꧔. ꦱꦹꦕꦶꦓꦫꦱꦶꦏ꧀ꦑꦴꦥꦢꦁ

꧕꧑꧖. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦏ꧀ꦏꦺꦱꦸ ꦮꦶꦲꦫꦠꦶ ꦏꦥꦶꦭꦮꦠ꧀ꦡꦸꦱ꧀ꦩꦶꦁ ꦤꦶꦒ꧀ꦫꦺꦴꦣꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦚ꧀ꦚꦠꦫꦺꦤ ꦢꦤ꧀ꦠꦏꦴꦫꦺꦤ ꦨꦶꦏ꧀ꦑꦹ ꦥꦮꦴꦫꦶꦠꦴ ꦲꦺꦴꦤ꧀ꦠꦶ – ‘‘ꦪꦺꦱꦁ ꦄꦪ꧀ꦪꦴꦤꦁ ꦱꦹꦕꦶꦓꦫꦺꦤ ꦄꦠ꧀ꦡꦺꦴ ꦄꦲꦁ ꦱꦹꦕꦶꦓꦫꦺꦤꦴ’’ꦠꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦹ ꦧꦲꦹ ꦱꦹꦕꦶꦓꦫꦺ ꦮꦶꦚ꧀ꦚꦴꦥꦺꦤ꧀ꦠꦶ. ꦪꦺꦱꦁ ꦑꦸꦢ꧀ꦢꦏꦴ ꦱꦹꦕꦶꦓꦫꦴ ꦠꦺ ꦩꦲꦤ꧀ꦠꦺ ꦱꦹꦕꦶꦓꦫꦺ ꦮꦶꦚ꧀ꦚꦴꦥꦺꦤ꧀ꦠꦶ. ꦪꦺꦱꦁ ꦩꦲꦤ꧀ꦠꦴ ꦱꦹꦕꦶꦓꦫꦴ ꦠꦺ ꦑꦸꦢ꧀ꦢꦏꦺ ꦱꦹꦕꦶꦓꦫꦺ ꦮꦶꦚ꧀ꦚꦴꦥꦺꦤ꧀ꦠꦶ. ꦄꦡ ꦑꦺꦴ ꦱꦺꦴ ꦢꦤ꧀ꦠꦏꦴꦫꦺꦴ ꦨꦶꦏ꧀ꦑꦹꦤꦁ ꦧꦲꦹ ꦱꦹꦕꦶꦓꦫꦺ ꦏꦫꦺꦴꦤ꧀ꦠꦺꦴ ꦤ ꦱꦏ꧀ꦏꦺꦴꦠꦶ ꦄꦚ꧀ꦚꦁ ꦮꦶꦏ꧀ꦏꦴꦪꦶꦏꦁ ꦨꦟ꧀ꦝꦁ ꦏꦴꦠꦸꦁ, ꦄꦠ꧀ꦠꦤꦴꦥꦶ ꦤ ꦪꦴꦥꦺꦠꦶ, ꦥꦸꦠ꧀ꦠꦢꦴꦫꦺꦴꦥꦶꦱ꧀ꦱ ꦏꦶꦭꦩꦠꦶ. ꦩꦤꦸꦱ꧀ꦱꦴ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦱꦩꦟꦴ ꦱꦏ꧀ꦪꦥꦸꦠ꧀ꦠꦶꦪꦴ ꦤ ꦩꦠ꧀ꦠꦁ ꦗꦴꦤꦶꦠ꧀ꦮꦴ ꦧꦲꦹ ꦱꦹꦕꦶꦓꦫꦺ ꦮꦶꦚ꧀ꦚꦴꦥꦺꦱ꧀ꦱꦤ꧀ꦠꦶ! ꦄꦪꦁ ꦆꦩꦺꦱꦁ ꦧꦲꦹ ꦱꦹꦕꦶꦓꦫꦺ ꦏꦫꦺꦴꦤ꧀ꦠꦺꦴ ꦤ ꦱꦏ꧀ꦏꦺꦴꦠꦶ ꦄꦚ꧀ꦚꦁ ꦮꦶꦏ꧀ꦏꦴꦪꦶꦏꦁ ꦨꦟ꧀ꦝꦁ ꦏꦴꦠꦸꦁ, ꦄꦠ꧀ꦠꦤꦴꦥꦶ ꦤ ꦪꦴꦥꦺꦠꦶ, ꦥꦸꦠ꧀ꦠꦢꦴꦫꦺꦴꦥꦶꦱ꧀ꦱ ꦏꦶꦭꦩꦠꦷ’’ꦠꦶ. ꦄꦱ꧀ꦱꦺꦴꦱꦸꦁ ꦑꦺꦴ ꦨꦶꦏ꧀ꦑꦹ ꦠꦺꦱꦁ ꦩꦤꦸꦱ꧀ꦱꦴꦤꦁ ꦈꦗ꧀ꦙꦴꦪꦤ꧀ꦠꦴꦤꦁ ꦑꦶꦪ꧀ꦪꦤ꧀ꦠꦴꦤꦁ ꦮꦶꦥꦴꦕꦺꦤ꧀ꦠꦴꦤꦁ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦹ ꦤ ꦩꦠ꧀ꦠꦁ ꦗꦴꦤꦶꦠ꧀ꦮꦴ ꦧꦲꦹ ꦱꦹꦕꦶꦓꦫꦺ ꦮꦶꦚ꧀ꦚꦴꦥꦺꦱ꧀ꦱꦤ꧀ꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦤ ꦩꦠ꧀ꦠꦁ ꦗꦴꦤꦶꦠ꧀ꦮꦴ ꦧꦲꦹ ꦱꦹꦕꦶꦓꦫꦺ ꦮꦶꦚ꧀ꦚꦴꦥꦺꦤ꧀ꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ ꦠꦺ, ꦨꦶꦏ꧀ꦑꦮꦺ, ꦩꦺꦴꦓꦥꦸꦫꦶꦱꦴ ꦤ ꦩꦠ꧀ꦠꦁ ꦗꦴꦤꦶꦠ꧀ꦮꦴ ꦧꦲꦹ ꦱꦹꦕꦶꦓꦫꦺ ꦮꦶꦚ꧀ꦚꦴꦥꦺꦱ꧀ꦱꦤ꧀ꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴꦡ –

꧕꧑꧗. ‘‘ꦪꦺꦴ ꦥꦤ ꦨꦶꦏ꧀ꦑꦸ ꦄꦛ꧀ꦜꦶꦩꦪꦁ ꦮꦴ ꦢꦤ꧀ꦠꦩꦪꦁ ꦮꦴ ꦮꦶꦱꦴꦟꦩꦪꦁ ꦮꦴ ꦱꦹꦕꦶꦓꦫꦁ ꦏꦴꦫꦴꦥꦺꦪ꧀ꦪ ꦨꦺꦢꦤꦏꦁ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧕꧑꧘. ꦪꦺꦴ ꦥꦤꦴꦠꦶ ꦪꦺꦴ ꦪꦴꦢꦶꦱꦺꦴ…ꦥꦺ… ꦨꦶꦏ꧀ꦑꦹꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦺꦴ ꦨꦶꦏ꧀ꦑꦹꦠꦶ.

ꦄꦛ꧀ꦜꦶ ꦤꦴꦩ ꦪꦁ ꦏꦶꦚ꧀ꦕꦶ ꦄꦛ꧀ꦜꦶ.

ꦢꦤ꧀ꦠꦺꦴ ꦤꦴꦩ ꦲꦠ꧀ꦡꦶꦢꦤ꧀ꦠꦺꦴ ꦮꦸꦕ꧀ꦕꦠꦶ.

ꦮꦶꦱꦴꦟꦁ ꦤꦴꦩ ꦪꦁ ꦏꦶꦚ꧀ꦕꦶ ꦮꦶꦱꦴꦟꦁ.

ꦏꦴꦫꦴꦥꦺꦪ꧀ꦪꦴꦠꦶ ꦏꦫꦺꦴꦠꦶ ꦮꦴ ꦏꦴꦫꦴꦥꦺꦠꦶ ꦮꦴ, ꦥꦪꦺꦴꦒꦺ ꦢꦸꦏ꧀ꦏꦛꦁ. ꦥꦛꦶꦭꦴꦨꦺꦤ ꦨꦶꦤ꧀ꦢꦶꦠ꧀ꦮꦴ ꦥꦴꦕꦶꦠ꧀ꦠꦶꦪꦁ ꦢꦺꦱꦺꦠꦧ꧀ꦧꦁ.

꧕꧑꧙. ꦄꦠ꧀ꦠꦤꦴ ꦮꦶꦥ꧀ꦥꦏꦠꦁ ꦄꦠ꧀ꦠꦤꦴ ꦥꦫꦶꦪꦺꦴꦱꦴꦥꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦄꦠ꧀ꦠꦤꦴ ꦮꦶꦥ꧀ꦥꦏꦠꦁ ꦥꦫꦺꦲꦶ ꦥꦫꦶꦪꦺꦴꦱꦴꦥꦺꦠꦶ [ꦥꦫꦶꦪꦺꦴꦱꦴꦮꦴꦥꦺꦠꦶ (ꦏ.)], ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦥꦫꦺꦲꦶ ꦮꦶꦥ꧀ꦥꦏꦠꦁ ꦄꦠ꧀ꦠꦤꦴ ꦥꦫꦶꦪꦺꦴꦱꦴꦥꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦥꦫꦺꦲꦶ ꦮꦶꦥ꧀ꦥꦏꦠꦁ ꦥꦫꦺꦲꦶ ꦥꦫꦶꦪꦺꦴꦱꦴꦥꦺꦠꦶ [ꦥꦫꦶꦪꦺꦴꦱꦴꦮꦴꦥꦺꦠꦶ (ꦏ.)], ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦄꦚ꧀ꦚꦱ꧀ꦱꦠ꧀ꦡꦴꦪ ꦏꦫꦺꦴꦠꦶ ꦮꦴ ꦏꦴꦫꦴꦥꦺꦠꦶ ꦮꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦚ꧀ꦚꦺꦤ ꦏꦠꦁ ꦥꦛꦶꦭꦨꦶꦠ꧀ꦮꦴ ꦥꦫꦶꦨꦸꦚ꧀ꦗꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ.

꧕꧒꧐. ꦄꦤꦴꦥꦠ꧀ꦠꦶ ꦒꦟ꧀ꦜꦶꦏꦴꦪ [ꦒꦟ꧀ꦝꦶꦏꦴꦪ (ꦱ꧀ꦪꦴ.)], ꦄꦫꦟꦶꦏꦺ, ꦮꦶꦣꦺ [ꦮꦷꦜꦺ (ꦱꦷ.), ꦮꦷꦡꦺ (ꦱ꧀ꦪꦴ.)], ꦄꦚ꧀ꦗꦤꦶꦪꦴ, ꦄꦚ꧀ꦗꦤꦶꦱꦭꦴꦏꦴꦪ, ꦮꦴꦱꦶꦗꦛꦺ, ꦈꦢꦏꦥꦸꦚ꧀ꦖꦤꦶꦪꦴ, ꦈꦩ꧀ꦩꦠ꧀ꦠꦏꦱ꧀ꦱ, ꦄꦴꦢꦶꦏꦩ꧀ꦩꦶꦏꦱ꧀ꦱꦴꦠꦶ.

ꦱꦹꦕꦶꦓꦫꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ ꦕꦠꦸꦠ꧀ꦡꦁ.