៩. បឋមអានន្ទសុត្តំ

៣៩. អថ ខោ អាយស្មា អានន្ទោ យេន ភគវា តេនុបសង្កមិ; ឧបសង្កមិត្វា ភគវន្តំ អភិវាទេត្វា ឯកមន្តំ និសីទិ. ឯកមន្តំ និសិន្នោ ខោ អាយស្មា អានន្ទោ ភគវន្តំ ឯតទវោច – ‘‘‘សង្ឃភេទោ សង្ឃភេទោ’តិ, ភន្តេ, វុច្ចតិ. កិត្តាវតា នុ ខោ, ភន្តេ, សង្ឃោ ភិន្នោ ហោតី’’តិ? ‘‘ឥធានន្ទ, ភិក្ខូ អធម្មំ ធម្មោតិ ទីបេន្តិ, ធម្មំ អធម្មោតិ ទីបេន្តិ, អវិនយំ វិនយោតិ ទីបេន្តិ…បេ… បញ្ញត្តំ តថាគតេន អបញ្ញត្តំ តថាគតេនាតិ ទីបេន្តិ. តេ ឥមេហិ ទសហិ វត្ថូហិ អវកស្សន្តិ អបកស្សន្តិ អាវេនិ កម្មានិ ករោន្តិ អាវេនិ បាតិមោក្ខំ ឧទ្ទិសន្តិ. ឯត្តាវតា ខោ, អានន្ទ, សង្ឃោ ភិន្នោ ហោតី’’តិ.

‘‘សមគ្គំ បន, ភន្តេ, សង្ឃំ ភិន្ទិត្វា កិំ សោ បសវតី’’តិ? ‘‘កប្បដ្ឋិកំ, អានន្ទ, កិព្ពិសំ បសវតី’’តិ. ‘‘កិំ បន, ភន្តេ, កប្បដ្ឋិកំ កិព្ពិស’’ន្តិ? ‘‘កប្បំ, អានន្ទ, និរយម្ហិ បច្ចតីតិ –

‘‘អាបាយិកោ នេរយិកោ, កប្បដ្ឋោ សង្ឃភេទកោ;

វគ្គរតោ អធម្មដ្ឋោ, យោគក្ខេមា បធំសតិ;

សង្ឃំ សមគ្គំ ភិន្ទិត្វា [ភេត្វាន (សី. ស្យា.), ភិត្វាន (ក.) ចូឡវ. ៣៥៤; ឥតិវុ. ១៨; កថាវ. ៦៥៧] កប្បំ និរយម្ហិ បច្ចតី’’តិ. នវមំ;