ឯកូនតិំសតិម បរិច្ឆេទ

ថូបារម្ភោ

១. ឯវំ សមត្តេ សម្ភារេ, វេសាខបុណ្ណមាសីយំ;

បត្តេ វិសាខនក្ខត្តេ, មហាថូបត្ថមារភិ.

២. ហារេត្វាន តហិំ ថូបំ, ថូបឋានមខាណយិ;

សត្ថហត្ថោ មហីបាលោ, ថិរី កាតុំ មនេកធា.

៣. យោធេហិ អាហរាបេត្វា, គុឡបាសាណកេ តហិំ;

កូដេហិ អាហនាបេត្វា, បាសាណេ ចុណ្ណិតេ អថ.

៤. ចម្មវនទ្ធ បាទេហិ, មហាហត្ថីហិ មទ្ទយិ;

ភូមិយា ថិរីភាវត្ថំ, អត្ថានត្ថវិចក្ខណោ.

៥. អាកាស គង្គាបតិត-ដ្ឋានេ សតតតិន្តកេ;

មត្តិកា សុខុមា តត្ថ, សមន្តា តិំ សយោជនេ.

៦. នវនីត មត្តិកា’តេសា, សុខុមត្តា បបុច្ចតិ;

ខីណាសវា សាមណេរា, មត្តិកា អាហរុំ តតោ.

៧. មត្តិកា អត្ថរាបេសិ, តត្ថ បាសាណកោដ្ដិមេ;

ឥដ្ឋកា អត្ថរាបេសិ, មត្តិកោ បរិឥស្សរោ.

៨. តស្សោ បរិខរសុធំ, កុរុវិន្ទំ តតោបរិ;

តស្សោ បរិអយោជាលំ, មរុម្ពន្តុ តតោបរំ.

៩. អាហដំ សាមណេរេហិ, ហិមវន្តា សុគន្ធកំ;

សន្ថរាបេសិ ភូមិន្ទោ, ផឡិកន្តុ តតោបរិ.

១០. សីលាយោ សន្ថរាបេសិច្ឆ ផឡិកសន្ថរោ បរិ;

សព្ពត្ថ មត្តិកាកិច្ចេ, នវនីតវ្ហយា អហុ.

១១. និយ្យាសេន កបិដ្ឋស្ស, សន្និតេន រសោទកេ;

អដ្ឋង្គុលំ ពហលឯតា, លោហបដ្ដំ សីលោបរិ.

១២. មនោសិលាយតិលតេ-លសន្និតាយ តតោ បរិ;

សត្តង្គុលំ សជ្ជុបដ្ដំ, សន្ថរេសិ រថេសភោ.

១៣. មហាថូប បតិដ្ឋាន-ឋានេ ឯវំ មហីបតិ;

ការេត្វា បរិកម្មានិ, វិប្បសន្នេន ចេតសា.

១៤. អាសឡ្ហី សុក្កបក្ខស្ស, ទិវសម្ហិ ចតុទ្ទសេ;

ការេត្វា ភិក្ខុសង្ឃស្ស, សន្និបាតមិទំ វទិ.

១៥. មហាចេតិយ មត្ថាយ, ភទន្តាមង្គលិដ្ឋកំ;

បតិដ្ឋាបេស្សំ ស្វេ ឯត្ថ, សព្ពោ សង្ឃោ សមេតុនោ.

១៦. ពុទ្ធ បូជា បយោគេន, មហាជនហីតត្ថិកោ;

‘‘មហាជនោ’ បោសថិកោ, គន្ធមាលាទិគណ្ហិយ.

១៧. មហាថូប បតិដ្ឋាន-ឋានំ យាតុ សុវេ’’ឥតិ;

ចេតិយ ឋាន ភូសាយ, អមច្ចេ ច និយោជយិ.

១៨. អាណាបិតា នរិន្ទេន, មុនិនោ បិយគារវា;

អនេកេហិ បការេហិ, តេ តំ ឋានមលង្ករុំ.

១៩. នគរំ សកលញ្ចេវ, មគ្គញ្ចេវ ឥធាគតំ;

អនេកេហិ បការេហិ, អលង្ការយិ ភូបតិ.

២០. បភាតេ ច ចតុទ្វារេ, នគរស្ស ឋបាបយិ;

នហាបិតេ នហាបកេ ច, អប្បកេ ច ពហូតថា.

២១. វត្ថានិ គន្ធមាលា ច, អន្នានិ មធុរានិ ច;

មហាជនត្ថំ ភូមិន្ទោ, មហាជនហិតេ រតោ.

២២. បដិយត្តានិ ឯតានិ, សាទិយិត្វា យថារុចិ;

បោរាជានបទាចេវ ថូបឋានមុបាគមុំ.

២៣. សុមណ្ឌិតេហិ នេកេហិ, ឋានន្តរ វិធានតោ;

អារក្ខិតោ អមច្ចេហិ, យថាឋានំ មហីបតិ.

២៤. សុមណ្ឌិតាហិ នេកាហិ, ទេវកញ្ញូបមាហិ ច;

នាដកីហិ បរិព្ពុឡ្ហោ, សុមណ្ឌិត បស្សាធិតោ.

២៥. ចត្តាលីស សហស្សេហិ, នរេហិ បរិវារិតោ;

នានា តូរិយ សង្ឃុដ្ឋោ, ទេវរាជ វិលាសវា.

២៦. មហាថូប បតិដ្ឋានំ, ឋានាឋាន វិចក្ខណោ;

អបរណ្ហេ ឧបាគញ្ឆិ, នន្ទយន្តោ មហាជនំ.

២៧. អដ្ឋុត្តរសហស្សំ សោ, សាដកានិដ្ឋបាបិយ;

បុដពទ្ធានិ មជ្ឈម្ហិ, ចតុបស្សេ តតោ បន.

២៨. វត្ថានិ រាសីំការេសិ, អនេកានិ មហីបតិ;

មធុសប្បិ គុឡាទីហិ ច, មង្គលត្ថំ ឋបាបយិ.

២៩. នានាទេសេហិបា’គញ្ឆុំ, ពហវោ ភិក្ខវោ ឥធ;

ឥធ ទីបដ្ឋសង្ឃស្ស, កា កថាវ ឥធាគមេ.

៣០. ថេរោ’ សីតិ សហស្សានិ, ភិក្ខូ អាទាយ អាគមា;

រាជគហស្ស សាមន្តា, ឥន្ទគុត្តោ មហាគណី.

៣១. សហស្សានិ’សិបតនា, ភិក្ខូនំ ទ្វាទសា’ទិយ;

ធម្មសេនោ មហាថេរោ, ចេតិយឋានមាគមា.

៣២. សដ្ឋិភិក្ខុសហស្សានិ, អាទាយ ឥធមាគមា;

បីយទស្សី មហាថេរោ, ជេតារាម វិហារតោ.

៣៣. វេសាលី មហាវនតោ, ថេរោរុ ពុទ្ធរក្ខិតោ;

អដ្ឋារស សហស្សានិ, ភិក្ខូ អាទាយ អាគមា.

៣៤. កោសម្ពី ឃោសិតារាមា, ថេរោរុ ធម្មរក្ខិតោ;

តិំសភិក្ខុសហស្សានិ, អាទាយ ឥធ អាគមា.

៣៥. អាទាយុជ្ជេនីយំ ថេរោ, ទក្ខិណ គិរិតោ យតិ;

ចត្តារីស សហស្សានិ, អគោរុ សង្ឃរក្ខិតោ.

៣៦. ភិក្ខូនំ សតសហស្សំ, សដ្ឋសហស្សានិ ចា’ទិយ;

បុប្ផបុរេ’សោករាមា, ថេរោ មិត្តិណ្ណ នាមកោ.

៣៧. ទុវេ សតសហស្សានិ, សហស្សានិ អសីតិ ច;

ភិក្ខូ គហេត្វានុ’ត្តិណ្ណោ, ថេរោ កស្មិរមណ្ឌលា.

៣៨. ចត្តារីសត សហស្សានិ, សហស្សានិ ច សដ្ឋិ ច;

ភិក្ខូ បល្លវភោគម្ហា, មហាទេវោ មហាមតី.

៣៩. យោននគរា’លសន្ទាសោ, យោន មហាធម្មរក្ខិតោ;

ថេរោ តិំស សហស្សានិ, ភិក្ខូ អាទាយ អាគមា.

៤០. វញ្ឈាដវិវត្តនិយា, សេនាសនា តុ ឧត្តរោ;

ថេរោ សដ្ឋិសហស្សានិ, ភិក្ខូ អាទាយ អាគមា.

៤១. ចិត្តគុត្តោ មហាថេរោ, ពោធិមណ្ឌវិហារតោ;

តិំស ភិក្ខុសហស្សានិ, អាទិយិត្វា ឥធាគមា.

៤២. ចន្ទគុត្តោ មហាថេរោ, វនវាសបទេសតោ;

អាគាសីតិ សហស្សានិ, អាទិយិត្វា យតី ឥធ.

៤៣. សូរិយគុត្តោមហាថេរោ, កេលាសម្ហា វិហារតោ;

ឆន្នវុតិ សហស្សានិ, ភិក្ខូអាទាយ អាគមា.

៤៤. ភិក្ខូនំ ទីបវាសិនំ, អាគតានញ្ច សព្ពសោ;

គណនាយ បរិច្ឆេទោ, បោរាណេហិ ន ភាសិតោ.

៤៥. សមាគតានំ សព្ពេសំ, ភិក្ខុនំ តំ សមាគមេ;

វុត្តា ខីណាសវាយេវ, តេ ឆន្នវុតិកោដិយោ.

៤៦. តេ មហាចេតិយឋានំ, បរិវារេត្វា យថារហំ;

មជ្ឈេ ឋបេត្វា ឱកាសំ, រញ្ញោ អដ្ឋំសុ ភិក្ខវោ.

៤៧. បវិសិត្វា តហិំ រាជា, ភិក្ខុសង្ឃំ តថា ឋិតំ;

ទិស្វា បសន្នចិត្តេន, វន្ទិត្វា ហដ្ឋមានសោ.

៤៨. គន្ធមាលាហិ បូជេត្វា, កត្វាន តិបទក្ខិណំ;

មជ្ឈេ បុណ្ណឃដឋានំ, បវិសិត្វា សមង្គលំ.

៤៩. សុវណ្ណខីលេ បដិមុក្កំ, បរិព្ភមនទណ្ឌកំ;

រាជតេន កតំ សុទ្ធំ, សុទ្ធបីតិ ពលោទយោ.

៥០. គាហយិត្វា អមច្ចេន, មណ្ឌិតេន សុជាតិនា;

អភិមង្គលភូតេន, ភូតភូតិបរាយណោ.

៥១. មហន្តំ ចេតិយាវដ្ដំ, ការេតុំ កតនិច្ឆយោ;

ភមាបយិតុ មារទ្ធោ, បរិកម្មិត ភូមិយំ.

៥២. សិទ្ធត្ថោ នាម នាមេន, មហាថេរោ មហិទ្ធិកោ;

តថាករោន្តំ រាជានំ, ទីឃទស្សី និវារយិ.

៥៣. ‘‘ឯវំ មហន្តំ ថូបញ្ច, អយំ រាជា’រភិស្សតិ;

ថូបេ អនិដ្ឋិតេយេវ, មរណំ អស្ស ហេស្សតិ.

៥៤. ភវិស្សតិ មហន្តោ ច, ថូបោទុប្បដិសង្ខរោ;

ឥតិ សោ នាគតំ បស្សំ, មហន្តត្តំ និវារយិ.

៥៥. សង្ឃស្ស ច អនុញ្ញាយ, ថេរោ សម្ភាវនាយច;

មហន្តំ កត្តុកាមោ’បិ, គណ្ហិត្វា ថេរភាសិតំ.

៥៦. ថេរស្ស ឧបទេសេន, តស្ស រាជា អការយិ;

មជ្ឈិមំ ចេតិយាវដ្ដំ, បតិដ្ឋាបេតុមិដ្ឋិកា.

៥៧. សោវណ្ណរជតេ ចេវ, ឃដេ មជ្ឈេដ្ឋបាបយិ;

អដ្ឋដ្ឋ អដ្ឋិតុស្សាហោ, បរិវារិយ តេ បន.

៥៨. អដ្ឋុត្តរសហស្សញ្ច, ឋបាបេសិ នវេ ឃដេ;

អដ្ឋុត្តរេ អដ្ឋុត្តរេ, វត្ថានំ តុ សតេ បន.

៥៩. ឥដ្ឋិកាបវរា អដ្ឋ, ឋបាបេសិ វិសុំ វិសុំ;

សម្មតេន អមច្ចេន, ភូសិតេន អនេកធា.

៦០. តតោ ឯកំ គាហយិត្វា, នានាមង្គលសង្ខតេ;

បុរិត្ថិមទិសាភាគេ, បឋមំ មង្គលិត្ថិកំ.

៦១. បតិដ្ឋាបេសិ សក្កច្ចំ, មនុញ្ញេ គន្ធកទ្ទមេ;

ជាតិសុមន បុប្ផេសុ, បូជិតេសុ តហិំ បន.

៦២. អហោសិ បុថវីកម្បោ, សេសា សត្តាបិ សត្តហិ;

បត្តិដ្ឋាបេស’ មច្ចេហិ, មង្គលានិ ច ការយិ.

៦៣. ឯវំ អសាឡ្ហមាសស្ស, សុក្កបក្ខេ’ភិសម្មតេ;

ឧបោសថេ បន្នរសេ, បតិដ្ឋាបេសិ ឥដ្ឋិកា.

៦៤. ចតុទ្ទិសំ ឋិតេ តត្ថ, មហាថេរេ អនាសវេ;

វន្ទិត្វា បូជយិត្វា ច, សុប្បតិតោ កមេន សោ.

៦៥. បុព្ពុត្តរំ ទិសំ គន្ត្វា, បិយទស្សិំ អនាសវំ;

វន្ទិត្វាន មហាថេរំ, អដ្ឋាសិ តស្ស សន្តិកេ.

៦៦. មង្គលំ តត្ថ វឌ្ឍេន្តោ, តស្ស ធម្មមភាសិសោ;

ថេរស្ស ទេសនា តស្ស, ជនស្សា’ហោសិ សាត្ថិកា.

៦៧. ចត្តាលីសសហស្សានំ, ធម្មាភិសមយោ អហុ;

ចត្តាលីសសហស្សានំ, សោតាបត្តិផលំ អហុ.

៦៨. សហស្សំ សកទាគាមិ, អនាគាមិ ច តត្តកា;

សហស្សំយេវ អរហន្តោ, តត្ថ’ហេសុំ គិហីជនា.

៦៩. អដ្ឋារសសហស្សានិ, ភិក្ខូភិក្ខុនិយោ បន;

ចុទ្ទសេវ សហស្សានិ, អរហត្តេ បតិដ្ឋយុំ.

៧០. ឯវម្បបសន្នមតិមា រតនត្តយម្ហិ,

ចាគាមិមុត្តមនសាជនតាហិ តេន;

លោកត្ថសិទ្ធិ បរមា ភវតីតិ ញត្វា,

សទ្ធាទិនេកគុណយោគ រតិំ ករេយ្យាតិ.

សុជនប្បសាទសំ វេគត្ថាយ កតេ មហាវំសេ

ថូបារម្ភោ នាម

ឯកូនតិំសតិមោ បរិច្ឆេទោ.