១. សមណសញ្ញាសុត្តំ

១០១. ‘‘តិស្សោ ឥមា, ភិក្ខវេ, សមណសញ្ញា ភាវិតា ពហុលីកតា សត្ត ធម្មេ បរិបូរេន្តិ. កតមា តិស្សោ? វេវណ្ណិយម្ហិ អជ្ឈុបគតោ, បរបដិពទ្ធា មេ ជីវិកា, អញ្ញោ មេ អាកប្បោ ករណីយោតិ – ឥមា ខោ, ភិក្ខវេ, តិស្សោ សមណសញ្ញា ភាវិតា ពហុលីកតា សត្ត ធម្មេ បរិបូរេន្តិ.

‘‘កតមេ សត្ត? សន្តតការី [សតតការី (ស្យា. បី. ក.)] ហោតិ សន្តតវុត្តិ [សតតវុត្តិ (ស្យា. បី.)] សីលេសុ, អនភិជ្ឈាលុ ហោតិ, អព្យាបជ្ជោ ហោតិ, អនតិមានី ហោតិ, សិក្ខាកាមោ ហោតិ, ឥទមត្ថំតិស្ស ហោតិ ជីវិតបរិក្ខារេសុ, អារទ្ធវីរិយោ ច [អារទ្ធវិរិយោ ច (សី. បី.), អារទ្ធវិរិយោ (ស្យា.)] វិហរតិ. ឥមា ខោ, ភិក្ខវេ, តិស្សោ សមណសញ្ញា ភាវិតា ពហុលីកតា ឥមេ សត្ត ធម្មេ បរិបូរេន្តី’’តិ. បឋមំ.