꧘. ꦈꦥꦏ꧀ꦑꦛꦱꦶꦏ꧀ꦑꦴꦥꦢꦁ

꧕꧒꧗. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦚ꧀ꦚꦠꦫꦺꦴ ꦥꦸꦫꦶꦱꦺꦴ ꦥꦗꦴꦥꦠꦶꦁ ꦌꦠꦢꦮꦺꦴꦕ – ‘‘ꦄꦪ꧀ꦪꦁ ꦈꦥꦤꦤ꧀ꦢꦁ ꦕꦷꦮꦫꦺꦤ ꦄꦕ꧀ꦖꦴꦢꦺꦱ꧀ꦱꦴꦩꦷ’’ꦠꦶ. ꦄꦱ꧀ꦱꦺꦴꦱꦶ ꦑꦺꦴ ꦄꦚ꧀ꦚꦠꦫꦺꦴ ꦥꦶꦟ꧀ꦝꦕꦴꦫꦶꦏꦺꦴ ꦨꦶꦏ꧀ꦑꦸ ꦠꦱ꧀ꦱ ꦥꦸꦫꦶꦱꦱ꧀ꦱ ꦆꦩꦁ ꦮꦴꦕꦁ ꦨꦴꦱꦩꦴꦤꦱ꧀ꦱ. ꦄꦡ ꦑꦺꦴ ꦱꦺꦴ ꦨꦶꦏ꧀ꦑꦸ ꦪꦺꦤꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦈꦥꦤꦤ꧀ꦢꦁ ꦱꦏ꧀ꦪꦥꦸꦠ꧀ꦠꦁ ꦌꦠꦢꦮꦺꦴꦕ – ‘‘ꦩꦲꦴꦥꦸꦚ꧀ꦚꦺꦴꦱꦶ ꦠ꧀ꦮꦁ, ꦄꦴꦮꦸꦱꦺꦴ ꦈꦥꦤꦤ꧀ꦢ, ꦄꦩꦸꦏꦱ꧀ꦩꦶꦁ ꦎꦏꦴꦱꦺ ꦄꦚ꧀ꦚꦠꦫꦺꦴ ꦥꦸꦫꦶꦱꦺꦴ ꦥꦗꦴꦥꦠꦶꦁ ꦌꦠꦢꦮꦺꦴꦕ – ‘‘ꦄꦪ꧀ꦪꦁ ꦈꦥꦤꦤ꧀ꦢꦁ ꦕꦷꦮꦫꦺꦤ ꦄꦕ꧀ꦖꦴꦢꦺꦱ꧀ꦱꦴꦩꦷ’’’ꦠꦶ. ‘‘ꦄꦠ꧀ꦡꦴꦮꦸꦱꦺꦴ, ꦩꦁ ꦱꦺꦴ ꦈꦥꦛ꧀ꦜꦴꦏꦺꦴ’’ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ ꦪꦺꦤ ꦱꦺꦴ ꦥꦸꦫꦶꦱꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦠꦁ ꦥꦸꦫꦶꦱꦁ ꦌꦠꦢꦮꦺꦴꦕ – ‘‘ꦱꦕ꧀ꦕꦁ ꦏꦶꦫ ꦩꦁ ꦠ꧀ꦮꦁ, ꦄꦴꦮꦸꦱꦺꦴ, ꦕꦷꦮꦫꦺꦤ ꦄꦕ꧀ꦖꦴꦢꦺꦠꦸꦏꦴꦩꦺꦴꦱꦷ’’ꦠꦶ? ‘‘ꦄꦥꦶ ꦩꦺꦪ꧀ꦪ, ꦌꦮꦁ ꦲꦺꦴꦠꦶ – ‘ꦄꦪ꧀ꦪꦁ ꦈꦥꦤꦤ꧀ꦢꦁ ꦕꦷꦮꦫꦺꦤ ꦄꦕ꧀ꦖꦴꦢꦺꦱ꧀ꦱꦴꦩꦷ’’’ꦠꦶ. ‘‘ꦱꦕꦺ ꦑꦺꦴ ꦩꦁ ꦠ꧀ꦮꦁ, ꦄꦴꦮꦸꦱꦺꦴ, ꦕꦷꦮꦫꦺꦤ ꦄꦕ꧀ꦖꦴꦢꦺꦠꦸꦏꦴꦩꦺꦴꦱꦶ, ꦌꦮꦫꦹꦥꦺꦤ ꦕꦷꦮꦫꦺꦤ ꦄꦕ꧀ꦖꦴꦢꦺꦲꦶ. ꦏ꧀ꦪꦴꦲꦁ ꦠꦺꦤ ꦄꦕ꧀ꦖꦤ꧀ꦤꦺꦴꦥꦶ ꦏꦫꦶꦱ꧀ꦱꦴꦩꦶ ꦪꦴꦲꦁ ꦤ ꦥꦫꦶꦨꦸꦚ꧀ꦗꦶꦱ꧀ꦱꦴꦩꦷ’’ꦠꦶ.

ꦄꦡ ꦑꦺꦴ ꦱꦺꦴ ꦥꦸꦫꦶꦱꦺꦴ ꦈꦗ꧀ꦙꦴꦪꦠꦶ ꦑꦶꦪ꧀ꦪꦠꦶ ꦮꦶꦥꦴꦕꦺꦠꦶ – ‘‘ꦩꦲꦶꦕ꧀ꦖꦴ ꦆꦩꦺ ꦱꦩꦟꦴ ꦱꦏ꧀ꦪꦥꦸꦠ꧀ꦠꦶꦪꦴ ꦄꦱꦤ꧀ꦠꦸꦛ꧀ꦜꦴ. ꦤꦪꦶꦩꦺ ꦱꦸꦏꦫꦴ ꦕꦷꦮꦫꦺꦤ ꦄꦕ꧀ꦖꦴꦢꦺꦠꦸꦁ. ꦏꦡꦚ꧀ꦲꦶ ꦤꦴꦩ ꦄꦪ꧀ꦪꦺꦴ ꦈꦥꦤꦤ꧀ꦢꦺꦴ ꦩꦪꦴ ꦥꦸꦧ꧀ꦧꦺ ꦄꦥ꧀ꦥꦮꦴꦫꦶꦠꦺꦴ ꦩꦁ ꦈꦥꦱꦔ꧀ꦏꦩꦶꦠ꧀ꦮꦴ ꦕꦷꦮꦫꦺ ꦮꦶꦏꦥ꧀ꦥꦁ ꦄꦴꦥꦗ꧀ꦗꦶꦱ꧀ꦱꦠꦷ’’ꦠꦶ! ꦄꦱ꧀ꦱꦺꦴꦱꦸꦁ ꦑꦺꦴ ꦨꦶꦏ꧀ꦑꦹ ꦠꦱ꧀ꦱ ꦥꦸꦫꦶꦱꦱ꧀ꦱ ꦈꦗ꧀ꦙꦴꦪꦤ꧀ꦠꦱ꧀ꦱ ꦑꦶꦪ꧀ꦪꦤ꧀ꦠꦱ꧀ꦱ ꦮꦶꦥꦴꦕꦺꦤ꧀ꦠꦱ꧀ꦱ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪ꧀ꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ ꦥꦸꦧ꧀ꦧꦺ ꦄꦥ꧀ꦥꦮꦴꦫꦶꦠꦺꦴ ꦒꦲꦥꦠꦶꦏꦁ ꦈꦥꦱꦔ꧀ꦏꦩꦶꦠ꧀ꦮꦴ ꦕꦷꦮꦫꦺ ꦮꦶꦏꦥ꧀ꦥꦁ ꦄꦴꦥꦗ꧀ꦗꦶꦱ꧀ꦱꦠꦷ’’ꦠꦶ! ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦤ꧀ꦠꦁ ꦈꦥꦤꦤ꧀ꦢꦁ ꦱꦏ꧀ꦪꦥꦸꦠ꧀ꦠꦁ ꦄꦤꦺꦏꦥꦫꦶꦪꦴꦪꦺꦤ ꦮꦶꦒꦫꦲꦶꦠ꧀ꦮꦴ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ …ꦥꦺ… ‘‘ꦱꦕ꧀ꦕꦁ ꦏꦶꦫ ꦠ꧀ꦮꦁ, ꦈꦥꦤꦤ꧀ꦢ, ꦥꦸꦧ꧀ꦧꦺ ꦄꦥ꧀ꦥꦮꦴꦫꦶꦠꦺꦴ ꦒꦲꦥꦠꦶꦏꦁ ꦈꦥꦱꦔ꧀ꦏꦩꦶꦠ꧀ꦮꦴ ꦕꦷꦮꦫꦺ ꦮꦶꦏꦥ꧀ꦥꦁ ꦄꦴꦥꦗ꧀ꦗꦱꦷ’’ꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ‘‘ꦚꦴꦠꦏꦺꦴ ꦠꦺ, ꦈꦥꦤꦤ꧀ꦢ, ꦄꦚ꧀ꦚꦴꦠꦏꦺꦴ’’ꦠꦶ? ‘‘ꦄꦚ꧀ꦚꦴꦠꦏꦺꦴ, ꦨꦒꦮꦴ’’ꦠꦶ. ‘‘ꦄꦚ꧀ꦚꦴꦠꦏꦺꦴ, ꦩꦺꦴꦓꦥꦸꦫꦶꦱ, ꦄꦚ꧀ꦚꦴꦠꦏꦱ꧀ꦱ ꦤ ꦗꦴꦤꦴꦠꦶ ꦥꦠꦶꦫꦹꦥꦁ ꦮꦴ ꦄꦥ꧀ꦥꦠꦶꦫꦹꦥꦁ ꦮꦴ ꦱꦤ꧀ꦠꦁ ꦮꦴ ꦄꦱꦤ꧀ꦠꦁ ꦮꦴ. ꦠꦠ꧀ꦡ ꦤꦴꦩ ꦠ꧀ꦮꦁ, ꦩꦺꦴꦓꦥꦸꦫꦶꦱ, ꦥꦸꦧ꧀ꦧꦺ ꦄꦥ꧀ꦥꦮꦴꦫꦶꦠꦺꦴ ꦄꦚ꧀ꦚꦴꦠꦏꦁ ꦒꦲꦥꦠꦶꦏꦁ ꦈꦥꦱꦔ꧀ꦏꦩꦶꦠ꧀ꦮꦴ ꦕꦷꦮꦫꦺ ꦮꦶꦏꦥ꧀ꦥꦁ ꦄꦴꦥꦗ꧀ꦗꦶꦱ꧀ꦱꦱꦶ! ꦤꦺꦠꦁ, ꦩꦺꦴꦓꦥꦸꦫꦶꦱ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴꦡ –

꧕꧒꧘. ‘‘ꦨꦶꦏ꧀ꦑꦸꦁ ꦥꦤꦺꦮ ꦈꦢ꧀ꦢꦶꦱ꧀ꦱ ꦄꦚ꧀ꦚꦴꦠꦏꦱ꧀ꦱ ꦒꦲꦥꦠꦶꦱ꧀ꦱ ꦮꦴ ꦒꦲꦥꦠꦴꦤꦶꦪꦴ ꦮꦴ ꦕꦷꦮꦫꦕꦺꦠꦴꦥꦤ꧀ꦤꦁ [ꦕꦷꦮꦫꦕꦺꦠꦴꦥꦤꦁ (ꦱ꧀ꦪꦴ.)] ꦈꦥꦏ꧀ꦑꦛꦁ ꦲꦺꦴꦠꦶ – ‘ꦆꦩꦶꦤꦴ ꦕꦷꦮꦫꦕꦺꦠꦴꦥꦤ꧀ꦤꦺꦤ ꦕꦷꦮꦫꦁ ꦕꦺꦠꦴꦥꦺꦠ꧀ꦮꦴ ꦆꦠ꧀ꦡꦤ꧀ꦤꦴꦩꦁ ꦨꦶꦏ꧀ꦑꦸꦁ ꦕꦷꦮꦫꦺꦤ ꦄꦕ꧀ꦖꦴꦢꦺꦱ꧀ꦱꦴꦩꦷ’ꦠꦶ; ꦠꦠ꧀ꦫ ꦕꦺ ꦱꦺꦴ ꦨꦶꦏ꧀ꦑꦸ ꦥꦸꦧ꧀ꦧꦺ ꦄꦥ꧀ꦥꦮꦴꦫꦶꦠꦺꦴ ꦈꦥꦱꦔ꧀ꦏꦩꦶꦠ꧀ꦮꦴ ꦕꦷꦮꦫꦺ ꦮꦶꦏꦥ꧀ꦥꦁ ꦄꦴꦥꦗ꧀ꦗꦺꦪ꧀ꦪ – ‘ꦱꦴꦣꦸ ꦮꦠ ꦩꦁ ꦄꦴꦪꦱ꧀ꦩꦴ ꦆꦩꦶꦤꦴ ꦕꦷꦮꦫꦕꦺꦠꦴꦥꦤ꧀ꦤꦺꦤ ꦌꦮꦫꦹꦥꦁ ꦮꦴ ꦌꦮꦫꦹꦥꦁ ꦮꦴ ꦕꦷꦮꦫꦁ ꦕꦺꦠꦴꦥꦺꦠ꧀ꦮꦴ ꦄꦕ꧀ꦖꦴꦢꦺꦲꦷ’ꦠꦶ, ꦏꦭ꧀ꦪꦴꦟꦏꦩ꧀ꦪꦠꦁ ꦈꦥꦴꦢꦴꦪ, ꦤꦶꦱ꧀ꦱꦒ꧀ꦒꦶꦪꦁ ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧕꧒꧙. ꦨꦶꦏ꧀ꦑꦸꦁ ꦥꦤꦺꦮ ꦈꦢ꧀ꦢꦶꦱ꧀ꦱꦴꦠꦶ ꦨꦶꦏ꧀ꦑꦸꦱ꧀ꦱꦠ꧀ꦡꦴꦪ, ꦨꦶꦏ꧀ꦑꦸꦁ ꦄꦴꦫꦩ꧀ꦩꦟꦁ ꦏꦫꦶꦠ꧀ꦮꦴ, ꦨꦶꦏ꧀ꦑꦸꦁ ꦄꦕ꧀ꦖꦴꦢꦺꦠꦸꦏꦴꦩꦺꦴ.

ꦄꦚ꧀ꦚꦴꦠꦏꦺꦴ ꦤꦴꦩ ꦩꦴꦠꦶꦠꦺꦴ ꦮꦴ ꦥꦶꦠꦶꦠꦺꦴ ꦮꦴ ꦪꦴꦮ ꦱꦠ꧀ꦠꦩꦴ ꦥꦶꦠꦴꦩꦲꦪꦸꦒꦴ ꦄꦱꦩ꧀ꦧꦢ꧀ꦣꦺꦴ.

ꦒꦲꦥꦠꦶ ꦤꦴꦩ ꦪꦺꦴ ꦏꦺꦴꦕꦶ ꦄꦒꦴꦫꦁ ꦄꦗ꧀ꦙꦴꦮꦱꦠꦶ.

ꦒꦲꦥꦠꦴꦤꦷ ꦤꦴꦩ ꦪꦴ ꦏꦴꦕꦶ ꦄꦒꦴꦫꦁ ꦄꦗ꧀ꦙꦴꦮꦱꦠꦶ.

ꦕꦷꦮꦫꦕꦺꦠꦴꦥꦤ꧀ꦤꦁ ꦤꦴꦩ ꦲꦶꦫꦚ꧀ꦚꦁ ꦮꦴ ꦱꦸꦮꦟ꧀ꦟꦁ ꦮꦴ ꦩꦸꦠ꧀ꦠꦴ ꦮꦴ ꦩꦟꦶ ꦮꦴ ꦥꦮꦴꦭ꦳ꦺꦴ ꦮꦴ ꦦꦭꦶꦏꦺꦴ ꦮꦴ ꦥꦛꦏꦺꦴ ꦮꦴ ꦱꦸꦠ꧀ꦠꦁ ꦮꦴ ꦏꦥ꧀ꦥꦴꦱꦺꦴ ꦮꦴ.

ꦆꦩꦶꦤꦴ ꦕꦷꦮꦫꦕꦺꦠꦴꦥꦤ꧀ꦤꦺꦤꦴꦠꦶ ꦥꦕ꧀ꦕꦸꦥꦛ꧀ꦜꦶꦠꦺꦤ.

ꦕꦺꦠꦴꦥꦺꦠ꧀ꦮꦴꦠꦶ ꦥꦫꦶꦮꦠ꧀ꦠꦺꦠ꧀ꦮꦴ.

ꦄꦕ꧀ꦖꦴꦢꦺꦱ꧀ꦱꦴꦩꦷꦠꦶ ꦢꦱ꧀ꦱꦴꦩꦶ.

ꦠꦠ꧀ꦫ ꦕꦺ ꦱꦺꦴ ꦨꦶꦏ꧀ꦑꦹꦠꦶ ꦪꦁ ꦨꦶꦏ꧀ꦑꦸꦁ ꦈꦢ꧀ꦢꦶꦱ꧀ꦱ ꦕꦷꦮꦫꦕꦺꦠꦴꦥꦤ꧀ꦤꦁ ꦈꦥꦏ꧀ꦑꦛꦁ ꦲꦺꦴꦠꦶ ꦱꦺꦴ ꦨꦶꦏ꧀ꦑꦸ.

ꦥꦸꦧ꧀ꦧꦺ ꦄꦥ꧀ꦥꦮꦴꦫꦶꦠꦺꦴꦠꦶ ꦥꦸꦧ꧀ꦧꦺ ꦄꦮꦸꦠ꧀ꦠꦺꦴ ꦲꦺꦴꦠꦶ – ‘‘ꦏꦷꦢꦶꦱꦺꦤ ꦠꦺ, ꦨꦤ꧀ꦠꦺ, ꦕꦷꦮꦫꦺꦤ ꦄꦠ꧀ꦡꦺꦴ, ꦏꦷꦢꦶꦱꦁ ꦠꦺ ꦕꦷꦮꦫꦁ ꦕꦺꦠꦴꦥꦺꦩꦷ’’ꦠꦶ?

ꦈꦥꦱꦔ꧀ꦏꦩꦶꦠ꧀ꦮꦴꦠꦶ ꦓꦫꦁ ꦒꦤ꧀ꦠ꧀ꦮꦴ ꦪꦠ꧀ꦡ ꦏꦠ꧀ꦡꦕꦶ ꦈꦥꦱꦔ꧀ꦏꦩꦶꦠ꧀ꦮꦴ .

ꦕꦷꦮꦫꦺ ꦮꦶꦏꦥ꧀ꦥꦁ ꦄꦴꦥꦗ꧀ꦗꦺꦪ꧀ꦪꦴꦠꦶ ꦄꦴꦪꦠꦁ ꦮꦴ ꦲꦺꦴꦠꦸ ꦮꦶꦠ꧀ꦡꦠꦁ ꦮꦴ ꦄꦥ꧀ꦥꦶꦠꦁ ꦮꦴ ꦱꦟ꧀ꦲꦁ ꦮꦴ.

ꦆꦩꦶꦤꦴ ꦕꦷꦮꦫꦕꦺꦠꦴꦥꦤ꧀ꦤꦺꦤꦴꦠꦶ ꦥꦕ꧀ꦕꦸꦥꦛ꧀ꦜꦶꦠꦺꦤ.

ꦌꦮꦫꦹꦥꦁ ꦮꦴ ꦌꦮꦫꦹꦥꦁ ꦮꦴꦠꦶ. ꦄꦴꦪꦠꦁ ꦮꦴ ꦮꦶꦠ꧀ꦡꦠꦁ ꦮꦴ ꦄꦥ꧀ꦥꦶꦠꦁ ꦮꦴ ꦱꦟ꧀ꦲꦁ ꦮꦴ.

ꦕꦺꦠꦴꦥꦺꦠ꧀ꦮꦴꦠꦶ ꦥꦫꦶꦮꦠ꧀ꦠꦺꦠ꧀ꦮꦴ.

ꦄꦕ꧀ꦖꦴꦢꦺꦲꦷꦠꦶ ꦢꦗ꧀ꦗꦺꦲꦶ.

ꦏꦭ꧀ꦪꦴꦟꦏꦩ꧀ꦪꦠꦁ ꦈꦥꦴꦢꦴꦪꦴꦠꦶ ꦱꦴꦣꦠ꧀ꦡꦶꦏꦺꦴ [ꦱꦴꦣꦸꦠ꧀ꦡꦶꦏꦺꦴ (ꦱ꧀ꦪꦴ.)] ꦩꦲꦒ꧀ꦓꦠ꧀ꦡꦶꦏꦺꦴ. ꦠꦱ꧀ꦱ ꦮꦕꦤꦺꦤ ꦄꦴꦪꦠꦁ ꦮꦴ ꦮꦶꦠ꧀ꦡꦠꦁ ꦮꦴ ꦄꦥ꧀ꦥꦶꦠꦁ ꦮꦴ ꦱꦟ꧀ꦲꦁ ꦮꦴ ꦕꦺꦠꦴꦥꦺꦠꦶ, ꦥꦪꦺꦴꦒꦺ ꦢꦸꦏ꧀ꦏꦛꦁ. ꦥꦛꦶꦭꦴꦨꦺꦤ ꦤꦶꦱ꧀ꦱꦒ꧀ꦒꦶꦪꦁ ꦲꦺꦴꦠꦶ. ꦤꦶꦱ꧀ꦱꦗ꧀ꦗꦶꦠꦧ꧀ꦧꦁ ꦱꦔ꧀ꦓꦱ꧀ꦱ ꦮꦴ ꦒꦟꦱ꧀ꦱ ꦮꦴ ꦥꦸꦒ꧀ꦒꦭꦱ꧀ꦱ ꦮꦴ. ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦤꦶꦱ꧀ꦱꦗ꧀ꦗꦶꦠꦧ꧀ꦧꦁ…ꦥꦺ… ꦆꦢꦁ ꦩꦺ, ꦨꦤ꧀ꦠꦺ, ꦕꦷꦮꦫꦁ ꦥꦸꦧ꧀ꦧꦺ ꦄꦥ꧀ꦥꦮꦴꦫꦶꦠꦺꦴ ꦄꦚ꧀ꦚꦴꦠꦏꦁ ꦒꦲꦥꦠꦶꦏꦁ ꦈꦥꦱꦔ꧀ꦏꦩꦶꦠ꧀ꦮꦴ ꦕꦷꦮꦫꦺ ꦮꦶꦏꦥ꧀ꦥꦁ ꦄꦴꦥꦤ꧀ꦤꦁ ꦤꦶꦱ꧀ꦱꦒ꧀ꦒꦶꦪꦁ, ꦆꦩꦴꦲꦁ ꦱꦔ꧀ꦓꦱ꧀ꦱ ꦤꦶꦱ꧀ꦱꦗ꧀ꦗꦴꦩꦷꦠꦶ…ꦥꦺ… ꦢꦢꦺꦪ꧀ꦪꦴꦠꦶ…ꦥꦺ… ꦢꦢꦺꦪ꧀ꦪꦸꦤ꧀ꦠꦶ…ꦥꦺ… ꦄꦴꦪꦱ꧀ꦩꦠꦺꦴ ꦢꦩ꧀ꦩꦷꦠꦶ.

꧕꧓꧐. ꦄꦚ꧀ꦚꦴꦠꦏꦺ ꦄꦚ꧀ꦚꦴꦠꦏꦱꦚ꧀ꦚꦷ ꦥꦸꦧ꧀ꦧꦺ ꦄꦥ꧀ꦥꦮꦴꦫꦶꦠꦺꦴ ꦒꦲꦥꦠꦶꦏꦁ ꦈꦥꦱꦔ꧀ꦏꦩꦶꦠ꧀ꦮꦴ ꦕꦷꦮꦫꦺ ꦮꦶꦏꦥ꧀ꦥꦁ ꦄꦴꦥꦗ꧀ꦗꦠꦶ, ꦤꦶꦱ꧀ꦱꦒ꧀ꦒꦶꦪꦁ ꦥꦴꦕꦶꦠ꧀ꦠꦶꦪꦁ. ꦄꦚ꧀ꦚꦴꦠꦏꦺ ꦮꦺꦩꦠꦶꦏꦺꦴ ꦥꦸꦧ꧀ꦧꦺ ꦄꦥ꧀ꦥꦮꦴꦫꦶꦠꦺꦴ ꦒꦲꦥꦠꦶꦏꦁ ꦈꦥꦱꦔ꧀ꦏꦩꦶꦠ꧀ꦮꦴ ꦕꦷꦮꦫꦺ ꦮꦶꦏꦥ꧀ꦥꦁ ꦄꦴꦥꦗ꧀ꦗꦠꦶ, ꦤꦶꦱ꧀ꦱꦒ꧀ꦒꦶꦪꦁ ꦥꦴꦕꦶꦠ꧀ꦠꦶꦪꦁ. ꦄꦚ꧀ꦚꦴꦠꦏꦺ ꦚꦴꦠꦏꦱꦚ꧀ꦚꦷ ꦥꦸꦧ꧀ꦧꦺ ꦄꦥ꧀ꦥꦮꦴꦫꦶꦠꦺꦴ ꦒꦲꦥꦠꦶꦏꦁ ꦈꦥꦱꦔ꧀ꦏꦩꦶꦠ꧀ꦮꦴ ꦕꦷꦮꦫꦺ ꦮꦶꦏꦥ꧀ꦥꦁ ꦄꦴꦥꦗ꧀ꦗꦠꦶ, ꦤꦶꦱ꧀ꦱꦒ꧀ꦒꦶꦪꦁ ꦥꦴꦕꦶꦠ꧀ꦠꦶꦪꦁ.

ꦚꦴꦠꦏꦺ ꦄꦚ꧀ꦚꦴꦠꦏꦱꦚ꧀ꦚꦷ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦚꦴꦠꦏꦺ ꦮꦺꦩꦠꦶꦏꦺꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦚꦴꦠꦏꦺ ꦚꦴꦠꦏꦱꦚ꧀ꦚꦷ, ꦄꦤꦴꦥꦠ꧀ꦠꦶ.

꧕꧓꧑. ꦄꦤꦴꦥꦠ꧀ꦠꦶ ꦚꦴꦠꦏꦴꦤꦁ, ꦥꦮꦴꦫꦶꦠꦴꦤꦁ, ꦄꦚ꧀ꦚꦱ꧀ꦱꦠ꧀ꦡꦴꦪ, ꦄꦠ꧀ꦠꦤꦺꦴ ꦣꦤꦺꦤ, ꦩꦲꦒ꧀ꦓꦁ ꦕꦺꦠꦴꦥꦺꦠꦸꦏꦴꦩꦱ꧀ꦱ ꦄꦥ꧀ꦥꦒ꧀ꦓꦁ ꦕꦺꦠꦴꦥꦺꦠꦶ, ꦈꦩ꧀ꦩꦠ꧀ꦠꦏꦱ꧀ꦱ, ꦄꦴꦢꦶꦏꦩ꧀ꦩꦶꦏꦱ꧀ꦱꦴꦠꦶ.

ꦈꦥꦏ꧀ꦑꦛꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ ꦄꦛ꧀ꦜꦩꦁ.