១៤. អបរបឋមឈានសុត្តំ

២៦៤. ‘‘បញ្ចិមេ, ភិក្ខវេ, ធម្មេ អប្បហាយ អភព្ពោ បឋមំ ឈានំ ឧបសម្បជ្ជ វិហរិតុំ. កតមេ បញ្ច? អាវាសមច្ឆរិយំ, កុលមច្ឆរិយំ, លាភមច្ឆរិយំ, វណ្ណមច្ឆរិយំ, អកតញ្ញុតំ អកតវេទិតំ – ឥមេ ខោ, ភិក្ខវេ, បញ្ច ធម្មេ អប្បហាយ អភព្ពោ បឋមំ ឈានំ ឧបសម្បជ្ជ វិហរិតុំ.

‘‘បញ្ចិមេ, ភិក្ខវេ, ធម្មេ បហាយ ភព្ពោ បឋមំ ឈានំ ឧបសម្បជ្ជ វិហរិតុំ. កតមេ បញ្ច? អាវាសមច្ឆរិយំ, កុលមច្ឆរិយំ, លាភមច្ឆរិយំ, វណ្ណមច្ឆរិយំ, អកតញ្ញុតំ អកតវេទិតំ – ឥមេ ខោ, ភិក្ខវេ, បញ្ច ធម្មេ បហាយ ភព្ពោ បឋមំ ឈានំ ឧបសម្បជ្ជ វិហរិតុ’’ន្តិ. ចុទ្ទសមំ.