១. បឋមទានសុត្តំ

៣១. [ទី. និ. ៣.៣៣៦] ‘‘អដ្ឋិមានិ, ភិក្ខវេ, ទានានិ. កតមានិ អដ្ឋ? អាសជ្ជ ទានំ ទេតិ, ភយា ទានំ ទេតិ, ‘អទាសិ មេ’តិ ទានំ ទេតិ, ‘ទស្សតិ មេ’តិ ទានំ ទេតិ, ‘សាហុ ទាន’ន្តិ ទានំ ទេតិ, ‘អហំ បចាមិ, ឥមេ ន បចន្តិ; នារហាមិ បចន្តោ អបចន្តានំ ទានំ អទាតុ’ន្តិ ទានំ ទេតិ, ‘ឥមំ មេ ទានំ ទទតោ កល្យាណោ កិត្តិសទ្ទោ អព្ភុគ្គច្ឆតី’តិ ទានំ ទេតិ, ចិត្តាលង្ការចិត្តបរិក្ខារត្ថំ ទានំ ទេតិ. ឥមានិ ខោ, ភិក្ខវេ, អដ្ឋ ទានានី’’តិ. បឋមំ.