꧕. ꦕꦷꦮꦫꦥꦛꦶꦒ꧀ꦒꦲꦟꦱꦶꦏ꧀ꦑꦴꦥꦢꦁ

꧕꧐꧘. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦠꦶ ꦮꦺꦭ꦳ꦸꦮꦤꦺ ꦏꦭꦤ꧀ꦢꦏꦤꦶꦮꦴꦥꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦈꦥ꧀ꦥꦭꦮꦟ꧀ꦟꦴ ꦨꦶꦏ꧀ꦑꦸꦤꦷ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ. ꦄꦡ ꦑꦺꦴ ꦈꦥ꧀ꦥꦭꦮꦟ꧀ꦟꦴ ꦨꦶꦏ꧀ꦑꦸꦤꦷ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦱꦴꦮꦠ꧀ꦡꦶꦁ ꦥꦶꦟ꧀ꦝꦴꦪ ꦥꦴꦮꦶꦱꦶ. ꦱꦴꦮꦠ꧀ꦡꦶꦪꦁ ꦥꦶꦟ꧀ꦝꦴꦪ ꦕꦫꦶꦠ꧀ꦮꦴ ꦥꦕ꧀ꦖꦴꦨꦠ꧀ꦠꦁ ꦥꦶꦟ꧀ꦝꦥꦴꦠꦥ꧀ꦥꦛꦶꦏ꧀ꦏꦤ꧀ꦠꦴ ꦪꦺꦤ ꦄꦤ꧀ꦣꦮꦤꦁ ꦠꦺꦤꦸꦥꦱꦔ꧀ꦏꦩꦶ ꦢꦶꦮꦴꦮꦶꦲꦴꦫꦴꦪ. ꦄꦤ꧀ꦣꦮꦤꦁ ꦄꦗ꧀ꦙꦺꦴꦒꦴꦲꦺꦠ꧀ꦮꦴ ꦄꦚ꧀ꦚꦠꦫꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦢꦶꦮꦴꦮꦶꦲꦴꦫꦁ ꦤꦶꦱꦷꦢꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦕꦺꦴꦫꦴ ꦏꦠꦏꦩ꧀ꦩꦴ ꦒꦴꦮꦶꦁ ꦮꦣꦶꦠ꧀ꦮꦴ ꦩꦁꦱꦁ ꦒꦲꦺꦠ꧀ꦮꦴ ꦄꦤ꧀ꦣꦮꦤꦁ ꦥꦮꦶꦱꦶꦁꦱꦸ. ꦄꦢ꧀ꦢꦱꦴ ꦑꦺꦴ ꦕꦺꦴꦫꦒꦴꦩꦟꦶꦏꦺꦴ ꦈꦥ꧀ꦥꦭꦮꦟ꧀ꦟꦁ ꦨꦶꦏ꧀ꦑꦸꦤꦶꦁ ꦄꦚ꧀ꦚꦠꦫꦱ꧀ꦩꦶꦁ ꦫꦸꦏ꧀ꦑꦩꦹꦭꦺ ꦢꦶꦮꦴꦮꦶꦲꦴꦫꦁ ꦤꦶꦱꦶꦤ꧀ꦤꦁ. ꦢꦶꦱ꧀ꦮꦴꦤꦱ꧀ꦱ ꦌꦠꦢꦲꦺꦴꦱꦶ – ‘‘ꦱꦕꦺ ꦩꦺ ꦥꦸꦠ꧀ꦠꦨꦴꦠꦸꦏꦴ ꦥꦱ꧀ꦱꦶꦱ꧀ꦱꦤ꧀ꦠꦶ ꦮꦶꦲꦺꦜꦶꦱ꧀ꦱꦤ꧀ꦠꦶ ꦆꦩꦁ ꦨꦶꦏ꧀ꦑꦸꦤꦶ’’ꦤ꧀ꦠꦶ ꦄꦚ꧀ꦚꦺꦤ ꦩꦒ꧀ꦒꦺꦤ ꦄꦒꦩꦴꦱꦶ. ꦄꦡ ꦑꦺꦴ ꦱꦺꦴ ꦕꦺꦴꦫꦒꦴꦩꦟꦶꦏꦺꦴ ꦩꦁꦱꦺ ꦥꦏ꧀ꦏꦺ ꦮꦫꦩꦁꦱꦴꦤꦶ ꦒꦲꦺꦠ꧀ꦮꦴ ꦥꦟ꧀ꦟꦥꦸꦛꦁ [ꦥꦟ꧀ꦟꦺꦤ ꦥꦸꦛꦁ (ꦱ꧀ꦪꦴ.)] ꦧꦤ꧀ꦣꦶꦠ꧀ꦮꦴ ꦈꦥ꧀ꦥꦭꦮꦟ꧀ꦟꦴꦪ ꦨꦶꦏ꧀ꦑꦸꦤꦶꦪꦴ ꦄꦮꦶꦢꦹꦫꦺ ꦫꦸꦏ꧀ꦑꦺ ꦄꦴꦭꦒ꧀ꦒꦺꦠ꧀ꦮꦴ – ‘‘ꦪꦺꦴ ꦥꦱ꧀ꦱꦠꦶ ꦱꦩꦟꦺꦴ ꦮꦴ ꦧ꧀ꦫꦴꦲ꧀ꦩꦟꦺꦴ ꦮꦴ ꦢꦶꦤ꧀ꦤꦁꦪꦺꦮ ꦲꦫꦠꦹ’’ꦠꦶ, ꦮꦠ꧀ꦮꦴ ꦥꦏ꧀ꦏꦴꦩꦶ. ꦄꦱ꧀ꦱꦺꦴꦱꦶ ꦑꦺꦴ ꦈꦥ꧀ꦥꦭꦮꦟ꧀ꦟꦴ ꦨꦶꦏ꧀ꦑꦸꦤꦷ ꦱꦩꦴꦣꦶꦩ꧀ꦲꦴ ꦮꦸꦛ꧀ꦜꦲꦶꦠ꧀ꦮꦴ ꦠꦱ꧀ꦱ ꦕꦺꦴꦫꦒꦴꦩꦟꦶꦏꦱ꧀ꦱ ꦆꦩꦁ ꦮꦴꦕꦁ ꦨꦴꦱꦩꦴꦤꦱ꧀ꦱ. ꦄꦡ ꦑꦺꦴ ꦈꦥ꧀ꦥꦭꦮꦟ꧀ꦟꦴ ꦨꦶꦏ꧀ꦑꦸꦤꦷ ꦠꦁ ꦩꦁꦱꦁ ꦒꦲꦺꦠ꧀ꦮꦴ ꦈꦥꦱ꧀ꦱꦪꦁ ꦄꦒꦩꦴꦱꦶ. ꦄꦡ ꦑꦺꦴ ꦈꦥ꧀ꦥꦭꦮꦟ꧀ꦟꦴ ꦨꦶꦏ꧀ꦑꦸꦤꦷ ꦠꦱ꧀ꦱꦴ ꦫꦠ꧀ꦠꦶꦪꦴ ꦄꦕ꧀ꦕꦪꦺꦤ ꦠꦁ ꦩꦁꦱꦁ ꦱꦩ꧀ꦥꦴꦢꦺꦠ꧀ꦮꦴ ꦈꦠ꧀ꦠꦫꦴꦱꦔ꧀ꦒꦺꦤ ꦨꦟ꧀ꦝꦶꦏꦁ ꦧꦤ꧀ꦣꦶꦠ꧀ꦮꦴ ꦮꦺꦲꦴꦱꦁ ꦄꦧ꧀ꦨꦸꦒ꧀ꦒꦤ꧀ꦠ꧀ꦮꦴ ꦮꦺꦭ꦳ꦸꦮꦤꦺ ꦥꦕ꧀ꦕꦸꦛ꧀ꦜꦴꦱꦶ [ꦥꦕ꧀ꦕꦸꦥꦛ꧀ꦜꦴꦱꦶ (?)].

ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦒꦮꦴ ꦒꦴꦩꦁ ꦥꦶꦟ꧀ꦝꦴꦪ ꦥꦮꦶꦛ꧀ꦜꦺꦴ ꦲꦺꦴꦠꦶ. ꦄꦴꦪꦱ꧀ꦩꦴ ꦈꦢꦴꦪꦷ ꦎꦲꦶꦪ꧀ꦪꦏꦺꦴ ꦲꦺꦴꦠꦶ ꦮꦶꦲꦴꦫꦥꦴꦭꦺꦴ. ꦄꦡ ꦑꦺꦴ ꦈꦥ꧀ꦥꦭꦮꦟ꧀ꦟꦴ ꦨꦶꦏ꧀ꦑꦸꦤꦷ ꦪꦺꦤꦴꦪꦱ꧀ꦩꦴ ꦈꦢꦴꦪꦷ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦈꦢꦴꦪꦶꦁ ꦌꦠꦢꦮꦺꦴꦕ – ‘‘ꦏꦲꦁ, ꦨꦤ꧀ꦠꦺ, ꦨꦒꦮꦴ’’ꦠꦶ? ‘‘ꦥꦮꦶꦛ꧀ꦜꦺꦴ, ꦨꦒꦶꦤꦶ, ꦨꦒꦮꦴ ꦒꦴꦩꦁ ꦥꦶꦟ꧀ꦝꦴꦪꦴ’’ꦠꦶ. ‘‘ꦆꦩꦁ, ꦨꦤ꧀ꦠꦺ, ꦩꦁꦱꦁ ꦨꦒꦮꦠꦺꦴ ꦢꦺꦲꦷ’’ꦠꦶ. ‘‘ꦱꦤ꧀ꦠꦥ꧀ꦥꦶꦠꦺꦴ ꦠꦪꦴ, ꦨꦒꦶꦤꦶ, ꦨꦒꦮꦴ ꦩꦁꦱꦺꦤ. ꦱꦕꦺ ꦩꦺ ꦠ꧀ꦮꦁ ꦄꦤ꧀ꦠꦫꦮꦴꦱꦏꦁ ꦢꦢꦺꦪ꧀ꦪꦴꦱꦶ, ꦌꦮꦁ ꦄꦲꦩ꧀ꦥꦶ ꦱꦤ꧀ꦠꦥ꧀ꦥꦶꦠꦺꦴ ꦨꦮꦺꦪ꧀ꦪꦁ ꦄꦤ꧀ꦠꦫꦮꦴꦱꦏꦺꦤꦴ’’ꦠꦶ. ‘‘ꦩꦪꦁ ꦑꦺꦴ, ꦨꦤ꧀ꦠꦺ, ꦩꦴꦠꦸꦒꦴꦩꦴ ꦤꦴꦩ ꦏꦶꦕ꧀ꦖꦭꦴꦨꦴ. ꦆꦢꦚ꧀ꦕ ꦩꦺ ꦄꦤ꧀ꦠꦶꦩꦁ ꦥꦚ꧀ꦕꦩꦁ ꦕꦷꦮꦫꦁ. ꦤꦴꦲꦁ ꦢꦱ꧀ꦱꦴꦩꦷ’’ꦠꦶ. ‘‘ꦱꦺꦪ꧀ꦪꦡꦴꦥꦶ, ꦨꦒꦶꦤꦶ, ꦥꦸꦫꦶꦱꦺꦴ ꦲꦠ꧀ꦡꦶꦁ ꦢꦠ꧀ꦮꦴ ꦏꦕ꧀ꦖꦺ ꦱꦗ꧀ꦗꦺꦪ꧀ꦪ [ꦮꦶꦱ꧀ꦱꦗ꧀ꦗꦺꦪ꧀ꦪ (ꦱ꧀ꦪꦴ.)] ꦌꦮꦩꦺꦮ ꦑꦺꦴ ꦠ꧀ꦮꦁ ꦨꦒꦶꦤꦶ ꦨꦒꦮꦠꦺꦴ ꦩꦁꦱꦁ ꦢꦠ꧀ꦮꦴ ꦩꦪꦶ ꦄꦤ꧀ꦠꦫꦮꦴꦱꦏꦺ ꦱꦗ꧀ꦗꦱꦷ’’ꦠꦶ [ꦄꦤ꧀ꦠꦫꦮꦴꦱꦏꦁ ꦤ ꦱꦗ꧀ꦗꦱꦷꦠꦶ (ꦏ.), ꦩꦪ꧀ꦲꦁ ꦄꦤ꧀ꦠꦫꦮꦴꦱꦏꦁ ꦮꦶꦱ꧀ꦱꦗ꧀ꦗꦺꦲꦷꦠꦶ (ꦱ꧀ꦪꦴ.)]. ꦄꦡ ꦑꦺꦴ ꦈꦥ꧀ꦥꦭꦮꦟ꧀ꦟꦴ ꦨꦶꦏ꧀ꦑꦸꦤꦷ ꦄꦴꦪꦱ꧀ꦩꦠꦴ ꦈꦢꦴꦪꦶꦤꦴ ꦤꦶꦥ꧀ꦥꦷꦭ꦳ꦶꦪꦩꦴꦤꦴ ꦄꦤ꧀ꦠꦫꦮꦴꦱꦏꦁ ꦢꦠ꧀ꦮꦴ ꦈꦥꦱ꧀ꦱꦪꦁ ꦄꦒꦩꦴꦱꦶ. ꦨꦶꦏ꧀ꦑꦸꦤꦶꦪꦺꦴ ꦈꦥ꧀ꦥꦭꦮꦟ꧀ꦟꦴꦪ ꦨꦶꦏ꧀ꦑꦸꦤꦶꦪꦴ ꦥꦠ꧀ꦠꦕꦷꦮꦫꦁ ꦥꦛꦶꦒ꧀ꦒꦟ꧀ꦲꦤ꧀ꦠꦶꦪꦺꦴ ꦈꦥ꧀ꦥꦭꦮꦟ꧀ꦟꦁ ꦨꦶꦏ꧀ꦑꦸꦤꦶꦁ ꦌꦠꦢꦮꦺꦴꦕꦸꦁ – ‘‘ꦏꦲꦁ ꦠꦺ, ꦄꦪ꧀ꦪꦺ, ꦄꦤ꧀ꦠꦫꦮꦴꦱꦏꦺꦴ’’ꦠꦶ? ꦈꦥ꧀ꦥꦭꦮꦟ꧀ꦟꦴ ꦨꦶꦏ꧀ꦑꦸꦤꦷ ꦨꦶꦏ꧀ꦑꦸꦤꦷꦤꦁ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦶ. ꦨꦶꦏ꧀ꦑꦸꦤꦶꦪꦺꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦪ꧀ꦪꦺꦴ ꦈꦢꦴꦪꦷ ꦨꦶꦏ꧀ꦑꦸꦤꦶꦪꦴ ꦕꦷꦮꦫꦁ ꦥꦛꦶꦒ꧀ꦒꦲꦺꦱ꧀ꦱꦠꦶ ꦏꦶꦕ꧀ꦖꦭꦴꦨꦺꦴ ꦩꦴꦠꦸꦒꦴꦩꦺꦴ’’ꦠꦶ. ꦄꦡ ꦑꦺꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦨꦶꦏ꧀ꦑꦹꦤꦁ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦴꦪꦱ꧀ꦩꦴ ꦈꦢꦴꦪꦷ ꦨꦶꦏ꧀ꦑꦸꦤꦶꦪꦴ ꦕꦷꦮꦫꦁ ꦥꦛꦶꦒ꧀ꦒꦲꦺꦱ꧀ꦱꦠꦷ’’ꦠꦶ! ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦄꦴꦪꦱ꧀ꦩꦤ꧀ꦠꦁ ꦈꦢꦴꦪꦶꦁ ꦄꦤꦺꦏꦥꦫꦶꦪꦴꦪꦺꦤ ꦮꦶꦒꦫꦲꦶꦠ꧀ꦮꦴ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ‘‘ꦱꦕ꧀ꦕꦁ ꦏꦶꦫ ꦠ꧀ꦮꦁ, ꦈꦢꦴꦪꦶ, ꦨꦶꦏ꧀ꦑꦸꦤꦶꦪꦴ ꦕꦷꦮꦫꦁ ꦥꦛꦶꦒ꧀ꦒꦲꦺꦱꦷ’’ꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ‘‘ꦚꦴꦠꦶꦏꦴ ꦠꦺ, ꦈꦢꦴꦪꦶ, ꦄꦚ꧀ꦚꦴꦠꦶꦏꦴ’’ꦠꦶ? ‘‘ꦄꦚ꧀ꦚꦴꦠꦶꦏꦴ, ꦨꦒꦮꦴ’’ꦠꦶ. ‘‘ꦄꦚ꧀ꦚꦴꦠꦏꦺꦴ, ꦩꦺꦴꦓꦥꦸꦫꦶꦱ, ꦄꦚ꧀ꦚꦴꦠꦶꦏꦴꦪ ꦤ ꦗꦴꦤꦴꦠꦶ ꦥꦠꦶꦫꦹꦥꦁ ꦮꦴ ꦄꦥ꧀ꦥꦠꦶꦫꦹꦥꦁ ꦮꦴ ꦱꦤ꧀ꦠꦁ ꦮꦴ ꦄꦱꦤ꧀ꦠꦁ ꦮꦴ. ꦠꦠ꧀ꦡ ꦤꦴꦩ ꦠ꧀ꦮꦁ, ꦩꦺꦴꦓꦥꦸꦫꦶꦱ, ꦄꦚ꧀ꦚꦴꦠꦶꦏꦴꦪ ꦨꦶꦏ꧀ꦑꦸꦤꦶꦪꦴ ꦲꦠ꧀ꦡꦠꦺꦴ ꦕꦷꦮꦫꦁ ꦥꦛꦶꦒ꧀ꦒꦲꦺꦱ꧀ꦱꦱꦶ! ꦤꦺꦠꦁ ꦩꦺꦴꦓꦥꦸꦫꦶꦱ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴꦡ –

꧕꧐꧙. ‘‘ꦪꦺꦴ ꦥꦤ ꦨꦶꦏ꧀ꦑꦸ ꦄꦚ꧀ꦚꦴꦠꦶꦏꦴꦪ ꦨꦶꦏ꧀ꦑꦸꦤꦶꦪꦴ ꦲꦠ꧀ꦡꦠꦺꦴ ꦕꦷꦮꦫꦁ ꦥꦛꦶꦒ꧀ꦒꦟ꧀ꦲꦺꦪ꧀ꦪ, ꦤꦶꦱ꧀ꦱꦒ꧀ꦒꦶꦪꦁ ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

ꦌꦮꦚ꧀ꦕꦶꦢꦁ ꦨꦒꦮꦠꦴ ꦨꦶꦏ꧀ꦑꦹꦤꦁ ꦱꦶꦏ꧀ꦑꦴꦥꦢꦁ ꦥꦚ꧀ꦚꦠ꧀ꦠꦁ ꦲꦺꦴꦠꦶ.

꧕꧑꧐. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦹ ꦏꦸꦏ꧀ꦏꦸꦕ꧀ꦕꦴꦪꦤ꧀ꦠꦴ ꦨꦶꦏ꧀ꦑꦸꦤꦷꦤꦁ ꦥꦴꦫꦶꦮꦠ꧀ꦠꦏꦕꦷꦮꦫꦁ ꦤ ꦥꦛꦶꦒ꧀ꦒꦟ꧀ꦲꦤ꧀ꦠꦶ. ꦨꦶꦏ꧀ꦑꦸꦤꦶꦪꦺꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦪ꧀ꦪꦴ ꦄꦩ꧀ꦲꦴꦏꦁ ꦥꦴꦫꦶꦮꦠ꧀ꦠꦏꦕꦷꦮꦫꦁ ꦤ ꦥꦛꦶꦒ꧀ꦒꦲꦺꦱ꧀ꦱꦤ꧀ꦠꦷ’’ꦠꦶ! ꦄꦱ꧀ꦱꦺꦴꦱꦸꦁ ꦑꦺꦴ ꦨꦶꦏ꧀ꦑꦹ ꦠꦴꦱꦁ ꦨꦶꦏ꧀ꦑꦸꦤꦷꦤꦁ ꦈꦗ꧀ꦙꦴꦪꦤ꧀ꦠꦷꦤꦁ ꦑꦶꦪ꧀ꦪꦤ꧀ꦠꦷꦤꦁ ꦮꦶꦥꦴꦕꦺꦤ꧀ꦠꦷꦤꦁ. ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦄꦡ ꦑꦺꦴ ꦨꦒꦮꦴ ꦌꦠꦱ꧀ꦩꦶꦁ ꦤꦶꦢꦴꦤꦺ ꦌꦠꦱ꧀ꦩꦶꦁ ꦥꦏꦫꦟꦺ ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦥꦚ꧀ꦕꦤ꧀ꦤꦁ ꦥꦴꦫꦶꦮꦠ꧀ꦠꦏꦁ ꦥꦛꦶꦒ꧀ꦒꦲꦺꦠꦸꦁ – ꦨꦶꦏ꧀ꦑꦸꦱ꧀ꦱ, ꦨꦶꦏ꧀ꦑꦸꦤꦶꦪꦴ, ꦱꦶꦏ꧀ꦑꦩꦴꦤꦴꦪ, ꦱꦴꦩꦟꦺꦫꦱ꧀ꦱ, ꦱꦴꦩꦟꦺꦫꦶꦪꦴ. ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦆꦩꦺꦱꦁ ꦥꦚ꧀ꦕꦤ꧀ꦤꦁ ꦥꦴꦫꦶꦮꦠ꧀ꦠꦏꦁ ꦥꦛꦶꦒ꧀ꦒꦲꦺꦠꦸꦁ. ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴꦡ.

꧕꧑꧑. ‘‘ꦪꦺꦴ ꦥꦤ ꦨꦶꦏ꧀ꦑꦸ ꦄꦚ꧀ꦚꦴꦠꦶꦏꦴꦪ ꦨꦶꦏ꧀ꦑꦸꦤꦶꦪꦴ ꦲꦠ꧀ꦡꦠꦺꦴ ꦕꦷꦮꦫꦁ ꦥꦛꦶꦒ꧀ꦒꦟ꧀ꦲꦺꦪ꧀ꦪ, ꦄꦚ꧀ꦚꦠ꧀ꦫ ꦥꦴꦫꦶꦮꦠ꧀ꦠꦏꦴ, ꦤꦶꦱ꧀ꦱꦒ꧀ꦒꦶꦪꦁ ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧕꧑꧒. ꦪꦺꦴ ꦥꦤꦴꦠꦶ ꦪꦺꦴ ꦪꦴꦢꦶꦱꦺꦴ…ꦥꦺ… ꦨꦶꦏ꧀ꦑꦹꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦺꦴ ꦨꦶꦏ꧀ꦑꦹꦠꦶ.

ꦄꦚ꧀ꦚꦴꦠꦶꦏꦴ ꦤꦴꦩ ꦩꦴꦠꦶꦠꦺꦴ ꦮꦴ ꦥꦶꦠꦶꦠꦺꦴ ꦮꦴ ꦪꦴꦮ ꦱꦠ꧀ꦠꦩꦴ ꦥꦶꦠꦴꦩꦲꦪꦸꦒꦴ ꦄꦱꦩ꧀ꦧꦢ꧀ꦣꦴ.

ꦨꦶꦏ꧀ꦑꦸꦤꦷ ꦤꦴꦩ ꦈꦨꦠꦺꦴꦱꦔ꧀ꦓꦺ ꦈꦥꦱꦩ꧀ꦥꦤ꧀ꦤꦴ.

ꦕꦷꦮꦫꦁ ꦤꦴꦩ ꦖꦤ꧀ꦤꦁ ꦕꦷꦮꦫꦴꦤꦁ ꦄꦚ꧀ꦚꦠꦫꦁ ꦕꦷꦮꦫꦁ ꦮꦶꦏꦥ꧀ꦥꦤꦸꦥꦒꦁ ꦥꦕ꧀ꦖꦶꦩꦁ.

ꦄꦚ꧀ꦚꦠ꧀ꦫ ꦥꦴꦫꦶꦮꦠ꧀ꦠꦏꦴꦠꦶ ꦜꦥꦺꦠ꧀ꦮꦴ ꦥꦴꦫꦶꦮꦠ꧀ꦠꦏꦁ.

ꦥꦛꦶꦒ꧀ꦒꦟ꧀ꦲꦴꦠꦶ, ꦥꦪꦺꦴꦒꦺ ꦢꦸꦏ꧀ꦏꦛꦁ. ꦥꦛꦶꦭꦴꦨꦺꦤ ꦤꦶꦱ꧀ꦱꦒ꧀ꦒꦶꦪꦁ ꦲꦺꦴꦠꦶ. ꦤꦶꦱ꧀ꦱꦗ꧀ꦗꦶꦠꦧ꧀ꦧꦁ ꦱꦔ꧀ꦓꦱ꧀ꦱ ꦮꦴ ꦒꦟꦱ꧀ꦱ ꦮꦴ ꦥꦸꦒ꧀ꦒꦭꦱ꧀ꦱ ꦮꦴ. ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦤꦶꦱ꧀ꦱꦗ꧀ꦗꦶꦠꦧ꧀ꦧꦁ…ꦥꦺ… ꦆꦢꦁ ꦩꦺ, ꦨꦤ꧀ꦠꦺ, ꦕꦷꦮꦫꦁ ꦄꦚ꧀ꦚꦴꦠꦶꦏꦴꦪ ꦨꦶꦏ꧀ꦑꦸꦤꦶꦪꦴ ꦲꦠ꧀ꦡꦠꦺꦴ ꦥꦛꦶꦒ꧀ꦒꦲꦶꦠꦁ, ꦄꦚ꧀ꦚꦠ꧀ꦫ ꦥꦴꦫꦶꦮꦠ꧀ꦠꦏꦴ, ꦤꦶꦱ꧀ꦱꦒ꧀ꦒꦶꦪꦁ. ꦆꦩꦴꦲꦁ ꦱꦔ꧀ꦓꦱ꧀ꦱ ꦤꦶꦱ꧀ꦱꦗ꧀ꦗꦴꦩꦷꦠꦶ…ꦥꦺ… ꦢꦢꦺꦪ꧀ꦪꦴꦠꦶ…ꦥꦺ… ꦢꦢꦺꦪ꧀ꦪꦸꦤ꧀ꦠꦶ…ꦥꦺ… ꦄꦴꦪꦱ꧀ꦩꦠꦺꦴ ꦢꦩ꧀ꦩꦷꦠꦶ.

꧕꧑꧓. ꦄꦚ꧀ꦚꦴꦠꦶꦏꦴꦪ ꦄꦚ꧀ꦚꦴꦠꦶꦏꦱꦚ꧀ꦚꦷ ꦕꦷꦮꦫꦁ ꦥꦛꦶꦒ꧀ꦒꦟ꧀ꦲꦴꦠꦶ, ꦄꦚ꧀ꦚꦠ꧀ꦫ ꦥꦴꦫꦶꦮꦠ꧀ꦠꦏꦴ, ꦤꦶꦱ꧀ꦱꦒ꧀ꦒꦶꦪꦁ ꦥꦴꦕꦶꦠ꧀ꦠꦶꦪꦁ. ꦄꦚ꧀ꦚꦴꦠꦶꦏꦴꦪ ꦮꦺꦩꦠꦶꦏꦺꦴ ꦕꦷꦮꦫꦁ ꦥꦛꦶꦒ꧀ꦒꦟ꧀ꦲꦴꦠꦶ, ꦄꦚ꧀ꦚꦠ꧀ꦫ ꦥꦴꦫꦶꦮꦠ꧀ꦠꦏꦴ, ꦤꦶꦱ꧀ꦱꦒ꧀ꦒꦶꦪꦁ ꦥꦴꦕꦶꦠ꧀ꦠꦶꦪꦁ. ꦄꦚ꧀ꦚꦴꦠꦶꦏꦴꦪ ꦚꦴꦠꦶꦏꦱꦚ꧀ꦚꦷ ꦕꦷꦮꦫꦁ ꦥꦛꦶꦒ꧀ꦒꦟ꧀ꦲꦴꦠꦶ, ꦄꦚ꧀ꦚꦠ꧀ꦫ ꦥꦴꦫꦶꦮꦠ꧀ꦠꦏꦴ, ꦤꦶꦱ꧀ꦱꦒ꧀ꦒꦶꦪꦁ ꦥꦴꦕꦶꦠ꧀ꦠꦶꦪꦁ.

ꦌꦏꦠꦺꦴꦈꦥꦱꦩ꧀ꦥꦤ꧀ꦤꦴꦪ ꦲꦠ꧀ꦡꦠꦺꦴ ꦕꦷꦮꦫꦁ ꦥꦛꦶꦒ꧀ꦒꦟ꧀ꦲꦴꦠꦶ, ꦄꦚ꧀ꦚꦠ꧀ꦫ ꦥꦴꦫꦶꦮꦠ꧀ꦠꦏꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦚꦴꦠꦶꦏꦴꦪ ꦄꦚ꧀ꦚꦴꦠꦶꦏꦱꦚ꧀ꦚꦷ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦚꦴꦠꦶꦏꦴꦪ ꦮꦺꦩꦠꦶꦏꦺꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦚꦴꦠꦶꦏꦴꦪ ꦚꦴꦠꦶꦏꦱꦚ꧀ꦚꦷ, ꦄꦤꦴꦥꦠ꧀ꦠꦶ.

꧕꧑꧔. ꦄꦤꦴꦥꦠ꧀ꦠꦶ ꦚꦴꦠꦶꦏꦴꦪ, ꦥꦴꦫꦶꦮꦠ꧀ꦠꦏꦁ ꦥꦫꦶꦠ꧀ꦠꦺꦤ ꦮꦴ ꦮꦶꦥꦸꦭꦁ, ꦮꦶꦥꦸꦭꦺꦤ ꦮꦴ ꦥꦫꦶꦠ꧀ꦠꦁ, ꦨꦶꦏ꧀ꦑꦸ ꦮꦶꦱ꧀ꦱꦴꦱꦁ ꦒꦟ꧀ꦲꦴꦠꦶ, ꦠꦴꦮꦏꦴꦭꦶꦏꦁ ꦒꦟ꧀ꦲꦴꦠꦶ, ꦕꦷꦮꦫꦁ ꦜꦥꦺꦠ꧀ꦮꦴ ꦄꦚ꧀ꦚꦁ ꦥꦫꦶꦏ꧀ꦑꦴꦫꦁ ꦒꦟ꧀ꦲꦴꦠꦶ, ꦱꦶꦏ꧀ꦑꦩꦴꦤꦴꦪ, ꦱꦴꦩꦟꦺꦫꦶꦪꦴ, ꦈꦩ꧀ꦩꦠ꧀ꦠꦏꦱ꧀ꦱ, ꦄꦴꦢꦶꦏꦩ꧀ꦩꦶꦏꦱ꧀ꦱꦴꦠꦶ.

ꦕꦷꦮꦫꦥꦛꦶꦒ꧀ꦒꦲꦟꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ ꦥꦚ꧀ꦕꦩꦁ.