꧑꧐. ꦥꦫꦶꦟꦠꦱꦶꦏ꧀ꦑꦴꦥꦢꦁ

꧖꧕꧗. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦴꦮꦠ꧀ꦡꦶꦪꦁ ꦄꦚ꧀ꦚꦠꦫꦱ꧀ꦱ ꦥꦹꦒꦱ꧀ꦱ ꦱꦔ꧀ꦓꦱ꧀ꦱ ꦱꦕꦷꦮꦫꦨꦠ꧀ꦠꦁ ꦥꦛꦶꦪꦠ꧀ꦠꦁ ꦲꦺꦴꦠꦶ – ‘‘ꦨꦺꦴꦗꦺꦠ꧀ꦮꦴ ꦕꦷꦮꦫꦺꦤ ꦄꦕ꧀ꦖꦴꦢꦺꦱ꧀ꦱꦴꦩꦴ’’ꦠꦶ. ꦄꦡ ꦑꦺꦴ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦪꦺꦤ ꦱꦺꦴ ꦥꦹꦒꦺꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ; ꦈꦥꦱꦔ꧀ꦏꦩꦶꦠ꧀ꦮꦴ ꦠꦁ ꦥꦹꦒꦁ ꦌꦠꦢꦮꦺꦴꦕꦸꦁ – ‘‘ꦢꦺꦡꦴꦮꦸꦱꦺꦴ, ꦄꦩ꧀ꦲꦴꦏꦁ ꦆꦩꦴꦤꦶ ꦕꦷꦮꦫꦴꦤꦷ’’ꦠꦶ. ‘‘ꦤ ꦩꦪꦁ, ꦨꦤ꧀ꦠꦺ, ꦢꦱ꧀ꦱꦴꦩ. ꦄꦩ꧀ꦲꦴꦏꦁ ꦱꦔ꧀ꦓꦱ꧀ꦱ ꦄꦤꦸꦮꦱ꧀ꦱꦁ ꦱꦕꦷꦮꦫꦨꦶꦏ꧀ꦑꦴ ꦥꦚ꧀ꦚꦠ꧀ꦠꦴ’’ꦠꦶ. ‘‘ꦧꦲꦹ, ꦄꦴꦮꦸꦱꦺꦴ, ꦱꦔ꧀ꦓꦱ꧀ꦱ ꦢꦴꦪꦏꦴ, ꦧꦲꦹ ꦱꦔ꧀ꦓꦱ꧀ꦱ ꦨꦠ꧀ꦠꦴ [ꦨꦢ꧀ꦢꦴ (ꦏ.)]. ꦩꦪꦁ ꦠꦸꦩ꧀ꦲꦺ ꦤꦶꦱ꧀ꦱꦴꦪ ꦠꦸꦩ꧀ꦲꦺ ꦱꦩ꧀ꦥꦱ꧀ꦱꦤ꧀ꦠꦴ ꦆꦣ ꦮꦶꦲꦫꦴꦩ. ꦠꦸꦩ꧀ꦲꦺ ꦕꦺ ꦄꦩ꧀ꦲꦴꦏꦁ ꦤ ꦢꦱ꧀ꦱꦡ, ꦄꦡ ꦏꦺꦴ ꦕꦫꦲꦶ ꦄꦩ꧀ꦲꦴꦏꦁ ꦢꦱ꧀ꦱꦠꦶ? ꦢꦺꦡꦴꦮꦸꦱꦺꦴ, ꦄꦩ꧀ꦲꦴꦏꦁ ꦆꦩꦴꦤꦶ ꦕꦷꦮꦫꦴꦤꦷ’’ꦠꦶ. ꦄꦡ ꦑꦺꦴ ꦱꦺꦴ ꦥꦹꦒꦺꦴ ꦖꦧ꧀ꦧꦒ꧀ꦒꦶꦪꦺꦲꦶ ꦨꦶꦏ꧀ꦑꦹꦲꦶ ꦤꦶꦥ꧀ꦥꦷꦭ꦳ꦶꦪꦩꦴꦤꦺꦴ ꦪꦡꦴꦥꦛꦶꦪꦠ꧀ꦠꦁ ꦕꦷꦮꦫꦁ ꦖꦧ꧀ꦧꦒ꧀ꦒꦶꦪꦴꦤꦁ ꦨꦶꦏ꧀ꦑꦹꦤꦁ ꦢꦠ꧀ꦮꦴ ꦱꦔ꧀ꦓꦁ ꦨꦠ꧀ꦠꦺꦤ ꦥꦫꦶꦮꦶꦱꦶ. ꦪꦺ ꦠꦺ ꦨꦶꦏ꧀ꦑꦹ ꦗꦴꦤꦤ꧀ꦠꦶ ꦱꦔ꧀ꦓꦱ꧀ꦱ ꦱꦕꦷꦮꦫꦨꦠ꧀ꦠꦁ ꦥꦛꦶꦪꦠ꧀ꦠꦁ, ꦤ ꦕ ꦗꦴꦤꦤ꧀ꦠꦶ ꦖꦧ꧀ꦧꦒ꧀ꦒꦶꦪꦴꦤꦁ ꦨꦶꦏ꧀ꦑꦹꦤꦁ ꦢꦶꦤ꧀ꦤꦤ꧀ꦠꦶ, ꦠꦺ ꦌꦮꦩꦴꦲꦁꦱꦸ – ‘‘ꦎꦟꦺꦴꦗꦺꦡꦴꦮꦸꦱꦺꦴ, ꦱꦔ꧀ꦓꦱ꧀ꦱ ꦕꦷꦮꦫ’’ꦤ꧀ꦠꦶ. ‘‘ꦤꦠ꧀ꦡꦶ, ꦨꦤ꧀ꦠꦺ. ꦪꦡꦴꦥꦛꦶꦪꦠ꧀ꦠꦁ ꦕꦷꦮꦫꦁ ꦄꦪ꧀ꦪꦴ ꦖꦧ꧀ꦧꦒ꧀ꦒꦶꦪꦴ ꦄꦠ꧀ꦠꦤꦺꦴ ꦥꦫꦶꦟꦴꦩꦺꦱꦸ’’ꦤ꧀ꦠꦶ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦹ ꦗꦴꦤꦁ ꦱꦔ꧀ꦓꦶꦏꦁ ꦭꦴꦨꦁ ꦥꦫꦶꦟꦠꦁ ꦄꦠ꧀ꦠꦤꦺꦴ ꦥꦫꦶꦟꦴꦩꦺꦱ꧀ꦱꦤ꧀ꦠꦷ’’ꦠꦶ! ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦖꦧ꧀ꦧꦒ꧀ꦒꦶꦪꦺ ꦨꦶꦏ꧀ꦑꦹ ꦄꦤꦺꦏꦥꦫꦶꦪꦴꦪꦺꦤ ꦮꦶꦒꦫꦲꦶꦠ꧀ꦮꦴ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ‘‘ꦱꦕ꧀ꦕꦁ ꦏꦶꦫ ꦠꦸꦩ꧀ꦲꦺ, ꦨꦶꦏ꧀ꦑꦮꦺ, ꦗꦴꦤꦁ ꦱꦔ꧀ꦓꦶꦏꦁ ꦭꦴꦨꦁ ꦥꦫꦶꦟꦠꦁ ꦄꦠ꧀ꦠꦤꦺꦴ ꦥꦫꦶꦟꦴꦩꦺꦡꦴ’’ꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ ꦠꦸꦩ꧀ꦲꦺ, ꦩꦺꦴꦓꦥꦸꦫꦶꦱꦴ, ꦗꦴꦤꦁ ꦱꦔ꧀ꦓꦶꦏꦁ ꦭꦴꦨꦁ ꦥꦫꦶꦟꦠꦁ ꦄꦠ꧀ꦠꦤꦺꦴ ꦥꦫꦶꦟꦴꦩꦺꦱ꧀ꦱꦡ! ꦤꦺꦠꦁ, ꦩꦺꦴꦓꦥꦸꦫꦶꦱꦴ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴꦡ –

꧖꧕꧘. ‘‘ꦪꦺꦴ ꦥꦤ ꦨꦶꦏ꧀ꦑꦸ ꦗꦴꦤꦁ ꦱꦔ꧀ꦓꦶꦏꦁ ꦭꦴꦨꦁ ꦥꦫꦶꦟꦠꦁ ꦄꦠ꧀ꦠꦤꦺꦴ ꦥꦫꦶꦟꦴꦩꦺꦪ꧀ꦪ, ꦤꦶꦱ꧀ꦱꦒ꧀ꦒꦶꦪꦁ ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧖꧕꧙. ꦪꦺꦴ ꦥꦤꦴꦠꦶ ꦪꦺꦴ ꦪꦴꦢꦶꦱꦺꦴ…ꦥꦺ… ꦨꦶꦏ꧀ꦑꦹꦠꦶ…ꦥꦺ… ꦄꦪ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦺꦴ ꦨꦶꦏ꧀ꦑꦹꦠꦶ.

[ꦥꦴꦕꦶ. ꧔꧙꧑] ꦗꦴꦤꦴꦠꦶ ꦤꦴꦩ ꦱꦴꦩꦁ ꦮꦴ ꦗꦴꦤꦴꦠꦶ ꦄꦚ꧀ꦚꦺ ꦮꦴ ꦠꦱ꧀ꦱ ꦄꦴꦫꦺꦴꦕꦺꦤ꧀ꦠꦶ ꦱꦺꦴ ꦮꦴ ꦄꦴꦫꦺꦴꦕꦺꦠꦶ.

[ꦥꦴꦕꦶ. ꧔꧙꧑] ꦱꦔ꧀ꦓꦶꦏꦁ ꦤꦴꦩ ꦱꦔ꧀ꦓꦱ꧀ꦱ ꦢꦶꦤ꧀ꦤꦁ ꦲꦺꦴꦠꦶ ꦥꦫꦶꦕ꧀ꦕꦠ꧀ꦠꦁ.

[ꦥꦴꦕꦶ. ꧔꧙꧑] ꦭꦴꦨꦺꦴ ꦤꦴꦩ ꦕꦷꦮꦫꦥꦶꦟ꧀ꦝꦥꦴꦠꦱꦺꦤꦴꦱꦤꦒꦶꦭꦴꦤꦥ꧀ꦥꦕ꧀ꦕꦪꦨꦺꦱꦗ꧀ꦗꦥꦫꦶꦏ꧀ꦑꦴꦫꦴ. ꦄꦤ꧀ꦠꦩꦱꦺꦴ ꦕꦸꦟ꧀ꦟꦥꦶꦟ꧀ꦝꦺꦴꦥꦶ, ꦢꦤ꧀ꦠꦏꦛ꧀ꦜꦩ꧀ꦥꦶ, ꦢꦱꦶꦏꦱꦸꦠ꧀ꦠꦩ꧀ꦥꦶ.

[ꦥꦴꦕꦶ. ꧔꧙꧑] ꦥꦫꦶꦟꦠꦁ ꦤꦴꦩ ꦢꦱ꧀ꦱꦴꦩ ꦏꦫꦶꦱ꧀ꦱꦴꦩꦴꦠꦶ ꦮꦴꦕꦴ ꦨꦶꦤ꧀ꦤꦴ ꦲꦺꦴꦠꦶ.

ꦄꦠ꧀ꦠꦤꦺꦴ ꦥꦫꦶꦟꦴꦩꦺꦠꦶ, ꦥꦪꦺꦴꦒꦺ ꦢꦸꦏ꧀ꦏꦛꦁ. ꦥꦛꦶꦭꦴꦨꦺꦤ ꦤꦶꦱ꧀ꦱꦒ꧀ꦒꦶꦪꦁ ꦲꦺꦴꦠꦶ. ꦤꦶꦱ꧀ꦱꦗ꧀ꦗꦶꦠꦧ꧀ꦧꦁ ꦱꦔ꧀ꦓꦱ꧀ꦱ ꦮꦴ ꦒꦟꦱ꧀ꦱ ꦮꦴ ꦥꦸꦒ꧀ꦒꦭꦱ꧀ꦱ ꦮꦴ. ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦤꦶꦱ꧀ꦱꦗ꧀ꦗꦶꦠꦧ꧀ꦧꦁ…ꦥꦺ… ꦆꦢꦁ ꦩꦺ, ꦨꦤ꧀ꦠꦺ, ꦗꦴꦤꦁ ꦱꦔ꧀ꦓꦶꦏꦁ ꦭꦴꦨꦁ ꦥꦫꦶꦟꦠꦁ ꦄꦠ꧀ꦠꦤꦺꦴ ꦥꦫꦶꦟꦴꦩꦶꦠꦁ ꦤꦶꦱ꧀ꦱꦒ꧀ꦒꦶꦪꦁ. ꦆꦩꦴꦲꦁ ꦱꦔ꧀ꦓꦱ꧀ꦱ ꦤꦶꦱ꧀ꦱꦗ꧀ꦗꦴꦩꦷꦠꦶ…ꦥꦺ… ꦢꦢꦺꦪ꧀ꦪꦴꦠꦶ…ꦥꦺ… ꦢꦢꦺꦪ꧀ꦪꦸꦤ꧀ꦠꦶ…ꦥꦺ… ꦄꦴꦪꦱ꧀ꦩꦠꦺꦴ ꦢꦩ꧀ꦩꦷꦠꦶ.

꧖꧖꧐. ꦥꦫꦶꦟꦠꦺ ꦥꦫꦶꦟꦠꦱꦚ꧀ꦚꦷ ꦄꦠ꧀ꦠꦤꦺꦴ ꦥꦫꦶꦟꦴꦩꦺꦠꦶ, ꦤꦶꦱ꧀ꦱꦒ꧀ꦒꦶꦪꦁ ꦥꦴꦕꦶꦠ꧀ꦠꦶꦪꦁ.

ꦥꦫꦶꦟꦠꦺ ꦮꦺꦩꦠꦶꦏꦺꦴ ꦄꦠ꧀ꦠꦤꦺꦴ ꦥꦫꦶꦟꦴꦩꦺꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦥꦫꦶꦟꦠꦺ ꦄꦥꦫꦶꦟꦠꦱꦚ꧀ꦚꦷ ꦄꦠ꧀ꦠꦤꦺꦴ ꦥꦫꦶꦟꦴꦩꦺꦠꦶ, ꦄꦤꦴꦥꦠ꧀ꦠꦶ. ꦱꦔ꧀ꦓꦱ꧀ꦱ ꦥꦫꦶꦟꦠꦁ ꦄꦚ꧀ꦚꦱꦔ꧀ꦓꦱ꧀ꦱ ꦮꦴ ꦕꦺꦠꦶꦪꦱ꧀ꦱ ꦮꦴ ꦥꦫꦶꦟꦴꦩꦺꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦕꦺꦠꦶꦪꦱ꧀ꦱ ꦥꦫꦶꦟꦠꦁ ꦄꦚ꧀ꦚꦕꦺꦠꦶꦪꦱ꧀ꦱ ꦮꦴ ꦱꦔ꧀ꦓꦱ꧀ꦱ ꦮꦴ ꦥꦸꦒ꧀ꦒꦭꦱ꧀ꦱ ꦮꦴ ꦥꦫꦶꦟꦴꦩꦺꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦥꦸꦒ꧀ꦒꦭꦱ꧀ꦱ ꦥꦫꦶꦟꦠꦁ ꦄꦚ꧀ꦚꦥꦸꦒ꧀ꦒꦭꦱ꧀ꦱ ꦮꦴ ꦱꦔ꧀ꦓꦱ꧀ꦱ ꦮꦴ ꦕꦺꦠꦶꦪꦱ꧀ꦱ ꦮꦴ ꦥꦫꦶꦟꦴꦩꦺꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦥꦫꦶꦟꦠꦺ ꦥꦫꦶꦟꦠꦱꦚ꧀ꦚꦷ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦥꦫꦶꦟꦠꦺ ꦮꦺꦩꦠꦶꦏꦺꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦥꦫꦶꦟꦠꦺ ꦄꦥꦫꦶꦟꦠꦱꦚ꧀ꦚꦷ, ꦄꦤꦴꦥꦠ꧀ꦠꦶ.

꧖꧖꧑. ꦄꦤꦴꦥꦠ꧀ꦠꦶ ꦏꦠ꧀ꦡ ꦢꦺꦩꦴꦠꦶ ꦥꦸꦕ꧀ꦖꦶꦪꦩꦴꦤꦺꦴ ꦪꦠ꧀ꦡ ꦠꦸꦩ꧀ꦲꦴꦏꦁ ꦢꦺꦪ꧀ꦪꦣꦩ꧀ꦩꦺꦴ ꦥꦫꦶꦨꦺꦴꦒꦁ ꦮꦴ ꦭꦨꦺꦪ꧀ꦪ ꦥꦛꦶꦱꦔ꧀ꦑꦴꦫꦁ ꦮꦴ ꦭꦨꦺꦪ꧀ꦪ ꦕꦶꦫꦛ꧀ꦜꦶꦠꦶꦏꦺꦴ ꦮꦴ ꦄꦱ꧀ꦱ ꦪꦠ꧀ꦡ ꦮꦴ ꦥꦤ ꦠꦸꦩ꧀ꦲꦴꦏꦁ ꦕꦶꦠ꧀ꦠꦁ ꦥꦱꦷꦢꦠꦶ ꦠꦠ꧀ꦡ ꦢꦺꦡꦴꦠꦶ ꦨꦟꦠꦶ, ꦈꦩ꧀ꦩꦠ꧀ꦠꦏꦱ꧀ꦱ, ꦄꦴꦢꦶꦏꦩ꧀ꦩꦶꦏꦱ꧀ꦱꦴꦠꦶ.

ꦥꦫꦶꦟꦠꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ ꦢꦱꦩꦁ.

ꦥꦠ꧀ꦠꦮꦒ꧀ꦒꦺꦴ ꦠꦠꦶꦪꦺꦴ.

ꦠꦱ꧀ꦱꦸꦢ꧀ꦢꦴꦤꦁ –

ꦢ꧀ꦮꦺ ꦕ ꦥꦠ꧀ꦠꦴꦤꦶ ꦨꦺꦱꦗ꧀ꦗꦁ, ꦮꦱ꧀ꦱꦶꦏꦴ ꦢꦴꦤꦥꦚ꧀ꦕꦩꦁ;

ꦱꦴꦩꦁ ꦮꦴꦪꦴꦥꦤꦕ꧀ꦕꦺꦏꦺꦴ, ꦱꦴꦱꦔ꧀ꦏꦁ ꦱꦔ꧀ꦓꦶꦏꦺꦤ ꦕꦴꦠꦶ.

꧖꧖꧒. ꦈꦢ꧀ꦢꦶꦛ꧀ꦜꦴ ꦑꦺꦴ, ꦄꦴꦪꦱ꧀ꦩꦤ꧀ꦠꦺꦴ, ꦠꦶꦁꦱ ꦤꦶꦱ꧀ꦱꦒ꧀ꦒꦶꦪꦴ ꦥꦴꦕꦶꦠ꧀ꦠꦶꦪꦴ ꦣꦩ꧀ꦩꦴ. ꦠꦠ꧀ꦡꦴꦪꦱ꧀ꦩꦤ꧀ꦠꦺ ꦥꦸꦕ꧀ꦖꦴꦩꦶ – ‘ꦏꦕ꧀ꦕꦶꦠ꧀ꦡ ꦥꦫꦶꦱꦸꦢ꧀ꦣꦴ’? ꦢꦸꦠꦶꦪꦩ꧀ꦥꦶ ꦥꦸꦕ꧀ꦖꦴꦩꦶ – ‘ꦏꦕ꧀ꦕꦶꦠ꧀ꦡ ꦥꦫꦶꦱꦸꦢ꧀ꦣꦴ’? ꦠꦠꦶꦪꦩ꧀ꦥꦶ ꦥꦸꦕ꧀ꦖꦴꦩꦶ – ‘ꦏꦕ꧀ꦕꦶꦠ꧀ꦡ ꦥꦫꦶꦱꦸꦢ꧀ꦣꦴ’? ꦥꦫꦶꦱꦸꦢ꧀ꦣꦺꦠ꧀ꦡꦴꦪꦱ꧀ꦩꦤ꧀ꦠꦺꦴ, ꦠꦱ꧀ꦩꦴ ꦠꦸꦟ꧀ꦲꦷ, ꦌꦮꦩꦺꦠꦁ ꦣꦴꦫꦪꦴꦩꦷꦠꦶ.

ꦤꦶꦱ꧀ꦱꦒ꧀ꦒꦶꦪꦏꦟ꧀ꦝꦁ ꦤꦶꦛ꧀ꦜꦶꦠꦁ.