នមោ តស្ស ភគវតោ អរហតោ សម្មាសម្ពុទ្ធស្ស

ជិនាលង្ការ

បណាមទីបនីគាថា

១. យោ លោកត្ថាយ ពុទ្ធោ ធនសុតភរិយាអង្គជីវេ ចជិត្វា បូរេត្វា អារមិយោ តិទសមនុបមេ ពោធិបក្ខីយធម្មេ,

បត្វា ពោធិំ វិសុទ្ធំ សកលគុណទទំ សេដ្ឋភូតោ តិលោកេ,

កត្វា ទុក្ខស្ស អន្តំ កតសុភជនតំ ទុក្ខតោ មោចយិត្ថ.

២. នត្វានាហំ ជិនន្តំ សមុបចិតសុភំ សព្ពលោកេកពន្ធុំ,

នាហុ យេនបិ តុល្យោ កុសលមហិមតោ ឧត្តមោ ភូតលោកេ តស្សេវាយំ ឧវិម្ហំ សុវិបុលមមលំ ពោធិសម្ភារភូតំ,

ហេតុំ ហេត្វានុរូបំ សុគតគតផលំ ភាសតោ មេ សុណាថ.

យោគាវចរសម្បត្តិទីបនីគាថា

៣. ជាតោ យោ នវមេ ខណេ សុតធរោ សីលេន សុទ្ធិន្ទ្រិយោ សំសារំ អយតោ ភវក្កយករំ ទិស្វា សិវំ ខេមតោ,

តំ សម្បាបកមគ្គទេសកមុនិំ សម្បូជយន្តោ តតោ ឧទ្ធានុស្សតិភាវនាទិកមតោ សម្បាទយេ តំ សិវំ.

វត្ថុវិសោធនីគាថា

៤. ពុទ្ធោតិ កោ ពុទ្ធគុណោ តិ កោ សោ,

អចិន្តយាទិត្តមុបាគតោ យោ;

អនញ្ញសាធារណភូតមត្ថំ,

អកាសិ កិំ សោ កិមវោច ពុទ្ធោ.

៥. វិសុទ្ធខន្ធសន្តានោ ពុទ្ធោតិ និយមោ កតោ,

ខន្ធសន្តានសុទ្ធី តុ គុណោតិ និយមោ កតោ.

៦. អកាសិ កិច្ចានិ ទិនេសុ បញ្ច,

បសាទយញ្ចិទ្ធិពលេន សេន;

ជនានសេសំ ចរិយានុកូលំ,

ញត្វានវោចានុសយប្បហានំ.

អនញ្ញសាធារណទីបនីគាថា

៧. អព្ភុគ្គតា យស្ស គុណា អនន្តា,

តិពុទ្ធខេត្តេកទិវាករោតិ;

ជានាតិ សោ លោកមិមំ បរញ្ច,

សចេតនញ្ចេវ អចេតនញ្ច;

សកស្ស សន្តានគតំ បរេសំ,

ព្យតីតមប្បត្តកមត្រភូតំ.

៨. អនន្តសត្តេសុ ច លោកធាតុសុ,

ឯកោវ សព្ពេបិ សមា ន តេន;

ទិសាសុ បុព្ពាទិសុ ចក្កវាឡា,

សហស្សសង្ខាយបិ អប្បមេយ្យា;

យេ តេសុ ទេវា មនុជា ច ព្រហ្មា,

ឯកត្ថ សង្គម្ម ហិ មន្តយន្តា.

៩. អនាទិកាលាគតនាមរូបិនំ,

យថាសកំ ហេតុផលត្តវុត្តិនំ;

តព្ភាវភាវិត្តមសម្ភុណន្តា,

នានាវិបល្លាសមនុបវិដ្ឋា.

១០. កម្មប្បវត្តិញ្ច ផលប្បវត្តិំ,

ឯកត្តនានត្តនិរីហធម្មតំ;

វិញ្ញត្តិសន្តានឃនេន ឆន្នតោ,

សិវញ្ជសំ នោ ភណិតុំ សមត្ថា.

១១. ឯកោ វ សោ សន្តិករោ បភង្ករោ,

សង្ខាយ ញេយ្យានិ អសេសិតានិ;

តេសញ្ហិ មជ្ឈេ បរមាសម្ភីវទំ,

សិវញ្ជសំ ទីបយិតុំ សមត្ថោ.

១២. សោ គោតមោ សក្យសុតោ មុនិន្ទោ,

សព្ពស្ស លោកស្ស បទីបភូតោ;

អនន្តសត្តេ ភវពន្ធនម្ហា,

មោចេសិ ការុញ្ញផលានុបេក្ខី.

អភិនីហារទីបនីគាថា

១៣. វទេថ តស្សីធ អនប្បកំ គុណំ,

ន តេន តុល្យោ បរមោ ច វិជ្ជតិ;

កិំ តំ គុណំ តំ សទិសេន ទិន្នំ,

សយំកតំ កិន្នុ អធិច្ចលទ្ធំ.

១៤. នាធិច្ចលទ្ធំ ន ច បុព្ពពុទ្ធា,

ព្រហ្មាទិនំ សម្មុតិយា ពហូនំ;

សយំកតេនេវ អនោបមេន,

ទានាទិនា លទ្ធមិទំ វិបាកំ.

១៥. ឥតោ ចតុន្នំ អសង្ខិយានំ,

សតំសហស្សានធិកានមត្ថកេ;

កប្បេ អតីតម្ហិ សុមេធតាបសោ,

វេហាយសំ គច្ឆតិ ឥទ្ធិយា តទា.

១៦. ទិបង្ករោ នាម ជិនោ សសង្ឃោ,

រម្មំ បុរំ យាតិ វិរោចមានោ;

មនុស្សទេវេហិភិបូជិយន្តោ,

សហស្សរំសិ វិយ ភាណុមា នភេ.

១៧. តស្សញ្ជសំ កាតុពហុស្សហានំ,

ពុទ្ធោតិ សុត្វា សុមនោ បតីតោ;

មមជ្ជ ទេហំ បនិមស្ស ទត្វា,

ពុទ្ធោ អហំ ហេស្សមនាគតេទិសោ.

១៨. តស្មិញ្ជសេ កន្ទរតម្ហិ បង្កេ,

កត្វាន សេតុំ សយិ សោ សទេហំ;

ពុទ្ធោ អយំ គច្ឆតុ បិដ្ឋិយា មមំ,

ពោធិស្សចេ ហេស្សតិ មេ អនាគតេ.

១៩. ឧស្សីសកំ យាតិ ជិនោ ហិ តស្ស,

អជ្ឈាសយោ សិជ្ឈតិមស្សនាគតេ;

ញត្វាន ព្យាកាសិ អសេសតោ ហិ,

ពុទ្ធោ អយំ ហេស្សតិនាគតេសុ.

២០. សុត្វាន បត្តោ វ មហាភិសេកំ,

លទ្ធំ វ ពោធិំ សមនុស្សរន្តោ;

បូជេត្វា យាតេ មុនិទេវមានុសេ,

ឧដ្ឋាយ សោ សម្មសិ បារមី ទស.

២១. ទឡ្ហំ គហេត្វា សមតិំសបារមី,

សិក្ខត្តយញ្ចស្ស ជិនស្ស សន្តិកេ;

កាតុំ សមត្ថោ បិ ភវស្ស បារំ,

សត្តេសុ ការុញ្ញពលា ភវំ គតោ.

២២. ឧប្បន្នុប្បន្នកេ សោ ជិនវរមតុលេ បូជយិត្វា អសេសំ ពុទ្ធោ ឯសោ ហិ ឱសោ ភវតិ និយមតោ ព្យាកតោ តេហិ តេហិ តេសំ តេសំ ជិនានំ អចនមនុបមំ បូជយិត្វា សិរេន,

តំ តំ ទុក្ខំ សហិត្វា សកលគុណទទំ បារមី បូរយិត្ថ.

ពោធិសម្ភារទីបនីគាថា

២៣. សោ ទុក្ខខិន្នជនទស្សនទុក្ខខិន្នោ,

ការុញ្ញមេវ ជនតាយ អកាសិ និច្ចំ;

តេសំ ហិ មោចនមុបាយមិទន្តិ ញត្វា,

តាទីបរាធមបិ អត្តនិ រោបយី សោ.

២៤. ទានាទិនេកវរបារមិសាគរេសុ,

ឱគាឡ្ហតាយបិ បទុដ្ឋជនេន ទិន្នំ;

ទុក្ខំ តថា អតិមហន្តតរម្បិ កិញ្ចិ,

នាញ្ញាសិ សត្តហិតមេវេអ គវេសយន្តោ.

២៥. ឆេត្វាន សីសំ ហិ សកំ ទទន្តោ,

មំសំ បចិត្វាន សកំ ទទន្តោ;

សោ ចត្តគត្តោ បណិធានកាលេ,

ទុដ្ឋស្ស កិំ ទុស្សតិ ឆេទនេន.

២៦. ឯវំ អនន្តមបិ ជាតិសតេសុ ទុក្ខំ,

បត្វាន សត្តហិតមេវ គវេសយន្តោ;

ទីបង្ករេ គហិតសីលសមាធិបញ្ញំ,

បាលេសិ យាវ សកពោធិតលេ សុនិដ្ឋោ.

២៧. យទាភិនីហារមកា សុមេធោ,

យទា ច មទ្ទិំ អទទា សិវិន្ទោ;

ឯត្ថន្តរេ ជាតិសុ កិញ្ចិបេកំ,

និរត្ថកំ នោ អគមាសិ តស្ស.

២៨. មហាសមុទ្ទេ ជលពិន្ទុតោបិ,

តទន្ត្រេ ជាតិ អនប្បកា វ;

និរន្តរំ បូរិតបារមីនំ,

កថំ បមាណំ ឧបមា កុហិំ វា.

២៩. យោ មគ្គបស្សេ មធុរម្ពពីជំ,

ឆាយាផលត្ថាយ មហាជនានំ;

រោបេសិ តស្មិំ ហិ ខណេវ តេន,

ឆាយាផលេ បុញ្ញមលទ្ធមុទ្ធំ.

៣០. តថេវ សំសារបថេ ជនានំ,

ហិតាយ អត្តនមភិរោបិតក្ខណេ;

សិទ្ធំ វ បុញ្ញូបរិ តស្ស តស្មិំ,

ធនង្គជីវំ បិ ហរន្តិ យេ យេ.

៣១. សោ សាគរេ ជលធិកំ រុហិរំ អទាសិ,

ភូមាបរាជិយ សមំសមទាសិ ទានំ;

មេរុប្បមាណមធិកញ្ច សមោឡិសីសំ,

ខេ តារកាធិកតរំ នយនំ អទាសិ.

គព្ភោក្កន្តិទីបនីគាថា

៣២. គម្ភីរបានទានាទិសាគរេសុ ហិ ថាមសា;

តរន្តោ មទ្ទិទានេន និដ្ឋាបេត្វាន បារមី.

៣៣. វសន្តោ តុសីតេ កាយេ ពោធិបរិបាកមាគម្ម;

អាយាចនាយ ច ទេវានំ មាតុគព្ភមុបាគមិ.

៣៤. សតោ ច សម្បជានោ ច មាតុកុច្ឆិម្ហិ ឱក្កមិ;

តស្ស ឱក្កន្តិយំ សព្ពា ទសសហស្សី បកម្បិត្ថ.

៣៥. តតោ បុព្ពនិមិត្តានិ ទ្វត្តិំសានិ តទា សិយុំ;

តុដ្ឋហដ្ឋា វ សា មាតា បុត្តំ បស្សតិ កុច្ឆិយំ.

វិជាយនមង្គលទីបនីគាថា

៣៦. សា បុណ្ណគព្ភា ទសមាសតោ បរំ,

គន្ត្វាន ផុល្លំ វរលុម្ពិនីវនំ;

ឋិតា គហេត្វា វរសាលសាខំ,

វិជាយិ តំ បុត្តវរំ សុខេន.

៣៧. តទា សហស្សីទសលោកធាតុសុ,

ទេវា ច នាគា អសុរា ច យក្ខា;

នានាទិសា មង្គលចក្កវាឡំ,

សុមង្គលំ មង្គលមាគមិំសុ.

៣៨. អនេកសាខញ្ច សហស្សមណ្ឌលំ,

ឆត្តំ មរូ ធារយុមន្តលិក្ខេ;

សុវណ្ណទណ្ឌា វិបតន្តិ ចាមរា,

ខជ្ជិំសុ ភេរី ច នទិំសុ សង្ខា.