꧘. ꦄꦛ꧀ꦜꦩꦱꦶꦏ꧀ꦑꦴꦥꦢꦁ

꧙꧑꧖. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦤꦛꦴꦤꦩ꧀ꦥꦶ ꦤꦛꦏꦴꦤꦩ꧀ꦥꦶ ꦭꦔ꧀ꦓꦏꦴꦤꦩ꧀ꦥꦶ ꦱꦺꦴꦏꦗ꧀ꦙꦴꦪꦶꦏꦴꦤꦩ꧀ꦥꦶ [ꦱꦺꦴꦏꦱꦴꦪꦶꦏꦴꦤꦩ꧀ꦥꦶ (ꦱꦷ.)] ꦏꦸꦩ꧀ꦨꦡꦹꦟꦶꦏꦴꦤꦩ꧀ꦥꦶ [ꦏꦸꦩ꧀ꦨꦡꦸꦟꦶꦏꦴꦤꦩ꧀ꦥꦶ (ꦏ.)] ꦱꦩꦟꦕꦷꦮꦫꦁ ꦢꦺꦠꦶ – ‘‘ꦩꦪ꧀ꦲꦁ ꦥꦫꦶꦱꦠꦶ [ꦥꦫꦶꦱꦠꦶꦁ (ꦱꦷ.)] ꦮꦟ꧀ꦟꦁ ꦨꦴꦱꦡꦴ’’ꦠꦶ. ꦤꦛꦴꦥꦶ ꦤꦛꦏꦴꦥꦶ ꦭꦔ꧀ꦓꦏꦴꦥꦶ ꦱꦺꦴꦏꦗ꧀ꦙꦴꦪꦶꦏꦴꦥꦶ ꦏꦸꦩ꧀ꦨꦡꦹꦟꦶꦏꦴꦥꦶ ꦡꦸꦭ꧀ꦭꦤꦤ꧀ꦢꦴꦪ ꦨꦶꦏ꧀ꦑꦸꦤꦶꦪꦴ ꦥꦫꦶꦱꦠꦶ ꦮꦟ꧀ꦟꦁ ꦨꦴꦱꦤ꧀ꦠꦶ – ‘‘ꦄꦪ꧀ꦪꦴ ꦡꦸꦭ꧀ꦭꦤꦤ꧀ꦢꦴ ꦧꦲꦸꦱ꧀ꦱꦸꦠꦴ ꦨꦴꦟꦶꦏꦴ ꦮꦶꦱꦴꦫꦢꦴ ꦥꦛ꧀ꦛꦴ ꦣꦩ꧀ꦩꦶꦁ ꦏꦡꦁ ꦏꦴꦠꦸꦁ; ꦢꦺꦡ ꦄꦪ꧀ꦪꦴꦪ, ꦏꦫꦺꦴꦡ ꦄꦪ꧀ꦪꦴꦪꦴ’’ꦠꦶ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ, ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦪ꧀ꦪꦴ ꦡꦸꦭ꧀ꦭꦤꦤ꧀ꦢꦴ ꦄꦒꦴꦫꦶꦏꦱ꧀ꦱ ꦱꦩꦟꦕꦷꦮꦫꦁ ꦢꦱ꧀ꦱꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦄꦒꦴꦫꦶꦏꦱ꧀ꦱ ꦱꦩꦟꦕꦷꦮꦫꦁ ꦢꦺꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦄꦒꦴꦫꦶꦏꦱ꧀ꦱ ꦱꦩꦟꦕꦷꦮꦫꦁ ꦢꦱ꧀ꦱꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧙꧑꧗. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦄꦒꦴꦫꦶꦏꦱ꧀ꦱ ꦮꦴ ꦥꦫꦶꦧ꧀ꦧꦴꦗꦏꦱ꧀ꦱ ꦮꦴ ꦥꦫꦶꦧ꧀ꦧꦴꦗꦶꦏꦴꦪ ꦮꦴ ꦱꦩꦟꦕꦷꦮꦫꦁ ꦢꦢꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧙꧑꧘. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦄꦒꦴꦫꦶꦏꦺꦴ ꦤꦴꦩ ꦪꦺꦴ ꦏꦺꦴꦕꦶ ꦄꦒꦴꦫꦁ ꦄꦗ꧀ꦙꦴꦮꦱꦠꦶ.

ꦥꦫꦶꦧ꧀ꦧꦴꦗꦏꦺꦴ ꦤꦴꦩ ꦨꦶꦏ꧀ꦑꦸꦚ꧀ꦕ ꦱꦴꦩꦟꦺꦫꦚ꧀ꦕ ꦜꦥꦺꦠ꧀ꦮꦴ ꦪꦺꦴ ꦏꦺꦴꦕꦶ ꦥꦫꦶꦧ꧀ꦧꦴꦗꦏꦱꦩꦴꦥꦤ꧀ꦤꦺꦴ.

ꦥꦫꦶꦧ꧀ꦧꦴꦗꦶꦏꦴ ꦤꦴꦩ ꦨꦶꦏ꧀ꦑꦸꦤꦶꦚ꧀ꦕ ꦱꦶꦏ꧀ꦑꦩꦴꦤꦚ꧀ꦕ ꦱꦴꦩꦟꦺꦫꦶꦚ꧀ꦕ ꦜꦥꦺꦠ꧀ꦮꦴ ꦪꦴ ꦏꦴꦕꦶ ꦥꦫꦶꦧ꧀ꦧꦴꦗꦶꦏꦱꦩꦴꦥꦤ꧀ꦤꦴ.

ꦱꦩꦟꦕꦷꦮꦫꦁ ꦤꦴꦩ ꦏꦥ꧀ꦥꦏꦠꦁ ꦮꦸꦕ꧀ꦕꦠꦶ. ꦢꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧙꧑꧙. ꦄꦤꦴꦥꦠ꧀ꦠꦶ ꦩꦴꦠꦴꦥꦶꦠꦹꦤꦁ ꦢꦺꦠꦶ, ꦠꦴꦮꦏꦴꦭꦶꦏꦁ ꦢꦺꦠꦶ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦄꦛ꧀ꦜꦩꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.