៦. មហន្តត្តសុត្តំ

៨០. ‘‘ឆហិ, ភិក្ខវេ, ធម្មេហិ សមន្នាគតោ ភិក្ខុ នចិរស្សេវ មហន្តត្តំ [មហត្តំ (ស្យា. កំ.)] វេបុល្លត្តំ បាបុណាតិ ធម្មេសុ. កតមេហិ ឆហិ? ឥធ, ភិក្ខវេ, ភិក្ខុ អាលោកពហុលោ ច ហោតិ យោគពហុលោ ច វេទពហុលោ ច អសន្តុដ្ឋិពហុលោ ច អនិក្ខិត្តធុរោ ច កុសលេសុ ធម្មេសុ ឧត្តរិ ច បតារេតិ [បករោតិ (ក.)]. ឥមេហិ ខោ, ភិក្ខវេ, ឆហិ ធម្មេហិ សមន្នាគតោ ភិក្ខុ នចិរស្សេវ មហន្តត្តំ វេបុល្លត្តំ បាបុណាតិ ធម្មេសូ’’តិ. ឆដ្ឋំ.