៥. អប្បហាយសុត្តំ

៨៩. ‘‘ឆ, ភិក្ខវេ, ធម្មេ អប្បហាយ អភព្ពោ ទិដ្ឋិសម្បទំ សច្ឆិកាតុំ. កតមេ ឆ? សក្កាយទិដ្ឋិំ, វិចិកិច្ឆំ, សីលព្ពតបរាមាសំ, អបាយគមនីយំ រាគំ, អបាយគមនីយំ ទោសំ, អបាយគមនីយំ មោហំ. ឥមេ ខោ, ភិក្ខវេ, ឆ ធម្មេ អប្បហាយ អភព្ពោ ទិដ្ឋិសម្បទំ សច្ឆិកាតុំ.

‘‘ឆ, ភិក្ខវេ, ធម្មេ បហាយ ភព្ពោ ទិដ្ឋិសម្បទំ សច្ឆិកាតុំ. កតមេ ឆ? សក្កាយទិដ្ឋិំ, វិចិកិច្ឆំ, សីលព្ពតបរាមាសំ, អបាយគមនីយំ រាគំ, អបាយគមនីយំ ទោសំ, អបាយគមនីយំ មោហំ. ឥមេ ខោ, ភិក្ខវេ, ឆ ធម្មេ បហាយ ភព្ពោ ទិដ្ឋិសម្បទំ សច្ឆិកាតុ’’ន្តិ. បញ្ចមំ.