꧑꧐. ꦢꦱꦩꦱꦶꦏ꧀ꦑꦴꦥꦢꦁ

꧑꧑꧖꧒. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦩꦴꦠꦴꦥꦶꦠꦹꦲꦶꦥꦶ ꦱꦴꦩꦶꦏꦺꦤꦥꦶ ꦄꦤꦤꦸꦚ꧀ꦚꦴꦠꦁ ꦱꦶꦏ꧀ꦑꦩꦴꦤꦁ ꦮꦸꦛ꧀ꦜꦴꦥꦺꦠꦶ. ꦩꦴꦠꦴꦥꦶꦠꦫꦺꦴꦥꦶ ꦱꦴꦩꦶꦏꦺꦴꦥꦶ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦪ꧀ꦪꦴ ꦡꦸꦭ꧀ꦭꦤꦤ꧀ꦢꦴ ꦄꦩ꧀ꦲꦺꦲꦶ ꦄꦤꦤꦸꦚ꧀ꦚꦴꦠꦁ ꦱꦶꦏ꧀ꦑꦩꦴꦤꦁ ꦮꦸꦛ꧀ꦜꦴꦥꦺꦱ꧀ꦱꦠꦷ’’ꦠꦶ! ꦄꦱ꧀ꦱꦺꦴꦱꦸꦁ ꦑꦺꦴ ꦨꦶꦏ꧀ꦑꦸꦤꦶꦪꦺꦴ ꦩꦴꦠꦴꦥꦶꦠꦹꦤꦩ꧀ꦥꦶ ꦱꦴꦩꦶꦏꦱ꧀ꦱꦥꦶ ꦈꦗ꧀ꦙꦴꦪꦤ꧀ꦠꦴꦤꦁ ꦑꦶꦪ꧀ꦪꦤ꧀ꦠꦴꦤꦁ ꦮꦶꦥꦴꦕꦺꦤ꧀ꦠꦴꦤꦁ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦪ꧀ꦪꦴ ꦡꦸꦭ꧀ꦭꦤꦤ꧀ꦢꦴ ꦩꦴꦠꦴꦥꦶꦠꦹꦲꦶꦥꦶ ꦱꦴꦩꦶꦏꦺꦤꦥꦶ ꦄꦤꦤꦸꦚ꧀ꦚꦴꦠꦁ ꦱꦶꦏ꧀ꦑꦩꦴꦤꦁ ꦮꦸꦛ꧀ꦜꦴꦥꦺꦱ꧀ꦱꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ, ꦩꦴꦠꦴꦥꦶꦠꦹꦲꦶꦥꦶ ꦱꦴꦩꦶꦏꦺꦤꦥꦶ ꦄꦤꦤꦸꦚ꧀ꦚꦴꦠꦁ ꦱꦶꦏ꧀ꦑꦩꦴꦤꦁ ꦮꦸꦛ꧀ꦜꦴꦥꦺꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦩꦴꦠꦴꦥꦶꦠꦹꦲꦶꦥꦶ ꦱꦴꦩꦶꦏꦺꦤꦥꦶ ꦄꦤꦤꦸꦚ꧀ꦚꦴꦠꦁ ꦱꦶꦏ꧀ꦑꦩꦴꦤꦁ ꦮꦸꦛ꧀ꦜꦴꦥꦺꦱ꧀ꦱꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧑꧑꧖꧓. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦩꦴꦠꦴꦥꦶꦠꦹꦲꦶ ꦮꦴ ꦱꦴꦩꦶꦏꦺꦤ ꦮꦴ ꦄꦤꦤꦸꦚ꧀ꦚꦴꦠꦁ ꦱꦶꦏ꧀ꦑꦩꦴꦤꦁ ꦮꦸꦛ꧀ꦜꦴꦥꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧑꧑꧖꧔. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦩꦴꦠꦴꦥꦶꦠꦫꦺꦴ ꦤꦴꦩ ꦗꦤꦏꦴ ꦮꦸꦕ꧀ꦕꦤ꧀ꦠꦶ. ꦱꦴꦩꦶꦏꦺꦴ ꦤꦴꦩ ꦪꦺꦤ ꦥꦫꦶꦒ꧀ꦒꦲꦶꦠꦴ ꦲꦺꦴꦠꦶ. ꦄꦤꦤꦸꦚ꧀ꦚꦴꦠꦴꦠꦶ ꦄꦤꦴꦥꦸꦕ꧀ꦖꦴ. ꦱꦶꦏ꧀ꦑꦩꦴꦤꦴ ꦤꦴꦩ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦱꦶꦏ꧀ꦑꦶꦠꦱꦶꦏ꧀ꦑꦴ. ꦮꦸꦛ꧀ꦜꦴꦥꦺꦪ꧀ꦪꦴꦠꦶ ꦈꦥꦱꦩ꧀ꦥꦴꦢꦺꦪ꧀ꦪ.

ꦮꦸꦛ꧀ꦜꦴꦥꦺꦱ꧀ꦱꦴꦩꦷꦠꦶ ꦒꦟꦁ ꦮꦴ ꦄꦴꦕꦫꦶꦤꦶꦁ ꦮꦴ ꦥꦠ꧀ꦠꦁ ꦮꦴ ꦕꦷꦮꦫꦁ ꦮꦴ ꦥꦫꦶꦪꦺꦱꦠꦶ, ꦱꦷꦩꦁ ꦮꦴ ꦱꦩ꧀ꦩꦤ꧀ꦤꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦚꦠ꧀ꦠꦶꦪꦴ ꦢꦸꦏ꧀ꦏꦛꦁ. ꦢ꧀ꦮꦷꦲꦶ ꦏꦩ꧀ꦩꦮꦴꦕꦴꦲꦶ ꦢꦸꦏ꧀ꦏꦛꦴ. ꦏꦩ꧀ꦩꦮꦴꦕꦴꦥꦫꦶꦪꦺꦴꦱꦴꦤꦺ ꦈꦥꦗ꧀ꦙꦴꦪꦴꦪ ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦒꦟꦱ꧀ꦱ ꦕ ꦄꦴꦕꦫꦶꦤꦶꦪꦴ ꦕ ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

꧑꧑꧖꧕. ꦄꦤꦴꦥꦠ꧀ꦠꦶ ꦄꦗꦴꦤꦤ꧀ꦠꦷ ꦮꦸꦛ꧀ꦜꦴꦥꦺꦠꦶ, ꦄꦥꦭꦺꦴꦏꦺꦠ꧀ꦮꦴ ꦮꦸꦛ꧀ꦜꦴꦥꦺꦠꦶ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦢꦱꦩꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.