សត្តវីសតិម បរិច្ឆេទ

លោហបាសាទមហោ

១. តតោ រាជា វិចិន្តេសិ, វិស្សុតំ សុស្សុតំ សុតំ;

មហាបញ្ញោ សទា បុញ្ញោ, បញ្ញាយ កតនិច្ឆយោ.

២. ‘‘ទីបប្បសាទកោ ថេរោ, រាជិនោ អយ្យកស្ស មេ;

ឯវំ កិរាហនត្តា តេ, ទុដ្ឋគាមណិភូបតិ.

៣. មហាបុញ្ញោ មហាថូបំ, សោណ្ណមាលិំ មនោរមំ;

វីសំហត្ថសតំ ឧច្ចំ, ការេស្សតិ អនាគតេ.

៤. បុនោ ឧបោសថាគារំ, នានារតនមណ្ឌិតំ;

នវភូមំ ករិត្វាន, លោហបាសាទ មេវ ច.

៥. ឥតិ ចិន្តិយ ភូមិន្ទោ, លិខិត្វេវំ ឋបាបិតំ;

បេក្ខាបេន្តោ រាជគេហេ, ឋិតំ ឯវ ករណ្ឌកេ.

៦. សោវណ្ណបដ្ដំ លទ្ធាន, លេខំ តត្ថ អវាចយិ;

‘‘ចត្តាលីសសតំ វស្សំ, អតិក្កម្ម អនាគតេ.

៧. កាកវណ្ណសុតោ ទុដ្ឋ-គាមណិមនុជាធិបោ;

ឥទញ្ចិទញ្ច ឯវញ្ច, ការេស្សតី’’តិ វាចិតំ.

៨. សុត្វា ហដ្ឋោ ឧទានេត្វា, អប្បោដ្ឋេសិ មហីបតិ;

តតោ បាតោ’វ គន្ត្វាន, មហាមេឃវនំ សុភំ.

៩. សន្និបាតំ ការយិត្វា, ភិក្ខុសង្ឃស្ស អព្រវិ;

‘‘វិមានតុល្យំ បាសាទំ, ការយិស្សាមិ វោ អហំ.

១០. ទិព្ពំ វិមានំ បេសេត្វា, តទា លេខំ អទាថ មេ’’;

ភិក្ខុសង្ឃោ វិសជ្ជេសិ, អដ្ឋ ខីណាសវេ តហិំ.

១១. កស្សបមុនិនោ កាលេ, អសោកោ នាម ព្រាហ្មណោ;

អដ្ឋ សលាកភត្តានិ, សង្ឃស្ស បរិណាមិយ.

១២. ភរណិំ នាម ទាសិំ សោ, ‘‘និច្ចំ ទេហី’’តិ អព្រវិ;

ទត្វា សា តានិ សក្កច្ចំ, យាវជីវំ តតោ ចុតា.

១៣. អាកាសដ្ឋវិមានម្ហិ, និព្ពត្តិរុចិរេ សុភេ;

អច្ឆរានំ សហស្សេន, សទា’សិ បរិវារិតា.

១៤. តស្សា រតនបាសាទោ, ទ្វាទសយោជនុគ្គតោ;

យោជនានំ បរិក្ខេបោ, ចត្តាលីសញ្ច អដ្ឋ ច.

១៥. កូដាគារសហស្សេន, មណ្ឌិតោ នវភូមិកោ;

សហស្សគព្ភសម្បន្នោ, រាជមានោ ចតុម្មុខោ.

១៦. សហស្សសង្ខសំវុត្តិ, សីហបញ្ជរ នេត្តវា;

សកិង្កណិកជាលាយ, សជ្ជិតោ វេទិកាយ ច.

១៧. អម្ពលដ្ឋិកបាសាទោ, តស្ស មជ្ឈេ ឋិតោ អហុ;

សន្តមតោ ទិស្សមានោ, បគ្គហិតធជាកុលោ.

១៨. តាវតិំសញ្ច គច្ឆន្តា, ទិស្វា ថេរំ តមេវ តេ;

ហិង្គុលេន តទា លេខំ, លេខយិត្វា បដេ តតោ.

១៩. និវត្តិត្វាន អាគន្ត្វា, បដំ សង្ឃស្ស ទស្សយុំ;

សង្ឃោ បដំ គហេត្វា តំ, បាហេសិ រាជសន្តិកំ.

២០. តំ ទិស្វា សុមនោ រាជា, អាគម្មារាម មុត្តមំ;

អាលេខតុល្យំ ការេសិ, លោហបាសាទ មុត្តមំ.

២១. កម្មារម្ភនកាលេវ, ចតុទ្វារម្ហិ ភោគវា;

អដ្ឋសតសហស្សានិ, ហិរញ្ញានិ ឋបាបយិ.

២២. បុដសហស្ស វត្ថានិ, ទ្វារេ ទ្វារេ ឋបាបយិ;

គុឡ តេលសក្ខរមធុ-បុរា ចានេក ចាដិយោ.

២៣. ‘‘អមូលកកម្ម មេត្ថ, ន កាតព្ព’’ន្តិ ភាសិយ;

អគ្ឃាបេត្វា កតំ កម្មំ, តេសំ មូលមទាបយិ.

២៤. ហត្ថសតំ ហត្ថសតំ, អាសិ ឯកេក បស្សតោ;

ឧច្ចតោ តត្តកោយេវ, បាសាទោ ហិ ចតុម្មុខោ.

២៥. តស្មិំ បាសាទ សេដ្ឋស្មិំ, អហេសុំ នវភូមិយោ;

ឯកេកិស្សា ភូមិយា ច, កូដាគារសតានិ ច.

២៦. កូដាគារានិ សព្ពានិ, សជ្ឈុនា ខចិតា ន’យុំ;

បវាលវេទិកា តេសំ, នានារតន ភូសិតា.

២៧. នានារតន ចិត្តានិ, តាសំ បទុមកានិ ច;

សជ្ឈកិំកិណិកាបន្តិ-បរិក្ខិត្តាវ តា អហុ.

២៨. សហស្សំ តត្ថ បាសាទោ, គព្ភា អាសុំ សុសង្ខតា;

នានារតន ខចិតា, សីហបញ្ជរនេត្តវា.

២៩. នារិវាហនយានន្តុ, សុត្វា វេស្សវណស្ស សោ;

តទា ការមការេសិ, មជ្ឈេ រតនមណ្ឌបំ.

៣០. សីហព្យគ្ឃាទិរូបេហិ, ទេវតា រូបកេហិ ច;

អហុ រតនមយោហេ’ស, ថម្ភេហិ ច វិភូសិតោ.

៣១. មុត្តាជាលបរិក្ខេបោ, មណ្ឌបន្តេ សមន្តតោ;

បវាលវេទិកា ចេត្ថ, បុព្ពេ វុត្តវិធា អហុ.

៣២. សត្តរតន ចិត្តស្ស, វេមជ្ឈេ មណ្ឌបស្ស តុ;

រុចិរោ ទន្តបល្លង្កោ, រម្មោ ផលិកសន្ថរោ.

៣៣. ទន្តមយាបស្សយេ’ត្ថ, សុវណ្ណមយ សូរិយោ;

សជ្ឈុមយេ ចន្ទិមា ច, តារា ច មុត្តកា មយា.

៣៤. នានារតន បទុមានិ, តត្ថ តត្ថ យថារហំ;

ជាតកានិ ច តត្ថេវ, អាសុំ សោណ្ណលតន្តរេ.

៣៥. មហគ្ឃបច្ចត្ថរណេ, បល្លង្កេ’តិ មនោរមេ;

មនោហរា’សិដ្ឋបិតា, រុចិរំ ទន្តពីជនី.

៣៦. បវាលបាទុកា តត្ថ, ផលិកម្ហិ បតិដ្ឋិតា;

សេតច្ឆត្តំ សជ្ឈុទណ្ឌំ, បល្លង្កោ’បរិសោភថ.

៣៧. សត្តរតន មយានេត្ថ, អដ្ឋមង្គលិកានិ ច;

ចតុប្បទានំ បន្តី ច, មណិមុត្តន្តរា អហុំ.

៣៨. រជតានញ្ច ឃណ្ដានំ, បន្តី ភត្តន្តលម្ពិតា;

បាសាទឆត្តបល្លង្ក-មណ្ឌបា’សុំ អនគ្ឃិកា.

៣៩. មហគ្ឃ បញ្ញបាបេសិ, មញ្ចបីឋំ យថារហំ;

តថេវ ភូមត្ថរណំ, កម្ពលញ្ច មហារហំ.

៤០. អាចាម កុម្ភិសោវណ្ណា, ឧលុង្កោ ច អហុ តហិំ;

បាសាទ បរិភោគេសុ, សេសេសុ ច កថា’ វកា.

៤១. ចារុបាការ បរិវារោ,

សោ ចតុទ្វារកោដ្ឋកោ;

បាសាទោ’លង្កតោ សោភិ,

តាវតិំស សភា វិយ.

៤២. តម្ព លោហិដ្ឋកាហេ’សោ,

បាសាទោ ឆាទិតោ អហុ;

លោហ បាសាទ វោហារោ,

តេន តស្ស អជាយថ.

៤៣. នដ្ឋិតេ លោហបាសាទេ, សោ សង្ឃំ សន្និបាតយិ;

រាជា សង្ឃោ សន្និបតិ, មរិចវដ្ដិមហេ វិយ.

៤៤. បុថុជ្ជនា’វ អដ្ឋំសុ, ភិក្ខូ បឋមភូមិយំ;

តេបិដកា ទុតិយាយ, សោតាបន្នាទយោ បន.

៤៥. ឯកេ កេយេវ អដ្ឋំសុ, តតិយាទីសុ ភូមិសុ;

អរហន្តោ ច អដ្ឋំសុ, ឧទ្ធំ ចតូសុ ភូមិសុ.

៤៦. សង្ឃស្ស ទត្វា បាសាទំ, ទក្ខិណម្ពុបុរស្សរំ;

រាជា’ទត្ថ មហាទានំ, សត្តាហំ បុព្ពកំ បិយ.

៤៧. បាសាទ មហចត្តានិ, មហាចាគេន រាជិនា;

អនគ្ឃានិ ឋបេត្វាន, អហេសុំ តិំសកោដិយោ.

៤៨. និស្សារេ ធននិចយេ វិសេសសារំ,

យេ ទានំ បរិគណយន្តិ សាធុបញ្ញា;

តេ ទានំ វិបុលមបេត ចិត្តសង្គា,

សត្តានំ ហិតបរមា ទទន្តិ ឯវំតិ.

សុជនប្បសាទសំវេគត្ថាយ កតេ មហាវំសេ

លោកហបាសាទមហោ នាម

សត្តវីសតិមោ បរិច្ឆេទោ.