២. កូដសុត្តំ

១២. ‘‘បញ្ចិមានិ, ភិក្ខវេ, សេខពលានិ. កតមានិ បញ្ច? សទ្ធាពលំ, ហិរីពលំ, ឱត្តប្បពលំ, វីរិយពលំ, បញ្ញាពលំ – ឥមានិ ខោ, ភិក្ខវេ, បញ្ច សេខពលានិ. ឥមេសំ ខោ, ភិក្ខវេ, បញ្ចន្នំ សេខពលានំ ឯតំ អគ្គំ ឯតំ សង្គាហិកំ ឯតំ សង្ឃាតនិយំ, យទិទំ បញ្ញាពលំ.

‘‘សេយ្យថាបិ, ភិក្ខវេ, កូដាគារស្ស ឯតំ អគ្គំ ឯតំ សង្គាហិកំ ឯតំ សង្ឃាតនិយំ, យទិទំ កូដំ. ឯវមេវំ ខោ, ភិក្ខវេ, ឥមេសំ បញ្ចន្នំ សេខពលានំ ឯតំ អគ្គំ ឯតំ សង្គាហិកំ ឯតំ សង្ឃាតនិយំ, យទិទំ បញ្ញាពលំ.

‘‘តស្មាតិហ, ភិក្ខវេ, ឯវំ សិក្ខិតព្ពំ – ‘សទ្ធាពលេន សមន្នាគតា ភវិស្សាម សេខពលេន, ហិរីពលេន… ឱត្តប្បពលេន… វីរិយពលេន… បញ្ញាពលេន សមន្នាគតា ភវិស្សាម សេខពលេនា’តិ. ឯវញ្ហិ វោ, ភិក្ខវេ, សិក្ខិតព្ព’’ន្តិ. ទុតិយំ.