꧖. ꦖꦛ꧀ꦜꦱꦶꦏ꧀ꦑꦴꦥꦢꦁ

꧑꧐꧙꧕. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦸꦤꦶꦪꦺꦴ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦁ ꦒꦶꦲꦶꦒꦠꦁ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦄꦱꦶꦏ꧀ꦑꦶꦠꦱꦶꦏ꧀ꦑꦁ ꦮꦸꦛ꧀ꦜꦴꦥꦺꦤ꧀ꦠꦶ. ꦠꦴ ꦧꦴꦭꦴ ꦲꦺꦴꦤ꧀ꦠꦶ ꦄꦧ꧀ꦪꦠ꧀ꦠꦴ ꦤ ꦗꦴꦤꦤ꧀ꦠꦶ ꦏꦥ꧀ꦥꦶꦪꦁ ꦮꦴ ꦄꦏꦥ꧀ꦥꦶꦪꦁ ꦮꦴ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸꦤꦶꦪꦺꦴ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦁ ꦒꦶꦲꦶꦒꦠꦁ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦄꦱꦶꦏ꧀ꦑꦶꦠꦱꦶꦏ꧀ꦑꦁ ꦮꦸꦛ꧀ꦜꦴꦥꦺꦱ꧀ꦱꦤ꧀ꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦁ ꦒꦶꦲꦶꦒꦠꦁ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦄꦱꦶꦏ꧀ꦑꦶꦠꦱꦶꦏ꧀ꦑꦁ ꦮꦸꦛ꧀ꦜꦴꦥꦺꦤ꧀ꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦁ ꦒꦶꦲꦶꦒꦠꦁ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦄꦱꦶꦏ꧀ꦑꦶꦠꦱꦶꦏ꧀ꦑꦁ ꦮꦸꦛ꧀ꦜꦴꦥꦺꦱ꧀ꦱꦤ꧀ꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦮꦶꦒꦫꦲꦶꦠ꧀ꦮꦴ ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦴꦪ ꦒꦶꦲꦶꦒꦠꦴꦪ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦱꦶꦏ꧀ꦑꦴꦱꦩ꧀ꦩꦸꦠꦶꦁ ꦢꦴꦠꦸꦁ. ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦢꦴꦠꦧ꧀ꦧꦴ. ꦠꦴꦪ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦴꦪ ꦒꦶꦲꦶꦒꦠꦴꦪ ꦱꦔ꧀ꦓꦁ ꦈꦥꦱꦔ꧀ꦏꦩꦶꦠ꧀ꦮꦴ ꦌꦏꦁꦱꦁ ꦈꦠ꧀ꦠꦫꦴꦱꦔ꧀ꦒꦁ ꦏꦫꦶꦠ꧀ꦮꦴ ꦨꦶꦏ꧀ꦑꦸꦤꦷꦤꦁ ꦥꦴꦢꦺ ꦮꦤ꧀ꦢꦶꦠ꧀ꦮꦴ ꦈꦏ꧀ꦏꦸꦛꦶꦏꦁ ꦤꦶꦱꦷꦢꦶꦠ꧀ꦮꦴ ꦄꦚ꧀ꦗꦭꦶꦁ ꦥꦒ꧀ꦒꦲꦺꦠ꧀ꦮꦴ ꦌꦮꦩꦱ꧀ꦱ ꦮꦕꦤꦷꦪꦺꦴ – ꦄꦲꦁ, ꦄꦪ꧀ꦪꦺ, ꦆꦠ꧀ꦡꦤ꧀ꦤꦴꦩꦴ ꦆꦠ꧀ꦡꦤ꧀ꦤꦴꦩꦴꦪ ꦄꦪ꧀ꦪꦴꦪ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦴ ꦒꦶꦲꦶꦒꦠꦴ ꦱꦔ꧀ꦓꦁ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦱꦶꦏ꧀ꦑꦴꦱꦩ꧀ꦩꦸꦠꦶꦁ ꦪꦴꦕꦴꦩꦷ’’ꦠꦶ. ꦢꦸꦠꦶꦪꦩ꧀ꦥꦶ ꦪꦴꦕꦶꦠꦧ꧀ꦧꦴ. ꦠꦠꦶꦪꦩ꧀ꦥꦶ ꦪꦴꦕꦶꦠꦧ꧀ꦧꦴ. ꦧ꧀ꦪꦠ꧀ꦠꦴꦪ ꦨꦶꦏ꧀ꦑꦸꦤꦶꦪꦴ ꦥꦛꦶꦧꦭꦴꦪ ꦱꦔ꧀ꦓꦺꦴ ꦚꦴꦥꦺꦠꦧ꧀ꦧꦺꦴ –

꧑꧐꧙꧖. ‘‘ꦱꦸꦟꦴꦠꦸ ꦩꦺ, ꦄꦪ꧀ꦪꦺ, ꦱꦔ꧀ꦓꦺꦴ. ꦄꦪꦁ ꦆꦠ꧀ꦡꦤ꧀ꦤꦴꦩꦴ ꦆꦠ꧀ꦡꦤ꧀ꦤꦴꦩꦴꦪ ꦄꦪ꧀ꦪꦴꦪ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦴ ꦒꦶꦲꦶꦒꦠꦴ ꦱꦔ꧀ꦓꦁ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦱꦶꦏ꧀ꦑꦴꦱꦩ꧀ꦩꦸꦠꦶꦁ ꦪꦴꦕꦠꦶ. ꦪꦢꦶ ꦱꦔ꧀ꦓꦱ꧀ꦱ ꦥꦠ꧀ꦠꦏꦭ꧀ꦭꦁ ꦱꦔ꧀ꦓꦺꦴ ꦆꦠ꧀ꦡꦤ꧀ꦤꦴꦩꦴꦪ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦴꦪ ꦒꦶꦲꦶꦒꦠꦴꦪ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦱꦶꦏ꧀ꦑꦴꦱꦩ꧀ꦩꦸꦠꦶꦁ ꦢꦢꦺꦪ꧀ꦪ. ꦌꦱꦴ ꦚꦠ꧀ꦠꦶ.

‘‘ꦱꦸꦟꦴꦠꦸ ꦩꦺ, ꦄꦪ꧀ꦪꦺ, ꦱꦔ꧀ꦓꦺꦴ. ꦄꦪꦁ ꦆꦠ꧀ꦡꦤ꧀ꦤꦴꦩꦴ ꦆꦠ꧀ꦡꦤ꧀ꦤꦴꦩꦴꦪ ꦄꦪ꧀ꦪꦴꦪ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦴ ꦒꦶꦲꦶꦒꦠꦴ ꦱꦔ꧀ꦓꦁ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦱꦶꦏ꧀ꦑꦴꦱꦩ꧀ꦩꦸꦠꦶꦁ ꦪꦴꦕꦠꦶ. ꦱꦔ꧀ꦓꦺꦴ ꦆꦠ꧀ꦡꦤ꧀ꦤꦴꦩꦴꦪ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦴꦪ ꦒꦶꦲꦶꦒꦠꦴꦪ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦱꦶꦏ꧀ꦑꦴꦱꦩ꧀ꦩꦸꦠꦶꦁ ꦢꦺꦠꦶ. ꦪꦱ꧀ꦱꦴ ꦄꦪ꧀ꦪꦴꦪ ꦑꦩꦠꦶ ꦆꦠ꧀ꦡꦤ꧀ꦤꦴꦩꦴꦪ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦴꦪ ꦒꦶꦲꦶꦒꦠꦴꦪ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦱꦶꦏ꧀ꦑꦴꦱꦩ꧀ꦩꦸꦠꦶꦪꦴ ꦢꦴꦤꦁ, ꦱꦴ ꦠꦸꦟ꧀ꦲꦱ꧀ꦱ; ꦪꦱ꧀ꦱꦴ ꦤꦏ꧀ꦑꦩꦠꦶ, ꦱꦴ ꦨꦴꦱꦺꦪ꧀ꦪ.

‘‘ꦢꦶꦤ꧀ꦤꦴ ꦱꦔ꧀ꦓꦺꦤ ꦆꦠ꧀ꦡꦤ꧀ꦤꦴꦩꦴꦪ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦴꦪ ꦒꦶꦲꦶꦒꦠꦴꦪ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦱꦶꦏ꧀ꦑꦴꦱꦩ꧀ꦩꦸꦠꦶ. ꦑꦩꦠꦶ ꦱꦔ꧀ꦓꦱ꧀ꦱ, ꦠꦱ꧀ꦩꦴ ꦠꦸꦟ꧀ꦲꦷ, ꦌꦮꦩꦺꦠꦁ ꦣꦴꦫꦪꦴꦩꦷ’’ꦠꦶ.

ꦱꦴ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦴ ꦒꦶꦲꦶꦒꦠꦴ ꦌꦮꦁ ꦮꦢꦺꦲꦷꦠꦶ ꦮꦠ꧀ꦠꦧ꧀ꦧꦴ – ‘‘ꦥꦴꦟꦴꦠꦶꦥꦴꦠꦴ ꦮꦺꦫꦩꦟꦶꦁ ꦢ꧀ꦮꦺ ꦮꦱ꧀ꦱꦴꦤꦶ ꦄꦮꦷꦠꦶꦏ꧀ꦏꦩ꧀ꦩ ꦱꦩꦴꦢꦴꦤꦁ ꦱꦩꦴꦢꦶꦪꦴꦩꦶ…ꦥꦺ… ꦮꦶꦏꦴꦭꦨꦺꦴꦗꦤꦴ ꦮꦺꦫꦩꦟꦶꦁ ꦢ꧀ꦮꦺ ꦮꦱ꧀ꦱꦴꦤꦶ ꦄꦮꦷꦠꦶꦏ꧀ꦏꦩ꧀ꦩ ꦱꦩꦴꦢꦴꦤꦁ ꦱꦩꦴꦢꦶꦪꦴꦩꦷ’’ꦠꦶ.

ꦄꦡ ꦑꦺꦴ ꦨꦒꦮꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦤꦺꦏꦥꦫꦶꦪꦴꦪꦺꦤ ꦮꦶꦒꦫꦲꦶꦠ꧀ꦮꦴ ꦢꦸꦧ꧀ꦨꦫꦠꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧑꧐꧙꧗. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦁ ꦒꦶꦲꦶꦒꦠꦁ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦄꦱꦶꦏ꧀ꦑꦶꦠꦱꦶꦏ꧀ꦑꦁ ꦮꦸꦛ꧀ꦜꦴꦥꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧑꧐꧙꧘. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦴ ꦤꦴꦩ ꦥꦠ꧀ꦠꦢ꧀ꦮꦴꦢꦱꦮꦱ꧀ꦱꦴ. ꦒꦶꦲꦶꦒꦠꦴ ꦤꦴꦩ ꦥꦸꦫꦶꦱꦤ꧀ꦠꦫꦒꦠꦴ ꦮꦸꦕ꧀ꦕꦠꦶ. ꦢ꧀ꦮꦺ ꦮꦱ꧀ꦱꦴꦤꦷꦠꦶ ꦢ꧀ꦮꦺ ꦱꦁꦮꦕ꧀ꦖꦫꦴꦤꦶ. ꦄꦱꦶꦏ꧀ꦑꦶꦠꦱꦶꦏ꧀ꦑꦴ ꦤꦴꦩ ꦱꦶꦏ꧀ꦑꦴ ꦮꦴ ꦤ ꦢꦶꦤ꧀ꦤꦴ ꦲꦺꦴꦠꦶ, ꦢꦶꦤ꧀ꦤꦴ ꦮꦴ ꦱꦶꦏ꧀ꦑꦴ ꦏꦸꦥꦶꦠꦴ. ꦮꦸꦛ꧀ꦜꦴꦥꦺꦪ꧀ꦪꦴꦠꦶ ꦈꦥꦱꦩ꧀ꦥꦴꦢꦺꦪ꧀ꦪ.

‘‘ꦮꦸꦛ꧀ꦜꦴꦥꦺꦱ꧀ꦱꦴꦩꦷ’’ꦠꦶ ꦒꦟꦁ ꦮꦴ ꦄꦴꦕꦫꦶꦤꦶꦁ ꦮꦴ ꦥꦠ꧀ꦠꦁ ꦮꦴ ꦕꦷꦮꦫꦁ ꦮꦴ ꦥꦫꦶꦪꦺꦱꦠꦶ, ꦱꦷꦩꦁ ꦮꦴ ꦱꦩ꧀ꦩꦤ꧀ꦤꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦚꦠ꧀ꦠꦶꦪꦴ ꦢꦸꦏ꧀ꦏꦛꦁ. ꦢ꧀ꦮꦷꦲꦶ ꦏꦩ꧀ꦩꦮꦴꦕꦴꦲꦶ ꦢꦸꦏ꧀ꦏꦛꦴ. ꦏꦩ꧀ꦩꦮꦴꦕꦴꦥꦫꦶꦪꦺꦴꦱꦴꦤꦺ ꦈꦥꦗ꧀ꦙꦴꦪꦴꦪ ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦒꦟꦱ꧀ꦱ ꦕ ꦄꦴꦕꦫꦶꦤꦶꦪꦴ ꦕ ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

꧑꧐꧙꧙. ꦣꦩ꧀ꦩꦏꦩ꧀ꦩꦺ ꦣꦩ꧀ꦩꦏꦩ꧀ꦩꦱꦚ꧀ꦚꦴ ꦮꦸꦛ꧀ꦜꦴꦥꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦣꦩ꧀ꦩꦏꦩ꧀ꦩꦺ ꦮꦺꦩꦠꦶꦏꦴ ꦮꦸꦛ꧀ꦜꦴꦥꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦣꦩ꧀ꦩꦏꦩ꧀ꦩꦺ ꦄꦣꦩ꧀ꦩꦏꦩ꧀ꦩꦱꦚ꧀ꦚꦴ ꦮꦸꦛ꧀ꦜꦴꦥꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦄꦣꦩ꧀ꦩꦏꦩ꧀ꦩꦺ ꦣꦩ꧀ꦩꦏꦩ꧀ꦩꦱꦚ꧀ꦚꦴ ꦮꦸꦛ꧀ꦜꦴꦥꦺꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦣꦩ꧀ꦩꦏꦩ꧀ꦩꦺ ꦮꦺꦩꦠꦶꦏꦴ ꦮꦸꦛ꧀ꦜꦴꦥꦺꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦣꦩ꧀ꦩꦏꦩ꧀ꦩꦺ ꦄꦣꦩ꧀ꦩꦏꦩ꧀ꦩꦱꦚ꧀ꦚꦴ ꦮꦸꦛ꧀ꦜꦴꦥꦺꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

꧑꧑꧐꧐. ꦄꦤꦴꦥꦠ꧀ꦠꦶ ꦥꦫꦶꦥꦸꦟ꧀ꦟꦢ꧀ꦮꦴꦢꦱꦮꦱ꧀ꦱꦁ ꦒꦶꦲꦶꦒꦠꦁ ꦢ꧀ꦮꦺ ꦮꦱ꧀ꦱꦴꦤꦶ ꦖꦱꦸ ꦣꦩ꧀ꦩꦺꦱꦸ ꦱꦶꦏ꧀ꦑꦶꦠꦱꦶꦏ꧀ꦑꦁ ꦮꦸꦛ꧀ꦜꦴꦥꦺꦠꦶ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦖꦛ꧀ꦜꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.