២. អរហត្តសុត្តំ

៦៦. ‘‘ឆ, ភិក្ខវេ, ធម្មេ អប្បហាយ អភព្ពោ អរហត្តំ សច្ឆិកាតុំ. កតមេ ឆ? ថិនំ [ថីនំ (សី. ស្យា. កំ. បី.)], មិទ្ធំ, ឧទ្ធច្ចំ, កុក្កុច្ចំ, អស្សទ្ធិយំ, បមាទំ – ឥមេ ខោ, ភិក្ខវេ, ឆ ធម្មេ អប្បហាយ អភព្ពោ អរហត្តំ សច្ឆិកាតុំ.

‘‘ឆ, ភិក្ខវេ, ធម្មេ បហាយ ភព្ពោ អរហត្តំ សច្ឆិកាតុំ. កតមេ ឆ? ថិនំ, មិទ្ធំ, ឧទ្ធច្ចំ, កុក្កុច្ចំ, អស្សទ្ធិយំ, បមាទំ – ឥមេ ខោ, ភិក្ខវេ, ឆ ធម្មេ បហាយ ភព្ពោ អរហត្តំ សច្ឆិកាតុ’’ន្តិ. ទុតិយំ.