꧘-꧙-꧑꧐. ꦄꦛ꧀ꦜꦩ-ꦤꦮꦩ-ꦢꦱꦩꦱꦶꦏ꧀ꦑꦴꦥꦢꦁ

꧑꧒꧑꧐. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦸꦤꦶꦪꦺꦴ ꦱꦶꦏ꧀ꦑꦩꦴꦤꦴꦪ ꦈꦩ꧀ꦩꦢ꧀ꦢꦴꦥꦺꦤ꧀ꦠꦶꦥꦶ ꦥꦫꦶꦩꦢ꧀ꦢꦴꦥꦺꦤ꧀ꦠꦶꦥꦶ…ꦥꦺ… ꦱꦴꦩꦟꦺꦫꦶꦪꦴ ꦈꦩ꧀ꦩꦢ꧀ꦢꦴꦥꦺꦤ꧀ꦠꦶꦥꦶ ꦥꦫꦶꦩꦢ꧀ꦢꦴꦥꦺꦤ꧀ꦠꦶꦥꦶ…ꦥꦺ… ꦒꦶꦲꦶꦤꦶꦪꦴ ꦈꦩ꧀ꦩꦢ꧀ꦢꦴꦥꦺꦤ꧀ꦠꦶꦥꦶ ꦥꦫꦶꦩꦢ꧀ꦢꦴꦥꦺꦤ꧀ꦠꦶꦥꦶ. ꦩꦤꦸꦱ꧀ꦱꦴ ꦮꦶꦲꦴꦫꦕꦴꦫꦶꦏꦁ ꦄꦴꦲꦶꦟ꧀ꦝꦤ꧀ꦠꦴ ꦥꦱ꧀ꦱꦶꦠ꧀ꦮꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸꦤꦶꦪꦺꦴ ꦒꦶꦲꦶꦤꦶꦪꦴ ꦈꦩ꧀ꦩꦢ꧀ꦢꦴꦥꦺꦱ꧀ꦱꦤ꧀ꦠꦶꦥꦶ ꦥꦫꦶꦩꦢ꧀ꦢꦴꦥꦺꦱ꧀ꦱꦤ꧀ꦠꦶꦥꦶ, ꦱꦺꦪ꧀ꦪꦡꦴꦥꦶ ꦒꦶꦲꦶꦤꦶꦪꦺꦴ ꦏꦴꦩꦨꦺꦴꦒꦶꦤꦶꦪꦺꦴ’’ꦠꦶ! ꦄꦱ꧀ꦱꦺꦴꦱꦸꦁ ꦑꦺꦴ ꦨꦶꦏ꧀ꦑꦸꦤꦶꦪꦺꦴ ꦠꦺꦱꦁ ꦩꦤꦸꦱ꧀ꦱꦴꦤꦁ ꦈꦗ꧀ꦙꦴꦪꦤ꧀ꦠꦴꦤꦁ ꦑꦶꦪ꧀ꦪꦤ꧀ꦠꦴꦤꦁ ꦮꦶꦥꦴꦕꦺꦤ꧀ꦠꦴꦤꦁ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸꦤꦶꦪꦺꦴ ꦒꦶꦲꦶꦤꦶꦪꦴ ꦈꦩ꧀ꦩꦢ꧀ꦢꦴꦥꦺꦱ꧀ꦱꦤ꧀ꦠꦶꦥꦶ ꦥꦫꦶꦩꦢ꧀ꦢꦴꦥꦺꦱ꧀ꦱꦤ꧀ꦠꦶꦥꦷꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦒꦶꦲꦶꦤꦶꦪꦴ ꦈꦩ꧀ꦩꦢ꧀ꦢꦴꦥꦺꦤ꧀ꦠꦶꦥꦶ ꦥꦫꦶꦩꦢ꧀ꦢꦴꦥꦺꦤ꧀ꦠꦶꦥꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦒꦶꦲꦶꦤꦶꦪꦴ ꦈꦩ꧀ꦩꦢ꧀ꦢꦴꦥꦺꦱ꧀ꦱꦤ꧀ꦠꦶꦥꦶ ꦥꦫꦶꦩꦢ꧀ꦢꦴꦥꦺꦱ꧀ꦱꦤ꧀ꦠꦶꦥꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧑꧒꧑꧑. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ (ꦱꦶꦏ꧀ꦑꦩꦴꦤꦴꦪ…ꦥꦺ… ꦱꦴꦩꦟꦺꦫꦶꦪꦴ…ꦥꦺ…) ꦒꦶꦲꦶꦤꦶꦪꦴ ꦈꦩ꧀ꦩꦢ꧀ꦢꦴꦥꦺꦪ꧀ꦪ ꦮꦴ ꦥꦫꦶꦩꦢ꧀ꦢꦴꦥꦺꦪ꧀ꦪ ꦮꦴ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧑꧒꧑꧒. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦱꦶꦏ꧀ꦑꦩꦴꦤꦴ ꦤꦴꦩ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦱꦶꦏ꧀ꦑꦶꦠꦱꦶꦏ꧀ꦑꦴ.

ꦱꦴꦩꦟꦺꦫꦷ ꦤꦴꦩ ꦢꦱꦱꦶꦏ꧀ꦑꦴꦥꦢꦶꦏꦴ.

ꦒꦶꦲꦶꦤꦷ ꦤꦴꦩ ꦄꦒꦴꦫꦶꦤꦷ ꦮꦸꦕ꧀ꦕꦠꦶ.

ꦈꦩ꧀ꦩꦢ꧀ꦢꦴꦥꦺꦪ꧀ꦪ ꦮꦴꦠꦶ ꦈꦩ꧀ꦩꦢ꧀ꦢꦴꦥꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦥꦫꦶꦩꦢ꧀ꦢꦴꦥꦺꦪ꧀ꦪ ꦮꦴꦠꦶ ꦱꦩ꧀ꦧꦴꦲꦴꦥꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧑꧒꧑꧓. ꦄꦤꦴꦥꦠ꧀ꦠꦶ ꦒꦶꦭꦴꦤꦴꦪ [ꦄꦴꦧꦴꦣꦥ꧀ꦥꦕ꧀ꦕꦪꦴ (ꦏ.)], ꦄꦴꦥꦢꦴꦱꦸ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦄꦛ꧀ꦜꦩ ꦤꦮꦩ ꦢꦱꦩꦱꦶꦏ꧀ꦑꦴꦥꦢꦴꦤꦶ ꦤꦶꦛ꧀ꦜꦶꦠꦴꦤꦶ.