꧕. ꦕꦶꦠ꧀ꦠꦴꦒꦴꦫꦮꦒ꧀ꦒꦺꦴ

꧑. ꦥꦜꦩꦱꦶꦏ꧀ꦑꦴꦥꦢꦁ

꧙꧗꧗. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦫꦚ꧀ꦚꦺꦴ ꦥꦱꦺꦤꦢꦶꦱ꧀ꦱ ꦏꦺꦴꦱꦭꦱ꧀ꦱ ꦈꦪ꧀ꦪꦴꦤꦺ ꦕꦶꦠ꧀ꦠꦴꦒꦴꦫꦺ ꦥꦛꦶꦨꦴꦤꦕꦶꦠ꧀ꦠꦁ ꦏꦠꦁ ꦲꦺꦴꦠꦶ. ꦧꦲꦹ ꦩꦤꦸꦱ꧀ꦱꦴ ꦕꦶꦠ꧀ꦠꦴꦒꦴꦫꦁ ꦢꦱ꧀ꦱꦤꦴꦪ ꦒꦕ꧀ꦖꦤ꧀ꦠꦶ. ꦖꦧ꧀ꦧꦒ꧀ꦒꦶꦪꦴꦥꦶ ꦨꦶꦏ꧀ꦑꦸꦤꦶꦪꦺꦴ ꦕꦶꦠ꧀ꦠꦴꦒꦴꦫꦁ ꦢꦱ꧀ꦱꦤꦴꦪ ꦄꦒꦩꦁꦱꦸ. ꦩꦤꦸꦱ꧀ꦱꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸꦤꦶꦪꦺꦴ ꦕꦶꦠ꧀ꦠꦴꦒꦴꦫꦁ ꦢꦱ꧀ꦱꦤꦴꦪ ꦒꦕ꧀ꦖꦶꦱ꧀ꦱꦤ꧀ꦠꦶ, ꦱꦺꦪ꧀ꦪꦡꦴꦥꦶ ꦒꦶꦲꦶꦤꦶꦪꦺꦴ ꦏꦴꦩꦨꦺꦴꦒꦶꦤꦶꦪꦺꦴ’’ꦠꦶ! ꦄꦱ꧀ꦱꦺꦴꦱꦸꦁ ꦑꦺꦴ ꦨꦶꦏ꧀ꦑꦸꦤꦶꦪꦺꦴ ꦠꦺꦱꦁ ꦩꦤꦸꦱ꧀ꦱꦴꦤꦁ ꦈꦗ꧀ꦙꦴꦪꦤ꧀ꦠꦴꦤꦁ ꦑꦶꦪ꧀ꦪꦤ꧀ꦠꦴꦤꦁ ꦮꦶꦥꦴꦕꦺꦤ꧀ꦠꦴꦤꦁ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦕꦶꦠ꧀ꦠꦴꦒꦴꦫꦁ ꦢꦱ꧀ꦱꦤꦴꦪ ꦒꦕ꧀ꦖꦶꦱ꧀ꦱꦤ꧀ꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦕꦶꦠ꧀ꦠꦴꦒꦴꦫꦁ ꦢꦱ꧀ꦱꦤꦴꦪ ꦒꦕ꧀ꦖꦤ꧀ꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦕꦶꦠ꧀ꦠꦴꦒꦴꦫꦁ ꦢꦱ꧀ꦱꦤꦴꦪ ꦒꦕ꧀ꦖꦶꦱ꧀ꦱꦤ꧀ꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧙꧗꧘. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦫꦴꦗꦴꦒꦴꦫꦁ ꦮꦴ ꦕꦶꦠ꧀ꦠꦴꦒꦴꦫꦁ ꦮꦴ ꦄꦴꦫꦴꦩꦁ ꦮꦴ ꦈꦪ꧀ꦪꦴꦤꦁ ꦮꦴ ꦥꦺꦴꦏ꧀ꦑꦫꦟꦶꦁ ꦮꦴ ꦢꦱ꧀ꦱꦤꦴꦪ ꦒꦕ꧀ꦖꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧙꧗꧙. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦫꦴꦗꦴꦒꦴꦫꦁ ꦤꦴꦩ ꦪꦠ꧀ꦡ ꦏꦠ꧀ꦡꦕꦶ ꦫꦚ꧀ꦚꦺꦴ ꦏꦷꦭ꦳ꦶꦠꦸꦁ ꦫꦩꦶꦠꦸꦁ ꦏꦠꦁ ꦲꦺꦴꦠꦶ.

ꦕꦶꦠ꧀ꦠꦴꦒꦴꦫꦁ ꦤꦴꦩ ꦪꦠ꧀ꦡ ꦏꦠ꧀ꦡꦕꦶ ꦩꦤꦸꦱ꧀ꦱꦴꦤꦁ ꦏꦷꦭ꦳ꦶꦠꦸꦁ ꦫꦩꦶꦠꦸꦁ ꦏꦠꦁ ꦲꦺꦴꦠꦶ.

ꦄꦴꦫꦴꦩꦺꦴ ꦤꦴꦩ ꦪꦠ꧀ꦡ ꦏꦠ꧀ꦡꦕꦶ ꦩꦤꦸꦱ꧀ꦱꦴꦤꦁ ꦏꦷꦭ꦳ꦶꦠꦸꦁ ꦫꦩꦶꦠꦸꦁ ꦏꦠꦺꦴ ꦲꦺꦴꦠꦶ.

ꦈꦪ꧀ꦪꦴꦤꦁ ꦤꦴꦩ ꦪꦠ꧀ꦡ ꦏꦠ꧀ꦡꦕꦶ ꦩꦤꦸꦱ꧀ꦱꦴꦤꦁ ꦏꦷꦭ꦳ꦶꦠꦸꦁ ꦫꦩꦶꦠꦸꦁ ꦏꦠꦁ ꦲꦺꦴꦠꦶ.

ꦥꦺꦴꦏ꧀ꦑꦫꦟꦷ ꦤꦴꦩ ꦪꦠ꧀ꦡ ꦏꦠ꧀ꦡꦕꦶ ꦩꦤꦸꦱ꧀ꦱꦴꦤꦁ ꦏꦷꦭ꦳ꦶꦠꦸꦁ ꦫꦩꦶꦠꦸꦁ ꦏꦠꦴ ꦲꦺꦴꦠꦶ.

꧙꧘꧐. ꦢꦱ꧀ꦱꦤꦴꦪ ꦒꦕ꧀ꦖꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦪꦠ꧀ꦡ ꦜꦶꦠꦴ ꦥꦱ꧀ꦱꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦢꦱ꧀ꦱꦤꦹꦥꦕꦴꦫꦁ ꦮꦶꦗꦲꦶꦠ꧀ꦮꦴ ꦥꦸꦤꦥ꧀ꦥꦸꦤꦁ ꦥꦱ꧀ꦱꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦌꦏꦩꦺꦏꦁ ꦢꦱ꧀ꦱꦤꦴꦪ ꦒꦕ꧀ꦖꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦪꦠ꧀ꦡ ꦜꦶꦠꦴ ꦥꦱ꧀ꦱꦠꦶ, ꦄꦴꦥꦠ꧀ꦠꦶ ꦥꦕꦶꦠ꧀ꦠꦶꦪꦱ꧀ꦱ. ꦢꦱ꧀ꦱꦤꦹꦥꦕꦴꦫꦁ ꦮꦶꦗꦲꦶꦠ꧀ꦮꦴ ꦥꦸꦤꦥ꧀ꦥꦸꦤꦁ ꦥꦱ꧀ꦱꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧙꧘꧑. ꦄꦤꦴꦥꦠ꧀ꦠꦶ ꦄꦴꦫꦴꦩꦺ ꦜꦶꦠꦴ ꦥꦱ꧀ꦱꦠꦶ, ꦒꦕ꧀ꦖꦤ꧀ꦠꦷ ꦮꦴ ꦄꦴꦒꦕ꧀ꦖꦤ꧀ꦠꦷ ꦮꦴ ꦥꦱ꧀ꦱꦠꦶ, ꦱꦠꦶ ꦏꦫꦟꦷꦪꦺ ꦒꦤ꧀ꦠ꧀ꦮꦴ ꦥꦱ꧀ꦱꦠꦶ, ꦄꦴꦥꦢꦴꦱꦸ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦥꦜꦩꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.

꧒. ꦢꦸꦠꦶꦪꦱꦶꦏ꧀ꦑꦴꦥꦢꦁ

꧙꧘꧒. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦸꦤꦶꦪꦺꦴ ꦄꦴꦱꦤ꧀ꦢꦶꦩ꧀ꦥꦶ ꦥꦭ꧀ꦭꦔ꧀ꦏꦩ꧀ꦥꦶ ꦥꦫꦶꦨꦸꦚ꧀ꦗꦤ꧀ꦠꦶ. ꦩꦤꦸꦱ꧀ꦱꦴ ꦮꦶꦲꦴꦫꦕꦴꦫꦶꦏꦁ ꦄꦴꦲꦶꦟ꧀ꦝꦤ꧀ꦠꦴ ꦥꦱ꧀ꦱꦶꦠ꧀ꦮꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸꦤꦶꦪꦺꦴ ꦄꦴꦱꦤ꧀ꦢꦶꦩ꧀ꦥꦶ ꦥꦭ꧀ꦭꦔ꧀ꦏꦩ꧀ꦥꦶ ꦥꦫꦶꦨꦸꦚ꧀ꦗꦶꦱ꧀ꦱꦤ꧀ꦠꦶ, ꦱꦺꦪ꧀ꦪꦡꦴꦥꦶ ꦒꦶꦲꦶꦤꦶꦪꦺꦴ ꦏꦴꦩꦨꦺꦴꦒꦶꦤꦶꦪꦺꦴ’’ꦠꦶ! ꦄꦱ꧀ꦱꦺꦴꦱꦸꦁ ꦑꦺꦴ ꦨꦶꦏ꧀ꦑꦸꦤꦶꦪꦺꦴ ꦠꦺꦱꦁ ꦩꦤꦸꦱ꧀ꦱꦴꦤꦁ ꦈꦗ꧀ꦙꦴꦪꦤ꧀ꦠꦴꦤꦁ ꦑꦶꦪ꧀ꦪꦤ꧀ꦠꦴꦤꦁ ꦮꦶꦥꦴꦕꦺꦤ꧀ꦠꦴꦤꦁ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸꦤꦶꦪꦺꦴ ꦄꦴꦱꦤ꧀ꦢꦶꦩ꧀ꦥꦶ ꦥꦭ꧀ꦭꦔ꧀ꦏꦩ꧀ꦥꦶ ꦥꦫꦶꦨꦸꦚ꧀ꦗꦶꦱ꧀ꦱꦤ꧀ꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦄꦴꦱꦤ꧀ꦢꦶꦩ꧀ꦥꦶ ꦥꦭ꧀ꦭꦔ꧀ꦏꦩ꧀ꦥꦶ ꦥꦫꦶꦨꦸꦚ꧀ꦗꦤ꧀ꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦄꦴꦱꦤ꧀ꦢꦶꦩ꧀ꦥꦶ ꦥꦭ꧀ꦭꦔ꧀ꦏꦩ꧀ꦥꦶ ꦥꦫꦶꦨꦸꦚ꧀ꦗꦶꦱ꧀ꦱꦤ꧀ꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧙꧘꧓. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦄꦴꦱꦤ꧀ꦢꦶꦁ ꦮꦴ ꦥꦭ꧀ꦭꦔ꧀ꦏꦁ ꦮꦴ ꦥꦫꦶꦨꦸꦚ꧀ꦗꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧙꧘꧔. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦄꦴꦱꦤ꧀ꦢꦷ ꦤꦴꦩ ꦄꦠꦶꦏ꧀ꦏꦤ꧀ꦠꦥ꧀ꦥꦩꦴꦟꦴ ꦮꦸꦕ꧀ꦕꦠꦶ.

ꦥꦭ꧀ꦭꦔ꧀ꦏꦺꦴ ꦤꦴꦩ ꦄꦴꦲꦫꦶꦩꦺꦲꦶ [‘‘ꦄꦱꦁꦲꦴꦫꦶꦩꦺꦲꦶ’’ ꦆꦠꦶ ꦏꦔ꧀ꦑꦴꦮꦶꦠꦫꦟꦶꦪꦴ ꦱꦩꦺꦠꦶ] ꦮꦴꦭ꦳ꦺꦲꦶ ꦏꦠꦺꦴ ꦲꦺꦴꦠꦶ.

ꦥꦫꦶꦨꦸꦚ꧀ꦗꦺꦪ꧀ꦪꦴꦠꦶ ꦠꦱ꧀ꦩꦶꦁ ꦄꦨꦶꦤꦶꦱꦷꦢꦠꦶ ꦮꦴ ꦄꦨꦶꦤꦶꦥꦗ꧀ꦗꦠꦶ ꦮꦴ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧙꧘꧕. ꦄꦤꦴꦥꦠ꧀ꦠꦶ ꦄꦴꦱꦤ꧀ꦢꦶꦪꦴ ꦥꦴꦢꦺ ꦖꦶꦤ꧀ꦢꦶꦠ꧀ꦮꦴ ꦥꦫꦶꦨꦸꦚ꧀ꦗꦠꦶ, ꦥꦭ꧀ꦭꦔ꧀ꦏꦱ꧀ꦱ ꦮꦴꦭ꦳ꦺ ꦨꦶꦤ꧀ꦢꦶꦠ꧀ꦮꦴ ꦥꦫꦶꦨꦸꦚ꧀ꦗꦠꦶ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦢꦸꦠꦶꦪꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.

꧓. ꦠꦠꦶꦪꦱꦶꦏ꧀ꦑꦴꦥꦢꦁ

꧙꧘꧖. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦱꦸꦠ꧀ꦠꦁ ꦏꦤ꧀ꦠꦤ꧀ꦠꦶ. ꦩꦤꦸꦱ꧀ꦱꦴ ꦮꦶꦲꦴꦫꦕꦴꦫꦶꦏꦁ ꦄꦴꦲꦶꦟ꧀ꦝꦤ꧀ꦠꦴ ꦥꦱ꧀ꦱꦶꦠ꧀ꦮꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸꦤꦶꦪꦺꦴ ꦱꦸꦠ꧀ꦠꦁ ꦏꦤ꧀ꦠꦶꦱ꧀ꦱꦤ꧀ꦠꦶ, ꦱꦺꦪ꧀ꦪꦡꦴꦥꦶ ꦒꦶꦲꦶꦤꦶꦪꦺꦴ ꦏꦴꦩꦨꦺꦴꦒꦶꦤꦶꦪꦺꦴ’’ꦠꦶ! ꦄꦱ꧀ꦱꦺꦴꦱꦸꦁ ꦑꦺꦴ ꦨꦶꦏ꧀ꦑꦸꦤꦶꦪꦺꦴ ꦠꦺꦱꦁ ꦩꦤꦸꦱ꧀ꦱꦴꦤꦁ ꦈꦗ꧀ꦙꦴꦪꦤ꧀ꦠꦴꦤꦁ ꦑꦶꦪ꧀ꦪꦤ꧀ꦠꦴꦤꦁ ꦮꦶꦥꦴꦕꦺꦤ꧀ꦠꦴꦤꦁ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ …ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦱꦸꦠ꧀ꦠꦁ ꦏꦤ꧀ꦠꦶꦱ꧀ꦱꦤ꧀ꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦱꦸꦠ꧀ꦠꦁ ꦏꦤ꧀ꦠꦤ꧀ꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦱꦸꦠ꧀ꦠꦁ ꦏꦤ꧀ꦠꦶꦱ꧀ꦱꦤ꧀ꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧙꧘꧗. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦱꦸꦠ꧀ꦠꦁ ꦏꦤ꧀ꦠꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧙꧘꧘. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦱꦸꦠ꧀ꦠꦁ ꦤꦴꦩ ꦖ ꦱꦸꦠ꧀ꦠꦴꦤꦶ – ꦑꦺꦴꦩꦁ, ꦏꦥ꧀ꦥꦴꦱꦶꦏꦁ, ꦏꦺꦴꦱꦺꦪ꧀ꦪꦁ, ꦏꦩ꧀ꦧꦭꦁ, ꦱꦴꦟꦁ, ꦨꦔ꧀ꦒꦁ.

ꦏꦤ꧀ꦠꦺꦪ꧀ꦪꦴꦠꦶ ꦱꦪꦁ ꦏꦤ꧀ꦠꦠꦶ, ꦥꦪꦺꦴꦒꦺ ꦢꦸꦏ꧀ꦏꦛꦁ. ꦈꦗ꧀ꦗꦮꦸꦗ꧀ꦗꦮꦺ ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧙꧘꧙. ꦄꦤꦴꦥꦠ꧀ꦠꦶ ꦏꦤ꧀ꦠꦶꦠꦱꦸꦠ꧀ꦠꦁ ꦏꦤ꧀ꦠꦠꦶ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦠꦠꦶꦪꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.

꧔. ꦕꦠꦸꦠ꧀ꦡꦱꦶꦏ꧀ꦑꦴꦥꦢꦁ

꧙꧙꧐. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦸꦤꦶꦪꦺꦴ ꦒꦶꦲꦶꦮꦺꦪ꧀ꦪꦴꦮꦕ꧀ꦕꦁ ꦏꦫꦺꦴꦤ꧀ꦠꦶ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸꦤꦶꦪꦺꦴ ꦒꦶꦲꦶꦮꦺꦪ꧀ꦪꦴꦮꦕ꧀ꦕꦁ ꦏꦫꦶꦱ꧀ꦱꦤ꧀ꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦒꦶꦲꦶꦮꦺꦪ꧀ꦪꦴꦮꦕ꧀ꦕꦁ ꦏꦫꦺꦴꦤ꧀ꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦒꦶꦲꦶꦮꦺꦪ꧀ꦪꦴꦮꦕ꧀ꦕꦁ ꦏꦫꦶꦱ꧀ꦱꦤ꧀ꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧙꧙꧑. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦒꦶꦲꦶꦮꦺꦪ꧀ꦪꦴꦮꦕ꧀ꦕꦁ ꦏꦫꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧙꧙꧒. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦒꦶꦲꦶꦮꦺꦪ꧀ꦪꦴꦮꦕ꧀ꦕꦁ ꦤꦴꦩ ꦄꦒꦴꦫꦶꦏꦱ꧀ꦱ ꦪꦴꦒꦸꦁ ꦮꦴ ꦨꦠ꧀ꦠꦁ ꦮꦴ ꦑꦴꦢꦤꦷꦪꦁ ꦮꦴ ꦥꦕꦠꦶ, ꦱꦴꦛꦏꦁ ꦮꦴ ꦮꦺꦜꦤꦁ ꦮꦴ ꦣꦺꦴꦮꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧙꧙꧓. ꦄꦤꦴꦥꦠ꧀ꦠꦶ ꦪꦴꦒꦸꦥꦴꦤꦺ, ꦱꦔ꧀ꦓꦨꦠ꧀ꦠꦺ, ꦕꦺꦠꦶꦪꦥꦹꦗꦴꦪ, ꦄꦠ꧀ꦠꦤꦺꦴ ꦮꦺꦪ꧀ꦪꦴꦮꦕ꧀ꦕꦏꦫꦱ꧀ꦱ ꦪꦴꦒꦸꦁ ꦮꦴ ꦨꦠ꧀ꦠꦁ ꦮꦴ ꦑꦴꦢꦤꦷꦪꦁ ꦮꦴ ꦥꦕꦠꦶ, ꦱꦴꦛꦏꦁ ꦮꦴ ꦮꦺꦜꦤꦁ ꦮꦴ ꦣꦺꦴꦮꦠꦶ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦕꦠꦸꦠ꧀ꦡꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.

꧕. ꦥꦚ꧀ꦕꦩꦱꦶꦏ꧀ꦑꦴꦥꦢꦁ

꧙꧙꧔. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦚ꧀ꦚꦠꦫꦴ ꦨꦶꦏ꧀ꦑꦸꦤꦷ ꦡꦸꦭ꧀ꦭꦤꦤ꧀ꦢꦁ ꦨꦶꦏ꧀ꦑꦸꦤꦶꦁ ꦈꦥꦱꦔ꧀ꦏꦩꦶꦠ꧀ꦮꦴ ꦌꦠꦢꦮꦺꦴꦕ – ‘‘ꦌꦲꦴꦪ꧀ꦪꦺ, ꦆꦩꦁ ꦄꦣꦶꦏꦫꦟꦁ ꦮꦹꦥꦱꦩꦺꦲꦷ’’ꦠꦶ. ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ‘ꦱꦴꦣꦹ’ꦠꦶ ꦥꦛꦶꦱ꧀ꦱꦸꦟꦶꦠ꧀ꦮꦴ ꦤꦺꦮ ꦮꦹꦥꦱꦩꦺꦠꦶ ꦤ ꦮꦹꦥꦱꦩꦴꦪ ꦈꦱ꧀ꦱꦸꦏ꧀ꦏꦁ ꦏꦫꦺꦴꦠꦶ. ꦄꦡ ꦑꦺꦴ ꦱꦴ ꦨꦶꦏ꧀ꦑꦸꦤꦷ ꦨꦶꦏ꧀ꦑꦸꦤꦷꦤꦁ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦶ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦪ꧀ꦪꦴ ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦶꦪꦴ – ‘ꦌꦲꦴꦪ꧀ꦪꦺ’, ꦆꦩꦁ ꦄꦣꦶꦏꦫꦟꦁ ꦮꦹꦥꦱꦩꦺꦲꦷ’ꦠꦶ ꦮꦸꦕ꧀ꦕꦩꦴꦤꦴ – ‘ꦱꦴꦣꦹ’ꦠꦶ ꦥꦛꦶꦱ꧀ꦱꦸꦟꦶꦠ꧀ꦮꦴ, ꦤꦺꦮ ꦮꦹꦥꦱꦩꦺꦱ꧀ꦱꦠꦶ ꦤ ꦮꦹꦥꦱꦩꦴꦪ ꦈꦱ꧀ꦱꦸꦏ꧀ꦏꦁ ꦏꦫꦶꦱ꧀ꦱꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦨꦶꦏ꧀ꦑꦸꦤꦶꦪꦴ – ‘‘ꦌꦲꦴꦪ꧀ꦪꦺ, ꦆꦩꦁ ꦄꦣꦶꦏꦫꦟꦁ ꦮꦹꦥꦱꦩꦺꦲꦷ’’ꦠꦶ ꦮꦸꦕ꧀ꦕꦩꦴꦤꦴ – ‘‘ꦱꦴꦣꦹ’’ꦠꦶ ꦥꦛꦶꦱ꧀ꦱꦸꦟꦶꦠ꧀ꦮꦴ, ꦤꦺꦮ ꦮꦹꦥꦱꦩꦺꦠꦶ ꦤ ꦮꦹꦥꦱꦩꦴꦪ ꦈꦱ꧀ꦱꦸꦏ꧀ꦏꦁ ꦏꦫꦺꦴꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦨꦶꦏ꧀ꦑꦸꦤꦶꦪꦴ – ‘‘ꦌꦲꦴꦪ꧀ꦪꦺ, ꦆꦩꦁ ꦄꦣꦶꦏꦫꦟꦁ ꦮꦹꦥꦱꦩꦺꦲꦷ’’ꦠꦶ ꦮꦸꦕ꧀ꦕꦩꦴꦤꦴ – ‘‘ꦱꦴꦣꦹ’’ꦠꦶ ꦥꦛꦶꦱ꧀ꦱꦸꦟꦶꦠ꧀ꦮꦴ, ꦤꦺꦮ ꦮꦹꦥꦱꦩꦺꦱ꧀ꦱꦠꦶ ꦤ ꦮꦹꦥꦱꦩꦴꦪ ꦈꦱ꧀ꦱꦸꦏ꧀ꦏꦁ ꦏꦫꦶꦱ꧀ꦱꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧙꧙꧕. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦨꦶꦏ꧀ꦑꦸꦤꦶꦪꦴ – ‘ꦌꦲꦴꦪ꧀ꦪꦺ, ꦆꦩꦁ ꦄꦣꦶꦏꦫꦟꦁ ꦮꦹꦥꦱꦩꦺꦲꦷ’ꦠꦶ ꦮꦸꦕ꧀ꦕꦩꦴꦤꦴ – ‘ꦱꦴꦣꦹ’ꦠꦶ ꦥꦛꦶꦱ꧀ꦱꦸꦟꦶꦠ꧀ꦮꦴ ꦱꦴ ꦥꦕ꧀ꦖꦴ ꦄꦤꦤ꧀ꦠꦫꦴꦪꦶꦏꦶꦤꦷ ꦤꦺꦮ ꦮꦹꦥꦱꦩꦺꦪ꧀ꦪ ꦤ ꦮꦹꦥꦱꦩꦴꦪ ꦈꦱ꧀ꦱꦸꦏ꧀ꦏꦁ ꦏꦫꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧙꧙꧖. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦨꦶꦏ꧀ꦑꦸꦤꦶꦪꦴꦠꦶ ꦄꦚ꧀ꦚꦴꦪ ꦨꦶꦏ꧀ꦑꦸꦤꦶꦪꦴ.

ꦄꦣꦶꦏꦫꦟꦁ ꦤꦴꦩ ꦕꦠ꧀ꦠꦴꦫꦶ ꦄꦣꦶꦏꦫꦟꦴꦤꦶ – ꦮꦶꦮꦴꦢꦴꦣꦶꦏꦫꦟꦁ, ꦄꦤꦸꦮꦴꦢꦴꦣꦶꦏꦫꦟꦁ, ꦄꦴꦥꦠ꧀ꦠꦴꦣꦶꦏꦫꦟꦁ, ꦏꦶꦕ꧀ꦕꦴꦣꦶꦏꦫꦟꦁ.

ꦌꦲꦴꦪ꧀ꦪꦺ ꦆꦩꦁ ꦄꦣꦶꦏꦫꦟꦁ ꦮꦹꦥꦱꦩꦺꦲꦷꦠꦶ ꦌꦲꦴꦪ꧀ꦪꦺ ꦆꦩꦁ ꦄꦣꦶꦏꦫꦟꦁ ꦮꦶꦤꦶꦕ꧀ꦖꦺꦲꦶ.

ꦱꦴ ꦥꦕ꧀ꦖꦴ ꦄꦤꦤ꧀ꦠꦫꦴꦪꦶꦏꦶꦤꦷꦠꦶ ꦄꦱꦠꦶ ꦄꦤ꧀ꦠꦫꦴꦪꦺ.

ꦤꦺꦮ ꦮꦹꦥꦱꦩꦺꦪ꧀ꦪꦴꦠꦶ ꦤ ꦱꦪꦁ ꦮꦹꦥꦱꦩꦺꦪ꧀ꦪ.

ꦤ ꦮꦹꦥꦱꦩꦴꦪ ꦈꦱ꧀ꦱꦸꦏ꧀ꦏꦁ ꦏꦫꦺꦪ꧀ꦪꦴꦠꦶ ꦤ ꦄꦚ꧀ꦚꦁ ꦄꦴꦟꦴꦥꦺꦪ꧀ꦪ. ‘‘ꦤꦺꦮ ꦮꦹꦥꦱꦩꦺꦱ꧀ꦱꦴꦩꦶ ꦤ ꦮꦹꦥꦱꦩꦴꦪ ꦈꦱ꧀ꦱꦸꦏ꧀ꦏꦁ ꦏꦫꦶꦱ꧀ꦱꦴꦩꦷ’’ꦠꦶ ꦣꦸꦫꦁ ꦤꦶꦏ꧀ꦑꦶꦠ꧀ꦠꦩꦠ꧀ꦠꦺ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧙꧙꧗. ꦈꦥꦱꦩ꧀ꦥꦤ꧀ꦤꦴꦪ ꦈꦥꦱꦩ꧀ꦥꦤ꧀ꦤꦱꦚ꧀ꦚꦴ ꦄꦣꦶꦏꦫꦟꦁ ꦤꦺꦮ ꦮꦹꦥꦱꦩꦺꦠꦶ ꦤ ꦮꦹꦥꦱꦩꦴꦪ ꦈꦱ꧀ꦱꦸꦏ꧀ꦏꦁ ꦏꦫꦺꦴꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦈꦥꦱꦩ꧀ꦥꦤ꧀ꦤꦴꦪ ꦮꦺꦩꦠꦶꦏꦴ ꦄꦣꦶꦏꦫꦟꦁ ꦤꦺꦮ ꦮꦹꦥꦱꦩꦺꦠꦶ, ꦤ ꦮꦹꦥꦱꦩꦴꦪ ꦈꦱ꧀ꦱꦸꦏ꧀ꦏꦁ ꦏꦫꦺꦴꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦈꦥꦱꦩ꧀ꦥꦤ꧀ꦤꦴꦪ ꦄꦤꦸꦥꦱꦩ꧀ꦥꦤ꧀ꦤꦱꦚ꧀ꦚꦴ ꦄꦣꦶꦏꦫꦟꦁ ꦤꦺꦮ ꦮꦹꦥꦱꦩꦺꦠꦶ, ꦤ ꦮꦹꦥꦱꦩꦴꦪ ꦈꦱ꧀ꦱꦸꦏ꧀ꦏꦁ ꦏꦫꦺꦴꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦄꦤꦸꦥꦱꦩ꧀ꦥꦤ꧀ꦤꦴꦪ ꦄꦣꦶꦏꦫꦟꦁ ꦤꦺꦮ ꦮꦹꦥꦱꦩꦺꦠꦶ, ꦤ ꦮꦹꦥꦱꦩꦴꦪ ꦈꦱ꧀ꦱꦸꦏ꧀ꦏꦁ ꦏꦫꦺꦴꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦤꦸꦥꦱꦩ꧀ꦥꦤ꧀ꦤꦴꦪ ꦈꦥꦱꦩ꧀ꦥꦤ꧀ꦤꦱꦚ꧀ꦚꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦤꦸꦥꦱꦩ꧀ꦥꦤ꧀ꦤꦴꦪ ꦮꦺꦩꦠꦶꦏꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦤꦸꦥꦱꦩ꧀ꦥꦤ꧀ꦤꦴꦪ ꦄꦤꦸꦥꦱꦩ꧀ꦥꦤ꧀ꦤꦱꦚ꧀ꦚꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

꧙꧙꧘. ꦄꦤꦴꦥꦠ꧀ꦠꦶ ꦱꦠꦶ ꦄꦤ꧀ꦠꦫꦴꦪꦺ, ꦥꦫꦶꦪꦺꦱꦶꦠ꧀ꦮꦴ ꦤ ꦭꦨꦠꦶ, ꦒꦶꦭꦴꦤꦴꦪ, ꦄꦴꦥꦢꦴꦱꦸ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦥꦚ꧀ꦕꦩꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.

꧖. ꦖꦛ꧀ꦜꦱꦶꦏ꧀ꦑꦴꦥꦢꦁ

꧙꧙꧙. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦤꦛꦴꦤꦩ꧀ꦥꦶ ꦤꦛꦏꦴꦤꦩ꧀ꦥꦶ ꦭꦔ꧀ꦓꦏꦴꦤꦩ꧀ꦥꦶ ꦱꦺꦴꦏꦗ꧀ꦙꦴꦪꦶꦏꦴꦤꦩ꧀ꦥꦶ ꦏꦸꦩ꧀ꦨꦡꦹꦟꦶꦏꦴꦤꦩ꧀ꦥꦶ ꦱꦲꦠ꧀ꦡꦴ ꦑꦴꦢꦤꦷꦪꦁ ꦨꦺꦴꦗꦤꦷꦪꦁ ꦢꦺꦠꦶ – ‘‘ꦩꦪ꧀ꦲꦁ ꦥꦫꦶꦱꦠꦶ ꦮꦟ꧀ꦟꦁ ꦨꦴꦱꦡꦴ’’ꦠꦶ. ꦤꦛꦴꦥꦶ ꦤꦛꦏꦴꦥꦶ ꦭꦔ꧀ꦓꦏꦴꦥꦶ ꦱꦺꦴꦏꦗ꧀ꦙꦴꦪꦶꦏꦴꦥꦶ ꦏꦸꦩ꧀ꦨꦡꦹꦟꦶꦏꦴꦥꦶ ꦡꦸꦭ꧀ꦭꦤꦤ꧀ꦢꦴꦪ ꦨꦶꦏ꧀ꦑꦸꦤꦶꦪꦴ ꦥꦫꦶꦱꦠꦶ ꦮꦟ꧀ꦟꦁ ꦨꦴꦱꦤ꧀ꦠꦶ – ‘‘ꦄꦪ꧀ꦪꦴ ꦡꦸꦭ꧀ꦭꦤꦤ꧀ꦢꦴ ꦧꦲꦸꦱ꧀ꦱꦸꦠꦴ ꦨꦴꦟꦶꦏꦴ ꦮꦶꦱꦴꦫꦢꦴ ꦥꦛ꧀ꦛꦴ ꦣꦩ꧀ꦩꦶꦁ ꦏꦡꦁ ꦏꦴꦠꦸꦁ; ꦢꦺꦡ ꦄꦪ꧀ꦪꦴꦪ, ꦏꦫꦺꦴꦡ ꦄꦪ꧀ꦪꦴꦪꦴ’’ꦠꦶ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ꦏꦡꦚ꧀ꦲꦶ ꦤꦴꦩ ꦄꦪ꧀ꦪꦴ ꦡꦸꦭ꧀ꦭꦤꦤ꧀ꦢꦴ ꦄꦒꦴꦫꦶꦏꦱ꧀ꦱ ꦱꦲꦠ꧀ꦡꦴ ꦑꦴꦢꦤꦷꦪꦁ ꦨꦺꦴꦗꦤꦷꦪꦁ ꦢꦱ꧀ꦱꦠꦷꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦄꦒꦴꦫꦶꦏꦱ꧀ꦱ ꦱꦲꦠ꧀ꦡꦴ ꦑꦴꦢꦤꦷꦪꦁ ꦨꦺꦴꦗꦤꦷꦪꦁ ꦢꦺꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦄꦒꦴꦫꦶꦏꦱ꧀ꦱ ꦱꦲꦠ꧀ꦡꦴ ꦑꦴꦢꦤꦷꦪꦁ ꦨꦺꦴꦗꦤꦷꦪꦁ ꦢꦱ꧀ꦱꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧑꧐꧐꧐. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦄꦒꦴꦫꦶꦏꦱ꧀ꦱ ꦮꦴ ꦥꦫꦶꦧ꧀ꦧꦴꦗꦏꦱ꧀ꦱ ꦮꦴ ꦥꦫꦶꦧ꧀ꦧꦴꦗꦶꦏꦴꦪ ꦮꦴ ꦱꦲꦠ꧀ꦡꦴ ꦑꦴꦢꦤꦷꦪꦁ ꦮꦴ ꦨꦺꦴꦗꦤꦷꦪꦁ ꦮꦴ ꦢꦢꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧑꧐꧐꧑. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦄꦒꦴꦫꦶꦏꦺꦴ ꦤꦴꦩ ꦪꦺꦴ ꦏꦺꦴꦕꦶ ꦄꦒꦴꦫꦁ ꦄꦗ꧀ꦙꦴꦮꦱꦠꦶ.

ꦥꦫꦶꦧ꧀ꦧꦴꦗꦏꦺꦴ ꦤꦴꦩ ꦨꦶꦏ꧀ꦑꦸꦚ꧀ꦕ ꦱꦴꦩꦟꦺꦫꦚ꧀ꦕ ꦜꦥꦺꦠ꧀ꦮꦴ ꦪꦺꦴ ꦏꦺꦴꦕꦶ ꦥꦫꦶꦧ꧀ꦧꦴꦗꦏꦱꦩꦴꦥꦤ꧀ꦤꦺꦴ.

ꦥꦫꦶꦧ꧀ꦧꦴꦗꦶꦏꦴ ꦤꦴꦩ ꦨꦶꦏ꧀ꦑꦸꦤꦶꦚ꧀ꦕ ꦱꦶꦏ꧀ꦑꦩꦴꦤꦚ꧀ꦕ ꦱꦴꦩꦟꦺꦫꦶꦚ꧀ꦕ ꦜꦥꦺꦠ꧀ꦮꦴ ꦪꦴ ꦏꦴꦕꦶ ꦥꦫꦶꦧ꧀ꦧꦴꦗꦶꦏꦱꦩꦴꦥꦤ꧀ꦤꦴ.

ꦑꦴꦢꦤꦷꦪꦁ ꦤꦴꦩ ꦥꦚ꧀ꦕ ꦨꦺꦴꦗꦤꦴꦤꦶ – ꦈꦢꦏꦢꦤ꧀ꦠꦥꦺꦴꦤꦁ ꦜꦥꦺꦠ꧀ꦮꦴ ꦄꦮꦱꦺꦱꦁ ꦑꦴꦢꦤꦷꦪꦁ ꦤꦴꦩ.

ꦨꦺꦴꦗꦤꦷꦪꦁ ꦤꦴꦩ ꦥꦚ꧀ꦕ ꦨꦺꦴꦗꦤꦴꦤꦶ – ꦎꦢꦤꦺꦴ, ꦏꦸꦩ꧀ꦩꦴꦱꦺꦴ, ꦱꦠ꧀ꦠꦸ, ꦩꦕ꧀ꦖꦺꦴ, ꦩꦁꦱꦁ.

ꦢꦢꦺꦪ꧀ꦪꦴꦠꦶ ꦏꦴꦪꦺꦤ ꦮꦴ ꦏꦴꦪꦥꦛꦶꦧꦢ꧀ꦣꦺꦤ ꦮꦴ ꦤꦶꦱ꧀ꦱꦒ꧀ꦒꦶꦪꦺꦤ ꦮꦴ ꦢꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦈꦢꦏꦢꦤ꧀ꦠꦥꦺꦴꦤꦁ ꦢꦺꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

꧑꧐꧐꧒. ꦄꦤꦴꦥꦠ꧀ꦠꦶ ꦢꦴꦥꦺꦠꦶ ꦤ ꦢꦺꦠꦶ, ꦈꦥꦤꦶꦏ꧀ꦑꦶꦥꦶꦠ꧀ꦮꦴ ꦢꦺꦠꦶ, ꦧꦴꦲꦶꦫꦴꦭꦺꦥꦁ ꦢꦺꦠꦶ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦖꦛ꧀ꦜꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.

꧗. ꦱꦠ꧀ꦠꦩꦱꦶꦏ꧀ꦑꦴꦥꦢꦁ

꧑꧐꧐꧓. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦄꦴꦮꦱꦡꦕꦷꦮꦫꦁ ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦥꦫꦶꦨꦸꦚ꧀ꦗꦠꦶ. ꦄꦚ꧀ꦚꦴ ꦈꦠꦸꦤꦶꦪꦺꦴ ꦨꦶꦏ꧀ꦑꦸꦤꦶꦪꦺꦴ ꦤ ꦭꦨꦤ꧀ꦠꦶ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦪ꧀ꦪꦴ ꦡꦸꦭ꧀ꦭꦤꦤ꧀ꦢꦴ ꦄꦴꦮꦱꦡꦕꦷꦮꦫꦁ ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦥꦫꦶꦨꦸꦚ꧀ꦗꦶꦱ꧀ꦱꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦄꦴꦮꦱꦡꦕꦷꦮꦫꦁ ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦥꦫꦶꦨꦸꦚ꧀ꦗꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦄꦴꦮꦱꦡꦕꦷꦮꦫꦁ ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦥꦫꦶꦨꦸꦚ꧀ꦗꦶꦱ꧀ꦱꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧑꧐꧐꧔. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦄꦴꦮꦱꦡꦕꦷꦮꦫꦁ ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦥꦫꦶꦨꦸꦚ꧀ꦗꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧑꧐꧐꧕. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦄꦴꦮꦱꦡꦕꦷꦮꦫꦁ ꦤꦴꦩ ‘‘ꦈꦠꦸꦤꦶꦪꦺꦴ ꦨꦶꦏ꧀ꦑꦸꦤꦶꦪꦺꦴ ꦥꦫꦶꦨꦸꦚ꧀ꦗꦤ꧀ꦠꦹ’’ꦠꦶ ꦢꦶꦤ꧀ꦤꦁ ꦲꦺꦴꦠꦶ.

ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦥꦫꦶꦨꦸꦚ꧀ꦗꦺꦪ꧀ꦪꦴꦠꦶ ꦢ꧀ꦮꦺꦠꦶꦱ꧀ꦱꦺꦴ ꦫꦠ꧀ꦠꦶꦪꦺꦴ ꦥꦫꦶꦨꦸꦚ꧀ꦗꦶꦠ꧀ꦮꦴ ꦕꦠꦸꦠ꧀ꦡꦢꦶꦮꦱꦺ ꦣꦺꦴꦮꦶꦠ꧀ꦮꦴ ꦨꦶꦏ꧀ꦑꦸꦤꦶꦪꦴ ꦮꦴ ꦱꦶꦏ꧀ꦑꦩꦴꦤꦴꦪ ꦮꦴ ꦱꦴꦩꦟꦺꦫꦶꦪꦴ ꦮꦴ ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦥꦫꦶꦨꦸꦚ꧀ꦗꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧑꧐꧐꧖. ꦄꦤꦶꦱ꧀ꦱꦗ꧀ꦗꦶꦠꦺ ꦄꦤꦶꦱ꧀ꦱꦗ꧀ꦗꦶꦠꦱꦚ꧀ꦚꦴ ꦥꦫꦶꦨꦸꦚ꧀ꦗꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦄꦤꦶꦱ꧀ꦱꦗ꧀ꦗꦶꦠꦺ ꦮꦺꦩꦠꦶꦏꦴ ꦥꦫꦶꦨꦸꦚ꧀ꦗꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦄꦤꦶꦱ꧀ꦱꦗ꧀ꦗꦶꦠꦺ ꦤꦶꦱ꧀ꦱꦗ꧀ꦗꦶꦠꦱꦚ꧀ꦚꦴ ꦥꦫꦶꦨꦸꦚ꧀ꦗꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦤꦶꦱ꧀ꦱꦗ꧀ꦗꦶꦠꦺ ꦄꦤꦶꦱ꧀ꦱꦗ꧀ꦗꦶꦠꦱꦚ꧀ꦚꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦤꦶꦱ꧀ꦱꦗ꧀ꦗꦶꦠꦺ ꦮꦺꦩꦠꦶꦏꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦤꦶꦱ꧀ꦱꦗ꧀ꦗꦶꦠꦺ ꦤꦶꦱ꧀ꦱꦗ꧀ꦗꦶꦠꦱꦚ꧀ꦚꦴ ꦄꦤꦴꦥꦠ꧀ꦠꦶ.

꧑꧐꧐꧗. ꦄꦤꦴꦥꦠ꧀ꦠꦶ ꦤꦶꦱ꧀ꦱꦗ꧀ꦗꦶꦠ꧀ꦮꦴ ꦥꦫꦶꦨꦸꦚ꧀ꦗꦠꦶ, ꦥꦸꦤ ꦥꦫꦶꦪꦴꦪꦺꦤ ꦥꦫꦶꦨꦸꦚ꧀ꦗꦠꦶ, ꦄꦚ꧀ꦚꦴ ꦈꦠꦸꦤꦶꦪꦺꦴ ꦨꦶꦏ꧀ꦑꦸꦤꦶꦪꦺꦴ ꦤ ꦲꦺꦴꦤ꧀ꦠꦶ, ꦄꦕ꧀ꦖꦶꦤ꧀ꦤꦕꦷꦮꦫꦶꦏꦴꦪ, ꦤꦛ꧀ꦜꦕꦷꦮꦫꦶꦏꦴꦪ, ꦄꦴꦥꦢꦴꦱꦸ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦱꦠ꧀ꦠꦩꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.

꧘. ꦄꦛ꧀ꦜꦩꦱꦶꦏ꧀ꦑꦴꦥꦢꦁ

꧑꧐꧐꧘. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦄꦴꦮꦱꦡꦁ ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦕꦴꦫꦶꦏꦁ ꦥꦏ꧀ꦏꦴꦩꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦡꦸꦭ꧀ꦭꦤꦤ꧀ꦢꦴꦪ ꦨꦶꦏ꧀ꦑꦸꦤꦶꦪꦴ ꦄꦴꦮꦱꦡꦺꦴ ꦝꦪ꧀ꦲꦠꦶ. ꦨꦶꦏ꧀ꦑꦸꦤꦶꦪꦺꦴ ꦌꦮꦩꦴꦲꦁꦱꦸ – ‘‘ꦲꦤ꧀ꦢꦴꦪ꧀ꦪꦺ, ꦨꦟ꧀ꦝꦏꦁ ꦤꦷꦲꦫꦴꦩꦴ’’ꦠꦶ. ꦌꦏꦕ꧀ꦕꦴ ꦌꦮꦩꦴꦲꦁꦱꦸ – ‘‘ꦤ ꦩꦪꦁ, ꦄꦪ꧀ꦪꦺ, ꦤꦷꦲꦫꦶꦱ꧀ꦱꦴꦩ. ꦪꦁ ꦏꦶꦚ꧀ꦕꦶ ꦤꦛ꧀ꦜꦁ ꦱꦧ꧀ꦧꦁ ꦄꦩ꧀ꦲꦺ ꦄꦨꦶꦪꦸꦚ꧀ꦗꦶꦱ꧀ꦱꦠꦷ’’ꦠꦶ. ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦥꦸꦤꦢꦺꦮ ꦠꦁ ꦄꦴꦮꦱꦡꦁ ꦥꦕ꧀ꦕꦴꦒꦤ꧀ꦠ꧀ꦮꦴ ꦨꦶꦏ꧀ꦑꦸꦤꦶꦪꦺꦴ ꦥꦸꦕ꧀ꦖꦶ – ‘‘ꦄꦥꦴꦪ꧀ꦪꦺ, ꦨꦟ꧀ꦝꦏꦁ ꦤꦷꦲꦫꦶꦠ꧀ꦡꦴ’’ꦠꦶ? ‘‘ꦤ ꦩꦪꦁ, ꦄꦪ꧀ꦪꦺ, ꦤꦷꦲꦫꦶꦩ꧀ꦲꦴ’’ꦠꦶ. ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦈꦗ꧀ꦙꦴꦪꦠꦶ ꦑꦶꦪ꧀ꦪꦠꦶ ꦮꦶꦥꦴꦕꦺꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸꦤꦶꦪꦺꦴ ꦄꦴꦮꦱꦡꦺ ꦝꦪ꧀ꦲꦩꦴꦤꦺ ꦨꦟ꧀ꦝꦏꦁ ꦤ ꦤꦷꦲꦫꦶꦱ꧀ꦱꦤ꧀ꦠꦷ’’ꦠꦶ! ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦪ꧀ꦪꦴ ꦡꦸꦭ꧀ꦭꦤꦤ꧀ꦢꦴ ꦄꦴꦮꦱꦡꦁ ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦕꦴꦫꦶꦏꦁ ꦥꦏ꧀ꦏꦩꦶꦱ꧀ꦱꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦄꦴꦮꦱꦡꦁ ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦕꦴꦫꦶꦏꦁ ꦥꦏ꧀ꦏꦩꦠꦷꦠꦶ [ꦥꦏ꧀ꦏꦩꦷꦠꦶ (ꦏ.)]? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦄꦴꦮꦱꦡꦁ ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦕꦴꦫꦶꦏꦁ ꦥꦏ꧀ꦏꦩꦶꦱ꧀ꦱꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧑꧐꧐꧙. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦄꦴꦮꦱꦡꦁ ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦕꦴꦫꦶꦏꦁ ꦥꦏ꧀ꦏꦩꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧑꧐꧑꧐. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦄꦴꦮꦱꦡꦺꦴ ꦤꦴꦩ ꦏꦮꦴꦛꦧꦢ꧀ꦣꦺꦴ ꦮꦸꦕ꧀ꦕꦠꦶ.

ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦕꦴꦫꦶꦏꦁ ꦥꦏ꧀ꦏꦩꦺꦪ꧀ꦪꦴꦠꦶ ꦨꦶꦏ꧀ꦑꦸꦤꦶꦪꦴ ꦮꦴ ꦱꦶꦏ꧀ꦑꦩꦴꦤꦴꦪ ꦮꦴ ꦱꦴꦩꦟꦺꦫꦶꦪꦴ ꦮꦴ ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦥꦫꦶꦏ꧀ꦑꦶꦠ꧀ꦠꦱ꧀ꦱ ꦄꦴꦮꦱꦡꦱ꧀ꦱ ꦥꦫꦶꦏ꧀ꦑꦺꦥꦁ ꦄꦠꦶꦏ꧀ꦏꦴꦩꦺꦤ꧀ꦠꦶꦪꦴ ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦄꦥꦫꦶꦏ꧀ꦑꦶꦠ꧀ꦠꦱ꧀ꦱ ꦄꦴꦮꦱꦡꦱ꧀ꦱ ꦈꦥꦕꦴꦫꦁ ꦄꦠꦶꦏ꧀ꦏꦴꦩꦺꦤ꧀ꦠꦶꦪꦴ ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧑꧐꧑꧑. ꦄꦤꦶꦱ꧀ꦱꦗ꧀ꦗꦶꦠꦺ ꦄꦤꦶꦱ꧀ꦱꦗ꧀ꦗꦶꦠꦱꦚ꧀ꦚꦴ ꦥꦏ꧀ꦏꦩꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦄꦤꦶꦱ꧀ꦱꦗ꧀ꦗꦶꦠꦺ ꦮꦺꦩꦠꦶꦏꦴ ꦥꦏ꧀ꦏꦩꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦄꦤꦶꦱ꧀ꦱꦗ꧀ꦗꦶꦠꦺ ꦤꦶꦱ꧀ꦱꦗ꧀ꦗꦶꦠꦱꦚ꧀ꦚꦴ ꦥꦏ꧀ꦏꦩꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦄꦏꦮꦴꦛꦧꦢ꧀ꦣꦁ ꦄꦤꦶꦱ꧀ꦱꦗ꧀ꦗꦶꦠ꧀ꦮꦴ ꦥꦏ꧀ꦏꦩꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦤꦶꦱ꧀ꦱꦗ꧀ꦗꦶꦠꦺ ꦄꦤꦶꦱ꧀ꦱꦗ꧀ꦗꦶꦠꦱꦚ꧀ꦚꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦤꦶꦱ꧀ꦱꦗ꧀ꦗꦶꦠꦺ ꦮꦺꦩꦠꦶꦏꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦤꦶꦱ꧀ꦱꦗ꧀ꦗꦶꦠꦺ ꦤꦶꦱ꧀ꦱꦗ꧀ꦗꦶꦠꦱꦚ꧀ꦚꦴ, ꦄꦤꦴꦥꦠ꧀ꦠꦶ.

꧑꧐꧑꧒. ꦄꦤꦴꦥꦠ꧀ꦠꦶ ꦤꦶꦱ꧀ꦱꦗ꧀ꦗꦶꦠ꧀ꦮꦴ ꦥꦏ꧀ꦏꦩꦠꦶ, ꦱꦠꦶ ꦄꦤ꧀ꦠꦫꦴꦪꦺ, ꦥꦫꦶꦪꦺꦱꦶꦠ꧀ꦮꦴ ꦤ ꦭꦨꦠꦶ, ꦒꦶꦭꦴꦤꦴꦪ, ꦄꦴꦥꦢꦴꦱꦸ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦄꦛ꧀ꦜꦩꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.

꧙. ꦤꦮꦩꦱꦶꦏ꧀ꦑꦴꦥꦢꦁ

꧑꧐꧑꧓. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦠꦶꦫꦕ꧀ꦖꦴꦤꦮꦶꦗ꧀ꦗꦁ ꦥꦫꦶꦪꦴꦥꦸꦟꦤ꧀ꦠꦶ. ꦩꦤꦸꦱ꧀ꦱꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸꦤꦶꦪꦺꦴ ꦠꦶꦫꦕ꧀ꦖꦴꦤꦮꦶꦗ꧀ꦗꦁ ꦥꦫꦶꦪꦴꦥꦸꦟꦶꦱ꧀ꦱꦤ꧀ꦠꦶ, ꦱꦺꦪ꧀ꦪꦡꦴꦥꦶ ꦒꦶꦲꦶꦤꦶꦪꦺꦴ ꦏꦴꦩꦨꦺꦴꦒꦶꦤꦶꦪꦺꦴ’’ꦠꦶ! ꦄꦱ꧀ꦱꦺꦴꦱꦸꦁ ꦑꦺꦴ ꦨꦶꦏ꧀ꦑꦸꦤꦶꦪꦺꦴ ꦠꦺꦱꦁ ꦩꦤꦸꦱ꧀ꦱꦴꦤꦁ ꦈꦗ꧀ꦙꦴꦪꦤ꧀ꦠꦴꦤꦁ ꦑꦶꦪ꧀ꦪꦤ꧀ꦠꦴꦤꦁ ꦮꦶꦥꦴꦕꦺꦤ꧀ꦠꦴꦤꦁ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦠꦶꦫꦕ꧀ꦖꦴꦤꦮꦶꦗ꧀ꦗꦁ ꦥꦫꦶꦪꦴꦥꦸꦟꦶꦱ꧀ꦱꦤ꧀ꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦠꦶꦫꦕ꧀ꦖꦴꦤꦮꦶꦗ꧀ꦗꦁ ꦥꦫꦶꦪꦴꦥꦸꦟꦤ꧀ꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦠꦶꦫꦕ꧀ꦖꦴꦤꦮꦶꦗ꧀ꦗꦁ ꦥꦫꦶꦪꦴꦥꦸꦟꦶꦱ꧀ꦱꦤ꧀ꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧑꧐꧑꧔. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦠꦶꦫꦕ꧀ꦖꦴꦤꦮꦶꦗ꧀ꦗꦁ ꦥꦫꦶꦪꦴꦥꦸꦟꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧑꧐꧑꧕. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦠꦶꦫꦕ꧀ꦖꦴꦤꦮꦶꦗ꧀ꦗꦴ [ꦠꦶꦫꦕ꧀ꦖꦴꦤꦮꦶꦗ꧀ꦗꦁ (ꦏ.)] ꦤꦴꦩ ꦪꦁ ꦏꦶꦚ꧀ꦕꦶ ꦧꦴꦲꦶꦫꦏꦁ ꦄꦤꦠ꧀ꦡꦱꦁꦲꦶꦠꦁ.

ꦥꦫꦶꦪꦴꦥꦸꦟꦺꦪ꧀ꦪꦴꦠꦶ ꦥꦢꦺꦤ ꦥꦫꦶꦪꦴꦥꦸꦟꦴꦠꦶ, ꦥꦢꦺ ꦥꦢꦺ ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦄꦏ꧀ꦑꦫꦴꦪ ꦥꦫꦶꦪꦴꦥꦸꦟꦴꦠꦶ, ꦄꦏ꧀ꦑꦫꦏ꧀ꦑꦫꦴꦪ ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧑꧐꧑꧖. ꦄꦤꦴꦥꦠ꧀ꦠꦶ ꦭꦺꦑꦁ ꦥꦫꦶꦪꦴꦥꦸꦟꦴꦠꦶ, ꦣꦴꦫꦟꦁ ꦥꦫꦶꦪꦴꦥꦸꦟꦴꦠꦶ, ꦒꦸꦠ꧀ꦠꦠ꧀ꦡꦴꦪ ꦥꦫꦶꦠ꧀ꦠꦁ ꦥꦫꦶꦪꦴꦥꦸꦟꦴꦠꦶ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦤꦮꦩꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.

꧑꧐. ꦢꦱꦩꦱꦶꦏ꧀ꦑꦴꦥꦢꦁ

꧑꧐꧑꧗. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦠꦶꦫꦕ꧀ꦖꦴꦤꦮꦶꦗ꧀ꦗꦁ ꦮꦴꦕꦺꦤ꧀ꦠꦶ. ꦩꦤꦸꦱ꧀ꦱꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸꦤꦶꦪꦺꦴ ꦠꦶꦫꦕ꧀ꦖꦴꦤꦮꦶꦗ꧀ꦗꦁ ꦮꦴꦕꦺꦱ꧀ꦱꦤ꧀ꦠꦶ, ꦱꦺꦪ꧀ꦪꦡꦴꦥꦶ ꦒꦶꦲꦶꦤꦶꦪꦺꦴ ꦏꦴꦩꦨꦺꦴꦒꦶꦤꦶꦪꦺꦴ’’ꦠꦶ! ꦄꦱ꧀ꦱꦺꦴꦱꦸꦁ ꦑꦺꦴ ꦨꦶꦏ꧀ꦑꦸꦤꦶꦪꦺꦴ ꦠꦺꦱꦁ ꦩꦤꦸꦱ꧀ꦱꦴꦤꦁ ꦈꦗ꧀ꦙꦴꦪꦤ꧀ꦠꦴꦤꦁ ꦑꦶꦪ꧀ꦪꦤ꧀ꦠꦴꦤꦁ ꦮꦶꦥꦴꦕꦺꦤ꧀ꦠꦴꦤꦁ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦠꦶꦫꦕ꧀ꦖꦴꦤꦮꦶꦗ꧀ꦗꦁ ꦮꦴꦕꦺꦱ꧀ꦱꦤ꧀ꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦠꦶꦫꦕ꧀ꦖꦴꦤꦮꦶꦗ꧀ꦗꦁ ꦮꦴꦕꦺꦤ꧀ꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦖꦧ꧀ꦧꦒ꧀ꦒꦶꦪꦴ ꦨꦶꦏ꧀ꦑꦸꦤꦶꦪꦺꦴ ꦠꦶꦫꦕ꧀ꦖꦴꦤꦮꦶꦗ꧀ꦗꦁ ꦮꦴꦕꦺꦱ꧀ꦱꦤ꧀ꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧑꧐꧑꧘. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦠꦶꦫꦕ꧀ꦖꦴꦤꦮꦶꦗ꧀ꦗꦁ ꦮꦴꦕꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧑꧐꧑꧙. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦠꦶꦫꦕ꧀ꦖꦴꦤꦮꦶꦗ꧀ꦗꦴ [ꦠꦶꦫꦕ꧀ꦖꦴꦤꦮꦶꦗ꧀ꦗꦁ (ꦏ.)] ꦤꦴꦩ ꦪꦁ ꦏꦶꦚ꧀ꦕꦶ ꦧꦴꦲꦶꦫꦏꦁ ꦄꦤꦠ꧀ꦡꦱꦁꦲꦶꦠꦁ.

ꦮꦴꦕꦺꦪ꧀ꦪꦴꦠꦶ ꦥꦢꦺꦤ ꦮꦴꦕꦺꦠꦶ, ꦥꦢꦺ ꦥꦢꦺ ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦄꦏ꧀ꦑꦫꦴꦪ ꦮꦴꦕꦺꦠꦶ, ꦄꦏ꧀ꦑꦫꦏ꧀ꦑꦫꦴꦪ ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧑꧐꧒꧐. ꦄꦤꦴꦥꦠ꧀ꦠꦶ ꦭꦺꦑꦁ ꦮꦴꦕꦺꦠꦶ, ꦣꦴꦫꦟꦁ ꦮꦴꦕꦺꦠꦶ, ꦒꦸꦠ꧀ꦠꦠ꧀ꦡꦴꦪ ꦥꦫꦶꦠ꧀ꦠꦁ ꦮꦴꦕꦺꦠꦶ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦢꦱꦩꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.

ꦕꦶꦠ꧀ꦠꦴꦒꦴꦫꦮꦒ꧀ꦒꦺꦴ ꦥꦚ꧀ꦕꦩꦺꦴ.