꧔. ꦕꦠꦸꦠ꧀ꦡꦱꦶꦏ꧀ꦑꦴꦥꦢꦁ

꧘꧙꧗. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦸꦤꦶꦪꦺꦴ ꦨꦶꦏ꧀ꦑꦸꦤꦷꦤꦁ ꦲꦠ꧀ꦡꦺ ꦕꦷꦮꦫꦁ ꦤꦶꦏ꧀ꦑꦶꦥꦶꦠ꧀ꦮꦴ ꦱꦤ꧀ꦠꦫꦸꦠ꧀ꦠꦫꦺꦤ ꦗꦤꦥꦢꦕꦴꦫꦶꦏꦁ ꦥꦏ꧀ꦏꦩꦤ꧀ꦠꦶ. ꦠꦴꦤꦶ ꦕꦷꦮꦫꦴꦤꦶ ꦕꦶꦫꦁ ꦤꦶꦏ꧀ꦑꦶꦠ꧀ꦠꦴꦤꦶ ꦏꦟ꧀ꦟꦏꦶꦠꦴꦤꦶ ꦲꦺꦴꦤ꧀ꦠꦶ. ꦠꦴꦤꦶ ꦨꦶꦏ꧀ꦑꦸꦤꦶꦪꦺꦴ ꦎꦠꦴꦥꦺꦤ꧀ꦠꦶ. ꦨꦶꦏ꧀ꦑꦸꦤꦶꦪꦺꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦌꦠꦢꦮꦺꦴꦕꦸꦁ – ‘‘ꦏꦱ꧀ꦱꦶꦩꦴꦤꦶ, ꦄꦪ꧀ꦪꦺ, ꦕꦷꦮꦫꦴꦤꦶ ꦏꦟ꧀ꦟꦏꦶꦠꦴꦤꦷ’’ꦠꦶ? ꦄꦡ ꦑꦺꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦨꦶꦏ꧀ꦑꦸꦤꦷꦤꦁ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸꦤꦶꦪꦺꦴ ꦨꦶꦏ꧀ꦑꦸꦤꦷꦤꦁ ꦲꦠ꧀ꦡꦺ ꦕꦷꦮꦫꦁ ꦤꦶꦏ꧀ꦑꦶꦥꦶꦠ꧀ꦮꦴ ꦱꦤ꧀ꦠꦫꦸꦠ꧀ꦠꦫꦺꦤ ꦗꦤꦥꦢꦕꦴꦫꦶꦏꦁ ꦥꦏ꧀ꦏꦩꦶꦱ꧀ꦱꦤ꧀ꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦨꦶꦏ꧀ꦑꦸꦤꦷꦤꦁ ꦲꦠ꧀ꦡꦺ ꦕꦷꦮꦫꦁ ꦤꦶꦏ꧀ꦑꦶꦥꦶꦠ꧀ꦮꦴ ꦱꦤ꧀ꦠꦫꦸꦠ꧀ꦠꦫꦺꦤ ꦗꦤꦥꦢꦕꦴꦫꦶꦏꦁ ꦥꦏ꧀ꦏꦩꦤ꧀ꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦨꦶꦏ꧀ꦑꦸꦤꦷꦤꦁ ꦲꦠ꧀ꦡꦺ ꦕꦷꦮꦫꦁ ꦤꦶꦏ꧀ꦑꦶꦥꦶꦠ꧀ꦮꦴ ꦱꦤ꧀ꦠꦫꦸꦠ꧀ꦠꦫꦺꦤ ꦗꦤꦥꦢꦕꦴꦫꦶꦏꦁ ꦥꦏ꧀ꦏꦩꦶꦱ꧀ꦱꦤ꧀ꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧘꧙꧘. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦥꦚ꧀ꦕꦴꦲꦶꦏꦁ ꦱꦔ꧀ꦓꦴꦛꦶꦕꦴꦫꦁ [ꦱꦔ꧀ꦓꦴꦛꦶꦮꦴꦫꦁ (ꦱ꧀ꦪꦴ.)] ꦄꦠꦶꦏ꧀ꦏꦴꦩꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧘꧙꧙. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦥꦚ꧀ꦕꦴꦲꦶꦏꦁ ꦱꦔ꧀ꦓꦴꦛꦶꦕꦴꦫꦁ ꦄꦠꦶꦏ꧀ꦏꦴꦩꦺꦪ꧀ꦪꦴꦠꦶ ꦥꦚ꧀ꦕꦩꦁ ꦢꦶꦮꦱꦁ ꦥꦚ꧀ꦕ ꦕꦷꦮꦫꦴꦤꦶ ꦤꦺꦮ ꦤꦶꦮꦴꦱꦺꦠꦶ ꦤ ꦥꦴꦫꦸꦥꦠꦶ ꦤ ꦎꦠꦴꦥꦺꦠꦶ, ꦥꦚ꧀ꦕꦩꦁ ꦢꦶꦮꦱꦁ ꦄꦠꦶꦏ꧀ꦏꦴꦩꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧙꧐꧐. ꦥꦚ꧀ꦕꦴꦲꦴꦠꦶꦏ꧀ꦏꦤ꧀ꦠꦺ ꦄꦠꦶꦏ꧀ꦏꦤ꧀ꦠꦱꦚ꧀ꦚꦴ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦥꦚ꧀ꦕꦴꦲꦴꦠꦶꦏ꧀ꦏꦤ꧀ꦠꦺ ꦮꦺꦩꦠꦶꦏꦴ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦥꦚ꧀ꦕꦴꦲꦴꦠꦶꦏ꧀ꦏꦤ꧀ꦠꦺ ꦄꦤꦠꦶꦏ꧀ꦏꦤ꧀ꦠꦱꦚ꧀ꦚꦴ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦥꦚ꧀ꦕꦴꦲꦴꦤꦠꦶꦏ꧀ꦏꦤ꧀ꦠꦺ ꦄꦠꦶꦏ꧀ꦏꦤ꧀ꦠꦱꦚ꧀ꦚꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦥꦚ꧀ꦕꦴꦲꦴꦤꦠꦶꦏ꧀ꦏꦤ꧀ꦠꦺ ꦮꦺꦩꦠꦶꦏꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦥꦚ꧀ꦕꦴꦲꦴꦤꦠꦶꦏ꧀ꦏꦤ꧀ꦠꦺ ꦄꦤꦠꦶꦏ꧀ꦏꦤ꧀ꦠꦱꦚ꧀ꦚꦴ, ꦄꦤꦴꦥꦠ꧀ꦠꦶ.

꧙꧐꧑. ꦄꦤꦴꦥꦠ꧀ꦠꦶ ꦥꦚ꧀ꦕꦩꦁ ꦢꦶꦮꦱꦁ ꦥꦚ꧀ꦕ ꦕꦷꦮꦫꦴꦤꦶ ꦤꦶꦮꦴꦱꦺꦠꦶ ꦮꦴ ꦥꦴꦫꦸꦥꦠꦶ ꦮꦴ ꦎꦠꦴꦥꦺꦠꦶ ꦮꦴ, ꦒꦶꦭꦴꦤꦴꦪ, ꦄꦴꦥꦢꦴꦱꦸ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦕꦠꦸꦠ꧀ꦡꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.