នមោ តស្ស ភគវតោ អរហតោ សម្មាសម្ពុទ្ធស្ស

ពុទ្ធគុណគាថាវលី

យថេវ បុប្ផរាសិម្ហា, គន្ថេយ្យ មាលា សោភនា;

ឯវំ ពុទ្ធគុណគាថា, វិរចិំ សហស្សាធិកា.

សោបិ ភគវា អរហំ, សម្មាសម្ពុទ្ធោ សយម្ភូ;

វិជ្ជាចរណសម្បន្នោ, ពុទ្ធំ តំ បណមាម្យហំ.១.

បុរិសទម្មសារថី, លោកវិទូ អនុត្តរោ;

សត្ថាទេវមនុស្សានំ, ពុទ្ធំ តំ បណមាម្យហំ.២.

សុគតោ សុគទោ សាមី, សុខទោ សន្តិបទាយកោ;

សព្ពលោកានុកម្បកោ, ពុទ្ធំ តំ បណមាម្យហំ.៣.

វរោ វរញ្ញូ វរទោ, វរុត្តមោ វរាហរោ;

វរធម្មំ អទេសយិ, ពុទ្ធំ តំ បណមាម្យហំ.៤.

មហាមង្គលមង្គល្យោ, មង្គលោ មង្គលាលយោ;

មង្គលាយតនោ នាថោ, ពុទ្ធំ តំ បណមាម្យហំ.៥.

មង្គលិន្ទោ មង្គលិកោ, មហាមង្គលនាយកោ;

មង្គលធម្មំ ទេសេសិ, ពុទ្ធំ តំ បណមាម្យហំ.៦.

មង្គលគ្គោ មង្គលញ្ញូ, មង្គលត្ថបទាយកោ;

មង្គលបន្ថទស្សាវី, ពុទ្ធំ តំ បណមាម្យហំ.៧.

មង្គលិច្ឆោ មង្គលិទ្ធោ, មង្គលមភិវទ្ធនោ;

មង្គលេហិ បរិបុណ្ណោ, ពុទ្ធំ តំ បណមាម្យហំ.៨.

មង្គលាភា ឧជ្ជោតេសិ, មង្គលត្ថបភាករោ;

មង្គលាលោកមណ្ឌិតោ, ពុទ្ធំ តំ បណមាម្យហំ.៩.

មង្គលត្ថមនុប្បត្តោ, មង្គលត្ថបរាយណោ;

សព្ពទា មង្គលករោ, ពុទ្ធំ តំ បណមាម្យហំ.១០.

មង្គលមគ្គមន្វេសិ, បត្តោ មង្គលមុត្តមំ;

មង្គលាយនំ ទស្សេតា, ពុទ្ធំ តំ បណមាម្យហំ.១១.

មង្គលមហិមាធារី, មង្គលការី នាយកោ;

សព្ពធិ មង្គលទាតា, ពុទ្ធំ តំ បណមាម្យហំ.១២.

មង្គលស្ស កោវិទោ ច, អមង្គលស្ស កោវិទោ;

បរមំ មង្គលំ លទ្ធោ, ពុទ្ធំ តំ បណមាម្យហំ.១៣.

សព្ពមង្គលសម្បន្នោ, មង្គលឃោសឃោសកោ;

មង្គលុត្តមំ ទេសេសិ, ពុទ្ធំ តំ បណមាម្យហំ.១៤.

មហាមង្គលត្ថំ មគ្គី, លទ្ធោ ធម្មសុមង្គលោ;

មង្គល’ទ្ធានំ ញាបេសិ, ពុទ្ធំ តំ បណមាម្យហំ.១៥.

អគារិកត្ថំ ញាបេសិ, មហាមង្គលមុត្តមំ;

គិហី សហាយកោ សាមី, ពុទ្ធំ តំ បណមាម្យហំ.១៦.

មហាមង្គល’លង្កិតោ, មហាមង្គលភូសនោ;

មហាមង្គលសេខរោ, ពុទ្ធំ តំ បណមាម្យហំ.១៧.

មហាមង្គលំសុមាលី, មង្គលាភោ សមុជ្ជលោ;

មង្គលំសុំ ឧជ្ជោតេសិ, ពុទ្ធំ តំ បណមាម្យហំ.១៨.

មហគ្ឃ មង្គលោទធិ, មហន្តមង្គលណ្ណវោ;

មហាមង្គលសាគរោ, ពុទ្ធំ តំ បណមាម្យហំ.១៩.

អមង្គលនិសាហន្តា, មង្គលភានុភស្សរោ;

មង្គលាលោកវិកិណ្ណោ, ពុទ្ធំ តំ បណមាម្យហំ.២០.

ពាហុសច្ចោ ពុជ្ឈនកោ, ធម្មចក្ខុឧប្បាទកោ;

តិភវមង្គលង្ការី, ពុទ្ធំ តំ បណមាម្យហំ.២១.

មហាវត្តា បវត្តា ច, អត្ថស្ស និន្នេតា បភូ;

អមតស្ស ទាតា វិញ្ញូ, ពុទ្ធំ តំ បណមាម្យហំ.២២.

ទិវា តបតិ អាទិច្ចោ, រត្តិំ ទិប្បតិ ចន្ទិមា;

រត្តិំទិវំ តបិ នាថោ, ពុទ្ធំ តំ បណមាម្យហំ.២៣.

សន្នទ្ធោ ខត្តិយោ តបតិ, ឈាយី តបតិ ព្រាហ្មណោ;

និរន្តរំ តបិ នាថោ, ពុទ្ធំ តំ បណមាម្យហំ.២៤.

ទុក្ខទោមនស្សនាសី, សោកបរិទេវក្ខយោ;

ជាតិមច្ចុជរាតិគោ, ពុទ្ធំ តំ បណមាម្យហំ.២៥.

យថាវាទី តថាការី, តថវាទី តថាគតោ;

យថាការី តថាវាទី, ពុទ្ធំ តំ បណមាម្យហំ.២៦.

ភគ្គរាគោ ភគ្គទោសោ, ភគ្គមោហោ សោ ភគវា;

ភគ្គមានោ ភគ្គមាយោ, ពុទ្ធំ តំ បណមាម្យហំ.២៧.

ភគ្គកាមោ ភគ្គកោធោ, ភគ្គកោបោ ភគ្គកុហោ;

ភគ្គកសាវោ ភគ្គិន្ធោ, ពុទ្ធំ តំ បណមាម្យហំ.២៨.

ភគ្គជាតិ ភគ្គមច្ចូ, ភគ្គលោកោ ភគ្គភវោ;

ភគ្គសំសារោ ភគ្គោឃោ, ពុទ្ធំ តំ បណមាម្យហំ.២៩.

ភោគភគ្គោ សោកភគ្គោ, រោគភគ្គោ ភគ្គរជោ;

សូលភគ្គោ សល្លភគ្គោ, ពុទ្ធំ តំ បណមាម្យហំ.៣០.

អាសាភគ្គោ ឥស្សាភគ្គោ, ឯជាភគ្គោ ភគ្គជដា;

ឆន្ទភគ្គោ ពន្ធភគ្គោ, ពុទ្ធំ តំ បណមាម្យហំ.៣១.

វីតរាគោ វីតទោសោ, វីតមោហោ វីតាសវោ;

វីតកាមោ វីតកោធោ, ពុទ្ធំ តំ បណមាម្យហំ.៣២.

វីតបាបោ វីតបុញ្ញោ, វីតភារោ វីតមលោ;

វីតវិការោ វីតិន្ធោ, ពុទ្ធំ តំ បណមាម្យហំ.៣៣.

វន្តរាគោ វន្តទោសោ, វន្តមោហោ វន្តមលោ;

វន្តកសាវោ វន្តីឃោ, ពុទ្ធំ តំ បណមាម្យហំ.៣៤.

វន្តរាគោ វន្តទោសោ, វន្តមោហោ វន្តមលោ;

វន្តកសាវោ វន្តីឃោ, ពុទ្ធំ តំ បណមាម្យហំ.៣៥.

សគ្គុរុ តិលោកគុរុ, សព្ពសត្តានមគ្គគុរូ;

នេតារេសុ មហានេតា, ពុទ្ធំ តំ បណមាម្យហំ.៣៦.

មហាគុរុ នរគុរុ, ទេវគុរុ គុរុត្តមោ!

ជេដ្ឋគុរុ សេដ្ឋគុរុ, ពុទ្ធំ តំ បណមាម្យហំ.៣៧.

វិស្សគុរុ លោកគុរុ, ធម្មគុរុ គុរូត្តមោ;

នត្ថិ ឯតាទិសោ គុរុ, ពុទ្ធំ តំ បណមាម្យហំ.៣៨.

មហាសត្ថា មហាសោត្ថិ, មហាមិត្តោ មហាសខា;

មហាកល្យាណមិត្តោ យោ, ពុទ្ធំ តំ បណមាម្យហំ.៣៩.

មហាបញ្ញោ មហាវិញ្ញូ, មហាវិទ្វា មហាវិទូ;

មហាមេធាវី សុមេធោ, ពុទ្ធំ តំ បណមាម្យហំ.៤០.

មហាសុទ្ធោ មហាភទ្ទោ, មហាទយោ មហាសយោ;

មហាទិព្ពោ មហាភព្ពោ, ពុទ្ធំ តំ បណមាម្យហំ.៤១.

មហាវីរោ មហាធីរោ, មហាសូរោ មហព្ពលោ;

មហាមារចមូ មទ្ទិ, ពុទ្ធំ តំ បណមាម្យហំ.៤២.

មហាជេដ្ឋោ មហាសេដ្ឋោ, មហគ្គោ មហានាយកោ;

មហាឆេកោ មហាទក្ខោ, ពុទ្ធំ តំ បណមាម្យហំ.៤៣.

មហាព្យត្តោ មហាញាតោ, មហាខ្យាតោ មហាយសី;

មហិទ្ធោ មហាវិខ្យាតោ, ពុទ្ធំ តំ បណមាម្យហំ.៤៤.

មហាតុដ្ឋោ មហាហដ្ឋោ, មហាជវោ មហាជយោ;

មហាសន្តុដ្ឋោ វិសិដ្ឋោ, ពុទ្ធំ តំ បណមាម្យហំ.៤៥.

មហានាថោ មហាសាមី, មហាបភូ មហាវិភូ;

មហិស្សរោ ពោធិស្សរោ, ពុទ្ធំ តំ បណមាម្យហំ.៤៦.

មហាវណ្ណោ មហាកន្តោ, មនោបិយោ មនាបិកោ;

មហាសោភនោ មនុញ្ញោ, ពុទ្ធំ តំ បណមាម្យហំ.៤៧.

មហាឈាយី មហាញាណី, មហាធីមា មហាសុធី;

មហាវិភាវី មេធាវី, ពុទ្ធំ តំ បណមាម្យហំ.៤៨.

មហាខន្តី ច តិតិក្ខោ, មហានិក្កង្ខោ ធម្មគូ;

មហាសំយតោ សំវុតោ, ពុទ្ធំ តំ បណមាម្យហំ.៤៩.

មហាថោមិតោ បូជិតោ, មហាមានិតោ វន្ទិតោ;

មហាភិវាទិតោ ភិយ្យោ, ពុទ្ធំ តំ បណមាម្យហំ.៥០.

មហតត្ថោ មហត្ថិកោ, មហន្តត្ថោ មហត្តរោ;

មហន្តោ មហត្តប្បត្តោ, ពុទ្ធំ តំ បណមាម្យហំ.៥១.

មហាលាភី មហាការី, មហាទាយី មហាធនី;

មហាវិជ្ជោ មហាបុជ្ជោ, ពុទ្ធំ តំ បណមាម្យហំ.៥២.

មហាពុទ្ធិ មហាពុធា, មហាបពោធិបុង្គវោ;

មហាភវណ្ណវំ តិណ្ណោ, ពុទ្ធំ តំ បណមាម្យហំ.៥៣.

មហានាគោ មហាភាគោ, មហាពាហោ មហិទ្ធិកោ;

មហាយោធោ មហគ្គតោ, ពុទ្ធំ តំ បណមាម្យហំ.៥៤.

មហាទន្តោ មហាសន្តោ, មហាគណី មហាគុណី;

មហាសន្តិបទាយកោ, ពុទ្ធំ តំ បណមាម្យហំ.៥៥.

មហាសីលោ មហាចិត្តោ, មហាពុធោ មហេសិនោ;

មហាមោហោទធិំ តិណ្ណោ, ពុទ្ធំ តំ បណមាម្យហំ.៥៦.

មហាតបស្សី ធម្មេសី, មហាយសស្សី នាយកោ;

មហាបតាបី តេជស្សី, ពុទ្ធំ តំ បណមាម្យហំ.៥៧.

មហាអាភោ មហាបភោ, មោហន្ធការភិន្ទកោ;

ញាណបទីបំ ទីបេសិ, ពុទ្ធំ តំ បណមាម្យហំ.៥៨.

មហាបស្សទ្ធិទាយកោ, មុនិរាជា មុនិស្សរោ;

សន្តិទទោ សុខទទោ, ពុទ្ធំ តំ បណមាម្យហំ.៥៩.

មហានីវរណា’តីតោ, មហាមោហសមូហតោ;

មហោឃតិណ្ណោ មោក្ខកោ, ពុទ្ធំ តំ បណមាម្យហំ.៦០.

មហាភវោបធិចត្តោ, លោភទោសវិនាសកោ;

មហារិបុំ និមទ្ទេសិ, ពុទ្ធំ តំ បណមាម្យហំ.៦១.

មហា’ភិញ្ញាពលប្បត្តោ, មហាមញ្ញិតនាសកោ;

មហាសទ្ធមំ និទ្ទិសិ, ពុទ្ធំ តំ បណមាម្យហំ.៦២.

អហោរត្តិំ សទាសុទ្ធោ, មហាលោកគ្គនាយកោ;

សមត្តវិស្សវិស្សុតោ, ពុទ្ធំ តំ បណមាម្យហំ.៦៣.

មហាអវិជ្ជាឧច្ឆិន្នោ, មហាអាសត្តិរិញ្ចកោ;

មហាជដា វិជដេសិ, ពុទ្ធំ តំ បណមាម្យហំ.៦៤.

មហាសូលវិវត្តកោ, មហាសល្លវិនោទនោ;

មហាសវំ ព្យន្តិករោ, ពុទ្ធំ តំ បណមាម្យហំ.៦៥.

មហាបរក្កមី សូរោ, សព្ពថា អបរាជយោ;

អច្ចន្តអភយោ វីរោ, ពុទ្ធំ តំ បណមាម្យហំ.៦៦.

មហាតណ្ហាវីតិវត្តោ, មហាសោកបនូទនោ;

មហាទុក្ខមតិក្កន្តោ, ពុទ្ធំ តំ បណមាម្យហំ.៦៧.

មហាមានមតិក្កមោ, មារសេននិម្មទ្ទនោ;

កម្មក្លេសំ និជ្ជរេសិ, ពុទ្ធំ តំ បណមាម្យហំ.៦៨.

មហាភវោទធិត្តិណ្ណោ, បាបណ្ណវបារង្គតោ;

មហាសំសរណាតិគោ, ពុទ្ធំ តំ បណមាម្យហំ.៦៩.

មហាសំយោជនាតីតោ, មហាវដ្ដវិនាសកោ;

មហាសំសារោឃតិណ្ណោ, ពុទ្ធំ តំ បណមាម្យហំ.៧០.

មហារាគវិរញ្ជកោ, មហាទោសនិម្មទ្ទកោ;

មហាសោតំ វិសោសេសិ, ពុទ្ធំ តំ បណមាម្យហំ.៧១.

មហាមេត្តាវិហារី យោ, មហាបុញ្ញោ មហារហោ;

មហាករុណាសាគរោ, ពុទ្ធំ តំ បណមាម្យហំ.៧២.

មហាភវសិន្ធុលង្ឃី, ភវមុត្តោ ភវន្តគូ;

សោកសូលសមុច្ឆិន្នោ, ពុទ្ធំ តំ បណមាម្យហំ.៧៣.