꧖. ꦖꦛ꧀ꦜꦱꦶꦏ꧀ꦑꦴꦥꦢꦁ

꧑꧐꧔꧖. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦩ꧀ꦧꦲꦸꦭꦴ ꦨꦶꦏ꧀ꦑꦸꦤꦶꦪꦺꦴ ꦒꦴꦩꦏꦴꦮꦴꦱꦺ ꦮꦱ꧀ꦱꦁꦮꦸꦛ꧀ꦜꦴ ꦱꦴꦮꦠ꧀ꦡꦶꦁ ꦄꦒꦩꦁꦱꦸ. ꦨꦶꦏ꧀ꦑꦸꦤꦶꦪꦺꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦌꦠꦢꦮꦺꦴꦕꦸꦁ – ‘‘ꦏꦠ꧀ꦡꦴꦪ꧀ꦪꦴꦪꦺꦴ ꦮꦱ꧀ꦱꦁꦮꦸꦛ꧀ꦜꦴ? ꦏꦕ꧀ꦕꦶ ꦎꦮꦴꦢꦺꦴ ꦆꦢ꧀ꦣꦺꦴ ꦄꦲꦺꦴꦱꦷ’’ꦠꦶ? ‘‘ꦤꦠ꧀ꦡꦪ꧀ꦪꦺ, ꦠꦠ꧀ꦡ ꦨꦶꦏ꧀ꦑꦹ; ꦏꦸꦠꦺꦴ ꦎꦮꦴꦢꦺꦴ ꦆꦢ꧀ꦣꦺꦴ ꦨꦮꦶꦱ꧀ꦱꦠꦷ’’ꦠꦶ! ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸꦤꦶꦪꦺꦴ ꦄꦨꦶꦏ꧀ꦑꦸꦏꦺ ꦄꦴꦮꦴꦱꦺ ꦮꦱ꧀ꦱꦁ ꦮꦱꦶꦱ꧀ꦱꦤ꧀ꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦄꦨꦶꦏ꧀ꦑꦸꦏꦺ ꦄꦴꦮꦴꦱꦺ ꦮꦱ꧀ꦱꦁ ꦮꦱꦤ꧀ꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦄꦨꦶꦏ꧀ꦑꦸꦏꦺ ꦄꦴꦮꦴꦱꦺ ꦮꦱ꧀ꦱꦁ ꦮꦱꦶꦱ꧀ꦱꦤ꧀ꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧑꧐꧔꧗. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦄꦨꦶꦏ꧀ꦑꦸꦏꦺ ꦄꦴꦮꦴꦱꦺ ꦮꦱ꧀ꦱꦁ ꦮꦱꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧑꧐꧔꧘. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦄꦨꦶꦏ꧀ꦑꦸꦏꦺꦴ ꦤꦴꦩ ꦄꦴꦮꦴꦱꦺꦴ ꦤ ꦱꦏ꧀ꦏꦴ ꦲꦺꦴꦠꦶ ꦎꦮꦴꦢꦴꦪ ꦮꦴ ꦱꦁꦮꦴꦱꦴꦪ ꦮꦴ ꦒꦤ꧀ꦠꦸꦁ. ‘‘ꦮꦱ꧀ꦱꦁ ꦮꦱꦶꦱ꧀ꦱꦴꦩꦷ’’ꦠꦶ ꦱꦺꦤꦴꦱꦤꦁ ꦥꦚ꧀ꦚꦥꦺꦠꦶ ꦥꦴꦤꦷꦪꦁ ꦥꦫꦶꦨꦺꦴꦗꦤꦷꦪꦁ ꦈꦥꦛ꧀ꦜꦥꦺꦠꦶ ꦥꦫꦶꦮꦺꦟꦁ ꦱꦩ꧀ꦩꦗ꧀ꦗꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦱꦲ ꦄꦫꦸꦟꦸꦒ꧀ꦒꦩꦤꦴ ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧑꧐꧔꧙. ꦄꦤꦴꦥꦠ꧀ꦠꦶ ꦮꦱ꧀ꦱꦸꦥꦒꦠꦴ ꦨꦶꦏ꧀ꦑꦹ ꦥꦏ꧀ꦏꦤ꧀ꦠꦴ ꦮꦴ ꦲꦺꦴꦤ꧀ꦠꦶ ꦮꦶꦧ꧀ꦨꦤ꧀ꦠꦴ ꦮꦴ ꦏꦴꦭꦔ꧀ꦏꦠꦴ ꦮꦴ ꦥꦏ꧀ꦑꦱꦔ꧀ꦏꦤ꧀ꦠꦴ ꦮꦴ, ꦄꦴꦥꦢꦴꦱꦸ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦖꦛ꧀ꦜꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.