១. ទុក្ខសុត្តំ

៧៥. ‘‘ឆហិ, ភិក្ខវេ, ធម្មេហិ សមន្នាគតោ ភិក្ខុ ទិដ្ឋេវ ធម្មេ ទុក្ខំ វិហរតិ សវិឃាតំ សឧបាយាសំ សបរិឡាហំ, កាយស្ស ភេទា បរំ មរណា ទុគ្គតិ បាដិកង្ខា. កតមេហិ ឆហិ? កាមវិតក្កេន, ព្យាបាទវិតក្កេន, វិហិំសាវិតក្កេន, កាមសញ្ញាយ, ព្យាបាទសញ្ញាយ, វិហិំសាសញ្ញាយ – ឥមេហិ, ខោ, ភិក្ខវេ, ឆហិ ធម្មេហិ សមន្នាគតោ ភិក្ខុ ទិដ្ឋេវ ធម្មេ ទុក្ខំ វិហរតិ សវិឃាតំ សឧបាយាសំ សបរិឡាហំ, កាយស្ស ភេទា បរំ មរណា ទុគ្គតិ បាដិកង្ខា.

‘‘ឆហិ, ភិក្ខវេ, ធម្មេហិ សមន្នាគតោ ភិក្ខុ ទិដ្ឋេវ ធម្មេ សុខំ វិហរតិ អវិឃាតំ អនុបាយាសំ អបរិឡាហំ, កាយស្ស ភេទា បរំ មរណា សុគតិ បាដិកង្ខា. កតមេហិ ឆហិ? នេក្ខម្មវិតក្កេន, អព្យាបាទវិតក្កេន, អវិហិំសាវិតក្កេន, នេក្ខម្មសញ្ញាយ, អព្យាបាទសញ្ញាយ, អវិហិំសាសញ្ញាយ – ឥមេហិ, ខោ, ភិក្ខវេ, ឆហិ ធម្មេហិ សមន្នាគតោ ភិក្ខុ ទិដ្ឋេវ ធម្មេ សុខំ វិហរតិ អវិឃាតំ អនុបាយាសំ អបរិឡាហំ, កាយស្ស ភេទា បរំ មរណា សុគតិ បាដិកង្ខា’’តិ. បឋមំ.