តិគុម្ពចេតិយ ថោមនា

នមោ តស្ស ភគវតោ អរហតោ សម្មាសម្ពុទ្ធស្ស

១. យោ ទីបង្ករមូលម្ហិ, បទំ ហត្តគតំ ចជិ;

សម្មាសម្ពោធិ មាកង្ខំ, វន្ទេ តស្ស សិរោរុហំ.

(បថ្យាវត្តគាថា).

២. បូរេត្វា ពោធិសម្ភារ-មហេសំ យោ អនុត្តរំ;

អលត្ថ ពុទ្ធត្តំ តស្ស, កេសធាតុវរំ នមេ.

(បថ្យាវត្តគាថា).

៣. លទ្ធា ពុទ្ធត្តំ ឆឋាន-មតិក្កម្ម បវេទយិ;

វិមុត្តិំ រាជាយតនេ, តស្ស កេសវរំ នមេ.

(រការ ភការវិបុលា បថ្យាវត្តគាថា).

៤. តត្ថ សក្កទត្តិយម្បិ, នាគលតំ ហរីតកំ;

អនោតត្តោទកំ ភុញ្ជិ, វន្ទេ តស្ស សិរោរុហំ.

(រការវិបុលា បថ្យាវត្តគាថា).

៥. តទា មុគ្គសេលបត្តំ, មហារាជូហិ ទិន្នកំ;

តថាគតោ បដិគ្គណ្ហិ, វន្ទាមិ តស្ស សីសជំ.

(រការវិបុលា បថ្យាវត្តគាថា).

៦. តទា ទ្វិន្នំ ទ្វេភាតិក-ជនេហិ មធុបិណ្ឌិកំ;

បរិភុញ្ជេសិ មន្ថម្បិ, តស្ស សីសសិរិំ នមេ.

(តការវិបុលា បថ្យាវត្តគាថា).

៧. យោ តបុស្សភល្លិកានំ, តទា ទ្វិសរណំ អទា;

លោកម្ហិ សព្ពបឋមំ, តស្ស សីរិវហំ នមេ.

(រការ នការ វិបុលាបថ្យាវត្តគាថា).

៨. តទា តត្ថុបដ្ឋកានំ, តេសំ កេសេ អទា អឋ;

លោកហិត មបេក្ខន្តោ, នាថោ យោ តស្ស តេ នមេ.

(រការវិបុលា បថ្យាវត្តគាថា).

៩. តេបិ តំ អាហារិត្វាន, បោក្ខរព្ពតិយំ ករុំ;

សជីវកេស ចេតិយំ, នមេតំ សព្ពបុព្ពកំ.

(មការវិបុលា បថ្យាវត្តគាថា).

១០. ឧបោសថុបោសថម្ហិ, មុញ្ចន្តំ នីលរស្មិយោ;

ភគវាវ លោកអត្ថំ, ករោន្តំ តំ សទា នមេ.

(រការវិបុលា បថ្យាវត្តគាថា).

១១. ចូឡាមណិទុស្សចេត្យំ, កាលម្ហិ ពោធិសត្តកេ;

ពុទ្ធកាលេ ឥទំ សព្ព-បឋមំ តំ នមាមហំ.

(រការវិបុលា បថ្យាវត្តគាថា).

១២. នមាមហំ វន្ទាមហំ, បូជេមហំ សិរោរុហំ;

បុញ្ញមិទំ ភវតុ មេ, បច្ចយោ អាសវក្ខយេ.

(តការ នការវិបុលា បថ្យាវត្តគាថា).

តិគុម្ពចេតិយថោមនា និដ្ឋិតា.