១. កាយានុបស្សីសុត្តំ

១១៧. ‘‘ឆ, ភិក្ខវេ, ធម្មេ អប្បហាយ អភព្ពោ កាយេ កាយានុបស្សី វិហរិតុំ. កតមេ ឆ? កម្មារាមតំ, ភស្សារាមតំ, និទ្ទារាមតំ, សង្គណិការាមតំ, ឥន្ទ្រិយេសុ អគុត្តទ្វារតំ, ភោជនេ អមត្តញ្ញុតំ. ឥមេ ខោ, ភិក្ខវេ, ឆ ធម្មេ អប្បហាយ អភព្ពោ កាយេ កាយានុបស្សី វិហរិតុំ.

‘‘ឆ, ភិក្ខវេ, ធម្មេ បហាយ ភព្ពោ កាយេ កាយានុបស្សី វិហរិតុំ. កតមេ ឆ? កម្មារាមតំ, ភស្សារាមតំ, និទ្ទារាមតំ, សង្គណិការាមតំ, ឥន្ទ្រិយេសុ អគុត្តទ្វារតំ, ភោជនេ អមត្តញ្ញុតំ – ឥមេ ខោ, ភិក្ខវេ, ឆ ធម្មេ បហាយ ភព្ពោ កាយេ កាយានុបស្សី វិហរិតុ’’ន្តិ. បឋមំ.