꧔. ꦮꦶꦥꦠ꧀ꦠꦶꦥꦕ꧀ꦕꦪꦮꦴꦫꦺꦴ

꧒꧘꧔. ꦱꦷꦭꦮꦶꦥꦠ꧀ꦠꦶꦥꦕ꧀ꦕꦪꦴ ꦏꦠꦶ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦠꦶ? ꦱꦷꦭꦮꦶꦥꦠ꧀ꦠꦶꦥꦕ꧀ꦕꦪꦴ ꦕꦠꦱ꧀ꦱꦺꦴ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦠꦶ – ꦨꦶꦏ꧀ꦑꦸꦤꦷ ꦗꦴꦤꦁ ꦥꦴꦫꦴꦗꦶꦏꦁ ꦣꦩ꧀ꦩꦁ ꦥꦛꦶꦕ꧀ꦖꦴꦢꦺꦠꦶ, ꦄꦴꦥꦠ꧀ꦠꦶ ꦥꦴꦫꦴꦗꦶꦏꦱ꧀ꦱ; ꦮꦺꦩꦠꦶꦏꦴ ꦥꦛꦶꦕ꧀ꦖꦴꦢꦺꦠꦶ, ꦄꦴꦥꦠ꧀ꦠꦶ ꦡꦸꦭ꧀ꦭꦕ꧀ꦕꦪꦱ꧀ꦱ; ꦨꦶꦏ꧀ꦑꦸ ꦱꦔ꧀ꦓꦴꦢꦶꦱꦺꦱꦁ ꦥꦛꦶꦕ꧀ꦖꦴꦢꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ; ꦄꦠ꧀ꦠꦤꦺꦴ ꦢꦸꦛ꧀ꦜꦸꦭ꧀ꦭꦁ ꦄꦴꦥꦠ꧀ꦠꦶꦁ ꦥꦛꦶꦕ꧀ꦖꦴꦢꦺꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ – ꦱꦷꦭꦮꦶꦥꦠ꧀ꦠꦶꦥꦕ꧀ꦕꦪꦴ ꦆꦩꦴ ꦕꦠꦱ꧀ꦱꦺꦴ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦠꦶ.

ꦠꦴ ꦄꦴꦥꦠ꧀ꦠꦶꦪꦺꦴ ꦕꦠꦸꦤ꧀ꦤꦁ ꦮꦶꦥꦠ꧀ꦠꦷꦤꦁ ꦏꦠꦶ ꦮꦶꦥꦠ꧀ꦠꦶꦪꦺꦴ ꦨꦗꦤ꧀ꦠꦶ…ꦥꦺ… ꦱꦠ꧀ꦠꦤ꧀ꦤꦁ ꦱꦩꦡꦴꦤꦁ ꦏꦠꦶꦲꦶ ꦱꦩꦡꦺꦲꦶ ꦱꦩ꧀ꦩꦤ꧀ꦠꦶ? ꦠꦴ ꦄꦴꦥꦠ꧀ꦠꦶꦪꦺꦴ ꦕꦠꦸꦤ꧀ꦤꦁ ꦮꦶꦥꦠ꧀ꦠꦷꦤꦁ ꦢ꧀ꦮꦺ ꦮꦶꦥꦠ꧀ꦠꦶꦪꦺꦴ ꦨꦗꦤ꧀ꦠꦶ – ꦱꦶꦪꦴ ꦱꦷꦭꦮꦶꦥꦠ꧀ꦠꦶꦁ, ꦱꦶꦪꦴ ꦄꦴꦕꦴꦫꦮꦶꦥꦠ꧀ꦠꦶꦁ. ꦱꦠ꧀ꦠꦤ꧀ꦤꦁ ꦄꦴꦥꦠ꧀ꦠꦶꦏ꧀ꦑꦤ꧀ꦣꦴꦤꦁ ꦕꦠꦹꦲꦶ ꦄꦴꦥꦠ꧀ꦠꦶꦏ꧀ꦑꦤ꧀ꦣꦺꦲꦶ ꦱꦔ꧀ꦒꦲꦶꦠꦴ – ꦱꦶꦪꦴ ꦥꦴꦫꦴꦗꦶꦏꦴꦥꦠ꧀ꦠꦶꦏ꧀ꦑꦤ꧀ꦣꦺꦤ, ꦱꦶꦪꦴ ꦡꦸꦭ꧀ꦭꦕ꧀ꦕꦪꦴꦥꦠ꧀ꦠꦶꦏ꧀ꦑꦤ꧀ꦣꦺꦤ, ꦱꦶꦪꦴ ꦥꦴꦕꦶꦠ꧀ꦠꦶꦪꦴꦥꦠ꧀ꦠꦶꦏ꧀ꦑꦤ꧀ꦣꦺꦤ, ꦱꦶꦪꦴ ꦢꦸꦏ꧀ꦏꦛꦴꦥꦠ꧀ꦠꦶꦏ꧀ꦑꦤ꧀ꦣꦺꦤ. ꦖꦤ꧀ꦤꦁ ꦄꦴꦥꦠ꧀ꦠꦶꦱꦩꦸꦛ꧀ꦜꦴꦤꦴꦤꦁ ꦌꦏꦺꦤ ꦱꦩꦸꦛ꧀ꦜꦴꦤꦺꦤ ꦱꦩꦸꦛ꧀ꦜꦤ꧀ꦠꦶ – ꦏꦴꦪꦠꦺꦴ ꦕ ꦮꦴꦕꦠꦺꦴ ꦕ ꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦤ꧀ꦠꦶ. ꦕꦠꦸꦤ꧀ꦤꦁ ꦄꦣꦶꦏꦫꦟꦴꦤꦁ, ꦄꦴꦥꦠ꧀ꦠꦴꦣꦶꦏꦫꦟꦁ. ꦱꦠ꧀ꦠꦤ꧀ꦤꦁ ꦱꦩꦡꦴꦤꦁ ꦠꦷꦲꦶ ꦱꦩꦡꦺꦲꦶ ꦱꦩ꧀ꦩꦤ꧀ꦠꦶ – ꦱꦶꦪꦴ ꦱꦩ꧀ꦩꦸꦑꦴꦮꦶꦤꦪꦺꦤ ꦕ ꦥꦛꦶꦚ꧀ꦚꦴꦠꦏꦫꦟꦺꦤ ꦕ, ꦱꦶꦪꦴ ꦱꦩ꧀ꦩꦸꦑꦴꦮꦶꦤꦪꦺꦤ ꦕ ꦠꦶꦟꦮꦠ꧀ꦡꦴꦫꦏꦺꦤ ꦕ.

꧒꧘꧕. ꦄꦴꦕꦴꦫꦮꦶꦥꦠ꧀ꦠꦶꦥꦕ꧀ꦕꦪꦴ ꦏꦠꦶ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦠꦶ? ꦄꦴꦕꦴꦫꦮꦶꦥꦠ꧀ꦠꦶꦥꦕ꧀ꦕꦪꦴ ꦌꦏꦁ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦠꦶ. ꦄꦴꦕꦴꦫꦮꦶꦥꦠ꧀ꦠꦶꦁ ꦥꦛꦶꦕ꧀ꦖꦴꦢꦺꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ – ꦄꦴꦕꦴꦫꦮꦶꦥꦠ꧀ꦠꦶꦥꦕ꧀ꦕꦪꦴ ꦆꦩꦁ ꦌꦏꦁ ꦄꦴꦥꦠ꧀ꦠꦶꦁ ꦄꦴꦥꦗ꧀ꦗꦠꦶ.

ꦱꦴ ꦄꦴꦥꦠ꧀ꦠꦶ ꦕꦠꦸꦤ꧀ꦤꦁ ꦮꦶꦥꦠ꧀ꦠꦷꦤꦁ ꦏꦠꦶ ꦮꦶꦥꦠ꧀ꦠꦶꦪꦺꦴ ꦨꦗꦠꦶ …ꦥꦺ… ꦱꦠ꧀ꦠꦤ꧀ꦤꦁ ꦱꦩꦡꦴꦤꦁ ꦏꦠꦶꦲꦶ ꦱꦩꦡꦺꦲꦶ ꦱꦩ꧀ꦩꦠꦶ? ꦱꦴ ꦄꦴꦥꦠ꧀ꦠꦶ ꦕꦠꦸꦤ꧀ꦤꦁ ꦮꦶꦥꦠ꧀ꦠꦷꦤꦁ ꦌꦏꦁ ꦮꦶꦥꦠ꧀ꦠꦶꦁ ꦨꦗꦠꦶ – ꦄꦴꦕꦴꦫꦮꦶꦥꦠ꧀ꦠꦶꦁ. ꦱꦠ꧀ꦠꦤ꧀ꦤꦁ ꦄꦴꦥꦠ꧀ꦠꦶꦏ꧀ꦑꦤ꧀ꦣꦴꦤꦁ ꦌꦏꦺꦤ ꦄꦴꦥꦠ꧀ꦠꦶꦏ꧀ꦑꦤ꧀ꦣꦺꦤ ꦱꦔ꧀ꦒꦲꦶꦠꦴ – ꦢꦸꦏ꧀ꦏꦛꦴꦥꦠ꧀ꦠꦶꦏ꧀ꦑꦤ꧀ꦣꦺꦤ. ꦖꦤ꧀ꦤꦁ ꦄꦴꦥꦠ꧀ꦠꦶꦱꦩꦸꦛ꧀ꦜꦴꦤꦴꦤꦁ ꦌꦏꦺꦤ ꦱꦩꦸꦛ꧀ꦜꦴꦤꦺꦤ ꦱꦩꦸꦛ꧀ꦜꦴꦠꦶ – ꦏꦴꦪꦠꦺꦴ ꦕ ꦮꦴꦕꦠꦺꦴ ꦕ ꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦴꦠꦶ. ꦕꦠꦸꦤ꧀ꦤꦁ ꦄꦣꦶꦏꦫꦟꦴꦤꦁ ꦄꦴꦥꦠ꧀ꦠꦴꦣꦶꦏꦫꦟꦁ. ꦱꦠ꧀ꦠꦤ꧀ꦤꦁ ꦱꦩꦡꦴꦤꦁ ꦠꦷꦲꦶ ꦱꦩꦡꦺꦲꦶ ꦱꦩ꧀ꦩꦠꦶ – ꦱꦶꦪꦴ ꦱꦩ꧀ꦩꦸꦑꦴꦮꦶꦤꦪꦺꦤ ꦕ ꦥꦛꦶꦚ꧀ꦚꦴꦠꦏꦫꦟꦺꦤ ꦕ, ꦱꦶꦪꦴ ꦱꦩ꧀ꦩꦸꦑꦴꦮꦶꦤꦪꦺꦤ ꦕ ꦠꦶꦟꦮꦠ꧀ꦡꦴꦫꦏꦺꦤ ꦕ.

꧒꧘꧖. ꦢꦶꦛ꧀ꦜꦶꦮꦶꦥꦠ꧀ꦠꦶꦥꦕ꧀ꦕꦪꦴ ꦏꦠꦶ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦠꦶ? ꦢꦶꦛ꧀ꦜꦶꦮꦶꦥꦠ꧀ꦠꦶꦥꦕ꧀ꦕꦪꦴ ꦢ꧀ꦮꦺ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦠꦶ. ꦥꦴꦥꦶꦏꦴꦪ ꦢꦶꦛ꧀ꦜꦶꦪꦴ ꦪꦴꦮꦠꦠꦶꦪꦁ ꦱꦩꦤꦸꦨꦴꦱꦤꦴꦪ ꦤ ꦥꦛꦶꦤꦶꦱ꧀ꦱꦗ꧀ꦗꦠꦶ, ꦚꦠ꧀ꦠꦶꦪꦴ ꦢꦸꦏ꧀ꦏꦛꦁ [ꦚꦠ꧀ꦠꦶꦪꦴ ꦢꦸꦏ꧀ꦏꦛꦁ, ꦢ꧀ꦮꦷꦲꦶ ꦏꦩ꧀ꦩꦮꦴꦕꦴꦲꦶ ꦢꦸꦏ꧀ꦏꦛꦴ (ꦱ꧀ꦪꦴ. ꦏ.)]; ꦏꦩ꧀ꦩꦮꦴꦕꦴꦥꦫꦶꦪꦺꦴꦱꦴꦤꦺ ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ – ꦢꦶꦛ꧀ꦜꦶꦮꦶꦥꦠ꧀ꦠꦶꦥꦕ꧀ꦕꦪꦴ ꦆꦩꦴ ꦢ꧀ꦮꦺ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦠꦶ.

ꦠꦴ ꦄꦴꦥꦠ꧀ꦠꦶꦪꦺꦴ ꦕꦠꦸꦤ꧀ꦤꦁ ꦮꦶꦥꦠ꧀ꦠꦷꦤꦁ ꦏꦠꦶ ꦮꦶꦥꦠ꧀ꦠꦶꦪꦺꦴ ꦨꦗꦤ꧀ꦠꦶ…ꦥꦺ… ꦱꦠ꧀ꦠꦤ꧀ꦤꦁ ꦱꦩꦡꦴꦤꦁ ꦏꦠꦶꦲꦶ ꦱꦩꦡꦺꦲꦶ ꦱꦩ꧀ꦩꦤ꧀ꦠꦶ? ꦠꦴ ꦄꦴꦥꦠ꧀ꦠꦶꦪꦺꦴ ꦕꦠꦸꦤ꧀ꦤꦁ ꦮꦶꦥꦠ꧀ꦠꦷꦤꦁ ꦌꦏꦁ ꦮꦶꦥꦠ꧀ꦠꦶꦁ ꦨꦗꦤ꧀ꦠꦶ – ꦄꦴꦕꦴꦫꦮꦶꦥꦠ꧀ꦠꦶꦁ. ꦱꦠ꧀ꦠꦤ꧀ꦤꦁ ꦄꦴꦥꦠ꧀ꦠꦶꦏ꧀ꦑꦤ꧀ꦣꦴꦤꦁ ꦢ꧀ꦮꦷꦲꦶ ꦄꦴꦥꦠ꧀ꦠꦶꦏ꧀ꦑꦤ꧀ꦣꦺꦲꦶ ꦱꦔ꧀ꦒꦲꦶꦠꦴ – ꦱꦶꦪꦴ ꦥꦴꦕꦶꦠ꧀ꦠꦶꦪꦴꦥꦠ꧀ꦠꦶꦏ꧀ꦑꦤ꧀ꦣꦺꦤ, ꦱꦶꦪꦴ ꦢꦸꦏ꧀ꦏꦛꦴꦥꦠ꧀ꦠꦶꦏ꧀ꦑꦤ꧀ꦣꦺꦤ. ꦖꦤ꧀ꦤꦁ ꦄꦴꦥꦠ꧀ꦠꦶꦱꦩꦸꦛ꧀ꦜꦴꦤꦴꦤꦁ ꦌꦏꦺꦤ ꦱꦩꦸꦛ꧀ꦜꦴꦤꦺꦤ ꦱꦩꦸꦛ꧀ꦜꦤ꧀ꦠꦶ – ꦏꦴꦪꦠꦺꦴ ꦕ ꦮꦴꦕꦠꦺꦴ ꦕ ꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦤ꧀ꦠꦶ. ꦕꦠꦸꦤ꧀ꦤꦁ ꦄꦣꦶꦏꦫꦟꦴꦤꦁ, ꦄꦴꦥꦠ꧀ꦠꦴꦣꦶꦏꦫꦟꦁ. ꦱꦠ꧀ꦠꦤ꧀ꦤꦁ ꦱꦩꦡꦴꦤꦁ ꦠꦷꦲꦶ ꦱꦩꦡꦺꦲꦶ ꦱꦩ꧀ꦩꦤ꧀ꦠꦶ – ꦱꦶꦪꦴ ꦱꦩ꧀ꦩꦸꦑꦴꦮꦶꦤꦪꦺꦤ ꦕ ꦥꦛꦶꦚ꧀ꦚꦴꦠꦏꦫꦟꦺꦤ ꦕ, ꦱꦶꦪꦴ ꦱꦩ꧀ꦩꦸꦑꦴꦮꦶꦤꦪꦺꦤ ꦕ ꦠꦶꦟꦮꦠ꧀ꦡꦴꦫꦏꦺꦤ ꦕ.

꧒꧘꧗. ꦄꦴꦗꦷꦮꦮꦶꦥꦠ꧀ꦠꦶꦥꦕ꧀ꦕꦪꦴ ꦏꦠꦶ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦠꦶ? ꦄꦴꦗꦷꦮꦮꦶꦥꦠ꧀ꦠꦶꦥꦕ꧀ꦕꦪꦴ ꦖ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦠꦶ – ꦄꦴꦗꦷꦮꦲꦺꦠꦸ ꦄꦴꦗꦷꦮꦏꦴꦫꦟꦴ ꦥꦴꦥꦶꦕ꧀ꦖꦺꦴ ꦆꦕ꧀ꦖꦴꦥꦏꦠꦺꦴ ꦄꦱꦤ꧀ꦠꦁ ꦄꦨꦹꦠꦁ ꦈꦠ꧀ꦠꦫꦶꦩꦤꦸꦱ꧀ꦱꦣꦩ꧀ꦩꦁ ꦈꦭ꧀ꦭꦥꦠꦶ, ꦄꦴꦥꦠ꧀ꦠꦶ ꦥꦴꦫꦴꦗꦶꦏꦱ꧀ꦱ; ꦄꦴꦗꦷꦮꦲꦺꦠꦸ ꦄꦴꦗꦷꦮꦏꦴꦫꦟꦴ ꦱꦚ꧀ꦕꦫꦶꦠ꧀ꦠꦁ ꦱꦩꦴꦥꦗ꧀ꦗꦠꦶ, ꦄꦴꦥꦠ꧀ꦠꦶ ꦱꦔ꧀ꦓꦴꦢꦶꦱꦺꦱꦱ꧀ꦱ; ꦄꦴꦗꦷꦮꦲꦺꦠꦸ ꦄꦴꦗꦷꦮꦏꦴꦫꦟꦴ ‘‘ꦪꦺꦴ ꦠꦺ ꦮꦶꦲꦴꦫꦺ ꦮꦱꦠꦶ, ꦱꦺꦴ ꦨꦶꦏ꧀ꦑꦸ ꦄꦫꦲꦴ’’ꦠꦶ ꦨꦟꦠꦶ, ꦥꦛꦶꦮꦶꦗꦴꦤꦤ꧀ꦠꦱ꧀ꦱ ꦄꦴꦥꦠ꧀ꦠꦶ ꦡꦸꦭ꧀ꦭꦕ꧀ꦕꦪꦱ꧀ꦱ; ꦄꦴꦗꦷꦮꦲꦺꦠꦸ ꦄꦴꦗꦷꦮꦏꦴꦫꦟꦴ ꦨꦶꦏ꧀ꦑꦸ ꦥꦟꦷꦠꦨꦺꦴꦗꦤꦴꦤꦶ ꦄꦠ꧀ꦠꦤꦺꦴ ꦄꦠ꧀ꦡꦴꦪ ꦮꦶꦚ꧀ꦚꦴꦥꦺꦠ꧀ꦮꦴ ꦨꦸꦚ꧀ꦗꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ; ꦄꦴꦗꦷꦮꦲꦺꦠꦸ ꦄꦴꦗꦷꦮꦏꦴꦫꦟꦴ ꦨꦶꦏ꧀ꦑꦸꦤꦷ ꦥꦟꦷꦠꦨꦺꦴꦗꦤꦴꦤꦶ ꦄꦠ꧀ꦠꦤꦺꦴ ꦄꦠ꧀ꦡꦴꦪ ꦮꦶꦚ꧀ꦚꦴꦥꦺꦠ꧀ꦮꦴ ꦨꦸꦚ꧀ꦗꦠꦶ, ꦄꦴꦥꦠ꧀ꦠꦶ ꦥꦴꦛꦶꦢꦺꦱꦤꦷꦪꦱ꧀ꦱ; ꦄꦴꦗꦷꦮꦲꦺꦠꦸ ꦄꦴꦗꦷꦮꦏꦴꦫꦟꦴ ꦱꦹꦥꦁ ꦮꦴ ꦎꦢꦤꦁ ꦮꦴ ꦄꦒꦶꦭꦴꦤꦺꦴ ꦄꦠ꧀ꦠꦤꦺꦴ ꦄꦠ꧀ꦡꦴꦪ ꦮꦶꦚ꧀ꦚꦴꦥꦺꦠ꧀ꦮꦴ ꦨꦸꦚ꧀ꦗꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ – ꦄꦴꦗꦷꦮꦮꦶꦥꦠ꧀ꦠꦶꦥꦕ꧀ꦕꦪꦴ ꦆꦩꦴ ꦖ ꦄꦴꦥꦠ꧀ꦠꦶꦪꦺꦴ ꦄꦴꦥꦗ꧀ꦗꦠꦶ.

ꦠꦴ ꦄꦴꦥꦠ꧀ꦠꦶꦪꦺꦴ ꦕꦠꦸꦤ꧀ꦤꦁ ꦮꦶꦥꦠ꧀ꦠꦷꦤꦁ ꦏꦠꦶ ꦮꦶꦥꦠ꧀ꦠꦶꦪꦺꦴ ꦨꦗꦤ꧀ꦠꦶ…ꦥꦺ… ꦱꦠ꧀ꦠꦤ꧀ꦤꦁ ꦱꦩꦡꦴꦤꦁ ꦏꦠꦶꦲꦶ ꦱꦩꦡꦺꦲꦶ ꦱꦩ꧀ꦩꦤ꧀ꦠꦶ. ꦠꦴ ꦄꦴꦥꦠ꧀ꦠꦶꦪꦺꦴ ꦕꦠꦸꦤ꧀ꦤꦁ ꦮꦶꦥꦠ꧀ꦠꦷꦤꦁ ꦢ꧀ꦮꦺ ꦮꦶꦥꦠ꧀ꦠꦶꦪꦺꦴ ꦨꦗꦤ꧀ꦠꦶ – ꦱꦶꦪꦴ ꦱꦷꦭꦮꦶꦥꦠ꧀ꦠꦶꦁ, ꦱꦶꦪꦴ ꦄꦴꦕꦴꦫꦮꦶꦥꦠ꧀ꦠꦶꦁ. ꦱꦠ꧀ꦠꦤ꧀ꦤꦁ ꦄꦴꦥꦠ꧀ꦠꦶꦏ꧀ꦑꦤ꧀ꦣꦴꦤꦁ ꦖꦲꦶ ꦄꦴꦥꦠ꧀ꦠꦶꦏ꧀ꦑꦤ꧀ꦣꦺꦲꦶ ꦱꦔ꧀ꦒꦲꦶꦠꦴ – ꦱꦶꦪꦴ ꦥꦴꦫꦴꦗꦶꦏꦴꦥꦠ꧀ꦠꦶꦏ꧀ꦑꦤ꧀ꦣꦺꦤ, ꦱꦶꦪꦴ ꦱꦔ꧀ꦓꦴꦢꦶꦱꦺꦱꦴꦥꦠ꧀ꦠꦶꦏ꧀ꦑꦤ꧀ꦣꦺꦤ, ꦱꦶꦪꦴ ꦡꦸꦭ꧀ꦭꦕ꧀ꦕꦪꦴꦥꦠ꧀ꦠꦶꦏ꧀ꦑꦤ꧀ꦣꦺꦤ, ꦱꦶꦪꦴ ꦥꦴꦕꦶꦠ꧀ꦠꦶꦪꦴꦥꦠ꧀ꦠꦶꦏ꧀ꦑꦤ꧀ꦣꦺꦤ, ꦱꦶꦪꦴ ꦥꦴꦛꦶꦢꦺꦱꦤꦷꦪꦴꦥꦠ꧀ꦠꦶꦏ꧀ꦑꦤ꧀ꦣꦺꦤ, ꦱꦶꦪꦴ ꦢꦸꦏ꧀ꦏꦛꦴꦥꦠ꧀ꦠꦶꦏ꧀ꦑꦤ꧀ꦣꦺꦤ. ꦖꦤ꧀ꦤꦁ ꦄꦴꦥꦠ꧀ꦠꦶꦱꦩꦸꦛ꧀ꦜꦴꦤꦴꦤꦁ ꦖꦲꦶ ꦱꦩꦸꦛ꧀ꦜꦴꦤꦺꦲꦶ ꦱꦩꦸꦛ꧀ꦜꦤ꧀ꦠꦶ – ꦱꦶꦪꦴ ꦏꦴꦪꦠꦺꦴ ꦱꦩꦸꦛ꧀ꦜꦤ꧀ꦠꦶ, ꦤ ꦮꦴꦕꦠꦺꦴ ꦤ ꦕꦶꦠ꧀ꦠꦠꦺꦴ; ꦱꦶꦪꦴ ꦮꦴꦕꦠꦺꦴ ꦱꦩꦸꦛ꧀ꦜꦤ꧀ꦠꦶ, ꦤ ꦏꦴꦪꦠꦺꦴ ꦤ ꦕꦶꦠ꧀ꦠꦠꦺꦴ; ꦱꦶꦪꦴ ꦏꦴꦪꦠꦺꦴ ꦕ ꦮꦴꦕꦠꦺꦴ ꦕ ꦱꦩꦸꦛ꧀ꦜꦤ꧀ꦠꦶ, ꦤ ꦕꦶꦠ꧀ꦠꦠꦺꦴ; ꦱꦶꦪꦴ ꦏꦴꦪꦠꦺꦴ ꦕ ꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦤ꧀ꦠꦶ, ꦤ ꦮꦴꦕꦠꦺꦴ; ꦱꦶꦪꦴ ꦮꦴꦕꦠꦺꦴ ꦕ ꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦤ꧀ꦠꦶ, ꦤ ꦏꦴꦪꦠꦺꦴ; ꦱꦶꦪꦴ ꦏꦴꦪꦠꦺꦴ ꦕ ꦮꦴꦕꦠꦺꦴ ꦕ ꦕꦶꦠ꧀ꦠꦠꦺꦴ ꦕ ꦱꦩꦸꦛ꧀ꦜꦤ꧀ꦠꦶ. ꦕꦠꦸꦤ꧀ꦤꦁ ꦄꦣꦶꦏꦫꦟꦴꦤꦁ, ꦄꦴꦥꦠ꧀ꦠꦴꦣꦶꦏꦫꦟꦁ. ꦱꦠ꧀ꦠꦤ꧀ꦤꦁ ꦱꦩꦡꦴꦤꦁ ꦠꦷꦲꦶ ꦱꦩꦡꦺꦲꦶ ꦱꦩ꧀ꦩꦤ꧀ꦠꦶ – ꦱꦶꦪꦴ ꦱꦩ꧀ꦩꦸꦑꦴꦮꦶꦤꦪꦺꦤ ꦕ ꦥꦛꦶꦚ꧀ꦚꦴꦠꦏꦫꦟꦺꦤ ꦕ, ꦱꦶꦪꦴ ꦱꦩ꧀ꦩꦸꦑꦴꦮꦶꦤꦪꦺꦤ ꦕ ꦠꦶꦟꦮꦠ꧀ꦡꦴꦫꦏꦺꦤ ꦕ.

ꦮꦶꦥꦠ꧀ꦠꦶꦥꦕ꧀ꦕꦪꦮꦴꦫꦺꦴ ꦤꦶꦛ꧀ꦜꦶꦠꦺꦴ ꦕꦠꦸꦠ꧀ꦡꦺꦴ.