꧕. ꦄꦣꦶꦏꦫꦟꦴꦣꦶꦥ꧀ꦥꦴꦪꦺꦴ

꧓꧔꧘. ꦮꦶꦮꦴꦢꦴꦣꦶꦏꦫꦟꦁ ꦲꦺꦴꦠꦶ ꦄꦤꦸꦮꦴꦢꦴꦣꦶꦏꦫꦟꦁ, ꦲꦺꦴꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ, ꦲꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ. ꦮꦶꦮꦴꦢꦴꦣꦶꦏꦫꦟꦁ ꦤ ꦲꦺꦴꦠꦶ ꦄꦤꦸꦮꦴꦢꦴꦣꦶꦏꦫꦟꦁ, ꦤ ꦲꦺꦴꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ, ꦤ ꦲꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ; ꦄꦥꦶ ꦕ, ꦮꦶꦮꦴꦢꦴꦣꦶꦏꦫꦟꦥꦕ꧀ꦕꦪꦴ ꦲꦺꦴꦠꦶ ꦄꦤꦸꦮꦴꦢꦴꦣꦶꦏꦫꦟꦁ, ꦲꦺꦴꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ, ꦲꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ. ꦪꦡꦴ ꦏꦡꦁ ꦮꦶꦪ? [ꦕꦹꦭ꦳ꦮ. ꧒꧑꧕; ꦥꦫꦶ. ꧓꧑꧔] ꦆꦣ ꦨꦶꦏ꧀ꦑꦹ ꦮꦶꦮꦢꦤ꧀ꦠꦶ – ꦣꦩ꧀ꦩꦺꦴꦠꦶ ꦮꦴ ꦄꦣꦩ꧀ꦩꦺꦴꦠꦶ ꦮꦴ ꦢꦸꦛ꧀ꦜꦸꦭ꧀ꦭꦴꦥꦠ꧀ꦠꦷꦠꦶ ꦮꦴ ꦄꦢꦸꦛ꧀ꦜꦸꦭ꧀ꦭꦴꦥꦠ꧀ꦠꦷꦠꦶ ꦮꦴ. ꦪꦁ ꦠꦠ꧀ꦡ ꦨꦟ꧀ꦝꦤꦁ ꦏꦭꦲꦺꦴ ꦮꦶꦒ꧀ꦒꦲꦺꦴ ꦮꦶꦮꦴꦢꦺꦴ ꦤꦴꦤꦴꦮꦴꦢꦺꦴ ꦄꦚ꧀ꦚꦡꦴꦮꦴꦢꦺꦴ ꦮꦶꦥꦕ꧀ꦕꦠꦴꦪ ꦮꦺꦴꦲꦴꦫꦺꦴ ꦩꦺꦣꦏꦁ, ꦆꦢꦁ ꦮꦸꦕ꧀ꦕꦠꦶ ꦮꦶꦮꦴꦢꦴꦣꦶꦏꦫꦟꦁ. ꦮꦶꦮꦴꦢꦴꦣꦶꦏꦫꦟꦺ ꦱꦔ꧀ꦓꦺꦴ ꦮꦶꦮꦢꦠꦶ ꦮꦶꦮꦴꦢꦴꦣꦶꦏꦫꦟꦁ. ꦮꦶꦮꦢꦩꦴꦤꦺꦴ ꦄꦤꦸꦮꦢꦠꦶ ꦄꦤꦸꦮꦴꦢꦴꦣꦶꦏꦫꦟꦁ. ꦄꦤꦸꦮꦢꦩꦴꦤꦺꦴ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ. ꦠꦴꦪ ꦄꦴꦥꦠ꧀ꦠꦶꦪꦴ ꦱꦔ꧀ꦓꦺꦴ ꦏꦩ꧀ꦩꦁ ꦏꦫꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ. ꦌꦮꦁ ꦮꦶꦮꦴꦢꦴꦣꦶꦏꦫꦟꦥꦕ꧀ꦕꦪꦴ ꦲꦺꦴꦠꦶ ꦄꦤꦸꦮꦴꦢꦴꦣꦶꦏꦫꦟꦁ, ꦲꦺꦴꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ, ꦲꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ.

ꦄꦤꦸꦮꦴꦢꦴꦣꦶꦏꦫꦟꦁ ꦲꦺꦴꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ, ꦲꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ, ꦲꦺꦴꦠꦶ ꦮꦶꦮꦴꦢꦴꦣꦶꦏꦫꦟꦁ. ꦄꦤꦸꦮꦴꦢꦴꦣꦶꦏꦫꦟꦁ ꦤ ꦲꦺꦴꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ, ꦤ ꦲꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ, ꦤ ꦲꦺꦴꦠꦶ ꦮꦶꦮꦴꦢꦴꦣꦶꦏꦫꦟꦁ; ꦄꦥꦶ ꦕ, ꦄꦤꦸꦮꦴꦢꦴꦣꦶꦏꦫꦟꦥꦕ꧀ꦕꦪꦴ ꦲꦺꦴꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ, ꦲꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ, ꦲꦺꦴꦠꦶ ꦮꦶꦮꦴꦢꦴꦣꦶꦏꦫꦟꦁ. ꦪꦡꦴ ꦏꦡꦁ ꦮꦶꦪ? ꦆꦣ ꦨꦶꦏ꧀ꦑꦹ ꦨꦶꦏ꧀ꦑꦸꦁ ꦄꦤꦸꦮꦢꦤ꧀ꦠꦶ ꦱꦷꦭꦮꦶꦥꦠ꧀ꦠꦶꦪꦴ ꦮꦴ ꦄꦴꦕꦴꦫꦮꦶꦥꦠ꧀ꦠꦶꦪꦴ ꦮꦴ ꦢꦶꦛ꧀ꦜꦶꦮꦶꦥꦠ꧀ꦠꦶꦪꦴ ꦮꦴ ꦄꦴꦗꦷꦮꦮꦶꦥꦠ꧀ꦠꦶꦪꦴ ꦮꦴ. ꦪꦺꦴ ꦠꦠ꧀ꦡ ꦄꦤꦸꦮꦴꦢꦺꦴ ꦄꦤꦸꦮꦢꦤꦴ ꦄꦤꦸꦭ꧀ꦭꦥꦤꦴ ꦄꦤꦸꦨꦟꦤꦴ ꦄꦤꦸꦱꦩ꧀ꦥꦮꦔ꧀ꦏꦠꦴ ꦄꦧ꧀ꦨꦸꦱ꧀ꦱꦲꦤꦠꦴ ꦄꦤꦸꦧꦭꦥ꧀ꦥꦢꦴꦤꦁ, ꦆꦢꦁ ꦮꦸꦕ꧀ꦕꦠꦶ ꦄꦤꦸꦮꦴꦢꦴꦣꦶꦏꦫꦟꦁ. ꦄꦤꦸꦮꦴꦢꦴꦣꦶꦏꦫꦟꦺ ꦱꦔ꧀ꦓꦺꦴ ꦮꦶꦮꦢꦠꦶ, ꦮꦶꦮꦴꦢꦴꦣꦶꦏꦫꦟꦁ. ꦮꦶꦮꦢꦩꦴꦤꦺꦴ ꦄꦤꦸꦮꦢꦠꦶ, ꦄꦤꦸꦮꦴꦢꦴꦣꦶꦏꦫꦟꦁ. ꦄꦤꦸꦮꦢꦩꦴꦤꦺꦴ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦠꦶ, ꦄꦴꦥꦠ꧀ꦠꦴꦣꦶꦏꦫꦟꦁ. ꦠꦴꦪ ꦄꦴꦥꦠ꧀ꦠꦶꦪꦴ ꦱꦔ꧀ꦓꦺꦴ ꦏꦩ꧀ꦩꦁ ꦏꦫꦺꦴꦠꦶ, ꦏꦶꦕ꧀ꦕꦴꦣꦶꦏꦫꦟꦁ. ꦌꦮꦁ ꦄꦤꦸꦮꦴꦢꦴꦣꦶꦏꦫꦟꦥꦕ꧀ꦕꦪꦴ ꦲꦺꦴꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ, ꦲꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ, ꦲꦺꦴꦠꦶ ꦮꦶꦮꦴꦢꦴꦣꦶꦏꦫꦟꦁ.

ꦄꦴꦥꦠ꧀ꦠꦴꦣꦶꦏꦫꦟꦁ ꦲꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ, ꦲꦺꦴꦠꦶ ꦮꦶꦮꦴꦢꦴꦣꦶꦏꦫꦟꦁ, ꦲꦺꦴꦠꦶ ꦄꦤꦸꦮꦴꦢꦴꦣꦶꦏꦫꦟꦁ. ꦄꦴꦥꦠ꧀ꦠꦴꦣꦶꦏꦫꦟꦁ ꦤ ꦲꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ, ꦤ ꦲꦺꦴꦠꦶ ꦮꦶꦮꦴꦢꦴꦣꦶꦏꦫꦟꦁ, ꦤ ꦲꦺꦴꦠꦶ ꦄꦤꦸꦮꦴꦢꦴꦣꦶꦏꦫꦟꦁ; ꦄꦥꦶ ꦕ, ꦄꦴꦥꦠ꧀ꦠꦴꦣꦶꦏꦫꦟꦥꦕ꧀ꦕꦪꦴ ꦲꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ, ꦲꦺꦴꦠꦶ ꦮꦶꦮꦴꦢꦴꦣꦶꦏꦫꦟꦁ, ꦲꦺꦴꦠꦶ ꦄꦤꦸꦮꦴꦢꦴꦣꦶꦏꦫꦟꦁ. ꦪꦡꦴ ꦏꦡꦁ ꦮꦶꦪ? [ꦕꦹꦭ꦳ꦮ. ꧒꧑꧕; ꦥꦫꦶ. ꧓꧔꧘] ꦥꦚ꧀ꦕꦥꦶ ꦄꦴꦥꦠ꧀ꦠꦶꦏ꧀ꦑꦤ꧀ꦣꦴ ꦄꦴꦥꦠ꧀ꦠꦴꦣꦶꦏꦫꦟꦁ, ꦱꦠ꧀ꦠꦥꦶ ꦄꦴꦥꦠ꧀ꦠꦶꦏ꧀ꦑꦤ꧀ꦣꦴ ꦄꦴꦥꦠ꧀ꦠꦴꦣꦶꦏꦫꦟꦁ, ꦆꦢꦁ ꦮꦸꦕ꧀ꦕꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ. ꦄꦴꦥꦠ꧀ꦠꦴꦣꦶꦏꦫꦟꦺ ꦱꦔ꧀ꦓꦺꦴ ꦮꦶꦮꦢꦠꦶ ꦮꦶꦮꦴꦢꦴꦣꦶꦏꦫꦟꦁ. ꦮꦶꦮꦢꦩꦴꦤꦺꦴ ꦄꦤꦸꦮꦢꦠꦶ ꦄꦤꦸꦮꦴꦢꦴꦣꦶꦏꦫꦟꦁ. ꦄꦤꦸꦮꦢꦩꦴꦤꦺꦴ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ. ꦠꦴꦪ ꦄꦴꦥꦠ꧀ꦠꦶꦪꦴ ꦱꦔ꧀ꦓꦺꦴ ꦏꦩ꧀ꦩꦁ ꦏꦫꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ. ꦌꦮꦁ ꦄꦴꦥꦠ꧀ꦠꦴꦣꦶꦏꦫꦟꦥꦕ꧀ꦕꦪꦴ ꦲꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ, ꦲꦺꦴꦠꦶ ꦮꦶꦮꦴꦢꦴꦣꦶꦏꦫꦟꦁ, ꦲꦺꦴꦠꦶ ꦄꦤꦸꦮꦴꦢꦴꦣꦶꦏꦫꦟꦁ.

ꦏꦶꦕ꧀ꦕꦴꦣꦶꦏꦫꦟꦁ ꦲꦺꦴꦠꦶ ꦮꦶꦮꦴꦢꦴꦣꦶꦏꦫꦟꦁ, ꦲꦺꦴꦠꦶ ꦄꦤꦸꦮꦴꦢꦴꦣꦶꦏꦫꦟꦁ, ꦲꦺꦴꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ. ꦏꦶꦕ꧀ꦕꦴꦣꦶꦏꦫꦟꦁ ꦤ ꦲꦺꦴꦠꦶ ꦮꦶꦮꦴꦢꦴꦣꦶꦏꦫꦟꦁ, ꦤ ꦲꦺꦴꦠꦶ ꦄꦤꦸꦮꦴꦢꦴꦣꦶꦏꦫꦟꦁ, ꦤ ꦲꦺꦴꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ; ꦄꦥꦶ ꦕ, ꦏꦶꦕ꧀ꦕꦴꦣꦶꦏꦫꦟꦥꦕ꧀ꦕꦪꦴ ꦲꦺꦴꦠꦶ ꦮꦶꦮꦴꦢꦴꦣꦶꦏꦫꦟꦁ, ꦲꦺꦴꦠꦶ ꦄꦤꦸꦮꦴꦢꦴꦣꦶꦏꦫꦟꦁ, ꦲꦺꦴꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ. ꦪꦡꦴ ꦏꦡꦁ ꦮꦶꦪ? ꦪꦴ ꦱꦔ꧀ꦓꦱ꧀ꦱ ꦏꦶꦕ꧀ꦕꦪꦠꦴ ꦏꦫꦟꦷꦪꦠꦴ ꦄꦥꦭꦺꦴꦏꦤꦏꦩ꧀ꦩꦁ ꦚꦠ꧀ꦠꦶꦏꦩ꧀ꦩꦁ ꦚꦠ꧀ꦠꦶꦢꦸꦠꦶꦪꦏꦩ꧀ꦩꦁ ꦚꦠ꧀ꦠꦶꦕꦠꦸꦠ꧀ꦡꦏꦩ꧀ꦩꦁ, ꦆꦢꦁ ꦮꦸꦕ꧀ꦕꦠꦶ ꦏꦶꦕ꧀ꦕꦴꦣꦶꦏꦫꦟꦁ. ꦏꦶꦕ꧀ꦕꦴꦣꦶꦏꦫꦟꦺ ꦱꦔ꧀ꦓꦺꦴ ꦮꦶꦮꦢꦠꦶ ꦮꦶꦮꦴꦢꦴꦣꦶꦏꦫꦟꦁ. ꦮꦶꦮꦢꦩꦴꦤꦺꦴ ꦄꦤꦸꦮꦢꦠꦶ ꦄꦤꦸꦮꦴꦢꦴꦣꦶꦏꦫꦟꦁ. ꦄꦤꦸꦮꦢꦩꦴꦤꦺꦴ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ. ꦠꦴꦪ ꦄꦴꦥꦠ꧀ꦠꦶꦪꦴ ꦱꦔ꧀ꦓꦺꦴ ꦏꦩ꧀ꦩꦁ ꦏꦫꦺꦴꦠꦶ ꦏꦶꦕ꧀ꦕꦴꦣꦶꦏꦫꦟꦁ. ꦌꦮꦁ ꦏꦶꦕ꧀ꦕꦴꦣꦶꦏꦫꦟꦥꦕ꧀ꦕꦪꦴ ꦲꦺꦴꦠꦶ ꦮꦶꦮꦴꦢꦴꦣꦶꦏꦫꦟꦁ, ꦲꦺꦴꦠꦶ ꦄꦤꦸꦮꦴꦢꦴꦣꦶꦏꦫꦟꦁ, ꦲꦺꦴꦠꦶ ꦄꦴꦥꦠ꧀ꦠꦴꦣꦶꦏꦫꦟꦁ.