៥. មលសុត្តំ

១៥. ‘‘អដ្ឋិមានិ, ភិក្ខវេ, មលានិ. កតមានិ អដ្ឋ? អសជ្ឈាយមលា, ភិក្ខវេ, មន្តា; អនុដ្ឋានមលា, ភិក្ខវេ, ឃរា; មលំ, ភិក្ខវេ, វណ្ណស្ស កោសជ្ជំ; បមាទោ, ភិក្ខវេ, រក្ខតោ មលំ; មលំ, ភិក្ខវេ, ឥត្ថិយា ទុច្ចរិតំ; មច្ឆេរំ, ភិក្ខវេ, ទទតោ មលំ; មលា, ភិក្ខវេ, បាបកា អកុសលា ធម្មា អស្មិំ លោកេ បរម្ហិ ច; តតោ [តតោ ច (ស្យា. បី.)], ភិក្ខវេ, មលា មលតរំ អវិជ្ជា បរមំ មលំ. ឥមានិ ខោ, ភិក្ខវេ, អដ្ឋ មលានី’’តិ.

‘‘អសជ្ឈាយមលា មន្តា, អនុដ្ឋានមលា ឃរា;

មលំ វណ្ណស្ស កោសជ្ជំ, បមាទោ រក្ខតោ មលំ.

‘‘មលិត្ថិយា ទុច្ចរិតំ, មច្ឆេរំ ទទតោ មលំ;

មលា វេ បាបកា ធម្មា, អស្មិំ លោកេ បរម្ហិ ច;

តតោ មលា មលតរំ, អវិជ្ជា បរមំ មល’’ន្តិ. បញ្ចមំ;