ពាវីសតិម បរិច្ឆេទ

គាមណិកុមារ សុតិ

១. ឯឡារំ ឃាតយិត្វាន, រាជា’ហុ ទុដ្ឋគាមណិ;

តទត្ថ ទីបនត្ថាយ, អនុបុព្ពកថា អយំ.

២. ទេវានំ បិយតិស្សស្ស, រញ្ញោ ទុតិយភាតិកោ;

ឧបរាជា មហានាគោ, នាមានុ ភាតុនោ បិយោ.

៣. រញ្ញោ ទេវី សបុត្តស្ស, ពាលា រជ្ជាភិកាមិនិ;

ឧបរាជវធត្ថាយ, ជាតចិត្តា និរន្តរំ.

៤. វាបិំ តរច្ឆនាមំ សា, ការាបេន្តស្ស បាហិណិ;

អម្ពំ វិសេន យោជេត្វា, ឋបេត្វា អម្ពមត្ថកេ.

៥. តស្សា បុត្តោ សហគតោ, ឧបរាជេន ពាលកោ;

ភាជនេ វិវដេយេវ, តំ អម្ពំ ខាទិយា’មរិ.

៦. ឧបរាជា តតោយេវ, សទារ ពល វាហនោ;

រក្ខិហុំ សកមត្តានំ, រោហណា’ភិមុខោ អគា.

៧. យដ្ឋាលយ វិហារស្មិំ, មហេសី តស្ស គព្ភិនី;

បុត្តំ ជនេសិ សោ តស្ស, ភាតុ នាម មការយិ.

៨. តតោ គន្ត្វា រោហណំ សោ,

ឥស្សរោ រោហណេ’ខិលោ;

មហា ភាគោ មហា គាមេ,

រជ្ជំ ការេសិ ខត្តិយោ.

៩. ការេសិ សោ នាគមហា-វិហារំ សកនាមកំ;

ឧទ្ធកន្ទរកាទី ច, បិហារេ ការយី ពហូ.

១០. យដ្ឋាលយ កតិស្សោ សោ, តស្ស បុត្តោ តទច្ចយេ;

ហត្ថេវ រជ្ជំ ការេសិ, តស្ស បុត្តោ’ភយោ តថា.

១១. គោដ្ឋាភយសុតោ កាក-វណ្ណតិស្សោតិ វិស្សុហោ;

តទច្ចយេ តត្ថ រជ្ជំ, សោ អការេសិ ខត្តិយោ.

១២. វិហារទេវិ នាមា’សិ, មហេសី តស្ស រាជិនោ;

សទ្ធស្ស សទ្ធាសម្បន្នា, ធីតា កល្យាណិ រាជិនោ.

១៣. កល្យាណិយំ នរិន្ទោ ហិ, តិស្សោ នាមាសិ ខត្តិយោ;

ទេវិសញ្ញោគជនិត-កោ បោតស្ស កនិដ្ឋកោ.

១៤. ភីតោ តតោ បលាយិត្វា, អយ្យឧត្តិយ នាមកោ;

អញ្ញត្ថ វសិ សោ ទេសោ, តេន តំ នាមកោ អហុ.

១៥. ទត្វា រហស្សលេខំ សោ, ភិក្ខុវេសធរំ នរំ;

បាហេសិ ទេវិយា គន្ត្វា, រាជទ្វារេ ឋិតោ តុសោ.

១៦. រាជ គេហេ អរហតា, ភុញ្ជមានេន សព្ពទា;

អញ្ញាយមានោ ថេរេន, រញ្ញោ ឃរមុបាគមិ.

១៧. ថេរេន សទ្ធិំ ភុញ្ជិត្វា, រញ្ញោ សហ វិនិគ្គមេ;

បាតេសិ ភូមិយំ លេខំ, បេក្ខមានាយ ទេវិយា.

១៨. សទ្ទេន តេន រាជានំ, និវត្តិត្វា វិលោកយំ;

ញត្វាន លេខសន្ទេសំ, កុទ្ធោ ថេរស្ស ទុម្មតិ.

១៩. ថេរំ តំ បុរិសំ តញ្ច, មារាបេត្វាន កោធសា;

សមុទ្ទស្មិំ ខិបាបេសិ, កុជ្ឈិត្វា តេន ទេវតា.

២០. សមុទ្ទេនោ’ត្ថរា បេសុំ, តំ ទេសំ សោតុភូបតិ;

អត្តនោ ធីតរំ យុទ្ធំ, ទេវិំ នាម សុរុបិនិំ.

២១. លិខិត្វា រាជធីតាតិ, សោវណ្ណក្ខលិយា លហុំ;

និសីទាបិយ តត្ថេវ, សមុទ្ទស្មិំ វិស្សជ្ជយិ.

២២. ឱក្កន្តំ តំ តតោ លំកេ-កាកវណ្ណោ មហីបតិ;

អភិសេចយិ តេនា’សិ, វិហារោបបទវ្ហយា.

២៣. តិស្ស មហាវិហារញ្ច, តថា ចិត្តលបព្ពតំ;

គមិត្ថវាលិំ កុដាលិំ, វិហារេ ឯវមាទិកេ.

២៤. ការេត្វា សុបសន្នេន, មនសារតនត្តយេ;

ឧបដ្ឋហិ តទា សង្ឃំ, បច្ចយេហិ ចតូហិ សោ.

២៥. កោដិបព្ពត នាមម្ហិ, វិហារេ សីលវត្តិមា;

តទា អហុ សាមណេរោ, នានាបុញ្ញករោ សទា.

២៦. សុខេនារោហណត្ថាយ, អកាស ចេតិយង្គណេ;

ឋបេសិ តីណិ បាសាណេ, បាសាណ ផលកានិ សោ.

២៧. អទា បានីយ ទានញ្ច, វត្តំ សង្ឃស្ស ចា’ករិ;

សទា កិលន្តកាយស្ស, តស្សា’ពោធោ មហា អហុ.

២៨. សិវិកាយ កមានេត្វា, ភិក្ខវោ កតវេទិនោ;

សិលាបស្សយ បរិវេណេ, តិស្សារាមេ ឧបដ្ឋហុំ.

២៩. សទា វិហារទេវីសា, រាជគេហេ សុសង្ខតេ;

បុរេភត្តំ មហាទានំ, ទត្វា សង្ឃស្ស សញ្ញតា.

៣០. បច្ឆាភត្តំ គន្ធមាលំ, ភេសជ្ជវសនានិ ច;

គាហយិត្វា គតា’រាមំ, សក្ករោតិ យថារហំ.

៣១. តទា តថេវ កត្វា សា, សង្ឃត្ថេរស្ស សន្តិកេ;

និសីទិ ធម្មំ ទេសេន្តោ, ថេរោ តំ ឥធ មព្រវិ.

៣២. ‘‘មហាសម្បត្តិ តុម្ហេហិ, លទ្ធា’យំ បុញ្ញកម្មុនា;

អប្បមាទោ’វ កាតព្ពោ, បុញ្ញកម្មេ ឥទានិបិ’’.

៣៣. ឯវំ វុត្តេ តុ សា អាហ, ‘‘កិំ សម្បត្តិ អយំ ឥធ;

យេសំ នោ ទារកា នត្ថិ, វញ្ឈាសម្បត្តិ តេន នោ’’.

៣៤. ឆឡភិញ្ញោ មហាថេរោ, បុត្តលាភមវេក្ខិយ;

‘‘គិលានំ សាមណេរំ តំ, បស្សទេវី’’តិ អព្រវិ.

៣៥. សា គន្ត្វា’សន្ន មរណំ, សាមណេរមវោច តំ;

‘‘បត្ថេហិ មម បុត្តត្តំ, សម្បត្តី មហតី ហិ នោ’’.

៣៦. ន ឥច្ឆតីតិ ញត្វាន, តទត្ថំ មហតិំ សុភំ;

បុប្ផបូជំ ការយិត្វា, បុន យាចិ សុមេធសា.

៣៧. ឯវម្ប’និច្ឆមានស្ស, អត្ថាយុ’បាយកោវិទា;

នានា ភេសជ្ជ វត្ថានិ, សង្ឃេ ទត្វា’ថ យាចិតំ.

៣៨. បត្ថេសិ សោ រាជកុលំ, សា តំ ឋានំ អនេកធា;

អលង្ករិត្វា វន្ទិត្វា, យានមារុយ្ហ បក្កមិ.

៣៩. តតោ ចុតោ សាមណេរោ, គច្ឆមានាយ ទេវិយា;

តស្សា កុច្ឆិម្ហិ និព្ពត្តិ, តំ ជានិយ និវត្តិសា.

៤០. រញ្ញោ តំ សាសនំ ទត្វា, រញ្ញា សហ បុនា’គមា;

សរីរកិច្ចំ ការេត្វា, សាមណេរស្សុ’ភោបិតេ.

៤១. តស្មិំយេវ បរិវេណេ, វសន្តា សន្តមានសា;

មហាទានំ បវត្តេសុំ, ភិក្ខុសង្ឃស្ស សព្ពទា.

៤២. តស្សេ’វំ ទោហឡោ អាហិ, មហា បុញ្ញាយ មាតុយា;

‘‘ឧសភមត្តំ មធុគណ្ឌំ, កត្វា ឧស្សីសកេ សយំ.

៤៣. វាមេតរេន បស្សេន, និបន្នាសយនេ សុភេ;

ទ្វាទសន្នំ សហស្សានំ, ភិក្ខូនំ ទិន្នសេសកំ.

៤៤. មធុំ ភុញ្ជិតុកាមា’សិ, អថ ឯឡារ រាជិនោ;

យោធាន មគ្គយោធស្ស, សីសច្ឆិន្នាសិទេវនំ.

៤៥. តស្សេវ សីសេ ឋត្វាន, បាតុញ្ចេវ អកាមយិ;

អនុរាធ បុរស្សេវ, ឧប្បលក្ខេត្តតោ បន.

៤៦. អានីតុប្បលមាលញ្ច, អមិលា តំ បិលន្ធិតុំ;

តំ ទេវី រាជិនោ អាហ, នេមិត្តេ បុច្ឆិ ភូបតិ.

៤៧. តំ សុត្វា អាហុ នេមិត្តា, ‘‘ទេវិបុត្តោ និឃាតិយ;

ទមិឡេ កត្វេ’ករជ្ជំ, សាសនំ ជោតយិស្សតិ’’.

៤៨. ឯទិសំ មធុគណ្ឌំ សោ, ទស្សេតិ តស្ស ឦទិសិំ;

សម្បត្តិំ ទេតិ រាជា’’តិ, ឃោសាបេសិ មហីបតិ.

៤៩. គោដ្ឋសមុទ្ទវេលន្តេ, មធុបុណ្ណំ និកុជ្ជិតំ;

នាវំ ញត្វាន អាចិក្ខិ, រញ្ញោ ជនបទេ នរោ.

៥០. រាជា ទេវិំ តហិំ នេត្វា, មណ្ឌបម្ហិ សុសង្ខតេ;

យថិច្ឆិថំ តាយ មធុំ, បរិភោគមការយិ.

៥១. ឥតរេ ទោហឡេ តស្សា, សម្បាទេតុំ មហីបតិ;

វេឡុសុមន នាមំ តំ, យោធំ តត្ថ និយោជយិ.

៥២. សោ’នុរាធបុរំ គន្ត្វា, រញ្ញោ មង្គលវាជិនោ;

គោបកេន អកា មេត្តិំ, តស្ស កិច្ចញ្ច សព្ពទា.

៥៣. តស្ស វិស្សត្ថ តំ ញត្វា, បាតោវ ឧប្បលាន’សិំ;

កទម្ពនទិយា តីរេ, ឋបេត្វាន អសង្កិតោ.

៥៤. អស្សំ នេត្វា តមារុយ្ហ, គណ្ហិត្វាន ឧប្បលាន’សិំ;

និវេទយិត្វាន អត្តានំ, អស្សវេគេន បក្កមិ.

៥៥. សុត្វា រាជា គហេតុំ តំ, មហា យោធានបេសយិ;

ទុតិយំ សម្មថំ អស្សំ, អារុយ្ហ សោនុធាបិតំ.

៥៦. សោ គុម្ពនិស្សិតោ អស្ស-បិដ្ឋេយេវ និសីទិយ;

ឯន្តស្ស បិដ្ឋិតោ តស្ស, ឧព្ពយ្ហា’សិំ បសារយិ.

៥៧. អស្សវេគេនយន្តស្ស, សីសំ ឆិជ្ជ ឧភោហយេ;

សីសញ្ចា’ទាយ សាយំ សោ, មហាគាមមុបាគមិ.

៥៨. ទោហឡេ តេ ច សា ទេវី, បរិភុញ្ជិ យថារុចិ;

រាជា យោធស្ស សក្ការំ, ការាបេសិ យថារហំ.

៥៩. សា ទេវី សមយេ ធញ្ញំ, ជនយី បុត្តមុត្តមំ;

មហារាជកុលេ តស្មិំ, អានន្ទោ ច មហា អហុ.

៦០. តស្ស បុញ្ញានុភាវេន, តទហេវ ឧបាគមុំ;

នានារតនសម្បុណ្ណា, សត្តនាវា តតោ តតោ.

៦១. តស្សេវ បុញ្ញតេជេន, ឆទ្ទន្តកុលតោ ករី;

ហត្ថិច្ឆាបំ អាហរិត្វា, ឋបេត្វា ឥធ បក្កមិ.

៦២. តំ តិត្ថសរតីរម្ហិ, ទិស្វា គុម្ពន្តរេ ឋិតំ;

កណ្ឌុលវ្ហោ ពាលិសិកោ, រញ្ញោ អាចិក្ខិ តាវទេ.

៦៣. បេសេត្វា’ចរិយេ រាជា, តមាណាបិយ បោសយិ;

កណ្ឌុលោ ឥតិ ញាយិត្ថ, ទិដ្ឋត្តា កណ្ឌុលេន សោ.

៦៤. ‘‘សុវណ្ណភាជនាទីនំ, បុណ្ណា នាវា ឥធាគតា’’;

ឥតិ រញ្ញោ និវេទសុំ, រាជា តានា’ហរាបយិ.

៦៥. បុត្តស្ស នាមករណេ, មង្គលម្ហិ មហីបតិ;

ទ្វាទស សហស្សសង្ខំ, ភិក្ខុសង្ឃំ និមន្តិយ.

៦៦. ឯវំ ចិន្តេសិ ‘‘យទិមេ, បុត្តោ លំកាតលេ’ខិលេ;

រជ្ជំ គហេត្វា សម្ពុទ្ធ-សាសនំ ជោតយិស្សតិ.

៦៧. អដ្ឋុត្តរសហស្សញ្ច, ភិក្ខវោ បវិសន្តុ ច;

សព្ពេ តេ ឧទ្ធបត្តញ្ច, ចីវរំ បារបន្តុ ច.

៦៨. បឋមំ ទក្ខិណំ បាទំ, ឧម្មារន្តោ ឋបេន្តុ ច;

ឯកច្ឆត្តយុតំ ធម្ម-ករណំ នីហរន្តុ ច.

៦៩. គោតមោ នាម ថេរោ ច, បតិគ្គណ្ហាតុ បុត្តកំ;

សោ ច សរណសិក្ខា យោ, ទេតុ’’ សព្ពំ តថា អហុ.

៧០. សព្ពំ និមិត្តំ ទិស្វាន, តុដ្ឋចិត្តោ មហីបតិ;

ទត្វា សង្ឃស្ស បាយាសំ, នាមំ បុត្តស្ស ការយិ.

៧១. មហាគាមេ នាយកត្តំ, បិតុនាមញ្ច ឯកតោ;

ឧភោ កត្វាន ឯកជ្ឈំ, គាមណិអភយោ ឥតិ.

៧២. មហាគាមំ បវិសិត្វា, នវមេ ទិវសេ តតោ;

សង្គមំ ទេវិយា កាសិ, តេន គព្ភមគណ្ហិ សា.

៧៣. កាលេ ជាតំ សុតំ រាជា, តិស្សនាមំ អការយិ;

មហតា បរិហារេន, ឧភតោ វឌ្ឍិំសុ ទារកា.