២. បវិវេកសុត្តំ

៩៤. ‘‘តីណិមានិ, ភិក្ខវេ, អញ្ញតិត្ថិយា បរិព្ពាជកា បវិវេកានិ បញ្ញាបេន្តិ. កតមានិ តីណិ? ចីវរបវិវេកំ, បិណ្ឌបាតបវិវេកំ, សេនាសនបវិវេកំ.

‘‘តត្រិទំ, ភិក្ខវេ, អញ្ញតិត្ថិយា បរិព្ពាជកា ចីវរបវិវេកស្មិំ បញ្ញាបេន្តិ, សាណានិបិ ធារេន្តិ, មសាណានិបិ ធារេន្តិ, ឆវទុស្សានិបិ ធារេន្តិ, បំសុកូលានិបិ ធារេន្តិ, តិរីដានិបិ ធារេន្តិ, អជិនម្បិ ធារេន្តិ, អជិនក្ខិបម្បិ ធារេន្តិ, កុសចីរម្បិ ធារេន្តិ, វាកចីរម្បិ ធារេន្តិ, ផលកចីរម្បិ ធារេន្តិ, កេសកម្ពលម្បិ ធារេន្តិ, វាលកម្ពលម្បិ ធារេន្តិ, ឧលូកបក្ខិកម្បិ ធារេន្តិ. ឥទំ ខោ, ភិក្ខវេ, អញ្ញតិត្ថិយា បរិព្ពាជកា ចីវរបវិវេកស្មិំ បញ្ញាបេន្តិ.

‘‘តត្រិទំ, ភិក្ខវេ, អញ្ញតិត្ថិយា បរិព្ពាជកា បិណ្ឌបាតបវិវេកស្មិំ បញ្ញាបេន្តិ. សាកភក្ខាបិ ហោន្តិ, សាមាកភក្ខាបិ ហោន្តិ, នីវារភក្ខាបិ ហោន្តិ, ទទ្ទុលភក្ខាបិ ហោន្តិ, ហដភក្ខាបិ ហោន្តិ, កណភក្ខាបិ ហោន្តិ, អាចាមភក្ខាបិ ហោន្តិ, បិញ្ញាកភក្ខាបិ ហោន្តិ, តិណភក្ខាបិ ហោន្តិ, គោមយភក្ខាបិ ហោន្តិ, វនមូលផលាហារា យាបេន្តិ បវត្តផលភោជី. ឥទំ ខោ, ភិក្ខវេ, អញ្ញតិត្ថិយា បរិព្ពាជកា បិណ្ឌបាតបវិវេកស្មិំ បញ្ញាបេន្តិ.

‘‘តត្រិទំ, ភិក្ខវេ, អញ្ញតិត្ថិយា បរិព្ពាជកា សេនាសនបវិវេកស្មិំ បញ្ញាបេន្តិ អរញ្ញំ រុក្ខមូលំ សុសានំ [រុក្ខមូលំ ភុសាគារំ សុសានំ (ក.)] វនបត្ថំ អព្ភោកាសំ បលាលបុញ្ជំ ភុសាគារំ [សុញ្ញាគារំ (ក.)]. ឥទំ ខោ, ភិក្ខវេ, អញ្ញតិត្ថិយា បរិព្ពាជកា សេនាសនបវិវេកស្មិំ បញ្ញាបេន្តិ. ឥមានិ ខោ, ភិក្ខវេ, តីណិ អញ្ញតិត្ថិយា បរិព្ពាជកា បវិវេកានិ បញ្ញាបេន្តិ.

‘‘តីណិ ខោ បនិមានិ, ភិក្ខវេ, ឥមស្មិំ ធម្មវិនយេ ភិក្ខុនោ បវិវេកានិ. កតមានិ តីណិ? ឥធ, ភិក្ខវេ, ភិក្ខុ សីលវា ច ហោតិ, ទុស្សីល្យញ្ចស្ស បហីនំ ហោតិ, តេន ច វិវិត្តោ ហោតិ; សម្មាទិដ្ឋិកោ ច ហោតិ, មិច្ឆាទិដ្ឋិ ចស្ស បហីនា ហោតិ, តាយ ច វិវិត្តោ ហោតិ; ខីណាសវោ ច ហោតិ, អាសវា ចស្ស បហីនា ហោន្តិ, តេហិ ច វិវិត្តោ ហោតិ. យតោ ខោ, ភិក្ខវេ, ភិក្ខុ សីលវា ហោតិ, ទុស្សីល្យញ្ចស្ស បហីនំ ហោតិ, តេន ច វិវិត្តោ ហោតិ; សម្មាទិដ្ឋិកោ ច ហោតិ, មិច្ឆាទិដ្ឋិ ចស្ស បហីនា ហោតិ, តាយ ច វិវិត្តោ ហោតិ; ខីណាសវោ ច ហោតិ, អាសវា ចស្ស បហីនា ហោន្តិ, តេហិ ច វិវិត្តោ ហោតិ. អយំ វុច្ចតិ, ភិក្ខវេ, ‘ភិក្ខុ អគ្គប្បត្តោ សារប្បត្តោ សុទ្ធោ សារេ បតិដ្ឋិតោ’’’.

‘‘សេយ្យថាបិ, ភិក្ខវេ, កស្សកស្ស គហបតិស្ស សម្បន្នំ សាលិក្ខេត្តំ. តមេនំ កស្សកោ គហបតិ សីឃំ សីឃំ [សីឃសីឃំ (សី. ស្យា. កំ. បី.)] លវាបេយ្យ. សីឃំ សីឃំ លវាបេត្វា សីឃំ សីឃំ សង្ឃរាបេយ្យ. សីឃំ សីឃំ សង្ឃរាបេត្វា សីឃំ សីឃំ ឧព្ពហាបេយ្យ [ឧព្ពាហាបេយ្យ (ស្យា. កំ.)]. សីឃំ សីឃំ ឧព្ពហាបេត្វា សីឃំ សីឃំ បុញ្ជំ ការាបេយ្យ. សីឃំ សីឃំ បុញ្ជំ ការាបេត្វា សីឃំ សីឃំ មទ្ទាបេយ្យ. សីឃំ សីឃំ មទ្ទាបេត្វា សីឃំ សីឃំ បលាលានិ ឧទ្ធរាបេយ្យ. សីឃំ សីឃំ បលាលានិ ឧទ្ធរាបេត្វា សីឃំ សីឃំ ភុសិកំ ឧទ្ធរាបេយ្យ. សីឃំ សីឃំ ភុសិកំ ឧទ្ធរាបេត្វា សីឃំ សីឃំ ឱបុនាបេយ្យ. សីឃំ សីឃំ ឱបុនាបេត្វា សីឃំ សីឃំ អតិហរាបេយ្យ. សីឃំ សីឃំ អតិហរាបេត្វា សីឃំ សីឃំ កោដ្ដាបេយ្យ. សីឃំ សីឃំ កោដ្ដាបេត្វា សីឃំ សីឃំ ថុសានិ ឧទ្ធរាបេយ្យ. ឯវមស្សុ [ឯវស្សុ (ក.)] តានិ, ភិក្ខវេ, កស្សកស្ស គហបតិស្ស ធញ្ញានិ អគ្គប្បត្តានិ សារប្បត្តានិ សុទ្ធានិ សារេ បតិដ្ឋិតានិ.

‘‘ឯវមេវំ ខោ, ភិក្ខវេ, យតោ ភិក្ខុ សីលវា ច ហោតិ, ទុស្សីល្យញ្ចស្ស បហីនំ ហោតិ, តេន ច វិវិត្តោ ហោតិ; សម្មាទិដ្ឋិកោ ច ហោតិ, មិច្ឆាទិដ្ឋិ ចស្ស បហីនា ហោតិ, តាយ ច វិវិត្តោ ហោតិ; ខីណាសវោ ច ហោតិ, អាសវា ចស្ស បហីនា ហោន្តិ, តេហិ ច វិវិត្តោ ហោតិ. អយំ វុច្ចតិ, ភិក្ខវេ, ‘ភិក្ខុ អគ្គប្បត្តោ សារប្បត្តោ សុទ្ធោ សារេ បតិដ្ឋិតោ’’’តិ. ទុតិយំ.