១០. ទុតិយតជ្ឈានសុត្តំ

៧៤. ‘‘ឆ, ភិក្ខវេ, ធម្មេ អប្បហាយ អភព្ពោ បឋមំ ឈានំ ឧបសម្បជ្ជ វិហរិតុំ. កតមេ ឆ? កាមវិតក្កំ, ព្យាបាទវិតក្កំ, វិហិំសាវិតក្កំ, កាមសញ្ញំ, ព្យាបាទសញ្ញំ, វិហិំសាសញ្ញំ – ឥមេ ខោ, ភិក្ខវេ, ឆ ធម្មេ អប្បហាយ អភព្ពោ បឋមំ ឈានំ ឧបសម្បជ្ជ វិហរិតុំ.

‘‘ឆ, ភិក្ខវេ, ធម្មេ បហាយ ភព្ពោ បឋមំ ឈានំ ឧបសម្បជ្ជ វិហរិតុំ. កតមេ ឆ? កាមវិតក្កំ, ព្យាបាទវិតក្កំ, វិហិំសាវិតក្កំ, កាមសញ្ញំ, ព្យាបាទសញ្ញំ, វិហិំសាសញ្ញំ – ឥមេ ខោ, ភិក្ខវេ, ឆ ធម្មេ បហាយ ភព្ពោ បឋមំ ឈានំ ឧបសម្បជ្ជ វិហរិតុ’’ន្តិ. ទសមំ.

ទេវតាវគ្គោ សត្តមោ. [ទុតិយោ (ស្យា. ក.)]