៣. បញ្ញាវិមុត្តសុត្តំ

៤៤. ‘‘‘បញ្ញាវិមុត្តោ បញ្ញាវិមុត្តោ’តិ, អាវុសោ, វុច្ចតិ. កិត្តាវតា នុ ខោ, អាវុសោ, បញ្ញាវិមុត្តោ វុត្តោ ភគវតា’’តិ?

‘‘ឥធាវុសោ, ភិក្ខុ វិវិច្ចេវ កាមេហិ…បេ… បឋមំ ឈានំ ឧបសម្បជ្ជ វិហរតិ, បញ្ញាយ ច នំ បជានាតិ. ឯត្តាវតាបិ ខោ, អាវុសោ, បញ្ញាវិមុត្តោ វុត្តោ ភគវតា បរិយាយេន…បេ….

‘‘បុន ចបរំ, អាវុសោ, ភិក្ខុ សព្ពសោ នេវសញ្ញានាសញ្ញាយតនំ សមតិក្កម្ម សញ្ញាវេទយិតនិរោធំ ឧបសម្បជ្ជ វិហរតិ, បញ្ញាយ ចស្ស ទិស្វា អាសវា បរិក្ខីណា ហោន្តិ, បញ្ញាយ ច នំ បជានាតិ. ឯត្តាវតាបិ ខោ, អាវុសោ, បញ្ញាវិមុត្តោ វុត្តោ ភគវតា និប្បរិយាយេនា’’តិ. តតិយំ.