꧑. ꦥꦜꦩꦱꦶꦏ꧀ꦑꦴꦥꦢꦁ

꧘꧓꧘. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦢ꧀ꦢꦴꦪ ꦏꦴꦥꦶꦭꦴꦤꦶꦪꦴ ꦄꦤ꧀ꦠꦺꦮꦴꦱꦶꦤꦶꦪꦴ ꦨꦶꦏ꧀ꦑꦸꦤꦶꦪꦴ ꦚꦴꦠꦏꦺꦴ ꦥꦸꦫꦶꦱꦺꦴ ꦒꦴꦩꦏꦴ ꦱꦴꦮꦠ꧀ꦡꦶꦁ ꦄꦒꦩꦴꦱꦶ ꦏꦺꦤꦕꦶꦢꦺꦮ ꦏꦫꦟꦷꦪꦺꦤ. ꦄꦡ ꦑꦺꦴ ꦱꦴ ꦨꦶꦏ꧀ꦑꦸꦤꦷ ꦠꦺꦤ ꦥꦸꦫꦶꦱꦺꦤ ꦱꦢ꧀ꦣꦶꦁ ꦫꦠ꧀ꦠꦤ꧀ꦣꦏꦴꦫꦺ ꦄꦥ꧀ꦥꦢꦷꦥꦺ ꦌꦏꦺꦤꦺꦏꦴ ꦱꦤ꧀ꦠꦶꦛ꧀ꦜꦠꦶꦥꦶ ꦱꦭ꧀ꦭꦥꦠꦶꦥꦶ. ꦪꦴ ꦠꦴ ꦨꦶꦏ꧀ꦑꦸꦤꦶꦪꦺꦴ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦸꦤꦷ ꦫꦠ꧀ꦠꦤ꧀ꦣꦏꦴꦫꦺ ꦄꦥ꧀ꦥꦢꦷꦥꦺ ꦥꦸꦫꦶꦱꦺꦤ ꦱꦢ꧀ꦣꦶꦁ ꦌꦏꦺꦤꦺꦏꦴ ꦱꦤ꧀ꦠꦶꦛ꧀ꦜꦶꦱ꧀ꦱꦠꦶꦥꦶ ꦱꦭ꧀ꦭꦥꦶꦱ꧀ꦱꦠꦶꦥꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦷ ꦫꦠ꧀ꦠꦤ꧀ꦣꦏꦴꦫꦺ ꦄꦥ꧀ꦥꦢꦷꦥꦺ ꦥꦸꦫꦶꦱꦺꦤ ꦱꦢ꧀ꦣꦶꦁ ꦌꦏꦺꦤꦺꦏꦴ ꦱꦤ꧀ꦠꦶꦛ꧀ꦜꦠꦶꦥꦶ ꦱꦭ꧀ꦭꦥꦠꦶꦥꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦷ ꦫꦠ꧀ꦠꦤ꧀ꦣꦏꦴꦫꦺ ꦄꦥ꧀ꦥꦢꦷꦥꦺ ꦥꦸꦫꦶꦱꦺꦤ ꦱꦢ꧀ꦣꦶꦁ ꦌꦏꦺꦤꦺꦏꦴ ꦱꦤ꧀ꦠꦶꦛ꧀ꦜꦶꦱ꧀ꦱꦠꦶꦥꦶ ꦱꦭ꧀ꦭꦥꦶꦱ꧀ꦱꦠꦶꦥꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦶꦪꦺꦴ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦤ꧀ꦠꦸ –

꧘꧓꧙. ‘‘ꦪꦴ ꦥꦤ ꦨꦶꦏ꧀ꦑꦸꦤꦷ ꦫꦠ꧀ꦠꦤ꧀ꦣꦏꦴꦫꦺ ꦄꦥ꧀ꦥꦢꦷꦥꦺ ꦥꦸꦫꦶꦱꦺꦤ ꦱꦢ꧀ꦣꦶꦁ ꦌꦏꦺꦤꦺꦏꦴ ꦱꦤ꧀ꦠꦶꦛ꧀ꦜꦺꦪ꧀ꦪ ꦮꦴ ꦱꦭ꧀ꦭꦥꦺꦪ꧀ꦪ ꦮꦴ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧘꧔꧐. ꦪꦴ ꦥꦤꦴꦠꦶ ꦪꦴ ꦪꦴꦢꦶꦱꦴ…ꦥꦺ… ꦨꦶꦏ꧀ꦑꦸꦤꦷꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦴ ꦨꦶꦏ꧀ꦑꦸꦤꦷꦠꦶ.

ꦫꦠ꧀ꦠꦤ꧀ꦣꦏꦴꦫꦺꦠꦶ ꦎꦒ꧀ꦒꦠꦺ ꦱꦹꦫꦶꦪꦺ. ꦄꦥ꧀ꦥꦢꦷꦥꦺꦠꦶ ꦄꦤꦴꦭꦺꦴꦏꦺ.

ꦥꦸꦫꦶꦱꦺꦴ ꦤꦴꦩ ꦩꦤꦸꦱ꧀ꦱꦥꦸꦫꦶꦱꦺꦴ ꦤ ꦪꦏ꧀ꦑꦺꦴ ꦤ ꦥꦺꦠꦺꦴ ꦤ ꦠꦶꦫꦕ꧀ꦖꦴꦤꦒꦠꦺꦴ ꦮꦶꦚ꧀ꦚꦹ ꦥꦛꦶꦧꦭꦺꦴ ꦱꦤ꧀ꦠꦶꦛ꧀ꦜꦶꦠꦸꦁ ꦱꦭ꧀ꦭꦥꦶꦠꦸꦁ.

ꦱꦢ꧀ꦣꦶꦤ꧀ꦠꦶ ꦌꦏꦠꦺꦴ. ꦌꦏꦺꦤꦺꦏꦴꦠꦶ ꦥꦸꦫꦶꦱꦺꦴ ꦕꦺꦮ ꦲꦺꦴꦠꦶ ꦨꦶꦏ꧀ꦑꦸꦤꦷ ꦕ.

ꦱꦤ꧀ꦠꦶꦛ꧀ꦜꦺꦪ꧀ꦪ ꦮꦴꦠꦶ ꦥꦸꦫꦶꦱꦱ꧀ꦱ ꦲꦠ꧀ꦡꦥꦴꦱꦺ ꦠꦶꦛ꧀ꦜꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦱꦭ꧀ꦭꦥꦺꦪ꧀ꦪ ꦮꦴꦠꦶ ꦥꦸꦫꦶꦱꦱ꧀ꦱ ꦲꦠ꧀ꦡꦥꦴꦱꦺ ꦜꦶꦠꦴ ꦱꦭ꧀ꦭꦥꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦲꦠ꧀ꦡꦥꦴꦱꦁ ꦮꦶꦗꦲꦶꦠ꧀ꦮꦴ ꦱꦤ꧀ꦠꦶꦛ꧀ꦜꦠꦶ ꦮꦴ ꦱꦭ꧀ꦭꦥꦠꦶ ꦮꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦪꦏ꧀ꦑꦺꦤ ꦮꦴ ꦥꦺꦠꦺꦤ ꦮꦴ ꦥꦟ꧀ꦝꦏꦺꦤ ꦮꦴ ꦠꦶꦫꦕ꧀ꦖꦴꦤꦒꦠꦩꦤꦸꦱ꧀ꦱꦮꦶꦒ꧀ꦒꦲꦺꦤ ꦮꦴ ꦱꦢ꧀ꦣꦶꦁ ꦱꦤ꧀ꦠꦶꦛ꧀ꦜꦠꦶ ꦮꦴ ꦱꦭ꧀ꦭꦥꦠꦶ ꦮꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

꧘꧔꧑. ꦄꦤꦴꦥꦠ꧀ꦠꦶ ꦪꦺꦴ ꦏꦺꦴꦕꦶ ꦮꦶꦚ꧀ꦚꦹ ꦢꦸꦠꦶꦪꦺꦴ [ꦪꦴ ꦏꦴꦕꦶ ꦮꦶꦚ꧀ꦚꦹ ꦢꦸꦠꦶꦪꦴ (ꦱ꧀ꦪꦴ.)] ꦲꦺꦴꦠꦶ, ꦄꦫꦲꦺꦴꦥꦺꦏ꧀ꦑꦴ, ꦄꦚ꧀ꦚꦮꦶꦲꦶꦠꦴ ꦱꦤ꧀ꦠꦶꦛ꧀ꦜꦠꦶ ꦮꦴ ꦱꦭ꧀ꦭꦥꦠꦶ ꦮꦴ, ꦈꦩ꧀ꦩꦠ꧀ꦠꦶꦏꦴꦪ, ꦄꦴꦢꦶꦏꦩ꧀ꦩꦶꦏꦴꦪꦴꦠꦶ.

ꦥꦜꦩꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ.