ្ធម្ហិ, បរាជិត្វា បលាយតា;

កាលំ ឃោសាបយិត្វាន, អាគតស្ស វិហាយសា.

៣២. ខីណាសវស្ស យតិនោ, អត្តានមនបេក្ខិយ;

ទិន្នំ សរកភត្ត’ន្តិ, វុត្តេ អាហ មហីបតិ.

៣៣. វិហារមហសត្តាហេ, បាសាទស្ស មហេតថា;

ថូបារម្ភេ តុ សត្តាហេ, តថា ធាតុនិធានកេ.

៣៤. ចាតុទ្ទិសស្ស ឧភតោ, សង្ឃស្ស ឧភតោ មយា;

មហារហំ មហាទានំ, អវិសេសំ បវត្តិតំ.

៣៥. មហាវេសាខបូជា ច, ចតុវីសតិ ការយិ;

ទីបេ សង្ឃស្ស តិក្ខត្តុំ, តិចីវរមទាបយិ.

៣៦. សត្តសត្ត ទិនានេវ, ទីបេ រជ្ជមហំ ឥមំ;

បញ្ចក្ខត្តុំ សាសនម្ហិ, អទាសិំ ហដ្ឋមានសោ.

៣៧. សតតំ ទ្វាទសឋានេ, សប្បិនា សុទ្ធវដ្ដិយា;

ទីបសហស្សំ ជាលេសិំ, បូជេន្តោ សុគតំ អហំ.

៣៨. និច្ចំ អដ្ឋារសឋានេ, វជ្ជេហិ វិហិតំ អហំ;

គិលាន ភត្តភេសជ្ជំ, គិលានានមទាបយិំ.

៣៩. ចតុត្តាលីសឋានម្ហិ, សង្ខតំ មធុបាយសំ;

តត្តកេស្វេវ ឋានេសុ, តេលុល្លោបកមេវ ច.

៤០. ឃតេ បក្កេ មហាជាល, បូវេ ឋានម្ហិ តត្តកេ;

តថេវ សហ ភត្តេហិ, និច្ច ឯមវ អទាបយិំ.

៤១. ឧបោសថេសុ ទិវសេសុ, មាសេ មាសេ ច អដ្ឋសុ;

លំកាទីបេ វិហារេសុ, ទីប តេលមទាបយិំ.

៤២. ធម្មទានំ មហន្តន្តិ, សុត្វា អមិសទានតោ;

លោហ បាសាទតោ ហេដ្ឋា, សង្ឃមជ្ឈម្ហិ អាសនេ.

៤៣. ‘‘ឱសារេស្សាមិ សង្ឃស្ស, មង្គលសុត្ត’’មិច្ចហំ;

និសិន្នោ ឱសារយិតុំ, នាសក្ខិំ សង្ឃគារវា.

៤៤. តតោប្បភុតិ លំកាយ, វិហារេសុ តហិំ តហិំ;

ធម្មកថំ កថាបេសិំ, សក្ករិត្វាន ទេសកេ.

៤៥. ធម្មកថិក ស្សេកស្ស, សប្បិផាណិតសក្ខរំ;

នាឡិំ នាឡិមទាបេសិំ, ទាបេសិំ ចតុរង្គុលំ.

៤៦. មុដ្ឋិកំ យដ្ឋិមធុកំ, ទាបេសិំ សាដកទ្វយំ;

សព្ពំបិស្សរិយេ ទានំ, នមេ ហាសេសិ មានសំ.

៤៧. ជីវិតំ អនបេក្ខិត្វា, ទុគ្គតេន សតា មយា;

ទិន្ន ទាន ទ្វយំយេវ, តំ មេ ហាសេសិ មានសំ.

៤៨. តំ សុត្វា អភយោ ថេរោ, តំ ទានទ្វយមេវ សោ;

រញ្ញោ ចិត្តប្បសាទត្ថំ, សំ វណ្ណេសិ អនេកធា.

៤៩. តេសុ បញ្ចសុ ថេរេសុ, កង្គុអម្ពិលគាហកោ;

មលិយ ទេវ មហាថេរោ, សុមនកូដម្ហិ បព្ពតេ.

៥០. នវន្នំ ភិក្ខុសតានំ, ទត្វា តំ បរិភុញ្ជិ សោ;

បថវីចាលកោ ធម្ម, សុត្តថេរោ តុ តំ បន.

៥១. កល្យាណិកវិហារម្ហិ, ភិក្ខូនំ សំវិភាជិយ;

ទសទ្ធស តសង្ខានំ, បរិភោគ មកាសយំ.

៥២. តលង្គរ វាសិកោ ធម្ម, ទិន្នត្ថេរោ បិយង្គុកេ;

ទីបេ ទសសហស្សានំ, ទត្វាន បរិភុញ្ជិតំ.

៥៣. មង្គណវាសិកោ ខុទ្ទ, តិស្សត្ថេរោ មហិទ្ធិកោ;

កេលាសេ សដ្ឋិសហស្សានំ, ទត្វាន បរិភុញ្ជិ តំ.

៥៤. មហាព្យគ្ឃោ ច ថេរោ តំ, ឧក្កនគរវិហារកេ;

ទត្វា សតានំ សត្តានំ, បរិភោគមកាសយំ.

៥៥. សរកភត្តគាហី តុ, ថេរោ បិយង្គុទីបកេ;

ទ្វាទស ភិក្ខុសហស្សានំ, ទត្វាន បរិភុញ្ជិតំ.

៥៦. ឥតិ វត្វា’ភយត្ថេរោ, រញ្ញោ ហាសេសិ មានសំ;

រាជា ចិត្តំ បសាទេត្វា, តំ ថេរំ ឥធ មព្រុវិ.

៥៧. ‘‘ចតុវីសតិវស្សានិ, សង្ឃស្ស ឧបការកោ;

អហ មេវំ ហោតុ កាយោ’បិ, សង្ឃស្ស ឧបការកោ.

៥៨. មហាថូប ទស្សនឋានេ, សង្ឃស្ស កម្មមាឡកេ;

សរីរំ សង្ឃទាសស្ស, តុម្ហេ ឈាបេថ មេ’’ឥតិ.

៥៩. កនិដ្ឋំ អាហ ‘‘ភោ តិស្ស, មហាថូបេ អនិដ្ឋិតំ;

និដ្ឋាបេហិ តុវំ សព្ពំ, កម្មំ សក្កច្ច សាធុកំ.

៦០. សាយំ បាតោ ច បុប្ផានិ, មហាថូបម្ហិ បូជយ;

តិក្ខត្តុំ ឧបហារញ្ច, មហាថូបស្ស ការយ.

៦១. បដិយាទិតញ្ច យំ វត្តំ, មយា សុគត សាសនេ;

សព្ពំ អបរិហាបេត្វា, តាត វត្តយ តំ តុវំ.

៦២. សង្ឃស្ស តាត កិច្ចេសុ, មា បមជ្ជិត្ថ សព្ពទា’’;

ឥតំ តំ អនុសាសិត្វា, តុណ្ហី អាសិ មហីបតិ.

៦៣. តង្ខណំ គណសជ្ឈាយំ, ភិក្ខុសង្ឃោ អកាសិ ច;

ទេវតា ឆ រថេ ចេវ, ឆហិ ទេវេហិ អានយុំ.

៦៤. យាចុំ វិសុំ វិសុំ ទេវា, រាជានំ តេ រថេ ឋិតា;

‘‘អម្ហាកំ ទេវលោកំ ត្វំ, ឯហិ រាជមនោរមំ’’.

៦៥. រាជា តេសំ វចោ សុត្វា, ‘‘យាវ ធម្មំ សុណោមហំ;

អធិវាសេថ តាវា’’តិ, ហត្ថាការេន វារយិ.

៦៦. វារេតិ គណសជ្ឈាយ, មីភិ មន្ត្វាន ភិក្ខវោ;

សជ្ឈាយំ ឋបយុំ រាជា, បុច្ឆិតំ ឋានការណំ.

៦៧. ‘‘អាគមេថា’’តិ សញ្ញាយ, ទិន្នត្តា’តិ វទិំសុ តេ;

រាជា ‘‘នេតំ តថា ភន្តេ’’, ឥតិ វត្វាន តំ វទិ.

៦៨. តំ សុត្វាន ជនា កេចិ, ‘‘ភីតោ មច្ចុភយា អយំ;

លាលប្បតី’’តិ មញ្ញិំសុ, តេសំ កង្ខាវិនោទនំ.

៦៩. ការេតុំ អភយត្ថេរោ, រាជានំ ឯវមាហ សោ;

‘‘ជានាបេតុំ កថំ សក្កា, អានីតា តេ រថា’’ឥតិ.

៧០. បុប្ផទានំ ខិបាបេសិ, រាជ នភសិ បណ្ឌិតោ;

តានិ លគ្គានិ លម្ពិំសុ, រថីសាសុ វិសុំ វិសុំ.

៧១. អាកាសេ លម្ពមានានិ, តានិ ទិស្វា មហាជនោ;

កង្ខំ បដិវិនោទេសិ, រាជា ថេរមភាសិតំ.

៧២. ‘‘កតមោ ទេវលោកោ ហិ,

រម្មោ ភន្តេ’’តិ សោ ព្រុវិ;

‘‘តុសិនានំ បុរំ រាជ,

រម្មំ’’ឥតិ សតំ មតំ.