៤. អតបនីយសុត្តំ

៤. ‘‘ទ្វេមេ, ភិក្ខវេ, ធម្មា អតបនីយា. កតមេ ទ្វេ? ឥធ, ភិក្ខវេ, ឯកច្ចស្ស កាយសុចរិតំ កតំ ហោតិ, អកតំ ហោតិ កាយទុច្ចរិតំ; វចីសុចរិតំ កតំ ហោតិ, អកតំ ហោតិ វចីទុច្ចរិតំ; មនោសុចរិតំ កតំ ហោតិ, អកតំ ហោតិ មនោទុច្ចរិតំ. សោ ‘កាយសុចរិតំ មេ កត’ន្តិ ន តប្បតិ, ‘អកតំ មេ កាយទុច្ចរិត’ន្តិ ន តប្បតិ; ‘វចីសុចរិតំ មេ កត’ន្តិ ន តប្បតិ, ‘អកតំ មេ វចីទុច្ចរិត’ន្តិ ន តប្បតិ; ‘មនោសុចរិតំ មេ កត’ន្តិ ន តប្បតិ, ‘អកតំ មេ មនោទុច្ចរិត’ន្តិ ន តប្បតិ. ឥមេ ខោ, ភិក្ខវេ, ទ្វេ ធម្មា អតបនីយា’’តិ. ចតុត្ថំ.