៥. បឋមវិនយធរសោភនសុត្តំ

៧៩. ‘‘សត្តហិ, ភិក្ខវេ, ធម្មេហិ សមន្នាគតោ [សមន្នាគតោ ភិក្ខុ (សី. ស្យា. ក.) អនន្តរសុត្តទ្វេយេ បន ឥទំ បាឋនានត្តំ នត្ថិ. បរិ. ៣២៧] វិនយធរោ សោភតិ. កតមេហិ សត្តហិ? អាបត្តិំ ជានាតិ, អនាបត្តិំ ជានាតិ, លហុកំ អាបត្តិំ ជានាតិ, គរុកំ អាបត្តិំ ជានាតិ, សីលវា ហោតិ…បេ… សមាទាយ សិក្ខតិ សិក្ខាបទេសុ, ចតុន្នំ ឈានានំ អាភិចេតសិកានំ និកាមលាភី ហោតិ អកិច្ឆលាភី អកសិរលាភី, អាសវានំ ខយា…បេ… សច្ឆិកត្វា ឧបសម្បជ្ជ វិហរតិ. ឥមេហិ ខោ, ភិក្ខវេ, សត្តហិ ធម្មេហិ សមន្នាគតោ វិនយធរោ សោភតី’’តិ. បញ្ចមំ.