꧖. ꦕꦴꦫꦶꦠ꧀ꦠꦱꦶꦏ꧀ꦑꦴꦥꦢꦁ

꧒꧙꧔. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦫꦴꦗꦒꦲꦺ ꦮꦶꦲꦫꦠꦶ ꦮꦺꦭ꦳ꦸꦮꦤꦺ ꦏꦭꦤ꧀ꦢꦏꦤꦶꦮꦴꦥꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦠꦺꦴ ꦈꦥꦤꦤ꧀ꦢꦱ꧀ꦱ ꦱꦏ꧀ꦪꦥꦸꦠ꧀ꦠꦱ꧀ꦱ ꦈꦥꦛ꧀ꦜꦴꦏꦏꦸꦭꦁ ꦄꦴꦪꦱ꧀ꦩꦤ꧀ꦠꦁ ꦈꦥꦤꦤ꧀ꦢꦁ ꦱꦏ꧀ꦪꦥꦸꦠ꧀ꦠꦁ ꦨꦠ꧀ꦠꦺꦤ ꦤꦶꦩꦤ꧀ꦠꦺꦱꦶ. ꦄꦚ꧀ꦚꦺꦥꦶ ꦨꦶꦏ꧀ꦑꦹ ꦨꦠ꧀ꦠꦺꦤ ꦤꦶꦩꦤ꧀ꦠꦺꦱꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ ꦥꦸꦫꦺꦨꦠ꧀ꦠꦁ, ꦏꦸꦭꦴꦤꦶ ꦥꦪꦶꦫꦸꦥꦴꦱꦠꦶ. ꦄꦡ ꦑꦺꦴ ꦠꦺ ꦨꦶꦏ꧀ꦑꦹ ꦠꦺ ꦩꦤꦸꦱ꧀ꦱꦺ ꦌꦠꦢꦮꦺꦴꦕꦸꦁ – ‘‘ꦢꦺꦡꦴꦮꦸꦱꦺꦴ ꦨꦠ꧀ꦠ’’ꦤ꧀ꦠꦶ. ‘‘ꦄꦴꦒꦩꦺꦡ, ꦨꦤ꧀ꦠꦺ, ꦪꦴꦮꦴꦪ꧀ꦪꦺꦴ ꦈꦥꦤꦤ꧀ꦢꦺꦴ ꦄꦴꦒꦕ꧀ꦖꦠꦷ’’ꦠꦶ. ꦢꦸꦠꦶꦪꦩ꧀ꦥꦶ ꦑꦺꦴ ꦠꦺ ꦨꦶꦏ꧀ꦑꦹ…ꦥꦺ… ꦠꦠꦶꦪꦩ꧀ꦥꦶ ꦑꦺꦴ ꦠꦺ ꦨꦶꦏ꧀ꦑꦹ ꦠꦺ ꦩꦤꦸꦱ꧀ꦱꦺ ꦌꦠꦢꦮꦺꦴꦕꦸꦁ – ‘‘ꦢꦺꦡꦴꦮꦸꦱꦺꦴ, ꦨꦠ꧀ꦠꦁ; ꦥꦸꦫꦺ ꦏꦴꦭꦺꦴ ꦄꦠꦶꦏ꧀ꦏꦩꦠꦷ’’ꦠꦶ. ‘‘ꦪꦩ꧀ꦥꦶ ꦩꦪꦁ, ꦨꦤ꧀ꦠꦺ, ꦨꦠ꧀ꦠꦁ ꦏꦫꦶꦩ꧀ꦲꦴ ꦄꦪ꧀ꦪꦱ꧀ꦱ ꦈꦥꦤꦤ꧀ꦢꦱ꧀ꦱ ꦏꦴꦫꦟꦴ. ꦄꦴꦒꦩꦺꦡ, ꦨꦤ꧀ꦠꦺ, ꦪꦴꦮꦴꦪ꧀ꦪꦺꦴ ꦈꦥꦤꦤ꧀ꦢꦺꦴ ꦄꦴꦒꦕ꧀ꦖꦠꦷ’’ꦠꦶ.

ꦄꦡ ꦑꦺꦴ ꦄꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ ꦥꦸꦫꦺꦨꦠ꧀ꦠꦁ ꦏꦸꦭꦴꦤꦶ ꦥꦪꦶꦫꦸꦥꦴꦱꦶꦠ꧀ꦮꦴ ꦢꦶꦮꦴ ꦄꦴꦒꦕ꧀ꦖꦠꦶ. ꦨꦶꦏ꧀ꦑꦹ ꦤ ꦕꦶꦠ꧀ꦠꦫꦹꦥꦁ ꦨꦸꦚ꧀ꦗꦶꦁꦱꦸ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ ꦤꦶꦩꦤ꧀ꦠꦶꦠꦺꦴ ꦱꦨꦠ꧀ꦠꦺꦴ ꦱꦩꦴꦤꦺꦴ ꦥꦸꦫꦺꦨꦠ꧀ꦠꦁ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦶꦱ꧀ꦱꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ ꦠ꧀ꦮꦁ, ꦈꦥꦤꦤ꧀ꦢ, ꦤꦶꦩꦤ꧀ꦠꦶꦠꦺꦴ ꦱꦨꦠ꧀ꦠꦺꦴ ꦱꦩꦴꦤꦺꦴ ꦥꦸꦫꦺꦨꦠ꧀ꦠꦁ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦱꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ ꦠ꧀ꦮꦁ, ꦩꦺꦴꦓꦥꦸꦫꦶꦱ, ꦤꦶꦩꦤ꧀ꦠꦶꦠꦺꦴ ꦱꦨꦠ꧀ꦠꦺꦴ ꦱꦩꦴꦤꦺꦴ ꦥꦸꦫꦺꦨꦠ꧀ꦠꦁ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦶꦱ꧀ꦱꦱꦶ! ꦤꦺꦠꦁ, ꦩꦺꦴꦓꦥꦸꦫꦶꦱ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴꦡ –

‘‘ꦪꦺꦴ ꦥꦤ ꦨꦶꦏ꧀ꦑꦸ ꦤꦶꦩꦤ꧀ꦠꦶꦠꦺꦴ ꦱꦨꦠ꧀ꦠꦺꦴ ꦱꦩꦴꦤꦺꦴ ꦥꦸꦫꦺꦨꦠ꧀ꦠꦁ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

ꦌꦮꦚ꧀ꦕꦶꦢꦁ ꦨꦒꦮꦠꦴ ꦨꦶꦏ꧀ꦑꦹꦤꦁ ꦱꦶꦏ꧀ꦑꦴꦥꦢꦁ ꦥꦚ꧀ꦚꦠ꧀ꦠꦁ ꦲꦺꦴꦠꦶ.

꧒꧙꧕. [ꦩꦲꦴꦮ. ꧒꧗꧗] ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦠꦺꦴ ꦈꦥꦤꦤ꧀ꦢꦱ꧀ꦱ ꦱꦏ꧀ꦪꦥꦸꦠ꧀ꦠꦱ꧀ꦱ ꦈꦥꦛ꧀ꦜꦴꦏꦏꦸꦭꦁ ꦱꦔ꧀ꦓꦱ꧀ꦱꦠ꧀ꦡꦴꦪ ꦑꦴꦢꦤꦷꦪꦁ ꦥꦴꦲꦺꦱꦶ – ‘‘ꦄꦪ꧀ꦪꦱ꧀ꦱ ꦈꦥꦤꦤ꧀ꦢꦱ꧀ꦱ ꦢꦱ꧀ꦱꦺꦠ꧀ꦮꦴ ꦱꦔ꧀ꦓꦱ꧀ꦱ ꦢꦴꦠꦧ꧀ꦧ’’ꦤ꧀ꦠꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ ꦒꦴꦩꦁ ꦥꦶꦟ꧀ꦝꦴꦪ ꦥꦮꦶꦛ꧀ꦜꦺꦴ ꦲꦺꦴꦠꦶ. ꦄꦡ ꦑꦺꦴ ꦠꦺ ꦩꦤꦸꦱ꧀ꦱꦴ ꦄꦴꦫꦴꦩꦁ ꦒꦤ꧀ꦠ꧀ꦮꦴ ꦨꦶꦏ꧀ꦑꦹ ꦥꦸꦕ꧀ꦖꦶꦁꦱꦸ – ‘‘ꦏꦲꦁ, ꦨꦤ꧀ꦠꦺ, ꦄꦪ꧀ꦪꦺꦴ ꦈꦥꦤꦤ꧀ꦢꦺꦴ’’ꦠꦶ? ‘‘ꦌꦱꦴꦮꦸꦱꦺꦴ, ꦄꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ ꦒꦴꦩꦁ ꦥꦶꦟ꧀ꦝꦴꦪ ꦥꦮꦶꦛ꧀ꦜꦺꦴ’’ꦠꦶ. ‘‘ꦆꦢꦁ, ꦨꦤ꧀ꦠꦺ, ꦑꦴꦢꦤꦷꦪꦁ ꦄꦪ꧀ꦪꦱ꧀ꦱ ꦈꦥꦤꦤ꧀ꦢꦱ꧀ꦱ ꦢꦱ꧀ꦱꦺꦠ꧀ꦮꦴ ꦱꦔ꧀ꦓꦱ꧀ꦱ ꦢꦴꦠꦧ꧀ꦧ’’ꦤ꧀ꦠꦶ. ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦄꦡ ꦑꦺꦴ ꦨꦒꦮꦴ ꦌꦠꦱ꧀ꦩꦶꦁ ꦤꦶꦢꦴꦤꦺ ꦌꦠꦱ꧀ꦩꦶꦁ ꦥꦏꦫꦟꦺ ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦠꦺꦤ ꦲꦶ, ꦨꦶꦏ꧀ꦑꦮꦺ, ꦥꦛꦶꦒ꧀ꦒꦲꦺꦠ꧀ꦮꦴ ꦤꦶꦏ꧀ꦑꦶꦥꦡ ꦪꦴꦮ ꦈꦥꦤꦤ꧀ꦢꦺꦴ ꦄꦴꦒꦕ꧀ꦖꦠꦷ’’ꦠꦶ.

ꦄꦡ ꦑꦺꦴ ꦄꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ – ‘‘ꦨꦒꦮꦠꦴ ꦥꦛꦶꦏ꧀ꦑꦶꦠ꧀ꦠꦁ ꦥꦸꦫꦺꦨꦠ꧀ꦠꦁ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦶꦠꦸ’’ꦤ꧀ꦠꦶ ꦥꦕ꧀ꦖꦴꦨꦠ꧀ꦠꦁ ꦏꦸꦭꦴꦤꦶ ꦥꦪꦶꦫꦸꦥꦴꦱꦶꦠ꧀ꦮꦴ ꦢꦶꦮꦴ ꦥꦛꦶꦏ꧀ꦏꦩꦶ, ꦑꦴꦢꦤꦷꦪꦁ ꦈꦱ꧀ꦱꦴꦫꦶꦪꦶꦠ꧀ꦡ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦄꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ ꦥꦕ꧀ꦖꦴꦨꦠ꧀ꦠꦁ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦶꦱ꧀ꦱꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ ꦠ꧀ꦮꦁ, ꦈꦥꦤꦤ꧀ꦢ, ꦥꦕ꧀ꦖꦴꦨꦠ꧀ꦠꦁ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦱꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ ꦠ꧀ꦮꦁ, ꦩꦺꦴꦓꦥꦸꦫꦶꦱ, ꦥꦕ꧀ꦖꦴꦨꦠ꧀ꦠꦁ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦶꦱ꧀ꦱꦱꦶ! ꦤꦺꦠꦁ, ꦩꦺꦴꦓꦥꦸꦫꦶꦱ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ ꦨꦶꦏ꧀ꦑꦮꦺ ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴꦡ –

‘‘ꦪꦺꦴ ꦥꦤ ꦨꦶꦏ꧀ꦑꦸ ꦤꦶꦩꦤ꧀ꦠꦶꦠꦺꦴ ꦱꦨꦠ꧀ꦠꦺꦴ ꦱꦩꦴꦤꦺꦴ ꦥꦸꦫꦺꦨꦠ꧀ꦠꦁ ꦮꦴ ꦥꦕ꧀ꦖꦴꦨꦠ꧀ꦠꦁ ꦮꦴ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦺꦪ꧀ꦪ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

ꦌꦮꦚ꧀ꦕꦶꦢꦁ ꦨꦒꦮꦠꦴ ꦨꦶꦏ꧀ꦑꦹꦤꦁ ꦱꦶꦏ꧀ꦑꦴꦥꦢꦁ ꦥꦚ꧀ꦚꦠ꧀ꦠꦁ ꦲꦺꦴꦠꦶ.

꧒꧙꧖. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦹ ꦕꦷꦮꦫꦢꦴꦤꦱꦩꦪꦺ ꦏꦸꦏ꧀ꦏꦸꦕ꧀ꦕꦴꦪꦤ꧀ꦠꦴ ꦏꦸꦭꦴꦤꦶ ꦤ ꦥꦪꦶꦫꦸꦥꦴꦱꦤ꧀ꦠꦶ. ꦕꦷꦮꦫꦁ ꦥꦫꦶꦠ꧀ꦠꦁ ꦈꦥ꧀ꦥꦗ꧀ꦗꦠꦶ. ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦕꦷꦮꦫꦢꦴꦤꦱꦩꦪꦺ ꦏꦸꦭꦴꦤꦶ ꦥꦪꦶꦫꦸꦥꦴꦱꦶꦠꦸꦁ. ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴꦡ –

‘‘ꦪꦺꦴ ꦥꦤ ꦨꦶꦏ꧀ꦑꦸ ꦤꦶꦩꦤ꧀ꦠꦶꦠꦺꦴ ꦱꦨꦠ꧀ꦠꦺꦴ ꦱꦩꦴꦤꦺꦴ ꦥꦸꦫꦺꦨꦠ꧀ꦠꦁ ꦮꦴ ꦥꦕ꧀ꦖꦴꦨꦠ꧀ꦠꦁ ꦮꦴ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦺꦪ꧀ꦪ, ꦄꦚ꧀ꦚꦠ꧀ꦫ ꦱꦩꦪꦴ, ꦥꦴꦕꦶꦠ꧀ꦠꦶꦪꦁ. ꦠꦠ꧀ꦡꦴꦪꦁ ꦱꦩꦪꦺꦴ. ꦕꦷꦮꦫꦢꦴꦤꦱꦩꦪꦺꦴ – ꦄꦪꦁ ꦠꦠ꧀ꦡ ꦱꦩꦪꦺꦴ’’ꦠꦶ.

ꦌꦮꦚ꧀ꦕꦶꦢꦁ ꦨꦒꦮꦠꦴ ꦨꦶꦏ꧀ꦑꦹꦤꦁ ꦱꦶꦏ꧀ꦑꦴꦥꦢꦁ ꦥꦚ꧀ꦚꦠ꧀ꦠꦁ ꦲꦺꦴꦠꦶ.

꧒꧙꧗. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦹ ꦕꦷꦮꦫꦏꦩ꧀ꦩꦁ ꦏꦫꦺꦴꦤ꧀ꦠꦶ, ꦄꦠ꧀ꦡꦺꦴ ꦕ ꦲꦺꦴꦠꦶ ꦱꦹꦕꦶꦪꦴꦥꦶ ꦱꦸꦠ꧀ꦠꦺꦤꦥꦶ ꦱꦠ꧀ꦡꦏꦺꦤꦥꦶ. ꦨꦶꦏ꧀ꦑꦹ ꦏꦸꦏ꧀ꦏꦸꦕ꧀ꦕꦴꦪꦤ꧀ꦠꦴ ꦏꦸꦭꦴꦤꦶ ꦤ ꦥꦪꦶꦫꦸꦥꦴꦱꦤ꧀ꦠꦶ. ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦕꦷꦮꦫꦏꦴꦫꦱꦩꦪꦺ ꦏꦸꦭꦴꦤꦶ ꦥꦪꦶꦫꦸꦥꦴꦱꦶꦠꦸꦁ. ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴꦡ –

‘‘ꦪꦺꦴ ꦥꦤ ꦨꦶꦏ꧀ꦑꦸ ꦤꦶꦩꦤ꧀ꦠꦶꦠꦺꦴ ꦱꦨꦠ꧀ꦠꦺꦴ ꦱꦩꦴꦤꦺꦴ ꦥꦸꦫꦺꦨꦠ꧀ꦠꦁ ꦮꦴ ꦥꦕ꧀ꦖꦴꦨꦠ꧀ꦠꦁ ꦮꦴ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦺꦪ꧀ꦪ, ꦄꦚ꧀ꦚꦠ꧀ꦫ ꦱꦩꦪꦴ, ꦥꦴꦕꦶꦠ꧀ꦠꦶꦪꦁ. ꦠꦠ꧀ꦡꦴꦪꦁ ꦱꦩꦪꦺꦴ. ꦕꦷꦮꦫꦢꦴꦤꦱꦩꦪꦺꦴ, ꦕꦷꦮꦫꦏꦴꦫꦱꦩꦪꦺꦴ – ꦄꦪꦁ ꦠꦠ꧀ꦡ ꦱꦩꦪꦺꦴ’’ꦠꦶ.

ꦌꦮꦚ꧀ꦕꦶꦢꦁ ꦨꦒꦮꦠꦴ ꦨꦶꦏ꧀ꦑꦹꦤꦁ ꦱꦶꦏ꧀ꦑꦴꦥꦢꦁ ꦥꦚ꧀ꦚꦠ꧀ꦠꦁ ꦲꦺꦴꦠꦶ.

꧒꧙꧘. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦹ ꦒꦶꦭꦴꦤꦴ ꦲꦺꦴꦤ꧀ꦠꦶ, ꦄꦠ꧀ꦡꦺꦴ ꦕ ꦲꦺꦴꦠꦶ ꦨꦺꦱꦗ꧀ꦗꦺꦲꦶ. ꦨꦶꦏ꧀ꦑꦹ ꦏꦸꦏ꧀ꦏꦸꦕ꧀ꦕꦴꦪꦤ꧀ꦠꦴ ꦏꦸꦭꦴꦤꦶ ꦤ ꦥꦪꦶꦫꦸꦥꦴꦱꦤ꧀ꦠꦶ. ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ…ꦥꦺ… ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦱꦤ꧀ꦠꦁ ꦨꦶꦏ꧀ꦑꦸꦁ ꦄꦴꦥꦸꦕ꧀ꦖꦴ ꦏꦸꦭꦴꦤꦶ ꦥꦪꦶꦫꦸꦥꦴꦱꦶꦠꦸꦁ. ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴꦡ –

꧒꧙꧙. ‘‘ꦪꦺꦴ ꦥꦤ ꦨꦶꦏ꧀ꦑꦸ ꦤꦶꦩꦤ꧀ꦠꦶꦠꦺꦴ ꦱꦨꦠ꧀ꦠꦺꦴ ꦱꦩꦴꦤꦺꦴ ꦱꦤ꧀ꦠꦁ ꦨꦶꦏ꧀ꦑꦸꦁ ꦄꦤꦴꦥꦸꦕ꧀ꦖꦴ ꦥꦸꦫꦺꦨꦠ꧀ꦠꦁ ꦮꦴ ꦥꦕ꧀ꦖꦴꦨꦠ꧀ꦠꦁ ꦮꦴ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦺꦪ꧀ꦪ, ꦄꦚ꧀ꦚꦠ꧀ꦫ ꦱꦩꦪꦴ, ꦥꦴꦕꦶꦠ꧀ꦠꦶꦪꦁ. ꦠꦠ꧀ꦡꦴꦪꦁ ꦱꦩꦪꦺꦴ. ꦕꦷꦮꦫꦢꦴꦤꦱꦩꦪꦺꦴ, ꦕꦷꦮꦫꦏꦴꦫꦱꦩꦪꦺꦴ – ꦄꦪꦁ ꦠꦠ꧀ꦡ ꦱꦩꦪꦺꦴ’’ꦠꦶ.

꧓꧐꧐. ꦪꦺꦴ ꦥꦤꦴꦠꦶ ꦪꦺꦴ ꦪꦴꦢꦶꦱꦺꦴ…ꦥꦺ… ꦨꦶꦏ꧀ꦑꦹꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦺꦴ ꦨꦶꦏ꧀ꦑꦹꦠꦶ.

ꦤꦶꦩꦤ꧀ꦠꦶꦠꦺꦴ ꦤꦴꦩ ꦥꦚ꧀ꦕꦤ꧀ꦤꦁ ꦨꦺꦴꦗꦤꦴꦤꦁ ꦄꦚ꧀ꦚꦠꦫꦺꦤ ꦨꦺꦴꦗꦤꦺꦤ ꦤꦶꦩꦤ꧀ꦠꦶꦠꦺꦴ.

ꦱꦨꦠ꧀ꦠꦺꦴ ꦤꦴꦩ ꦪꦺꦤ ꦤꦶꦩꦤ꧀ꦠꦶꦠꦺꦴ ꦠꦺꦤ ꦱꦨꦠ꧀ꦠꦺꦴ.

ꦱꦤ꧀ꦠꦁ ꦤꦴꦩ ꦨꦶꦏ꧀ꦑꦸꦁ ꦱꦏ꧀ꦏꦴ ꦲꦺꦴꦠꦶ ꦄꦴꦥꦸꦕ꧀ꦖꦴ ꦥꦮꦶꦱꦶꦠꦸꦁ.

ꦄꦱꦤ꧀ꦠꦁ ꦤꦴꦩ ꦨꦶꦏ꧀ꦑꦸꦁ ꦤ ꦱꦏ꧀ꦏꦴ ꦲꦺꦴꦠꦶ ꦄꦴꦥꦸꦕ꧀ꦖꦴ ꦥꦮꦶꦱꦶꦠꦸꦁ.

ꦥꦸꦫꦺꦨꦠ꧀ꦠꦁ ꦤꦴꦩ ꦪꦺꦤ ꦤꦶꦩꦤ꧀ꦠꦶꦠꦺꦴ ꦠꦁ ꦄꦨꦸꦠ꧀ꦠꦴꦮꦷ.

ꦥꦕ꧀ꦖꦴꦨꦠ꧀ꦠꦁ ꦤꦴꦩ ꦪꦺꦤ ꦤꦶꦩꦤ꧀ꦠꦶꦠꦺꦴ ꦠꦁ ꦄꦤ꧀ꦠꦩꦱꦺꦴ ꦏꦸꦱꦒ꧀ꦒꦺꦤꦥꦶ [ꦄꦫꦸꦟꦸꦒ꧀ꦒꦩꦤꦺꦥꦶ (ꦱꦷ.)] ꦨꦸꦠ꧀ꦠꦁ ꦲꦺꦴꦠꦶ.

ꦏꦸꦭꦁ ꦤꦴꦩ ꦕꦠ꧀ꦠꦴꦫꦶ ꦏꦸꦭꦴꦤꦶ – ꦑꦠ꧀ꦠꦶꦪꦏꦸꦭꦁ, ꦧ꧀ꦫꦴꦲ꧀ꦩꦟꦏꦸꦭꦁ, ꦮꦺꦱ꧀ꦱꦏꦸꦭꦁ, ꦱꦸꦢ꧀ꦢꦏꦸꦭꦁ.

ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦺꦪ꧀ꦪꦴꦠꦶ ꦄꦚ꧀ꦚꦱ꧀ꦱ ꦓꦫꦹꦥꦕꦴꦫꦁ ꦎꦏ꧀ꦏꦩꦤ꧀ꦠꦱ꧀ꦱ ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦥꦜꦩꦁ ꦥꦴꦢꦁ ꦈꦩ꧀ꦩꦴꦫꦁ ꦄꦠꦶꦏ꧀ꦏꦴꦩꦺꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦢꦸꦠꦶꦪꦁ ꦥꦴꦢꦁ ꦄꦠꦶꦏ꧀ꦏꦴꦩꦺꦠꦶ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦄꦚ꧀ꦚꦠ꧀ꦫ ꦱꦩꦪꦴꦠꦶ ꦜꦥꦺꦠ꧀ꦮꦴ ꦱꦩꦪꦁ.

ꦕꦷꦮꦫꦢꦴꦤꦱꦩꦪꦺꦴ ꦤꦴꦩ ꦄꦤꦠ꧀ꦡꦠꦺ ꦏꦡꦶꦤꦺ ꦮꦱ꧀ꦱꦴꦤꦱ꧀ꦱ ꦥꦕ꧀ꦖꦶꦩꦺꦴ ꦩꦴꦱꦺꦴ, ꦄꦠ꧀ꦡꦠꦺ ꦏꦡꦶꦤꦺ ꦥꦚ꧀ꦕ ꦩꦴꦱꦴ.

ꦕꦷꦮꦫꦏꦴꦫꦱꦩꦪꦺꦴ ꦤꦴꦩ ꦕꦷꦮꦫꦺ ꦏꦪꦶꦫꦩꦴꦤꦺ.

꧓꧐꧑. ꦤꦶꦩꦤ꧀ꦠꦶꦠꦺ ꦤꦶꦩꦤ꧀ꦠꦶꦠꦱꦚ꧀ꦚꦷ ꦱꦤ꧀ꦠꦁ ꦨꦶꦏ꧀ꦑꦸꦁ ꦄꦤꦴꦥꦸꦕ꧀ꦖꦴ ꦥꦸꦫꦺꦨꦠ꧀ꦠꦁ ꦮꦴ ꦥꦕ꧀ꦖꦴꦨꦠ꧀ꦠꦁ ꦮꦴ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦠꦶ, ꦄꦚ꧀ꦚꦠ꧀ꦫ ꦱꦩꦪꦴ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦤꦶꦩꦤ꧀ꦠꦶꦠꦺ ꦮꦺꦩꦠꦶꦏꦺꦴ ꦱꦤ꧀ꦠꦁ ꦨꦶꦏ꧀ꦑꦸꦁ ꦄꦤꦴꦥꦸꦕ꧀ꦖꦴ ꦥꦸꦫꦺꦨꦠ꧀ꦠꦁ ꦮꦴ ꦥꦕ꧀ꦖꦴꦨꦠ꧀ꦠꦁ ꦮꦴ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦠꦶ, ꦄꦚ꧀ꦚꦠ꧀ꦫ ꦱꦩꦪꦴ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦤꦶꦩꦤ꧀ꦠꦶꦠꦺ ꦄꦤꦶꦩꦤ꧀ꦠꦶꦠꦱꦚ꧀ꦚꦷ ꦱꦤ꧀ꦠꦁ ꦨꦶꦏ꧀ꦑꦸꦁ ꦄꦤꦴꦥꦸꦕ꧀ꦖꦴ ꦥꦸꦫꦺꦨꦠ꧀ꦠꦁ ꦮꦴ ꦥꦕ꧀ꦖꦴꦨꦠ꧀ꦠꦁ ꦮꦴ ꦏꦸꦭꦺꦱꦸ ꦕꦴꦫꦶꦠ꧀ꦠꦁ ꦄꦴꦥꦗ꧀ꦗꦠꦶ, ꦄꦚ꧀ꦚꦠ꧀ꦫ ꦱꦩꦪꦴ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦄꦤꦶꦩꦤ꧀ꦠꦶꦠꦺ ꦤꦶꦩꦤ꧀ꦠꦶꦠꦱꦚ꧀ꦚꦷ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦤꦶꦩꦤ꧀ꦠꦶꦠꦺ ꦮꦺꦩꦠꦶꦏꦺꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦤꦶꦩꦤ꧀ꦠꦶꦠꦺ ꦄꦤꦶꦩꦤ꧀ꦠꦶꦠꦱꦚ꧀ꦚꦷ, ꦄꦤꦴꦥꦠ꧀ꦠꦶ.

꧓꧐꧒. ꦄꦤꦴꦥꦠ꧀ꦠꦶ ꦱꦩꦪꦺ, ꦱꦤ꧀ꦠꦁ ꦨꦶꦏ꧀ꦑꦸꦁ ꦄꦴꦥꦸꦕ꧀ꦖꦴ ꦥꦮꦶꦱꦠꦶ, ꦄꦱꦤ꧀ꦠꦁ ꦨꦶꦏ꧀ꦑꦸꦁ ꦄꦤꦴꦥꦸꦕ꧀ꦖꦴ ꦥꦮꦶꦱꦠꦶ, ꦄꦚ꧀ꦚꦱ꧀ꦱ ꦓꦫꦺꦤ ꦩꦒ꧀ꦒꦺꦴ ꦲꦺꦴꦠꦶ, ꦓꦫꦹꦥꦕꦴꦫꦺꦤ ꦩꦒ꧀ꦒꦺꦴ ꦲꦺꦴꦠꦶ, ꦄꦤ꧀ꦠꦫꦴꦫꦴꦩꦁ ꦒꦕ꧀ꦖꦠꦶ, ꦨꦶꦏ꧀ꦑꦸꦤꦸꦥꦱ꧀ꦱꦪꦁ ꦒꦕ꧀ꦖꦠꦶ, ꦠꦶꦠ꧀ꦡꦶꦪꦱꦺꦪ꧀ꦪꦁ ꦒꦕ꧀ꦖꦠꦶ, ꦥꦛꦶꦏ꧀ꦏꦩꦤꦁ ꦒꦕ꧀ꦖꦠꦶ, ꦨꦠ꧀ꦠꦶꦪꦓꦫꦁ ꦒꦕ꧀ꦖꦠꦶ, ꦄꦴꦥꦢꦴꦱꦸ, ꦈꦩ꧀ꦩꦠ꧀ꦠꦏꦱ꧀ꦱ, ꦄꦴꦢꦶꦏꦩ꧀ꦩꦶꦏꦱ꧀ꦱꦴꦠꦶ.

ꦕꦴꦫꦶꦠ꧀ꦠꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ ꦖꦛ꧀ꦜꦁ.