꧖. ꦖꦛ꧀ꦜꦱꦶꦏ꧀ꦑꦴꦥꦢꦁ

꧙꧐꧗. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦡꦸꦭ꧀ꦭꦤꦤ꧀ꦢꦴꦪ ꦨꦶꦏ꧀ꦑꦸꦤꦶꦪꦴ ꦈꦥꦛ꧀ꦜꦴꦏꦏꦸꦭꦁ ꦡꦸꦭ꧀ꦭꦤꦤ꧀ꦢꦁ ꦨꦶꦏ꧀ꦑꦸꦤꦶꦁ ꦌꦠꦢꦮꦺꦴꦕ – ‘‘ꦨꦶꦏ꧀ꦑꦸꦤꦶꦱꦔ꧀ꦓꦱ꧀ꦱ, ꦄꦪ꧀ꦪꦺ, ꦕꦷꦮꦫꦁ ꦢꦱ꧀ꦱꦴꦩꦴ’’ꦠꦶ. ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ – ‘‘ꦠꦸꦩ꧀ꦲꦺ ꦧꦲꦸꦏꦶꦕ꧀ꦕꦴ ꦧꦲꦸꦏꦫꦟꦷꦪꦴ’’ꦠꦶ ꦄꦤ꧀ꦠꦫꦴꦪꦁ ꦄꦏꦴꦱꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦠꦱ꧀ꦱ ꦏꦸꦭꦱ꧀ꦱ ꦓꦫꦁ ꦝꦪ꧀ꦲꦠꦶ. ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦪ꧀ꦪꦴ ꦡꦸꦭ꧀ꦭꦤꦤ꧀ꦢꦴ ꦄꦩ꧀ꦲꦴꦏꦁ ꦢꦺꦪ꧀ꦪꦣꦩ꧀ꦩꦁ ꦄꦤ꧀ꦠꦫꦴꦪꦁ ꦏꦫꦶꦱ꧀ꦱꦠꦶ! ꦈꦨꦪꦺꦤꦴꦩ꧀ꦲ ꦥꦫꦶꦧꦴꦲꦶꦫꦴ [ꦥꦫꦶꦲꦷꦤꦴ (ꦱꦷ.)], ꦨꦺꦴꦒꦺꦲꦶ ꦕ ꦥꦸꦚ꧀ꦚꦺꦤ ꦕꦴ’’ꦠꦶ. ꦄꦱ꧀ꦱꦺꦴꦱꦸꦁ ꦑꦺꦴ ꦨꦶꦏ꧀ꦑꦸꦤꦶꦪꦺꦴ ꦠꦺꦱꦁ ꦩꦤꦸꦱ꧀ꦱꦴꦤꦁ ꦈꦗ꧀ꦙꦴꦪꦤ꧀ꦠꦴꦤꦁ ꦑꦶꦪ꧀ꦪꦤ꧀ꦠꦴꦤꦁ ꦮꦶꦥꦴꦕꦺꦤ꧀ꦠꦴꦤꦁ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦪ꧀ꦪꦴ ꦡꦸꦭ꧀ꦭꦤꦤ꧀ꦢꦴ ꦒꦟꦱ꧀ꦱ ꦕꦷꦮꦫꦭꦴꦨꦁ ꦄꦤ꧀ꦠꦫꦴꦪꦁ ꦏꦫꦶꦱ꧀ꦱꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦒꦟꦱ꧀ꦱ ꦕꦷꦮꦫꦭꦴꦨꦁ ꦄꦤ꧀ꦠꦫꦴꦪꦁ ꦄꦏꦴꦱꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦡꦸꦭ꧀ꦭꦤꦤ꧀ꦢꦴ ꦨꦶꦏ꧀ꦑꦸꦤꦷ ꦒꦟꦱ꧀ꦱ ꦕꦷꦮꦫꦭꦴꦨꦁ ꦄꦤ꧀ꦠꦫꦴꦪꦁ ꦏꦫꦶꦱ꧀ꦱꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧙꧐꧘. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦒꦟꦱ꧀ꦱ ꦕꦷꦮꦫꦭꦴꦨꦁ ꦄꦤ꧀ꦠꦫꦴꦪꦁ ꦏꦫꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧙꧐꧙. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦒꦟꦺꦴ ꦤꦴꦩ ꦨꦶꦏ꧀ꦑꦸꦤꦶꦱꦔ꧀ꦓꦺꦴ ꦮꦸꦕ꧀ꦕꦠꦶ.

ꦕꦷꦮꦫꦁ ꦤꦴꦩ ꦖꦤ꧀ꦤꦁ ꦕꦷꦮꦫꦴꦤꦁ ꦄꦚ꧀ꦚꦠꦫꦁ ꦕꦷꦮꦫꦁ ꦮꦶꦏꦥ꧀ꦥꦤꦸꦥꦒꦁ ꦥꦕ꧀ꦖꦶꦩꦁ.

ꦄꦤ꧀ꦠꦫꦴꦪꦁ ꦏꦫꦺꦪ꧀ꦪꦴꦠꦶ ‘‘ꦏꦡꦁ ꦆꦩꦺ ꦕꦷꦮꦫꦁ ꦤ [ꦆꦩꦁ ꦕꦷꦮꦫꦁ (ꦏ.)] ꦢꦢꦺꦪ꧀ꦪꦸ’’ꦤ꧀ꦠꦶ ꦄꦤ꧀ꦠꦫꦴꦪꦁ ꦏꦫꦺꦴꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦄꦚ꧀ꦚꦁ ꦥꦫꦶꦏ꧀ꦑꦴꦫꦁ ꦄꦤ꧀ꦠꦫꦴꦪꦁ ꦏꦫꦺꦴꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦱꦩ꧀ꦧꦲꦸꦭꦴꦤꦁ ꦨꦶꦏ꧀ꦑꦸꦤꦷꦤꦁ ꦮꦴ ꦌꦏꦨꦶꦏ꧀ꦑꦸꦤꦶꦪꦴ ꦮꦴ ꦄꦤꦸꦥꦱꦩ꧀ꦥꦤ꧀ꦤꦴꦪ ꦮꦴ ꦕꦷꦮꦫꦁ ꦮꦴ ꦄꦚ꧀ꦚꦁ ꦮꦴ ꦥꦫꦶꦏ꧀ꦑꦴꦫꦁ ꦄꦤ꧀ꦠꦫꦴꦪꦁ ꦏꦫꦺꦴꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

꧙꧑꧐. ꦄꦤꦴꦥꦠ꧀ꦠꦶ ꦄꦴꦤꦶꦱꦁꦱꦁ ꦢꦱ꧀ꦱꦺꦠ꧀ꦮꦴ ꦤꦶꦮꦴꦫꦺꦠꦶ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦖꦛ꧀ꦜꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.