ចតុវីសតិម បរិច្ឆេទ

ទ្វេភាតិកយុទ្ធំ

១. ហត្ថស្ស ថរុកម្មស្ស, កុសលោ កតុបាសនោ;

សោ គាមណិរាជសុតោ, មហាគាមេ វសី តទា.

២. រាជា រាជសុតំ តិស្សំ, ទីឃវាបិម្ហិ វាសយិ;

អារក្ខិតុំ ជនបទំ, សម្បន្ន ពលវាហនំ.

៣. កុមារោ គាមណិកាលេ, សម្បស្សន្តោ ពលំ សកំ;

‘‘យុជ្ឈិស្សំ ទមិឡេហី’’តិ, បិតុរញ្ញោ កថាបយី.

៤. រាជា តំ អនុរក្ខន្តោ, ‘‘ឱរគង្គំ អលំ’’ ឥតិ;

វារេសិ យាវតតិយំ, សោ តថេវ កថាបយី.

៥. បិតា មេ បុរិសោ ហោន្តោ, នេ’វំ វក្ខតិ តេនិ’ទំ;

បិលន្ធតូតិ បេសេសិ, ឥត្ថាលង្ការមស្ស សោ.

៦. រាជា’ហ តស្ស កុជ្ឈិត្វា, ‘‘ករោថ ហេមសង្ខលិំ;

តាយ តំ ពន្ធយិស្សាមិ, នា’ញ្ញថា រក្ខិយោ ហិ សោ.

៧. បលាយិត្វាន មលយំ, កុជ្ឈិត្វា បិតុនោ អគា;

ទុដ្ឋត្តាយេវ បិតរិ, អាហុ តំ ទុដ្ឋគាមណិ.

៨. រាជា’ថ អារភី កាតុំ, មហាមង្គលចេតិយំ;

និដ្ឋិតេ ចេតិយេ សង្ឃំ, សន្និបាតយិ ភូបតិ.

៩. ទ្វាទសា’សុំ សហស្សានិ, ភិក្ខូ ចិត្តលបព្ពតា;

តតោ តតោ ទ្វាទសេវ, សហស្សានិ សមាគមុំ.

១០. កត្វាន ចេតិយមហំ, រាជា សង្ឃស្ស សម្មុខា;

សព្ពេ យោធេ សមានេត្វា, ការេសិ សបថំ តទា.

១១. ‘‘បុត្តានំ កលហដ្ឋានំ, ន គច្ឆិស្សាម នោ’’ឥតិ;

អកំសុ សបថំ សព្ពេ, តំ យុទ្ធំ តេន នាគមុំ.

១២. ចតុសដ្ឋិ វិហារេ សោ, ការាបេត្វា មហីបតិ;

តត្តកានេវ វស្សានិ, ឋត្វា មរិតហិំ តទា.

១៣. រញ្ញោ សរីរំ គាហេត្វា, ឆន្នយានេន រាជិនិ;

នេត្វា តិស្ស មហារាមំ, តំ សង្ឃស្ស និវេទយិ.

១៤. សុត្វា តិស្សកុមារោ តំ, អាគន្ត្វា ទីឃវាបិតោ;

សរីរកិច្ចំ ការេត្វា, សក្កច្ចំ បិតុនោ សយំ.

១៥. មាតរំ កណ្ឌុលំ ហត្ថិំ, អាទិយិត្វា មហព្ពលោ;

ភាតុភយា ទីឃវាបិំ, អគមាសិ លហុំ តតោ.

១៦. តំ បវត្តិំ និវេទេតុំ, ទុដ្ឋគាមណិ សន្តិកំ;

លេខំ ទត្វា វិសជ្ជេសុំ, សច្ចេមច្ចា សមាគតា.

១៧. សោ គុត្តហាលមាគន្ត្វា, តត្ថ ចារេ វិសជ្ជិយ;

មហាគាមមុបគន្ត្វា, សយំ រជ្ជេ’ភិសេចយិ.

១៨. មាតត្ថំ កណ្ឌូលត្ថញ្ច, ភាតុលេខំ វិសជ្ជយិ;

អលទ្ធា យាវតតិយំ, យុទ្ធាយ សមុបាគមិ.

១៩. អហុ ទ្វិន្នំ មហាយុទ្ធំ, ចូឡង្គណិយបិដ្ឋិយំ;

តត្ថ នេកសហស្សានិ, បតិំសុ រាជិនោ នរា.

២០. រាជា ច តិស្សាមច្ចោ ច, វឡវាទីឃុតុនិកា;

តយោយេវ បលាយិំសុ, កុមារោ អនុពន្ធិតេ.

២១. ឧភិន្នមន្តរេ ភិក្ខូ, មន្តយិំសុ មហីធរំ;

តំ ទិស្វា ‘‘ភិក្ខុសង្ឃស្ស, កម្មំ’’ ឥតិ និវត្តិ សោ.

២២. កប្បកន្ទរនជ្ជាសោ, ជវមាលិតិត្ថមាគតោ;

រាជា’ហ តិស្សមច្ចំ តំ, ‘‘ឆាតជ្ឈត្តា មយំ’’ឥតិ.

២៣. សុវណ្ណសរកេ ខិត្ត-ភត្តំ នីហរិតស្ស សោ;

សង្ឃេ ទត្វា ភុញ្ជនតោ, ការេត្វា ចតុភាគកំ.

២៤. ‘‘ឃោសេហិ កាល’’មិច្ចា’ហ,

តិស្សោ កាលមឃោសយិ;

សុណិត្វា ទិព្ពសោតេន,

រញ្ញោ សក្ខាយ ទាយកោ.

២៥. ថេរោ បិយង្គុ ទីបដ្ឋោ, ថេរំ តត្ថ និយោជយិ;

តិស្សំ កុដុម្ពិកសុតំ, សោ តត្ថ នភសា’គមា.

២៦. តស្ស តិស្សោ ករាបត្ត-អាទាយា’ទាសិ រាជិនោ;

សង្ឃស្ស ភាគំ សម្ភាគំ, រាជា បត្តេ ខិបាបយិ.

២៧. សម្ភាគំ ខិបិ តិស្សោ ច, សម្ភាគំ វឡវាបិ ច;

ន ឥច្ឆិតស្សាភាគញ្ច, តិស្សោ បត្តម្ហិ បក្ខិបិ.

២៨. ភត្តស្ស បុណ្ណបត្តំ តំ, អទាថេរស្ស ភូបតិ;

អទា គោតមថេរស្ស, សោ គន្ត្វា នភសា លហុំ.

២៩. ភិក្ខូនំ ភុញ្ជមានានំ, ទត្វា អាលោបភាគសោ;

បញ្ចសតានំ សោ ថេរោ, លទ្ធេហិ តុ តទន្តិកា.

៣០. ភាគេហិ បត្តំ បូរេត្វា, អាកាសេ ខិបិ រាជិនោ;

ទិស្វា’ គតំ គហេត្វា តំ, តិស្សោ ភោជិសិ ភូបតិំ.

៣១. ភុញ្ជិត្វាន សយញ្ជាបិ, វឡវញ្ច អភោជយិ;

សត្តាហំ ចុម្ពដំ កត្វា, រាជា បត្តំ វិសជ្ជយិ.

៣២. គន្ត្វាន សោ មហាគាមំ, សមាទាយ ពលំ បុន;

សដ្ឋិសហស្សំ យុទ្ធាយ, គន្ត្វា យុជ្ឈិ សភាតរា.

៣៣. រាជា វឡវមារុយ្ហ, តិស្សោ កណ្ឌូល ហត្ថិនំ;

ទ្វេ ភាតរោ សមាគញ្ឆុំ, យុជ្ឈមានា រណេ តទា.

៣៤. រាជា ករិំ ករិត្វ’ន្តោ, វឡវាមណ្ឌលំ អកា;

តថាបិ ឆិទ្ទំ នោ ទិស្វា, លង្ឃា បេតុំ មតិំអកា.

៣៥. វឡវំ លង្ឃយិត្វាន, ហត្ថិនំ ភាតិកោ’បរិ;

តោមរំ ខិបិ ចម្មំវ, យថា ឆិជ្ជតិ បិដ្ឋិយំ.

៣៦. អនេកានិ សហស្សានិ, កុមារស្ស នរាតហិំ;

បតិំសុ យុទ្ធេ យុជ្ឈន្តា, ភិជ្ជ ចេវ មហព្ពលំ.

៣៧. ‘‘អារោហកស្ស វេកល្លា, ឥត្ថី មំ លង្ឃយី’’ឥតិ;

កុទ្ធោករី តំ ចាលេន្តោ, រុក្ខមេក មុបាគមិ.

៣៨. កុមារោ អារុហី រុក្ខំ, ហត្ថី សាមិមុបាគមិ;

តមារុយ្ហ បលាយន្តំ, កុមារោ មនុពន្ធិ សោ.

៣៩. បវិសិត្វា វិហារំ សោ, មហាថេរ ឃរំគតោ;

និបជ្ជហេដ្ឋា មញ្ចស្ស, កុមារោ ភាតុនោភយា.

៤០. បសារយិ មហាថេរោ, ចីវរំ តត្ថ មញ្ចកេ;

រាជា អនុបទំ គន្ត្វា, ‘‘កុហិំ តិស្សោ’’តិ បុច្ឆថ.

៤១. ‘‘មញ្ចេ តត្ថ មហារាជ’’, ឥតិ ថេរោ អវោច តំ;

ហេដ្ឋា មញ្ចេតិ ជានិត្វា, តតោ និក្ខម្ម ភូបតិ.

៤២. សមន្តតោ វិហារស្ស, រក្ខំ ការយិ តំ បន;

បញ្ចកម្ហិ និបជ្ជេត្វា, ទត្វា ឧបរិ ចីវរំ.

៤៣. មញ្ចបាទេសុ គណ្ហិត្វា, ចត្តារោ ទហរា យតី;

មតភិក្ខុនិយាមេន, កុមារំ ពហិ នីហរុំ.

៤៤. នីយមានន្តុ តំ ញត្វា, ឥធ មាហ មហីបតិ;

‘‘តិស្ស ត្វំ កុលទេវតានំ, សីសេ ហុត្វាន និយ្យាសិ.

៤៥. ពលក្ការេន គហណំ, កុលទេវេហិ នត្ថិ មេ;

គុណំ ត្វំ កុលទេវានំ, សរេយ្យាសិ កទាចិបិ’’.

៤៦. តតោយេវ មហាគាមំ, អគមាសិ មហីបតិ;

អាណាបេសិ ច តត្ថេវ, មាតរំ មាតុគារវោ.

៤៧. [វស្សានិ អដ្ឋសដ្ឋិំសោ, អដ្ឋា ធម្មដ្ឋមានសោ;

អដ្ឋសដ្ឋិវិហារេ ច, ការាបេសិ មហីបតិ.]

៤៨. និក្ខាមិតោ សោ ភិក្ខូហិ, តិស្សោរាជ សុតោ បន;

ទីឃវាបិំ តតោយេវ, អគម’ញ្ញតរោ វិយ.

៤៩. កុមារោ គោធគត្តស្ស, តិស្សថេរស្ស អាហ សោ;

‘‘សាបរាធោ អហំ ភន្តេ, ខមាបេស្សាមិ ភាតរំ.

៥០. វេយ្យាវច្ចករា ការំ, តិស្សំ បញ្ចសតានិ ច;

ភិក្ខុនមាទិយិត្វា សោ, ថេរោ រាជ មុបាគមិ.

៥១. រាជបុត្តំ ឋបេត្វាន, ថេរោ សោបាន មត្ថកេ;

សសង្ឃោ បាវិសិ សទ្ធោ, និសីទាវិយ ភូមិបោ.

៥២. ឧបានយី យាគុអាទិំ, ថេរោ បត្តំ វិធេសិសោ;

‘‘កិន្តិ វុត្តោ’ព្រវិ តិស្សំ, អាទាយ អគតា’’ឥតិ.

៥៣. ‘‘កុហិំ ចោរោ’’តិ វុត្តោ ច, ឋិតឋានំ និវេទយិ;

វិហារទេវី គន្ត្វាន, ឆាទិយឋាសិ បុត្តក.

៥៤. រាជា’ហ ថេរំ ‘‘ញាតោ វោ,

ទាសភាវោ ឥទានិ នោ;

សាមណេរំ បេសយេថ,

តុម្ហេ មេ សត្តវស្សិកំ.

៥៥. ជនក្ខយំ វិនាយេវ, កលហោ ន ភវេយ្យ នោ;

រាជា សង្ឃស្ស ទោសេសោ, ភំឃេ ទណ្ឌំ ករិស្សតិ.

៥៦. ហេស្សតា’គតកិច្ចា វោ,

យាគាទិំ គណ្ហាថាតិ សោ;

ទត្វា តំ ភិក្ខុសង្ឃស្ស,

បក្កោសិត្វាន ភាតរំ.

៥៧. តត្ថេវ សង្ឃមជ្ឈម្ហិ, និសិន្នោ ភាតរា សហ;

ភុញ្ជិត្វា ឯកតោយេវ, ភិក្ខុ សង្ឃំ វិសជ្ជយិ.

៥៨. សស្សកម្មានិ ការេតុំ, តិស្សំ តត្ថេវ បាហិណិ;

សយម្បិ ភេរិំ ចារេត្វា, សស្សកម្មានិ ការយិ.

៥៩. ឥតិ វេរមនេកវិកប្បចិតំ,

សមយន្តិ ពហុំ អបិ សប្បុរិសំ;

ឥតិ ចិន្តិយ កោហិ នរោ មតិមា,

ន ភវេយ្យ បរេសុ សុសន្ត មនោតិ.

សុជនប្បសាទសំវេគត្ថាយ កតេ មហាវំសេ

ទ្វេភាតិកយុទ្ធំ នាម

ចតុវីសតិមោ បរិច្ឆេទោ.