꧕. ꦥꦜꦩꦥꦮꦴꦫꦟꦴꦱꦶꦏ꧀ꦑꦴꦥꦢꦁ

꧒꧓꧖. ꦠꦺꦤ ꦱꦩꦪꦺꦤ ꦧꦸꦢ꧀ꦣꦺꦴ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦚ꧀ꦚꦠꦫꦺꦴ ꦧ꧀ꦫꦴꦲ꧀ꦩꦟꦺꦴ ꦨꦶꦏ꧀ꦑꦹ ꦤꦶꦩꦤ꧀ꦠꦺꦠ꧀ꦮꦴ ꦨꦺꦴꦗꦺꦱꦶ. ꦨꦶꦏ꧀ꦑꦹ ꦨꦸꦠ꧀ꦠꦴꦮꦷ ꦥꦮꦴꦫꦶꦠꦴ ꦚꦴꦠꦶꦏꦸꦭꦴꦤꦶ ꦒꦤ꧀ꦠ꧀ꦮꦴ ꦌꦏꦕ꧀ꦕꦺ ꦨꦸꦚ꧀ꦗꦶꦁꦱꦸ ꦌꦏꦕ꧀ꦕꦺ ꦥꦶꦟ꧀ꦝꦥꦴꦠꦁ ꦄꦴꦢꦴꦪ ꦄꦒꦩꦁꦱꦸ. ꦄꦡ ꦑꦺꦴ ꦱꦺꦴ ꦧ꧀ꦫꦴꦲ꧀ꦩꦟꦺꦴ ꦥꦛꦶꦮꦶꦱ꧀ꦱꦏꦺ [ꦥꦛꦶꦮꦶꦱꦏꦺ (ꦪꦺꦴꦗꦤꦴ)] ꦌꦠꦢꦮꦺꦴꦕ – ‘‘ꦨꦶꦏ꧀ꦑꦹ ꦩꦪꦴ ꦄꦪ꧀ꦪꦴ ꦱꦤ꧀ꦠꦥ꧀ꦥꦶꦠꦴ. ꦌꦡ, ꦠꦸꦩ꧀ꦲꦺꦥꦶ ꦱꦤ꧀ꦠꦥ꧀ꦥꦺꦱ꧀ꦱꦴꦩꦷ’’ꦠꦶ. ꦠꦺ ꦌꦮꦩꦴꦲꦁꦱꦸ – ‘‘ꦏꦶꦁ ꦠ꧀ꦮꦁ, ꦄꦪ꧀ꦪꦺꦴ [ꦄꦪ꧀ꦪ (ꦱ꧀ꦪꦴ.)], ꦄꦩ꧀ꦲꦺ ꦱꦤ꧀ꦠꦥ꧀ꦥꦺꦱ꧀ꦱꦱꦶ? ꦪꦺꦥꦶ ꦠꦪꦴ ꦤꦶꦩꦤ꧀ꦠꦶꦠꦴ ꦠꦺꦥꦶ ꦄꦩ꧀ꦲꦴꦏꦁ ꦓꦫꦴꦤꦶ ꦄꦴꦒꦤ꧀ꦠ꧀ꦮꦴ ꦌꦏꦕ꧀ꦕꦺ ꦨꦸꦚ꧀ꦗꦶꦁꦱꦸ ꦌꦏꦕ꧀ꦕꦺ ꦥꦶꦟ꧀ꦝꦥꦴꦠꦁ ꦄꦴꦢꦴꦪ ꦄꦒꦩꦁꦱꦹ’’ꦠꦶ!

ꦄꦡ ꦑꦺꦴ ꦱꦺꦴ ꦧ꧀ꦫꦴꦲ꧀ꦩꦟꦺꦴ ꦈꦗ꧀ꦙꦴꦪꦠꦶ ꦑꦶꦪ꧀ꦪꦠꦶ ꦮꦶꦥꦴꦕꦺꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦢꦤ꧀ꦠꦴ ꦄꦩ꧀ꦲꦴꦏꦁ ꦓꦫꦺ ꦨꦸꦚ꧀ꦗꦶꦠ꧀ꦮꦴ ꦄꦚ꧀ꦚꦠ꧀ꦫ ꦨꦸꦚ꧀ꦗꦶꦱ꧀ꦱꦤ꧀ꦠꦶ! ꦤ ꦕꦴꦲꦁ ꦥꦛꦶꦧꦭꦺꦴ ꦪꦴꦮꦢꦠ꧀ꦡꦁ ꦢꦴꦠꦸ’’ꦤ꧀ꦠꦶ! ꦄꦱ꧀ꦱꦺꦴꦱꦸꦁ ꦑꦺꦴ ꦨꦶꦏ꧀ꦑꦹ ꦠꦱ꧀ꦱ ꦧ꧀ꦫꦴꦲ꧀ꦩꦟꦱ꧀ꦱ ꦈꦗ꧀ꦙꦴꦪꦤ꧀ꦠꦱ꧀ꦱ ꦑꦶꦪ꧀ꦪꦤ꧀ꦠꦱ꧀ꦱ ꦮꦶꦥꦴꦕꦺꦤ꧀ꦠꦱ꧀ꦱ. ꦪꦺ ꦠꦺ ꦨꦶꦏ꧀ꦑꦹ ꦄꦥ꧀ꦥꦶꦕ꧀ꦖꦴ…ꦥꦺ… ꦠꦺ ꦈꦗ꧀ꦙꦴꦪꦤ꧀ꦠꦶ ꦑꦶꦪ꧀ꦪꦤ꧀ꦠꦶ ꦮꦶꦥꦴꦕꦺꦤ꧀ꦠꦶ – ‘‘ꦏꦡꦚ꧀ꦲꦶ ꦤꦴꦩ ꦨꦶꦏ꧀ꦑꦹ ꦨꦸꦠ꧀ꦠꦴꦮꦷ ꦥꦮꦴꦫꦶꦠꦴ ꦄꦚ꧀ꦚꦠ꧀ꦫ ꦨꦸꦚ꧀ꦗꦶꦱ꧀ꦱꦤ꧀ꦠꦷ’’ꦠꦶ…ꦥꦺ… ꦱꦕ꧀ꦕꦁ ꦏꦶꦫ, ꦨꦶꦏ꧀ꦑꦮꦺ, ꦨꦶꦏ꧀ꦑꦹ ꦨꦸꦠ꧀ꦠꦴꦮꦷ ꦥꦮꦴꦫꦶꦠꦴ ꦄꦚ꧀ꦚꦠ꧀ꦫ ꦨꦸꦚ꧀ꦗꦤ꧀ꦠꦷꦠꦶ? ‘‘ꦱꦕ꧀ꦕꦁ, ꦨꦒꦮꦴ’’ꦠꦶ. ꦮꦶꦒꦫꦲꦶ ꦧꦸꦢ꧀ꦣꦺꦴ ꦨꦒꦮꦴ…ꦥꦺ… ꦏꦡꦚ꧀ꦲꦶ ꦤꦴꦩ ꦠꦺ, ꦨꦶꦏ꧀ꦑꦮꦺ, ꦩꦺꦴꦓꦥꦸꦫꦶꦱꦴ ꦨꦸꦠ꧀ꦠꦴꦮꦷ ꦥꦮꦴꦫꦶꦠꦴ ꦄꦚ꧀ꦚꦠ꧀ꦫ ꦨꦸꦚ꧀ꦗꦶꦱ꧀ꦱꦤ꧀ꦠꦶ! ꦤꦺꦠꦁ, ꦨꦶꦏ꧀ꦑꦮꦺ, ꦄꦥ꧀ꦥꦱꦤ꧀ꦤꦴꦤꦁ ꦮꦴ ꦥꦱꦴꦢꦴꦪ…ꦥꦺ… ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴꦡ –

‘‘ꦪꦺꦴ ꦥꦤ ꦨꦶꦏ꧀ꦑꦸ ꦨꦸꦠ꧀ꦠꦴꦮꦷ ꦥꦮꦴꦫꦶꦠꦺꦴ ꦑꦴꦢꦤꦷꦪꦁ ꦮꦴ ꦨꦺꦴꦗꦤꦷꦪꦁ ꦮꦴ ꦑꦴꦢꦺꦪ꧀ꦪ ꦮꦴ ꦨꦸꦚ꧀ꦗꦺꦪ꧀ꦪ ꦮꦴ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

ꦌꦮꦚ꧀ꦕꦶꦢꦁ ꦨꦒꦮꦠꦴ ꦨꦶꦏ꧀ꦑꦹꦤꦁ ꦱꦶꦏ꧀ꦑꦴꦥꦢꦁ ꦥꦚ꧀ꦚꦠ꧀ꦠꦁ ꦲꦺꦴꦠꦶ.

꧒꧓꧗. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦹ ꦒꦶꦭꦴꦤꦴꦤꦁ ꦨꦶꦏ꧀ꦑꦹꦤꦁ ꦥꦟꦷꦠꦺ ꦥꦶꦟ꧀ꦝꦥꦴꦠꦺ ꦤꦷꦲꦫꦤ꧀ꦠꦶ. ꦒꦶꦭꦴꦤꦴ ꦤ ꦕꦶꦠ꧀ꦠꦫꦹꦥꦁ ꦨꦸꦚ꧀ꦗꦤ꧀ꦠꦶ. ꦠꦴꦤꦶ ꦨꦶꦏ꧀ꦑꦹ ꦖꦛ꧀ꦛꦺꦤ꧀ꦠꦶ. ꦄꦱ꧀ꦱꦺꦴꦱꦶ ꦑꦺꦴ ꦨꦒꦮꦴ ꦈꦕ꧀ꦕꦴꦱꦢ꧀ꦢꦁ ꦩꦲꦴꦱꦢ꧀ꦢꦁ ꦏꦴꦏꦺꦴꦫꦮꦱꦢ꧀ꦢꦁ. ꦱꦸꦠ꧀ꦮꦴꦤ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦏꦶꦁ ꦤꦸ ꦑꦺꦴ ꦱꦺꦴ, ꦄꦴꦤꦤ꧀ꦢ, ꦈꦕ꧀ꦕꦴꦱꦢ꧀ꦢꦺꦴ ꦩꦲꦴꦱꦢ꧀ꦢꦺꦴ ꦏꦴꦏꦺꦴꦫꦮꦱꦢ꧀ꦢꦺꦴ’’ꦠꦶ? ꦄꦡ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦶ. ‘‘ꦨꦸꦚ꧀ꦗꦺꦪ꧀ꦪꦸꦁ ꦥꦤꦴꦤꦤ꧀ꦢ, ꦨꦶꦏ꧀ꦑꦹ ꦒꦶꦭꦴꦤꦴꦠꦶꦫꦶꦠ꧀ꦠ’’ꦤ꧀ꦠꦶ. ‘‘ꦤ ꦨꦸꦚ꧀ꦗꦺꦪ꧀ꦪꦸꦁ, ꦨꦒꦮꦴ’’ꦠꦶ. ꦄꦡ ꦑꦺꦴ ꦨꦒꦮꦴ ꦌꦠꦱ꧀ꦩꦶꦁ ꦤꦶꦢꦴꦤꦺ ꦌꦠꦱ꧀ꦩꦶꦁ ꦥꦏꦫꦟꦺ ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦄꦤꦸꦗꦴꦤꦴꦩꦶ ꦨꦶꦏ꧀ꦑꦮꦺ, ꦒꦶꦭꦴꦤꦱ꧀ꦱ ꦕ ꦄꦒꦶꦭꦴꦤꦱ꧀ꦱ ꦕ ꦄꦠꦶꦫꦶꦠ꧀ꦠꦁ ꦨꦸꦚ꧀ꦗꦶꦠꦸꦁ. ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦄꦠꦶꦫꦶꦠ꧀ꦠꦁ ꦏꦴꦠꦧ꧀ꦧꦁ – ‘‘ꦄꦭꦩꦺꦠꦁ ꦱꦧ꧀ꦧ’’ꦤ꧀ꦠꦶ. ꦌꦮꦚ꧀ꦕ ꦥꦤ, ꦨꦶꦏ꧀ꦑꦮꦺ, ꦆꦩꦁ ꦱꦶꦏ꧀ꦑꦴꦥꦢꦁ ꦈꦢ꧀ꦢꦶꦱꦺꦪ꧀ꦪꦴꦡ –

꧒꧓꧘. ‘‘ꦪꦺꦴ ꦥꦤ ꦨꦶꦏ꧀ꦑꦸ ꦨꦸꦠ꧀ꦠꦴꦮꦷ ꦥꦮꦴꦫꦶꦠꦺꦴ ꦄꦤꦠꦶꦫꦶꦠ꧀ꦠꦁ ꦑꦴꦢꦤꦷꦪꦁ ꦮꦴ ꦨꦺꦴꦗꦤꦷꦪꦁ ꦮꦴ ꦑꦴꦢꦺꦪ꧀ꦪ ꦮꦴ ꦨꦸꦚ꧀ꦗꦺꦪ꧀ꦪ ꦮꦴ, ꦥꦴꦕꦶꦠ꧀ꦠꦶꦪ’’ꦤ꧀ꦠꦶ.

꧒꧓꧙. ꦪꦺꦴ ꦥꦤꦴꦠꦶ ꦪꦺꦴ ꦪꦴꦢꦶꦱꦺꦴ…ꦥꦺ… ꦨꦶꦏ꧀ꦑꦹꦠꦶ…ꦥꦺ… ꦄꦪꦁ ꦆꦩꦱ꧀ꦩꦶꦁ ꦄꦠ꧀ꦡꦺ ꦄꦣꦶꦥ꧀ꦥꦺꦠꦺꦴ ꦨꦶꦏ꧀ꦑꦹꦠꦶ.

ꦨꦸꦠ꧀ꦠꦴꦮꦷ ꦤꦴꦩ ꦥꦚ꧀ꦕꦤ꧀ꦤꦁ ꦨꦺꦴꦗꦤꦴꦤꦁ ꦄꦚ꧀ꦚꦠꦫꦁ ꦨꦺꦴꦗꦤꦁ ꦄꦤ꧀ꦠꦩꦱꦺꦴ ꦏꦸꦱꦒ꧀ꦒꦺꦤꦥꦶ ꦨꦸꦠ꧀ꦠꦁ ꦲꦺꦴꦠꦶ.

ꦥꦮꦴꦫꦶꦠꦺꦴ ꦤꦴꦩ ꦄꦱꦤꦁ ꦥꦚ꧀ꦚꦴꦪꦠꦶ, ꦨꦺꦴꦗꦤꦁ ꦥꦚ꧀ꦚꦴꦪꦠꦶ, ꦲꦠ꧀ꦡꦥꦴꦱꦺ ꦜꦶꦠꦺꦴ ꦄꦨꦶꦲꦫꦠꦶ, ꦥꦛꦶꦏ꧀ꦑꦺꦥꦺꦴ ꦥꦚ꧀ꦚꦴꦪꦠꦶ.

ꦄꦤꦠꦶꦫꦶꦠ꧀ꦠꦁ ꦤꦴꦩ ꦄꦏꦥ꧀ꦥꦶꦪꦏꦠꦁ ꦲꦺꦴꦠꦶ, ꦄꦥ꧀ꦥꦛꦶꦒ꧀ꦒꦲꦶꦠꦏꦠꦁ ꦲꦺꦴꦠꦶ, ꦄꦤꦸꦕ꧀ꦕꦴꦫꦶꦠꦏꦠꦁ ꦲꦺꦴꦠꦶ, ꦄꦲꦠ꧀ꦡꦥꦴꦱꦺ ꦏꦠꦁ ꦲꦺꦴꦠꦶ, ꦄꦨꦸꦠ꧀ꦠꦴꦮꦶꦤꦴ ꦏꦠꦁ ꦲꦺꦴꦠꦶ, ꦨꦸꦠ꧀ꦠꦴꦮꦶꦤꦴ ꦥꦮꦴꦫꦶꦠꦺꦤ ꦄꦴꦱꦤꦴ ꦮꦸꦛ꧀ꦜꦶꦠꦺꦤ ꦏꦠꦁ ꦲꦺꦴꦠꦶ, ‘‘ꦄꦭꦩꦺꦠꦁ ꦱꦧ꧀ꦧꦤ꧀ꦠꦶ ꦄꦮꦸꦠ꧀ꦠꦁ ꦲꦺꦴꦠꦶ, ꦤ ꦒꦶꦭꦴꦤꦴꦠꦶꦫꦶꦠ꧀ꦠꦁ ꦲꦺꦴꦠꦶ’’ – ꦌꦠꦁ ꦄꦤꦠꦶꦫꦶꦠ꧀ꦠꦁ ꦤꦴꦩ.

ꦄꦠꦶꦫꦶꦠ꧀ꦠꦁ ꦤꦴꦩ ꦏꦥ꧀ꦥꦶꦪꦏꦠꦁ ꦲꦺꦴꦠꦶ, ꦥꦛꦶꦒ꧀ꦒꦲꦶꦠꦏꦠꦁ ꦲꦺꦴꦠꦶ, ꦈꦕ꧀ꦕꦴꦫꦶꦠꦏꦠꦁ ꦲꦺꦴꦠꦶ, ꦲꦠ꧀ꦡꦥꦴꦱꦺ ꦏꦠꦁ ꦲꦺꦴꦠꦶ, ꦨꦸꦠ꧀ꦠꦴꦮꦶꦤꦴ ꦏꦠꦁ ꦲꦺꦴꦠꦶ, ꦨꦸꦠ꧀ꦠꦴꦮꦶꦤꦴ ꦥꦮꦴꦫꦶꦠꦺꦤ ꦄꦴꦱꦤꦴ ꦄꦮꦸꦛ꧀ꦜꦶꦠꦺꦤ ꦏꦠꦁ ꦲꦺꦴꦠꦶ, ‘‘ꦄꦭꦩꦺꦠꦁ ꦱꦧ꧀ꦧ’’ꦤ꧀ꦠꦶ ꦮꦸꦠ꧀ꦠꦁ ꦲꦺꦴꦠꦶ, ꦒꦶꦭꦴꦤꦴꦠꦶꦫꦶꦠ꧀ꦠꦁ ꦲꦺꦴꦠꦶ – ꦌꦠꦁ ꦄꦠꦶꦫꦶꦠ꧀ꦠꦁ ꦤꦴꦩ.

ꦑꦴꦢꦤꦷꦪꦁ ꦤꦴꦩ ꦥꦚ꧀ꦕ ꦨꦺꦴꦗꦤꦴꦤꦶ – ꦪꦴꦩꦏꦴꦭꦶꦏꦁ ꦱꦠ꧀ꦠꦴꦲꦏꦴꦭꦶꦏꦁ ꦪꦴꦮꦗꦷꦮꦶꦏꦁ ꦜꦥꦺꦠ꧀ꦮꦴ ꦄꦮꦱꦺꦱꦁ ꦑꦴꦢꦤꦷꦪꦁ ꦤꦴꦩ.

ꦨꦺꦴꦗꦤꦷꦪꦁ ꦤꦴꦩ ꦥꦚ꧀ꦕ ꦨꦺꦴꦗꦤꦴꦤꦶ – ꦎꦢꦤꦺꦴ, ꦏꦸꦩ꧀ꦩꦴꦱꦺꦴ, ꦱꦠ꧀ꦠꦸ, ꦩꦕ꧀ꦖꦺꦴ, ꦩꦁꦱꦁ.

‘‘ꦑꦴꦢꦶꦱ꧀ꦱꦴꦩꦶ ꦨꦸꦚ꧀ꦗꦶꦱ꧀ꦱꦴꦩꦷ’’ꦠꦶ ꦥꦛꦶꦒ꧀ꦒꦟ꧀ꦲꦴꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ ꦄꦗ꧀ꦙꦺꦴꦲꦴꦫꦺ ꦄꦗ꧀ꦙꦺꦴꦲꦴꦫꦺ ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

꧒꧔꧐. ꦄꦤꦠꦶꦫꦶꦠ꧀ꦠꦺ ꦄꦤꦠꦶꦫꦶꦠ꧀ꦠꦱꦚ꧀ꦚꦷ ꦑꦴꦢꦤꦷꦪꦁ ꦮꦴ ꦨꦺꦴꦗꦤꦷꦪꦁ ꦮꦴ ꦑꦴꦢꦠꦶ ꦮꦴ ꦨꦸꦚ꧀ꦗꦠꦶ ꦮꦴ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦄꦤꦠꦶꦫꦶꦠ꧀ꦠꦺ ꦮꦺꦩꦠꦶꦏꦺꦴ ꦑꦴꦢꦤꦷꦪꦁ ꦮꦴ ꦨꦺꦴꦗꦤꦷꦪꦁ ꦮꦴ ꦑꦴꦢꦠꦶ ꦮꦴ ꦨꦸꦚ꧀ꦗꦠꦶ ꦮꦴ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ. ꦄꦤꦠꦶꦫꦶꦠ꧀ꦠꦺ ꦄꦠꦶꦫꦶꦠ꧀ꦠꦱꦚ꧀ꦚꦷ ꦑꦴꦢꦤꦷꦪꦁ ꦮꦴ ꦨꦺꦴꦗꦤꦷꦪꦁ ꦮꦴ ꦑꦴꦢꦠꦶ ꦮꦴ ꦨꦸꦚ꧀ꦗꦠꦶ ꦮꦴ, ꦄꦴꦥꦠ꧀ꦠꦶ ꦥꦴꦕꦶꦠ꧀ꦠꦶꦪꦱ꧀ꦱ.

ꦪꦴꦩꦏꦴꦭꦶꦏꦁ ꦱꦠ꧀ꦠꦴꦲꦏꦴꦭꦶꦏꦁ ꦪꦴꦮꦗꦷꦮꦶꦏꦁ ꦄꦴꦲꦴꦫꦠ꧀ꦡꦴꦪ ꦥꦛꦶꦒ꧀ꦒꦟ꧀ꦲꦴꦠꦶ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦗ꧀ꦙꦺꦴꦲꦴꦫꦺ ꦄꦗ꧀ꦙꦺꦴꦲꦴꦫꦺ ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦠꦶꦫꦶꦠ꧀ꦠꦺ ꦄꦤꦠꦶꦫꦶꦠ꧀ꦠꦱꦚ꧀ꦚꦷ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦠꦶꦫꦶꦠ꧀ꦠꦺ ꦮꦺꦩꦠꦶꦏꦺꦴ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ. ꦄꦠꦶꦫꦶꦠ꧀ꦠꦺ ꦄꦠꦶꦫꦶꦠ꧀ꦠꦱꦚ꧀ꦚꦷ, ꦄꦤꦴꦥꦠ꧀ꦠꦶ.

꧒꧔꧑. ꦄꦤꦴꦥꦠ꧀ꦠꦶ ꦄꦠꦶꦫꦶꦠ꧀ꦠꦁ ꦏꦴꦫꦴꦥꦺꦠ꧀ꦮꦴ ꦨꦸꦚ꧀ꦗꦠꦶ, ‘‘ꦄꦠꦶꦫꦶꦠ꧀ꦠꦁ ꦏꦴꦫꦴꦥꦺꦠ꧀ꦮꦴ ꦨꦸꦚ꧀ꦗꦶꦱ꧀ꦱꦴꦩꦷ’’ꦠꦶ ꦥꦛꦶꦒ꧀ꦒꦟ꧀ꦲꦴꦠꦶ, ꦄꦚ꧀ꦚꦱ꧀ꦱꦠ꧀ꦡꦴꦪ ꦲꦫꦤ꧀ꦠꦺꦴ ꦒꦕ꧀ꦖꦠꦶ, ꦒꦶꦭꦴꦤꦱ꧀ꦱ ꦱꦺꦱꦏꦁ ꦨꦸꦚ꧀ꦗꦠꦶ, ꦪꦴꦩꦏꦴꦭꦶꦏꦁ ꦱꦠ꧀ꦠꦴꦲꦏꦴꦭꦶꦏꦁ ꦪꦴꦮꦗꦷꦮꦶꦏꦁ ꦱꦠꦶ ꦥꦕ꧀ꦕꦪꦺ ꦥꦫꦶꦨꦸꦚ꧀ꦗꦠꦶ, ꦈꦩ꧀ꦩꦠ꧀ꦠꦏꦱ꧀ꦱ, ꦄꦴꦢꦶꦏꦩ꧀ꦩꦶꦏꦱ꧀ꦱꦴꦠꦶ.

ꦥꦜꦩꦥꦮꦴꦫꦟꦴꦱꦶꦏ꧀ꦑꦴꦥꦢꦁ ꦤꦶꦛ꧀ꦜꦶꦠꦁ ꦥꦚ꧀ꦕꦩꦁ.