២. បាតិមោក្ខដ្ឋបនាសុត្តំ

៣២. ‘‘កតិ នុ ខោ, ភន្តេ, បាតិមោក្ខដ្ឋបនា’’តិ? ‘‘ទស ខោ, ឧបាលិ, បាតិមោក្ខដ្ឋបនា. កតមេ ទស? បារាជិកោ តស្សំ បរិសាយំ និសិន្នោ ហោតិ, បារាជិកកថា វិប្បកតា ហោតិ, អនុបសម្បន្នោ តស្សំ បរិសាយំ និសិន្នោ ហោតិ, អនុបសម្បន្នកថា វិប្បកតា ហោតិ, សិក្ខំ បច្ចក្ខាតកោ តស្សំ បរិសាយំ និសិន្នោ ហោតិ, សិក្ខំ បច្ចក្ខាតកកថា វិប្បកតា ហោតិ, បណ្ឌកោ តស្សំ បរិសាយំ និសិន្នោ ហោតិ, បណ្ឌកកថា វិប្បកតា ហោតិ, ភិក្ខុនិទូសកោ តស្សំ បរិសាយំ និសិន្នោ ហោតិ, ភិក្ខុនិទូសកកថា វិប្បកតា ហោតិ – ឥមេ ខោ, ឧបាលិ, ទស បាតិមោក្ខដ្ឋបនា’’តិ. ទុតិយំ.