៧. សុវិទូរសុត្តំ

៤៧. ‘‘ចត្តារិមានិ, ភិក្ខវេ, សុវិទូរវិទូរានិ. កតមានិ ចត្តារិ? នភញ្ច, ភិក្ខវេ, បថវី ច; ឥទំ បឋមំ សុវិទូរវិទូរេ. ឱរិមញ្ច, ភិក្ខវេ, តីរំ សមុទ្ទស្ស បារិមញ្ច; ឥទំ ទុតិយំ សុវិទូរវិទូរេ. យតោ ច, ភិក្ខវេ, វេរោចនោ អព្ភុទេតិ យត្ថ ច អត្ថមេតិ [អត្ថង្គមេតិ (ស្យា.), វេតិ (ក.)]; ឥទំ តតិយំ សុវិទូរវិទូរេ. សតញ្ច, ភិក្ខវេ, ធម្មោ អសតញ្ច ធម្មោ; ឥទំ ចតុត្ថំ សុវិទូរវិទូរេ. ឥមានិ ខោ, ភិក្ខវេ, ចត្តារិ សុវិទូរវិទូរានី’’តិ.

[ជា. ២.២១.៤១៤, ៤៤៨] ‘‘នភញ្ច ទូរេ បថវី ច ទូរេ,

បារំ សមុទ្ទស្ស តទាហុ ទូរេ;

យតោ ច វេរោចនោ អព្ភុទេតិ,

បភង្ករោ យត្ថ ច អត្ថមេតិ;

តតោ ហវេ ទូរតរំ វទន្តិ,

សតញ្ច ធម្មំ អសតញ្ច ធម្មំ.

‘‘អព្យាយិកោ ហោតិ សតំ សមាគមោ,

យាវាបិ [យាវម្បិ (សី. ស្យា. កំ. បី.)] តិដ្ឋេយ្យ តថេវ ហោតិ;

ខិប្បញ្ហិ វេតិ អសតំ សមាគមោ,

តស្មា សតំ ធម្មោ អសព្ភិ អារកា’’តិ. សត្តមំ;