꧒꧒꧔. ꦒꦶꦭꦴꦤꦮꦠ꧀ꦡꦸꦏꦡꦴ

꧓꧖꧕. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦚ꧀ꦚꦠꦫꦱ꧀ꦱ ꦨꦶꦏ꧀ꦑꦸꦤꦺꦴ ꦏꦸꦕ꧀ꦖꦶꦮꦶꦏꦴꦫꦴꦧꦴꦣꦺꦴ ꦲꦺꦴꦠꦶ. ꦱꦺꦴ ꦱꦏꦺ ꦩꦸꦠ꧀ꦠꦏꦫꦷꦱꦺ ꦥꦭꦶꦥꦤ꧀ꦤꦺꦴ ꦱꦺꦠꦶ. ꦄꦡ ꦑꦺꦴ ꦨꦒꦮꦴ ꦄꦴꦪꦱ꧀ꦩꦠꦴ ꦄꦴꦤꦤ꧀ꦢꦺꦤ ꦥꦕ꧀ꦖꦴꦱꦩꦟꦺꦤ ꦱꦺꦤꦴꦱꦤꦕꦴꦫꦶꦏꦁ ꦄꦴꦲꦶꦟ꧀ꦝꦤ꧀ꦠꦺꦴ ꦪꦺꦤ ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦮꦶꦲꦴꦫꦺꦴ ꦠꦺꦤꦸꦥꦱꦔ꧀ꦏꦩꦶ. ꦄꦢ꧀ꦢꦱꦴ ꦑꦺꦴ ꦨꦒꦮꦴ ꦠꦁ ꦨꦶꦏ꧀ꦑꦸꦁ ꦱꦏꦺ ꦩꦸꦠ꧀ꦠꦏꦫꦷꦱꦺ ꦥꦭꦶꦥꦤ꧀ꦤꦁ ꦱꦪꦩꦴꦤꦁ, ꦢꦶꦱ꧀ꦮꦴꦤ ꦪꦺꦤ ꦱꦺꦴ ꦨꦶꦏ꧀ꦑꦸ ꦠꦺꦤꦸꦥꦱꦔ꧀ꦏꦩꦶ, ꦈꦥꦱꦔ꧀ꦏꦩꦶꦠ꧀ꦮꦴ ꦠꦁ ꦨꦶꦏ꧀ꦑꦸꦁ ꦌꦠꦢꦮꦺꦴꦕ – ‘‘ꦏꦶꦁ ꦠꦺ, ꦨꦶꦏ꧀ꦑꦸ, ꦄꦴꦧꦴꦣꦺꦴ’’ꦠꦶ? ‘‘ꦏꦸꦕ꧀ꦖꦶꦮꦶꦏꦴꦫꦺꦴ ꦩꦺ, ꦨꦒꦮꦴ’’ꦠꦶ. ‘‘ꦄꦠ꧀ꦡꦶ ꦥꦤ ꦠꦺ, ꦨꦶꦏ꧀ꦑꦸ, ꦈꦥꦛ꧀ꦜꦴꦏꦺꦴ’’ꦠꦶ? ‘‘ꦤꦠ꧀ꦡꦶ, ꦨꦒꦮꦴ’’ꦠꦶ. ‘‘ꦏꦶꦱ꧀ꦱ ꦠꦁ ꦨꦶꦏ꧀ꦑꦹ ꦤ ꦈꦥꦛ꧀ꦜꦺꦤ꧀ꦠꦷ’’ꦠꦶ? ‘‘ꦄꦲꦁ ꦑꦺꦴ, ꦨꦤ꧀ꦠꦺ, ꦨꦶꦏ꧀ꦑꦹꦤꦁ ꦄꦏꦴꦫꦏꦺꦴ; ꦠꦺꦤ ꦩꦁ ꦨꦶꦏ꧀ꦑꦹ ꦤ ꦈꦥꦛ꧀ꦜꦺꦤ꧀ꦠꦷ’’ꦠꦶ. ꦄꦡ ꦑꦺꦴ ꦨꦒꦮꦴ ꦄꦴꦪꦱ꧀ꦩꦤ꧀ꦠꦁ ꦄꦴꦤꦤ꧀ꦢꦁ ꦄꦴꦩꦤ꧀ꦠꦺꦱꦶ – ‘‘ꦒꦕ꧀ꦖꦴꦤꦤ꧀ꦢ, ꦈꦢꦏꦁ ꦄꦴꦲꦫ, ꦆꦩꦁ ꦨꦶꦏ꧀ꦑꦸꦁ ꦤꦲꦴꦥꦺꦱ꧀ꦱꦴꦩꦴ’’ꦠꦶ. ‘‘ꦌꦮꦁ, ꦨꦤ꧀ꦠꦺ’’ꦠꦶ ꦑꦺꦴ ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦨꦒꦮꦠꦺꦴ ꦥꦛꦶꦱ꧀ꦱꦸꦟꦶꦠ꧀ꦮꦴ ꦈꦢꦏꦁ ꦄꦴꦲꦫꦶ. ꦨꦒꦮꦴ ꦈꦢꦏꦁ ꦄꦴꦱꦶꦚ꧀ꦕꦶ. ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦥꦫꦶꦣꦺꦴꦮꦶ. ꦨꦒꦮꦴ ꦱꦷꦱꦠꦺꦴ ꦄꦒ꧀ꦒꦲꦺꦱꦶ. ꦄꦴꦪꦱ꧀ꦩꦴ ꦄꦴꦤꦤ꧀ꦢꦺꦴ ꦥꦴꦢꦠꦺꦴ ꦈꦕ꧀ꦕꦴꦫꦺꦠ꧀ꦮꦴ ꦩꦚ꧀ꦕꦏꦺ ꦤꦶꦥꦴꦠꦺꦱꦸꦁ. ꦄꦡ ꦑꦺꦴ ꦨꦒꦮꦴ ꦌꦠꦱ꧀ꦩꦶꦁ ꦤꦶꦢꦴꦤꦺ ꦌꦠꦱ꧀ꦩꦶꦁ ꦥꦏꦫꦟꦺ ꦨꦶꦏ꧀ꦑꦸꦱꦔ꧀ꦓꦁ ꦱꦤ꧀ꦤꦶꦥꦴꦠꦴꦥꦺꦠ꧀ꦮꦴ ꦨꦶꦏ꧀ꦑꦹ ꦥꦛꦶꦥꦸꦕ꧀ꦖꦶ – ‘‘ꦄꦠ꧀ꦡꦶ, ꦨꦶꦏ꧀ꦑꦮꦺ, ꦄꦩꦸꦏꦱ꧀ꦩꦶꦁ ꦮꦶꦲꦴꦫꦺ ꦨꦶꦏ꧀ꦑꦸ ꦒꦶꦭꦴꦤꦺꦴ’’ꦠꦶ? ‘‘ꦄꦠ꧀ꦡꦶ, ꦨꦒꦮꦴ’’ꦠꦶ. ‘‘ꦏꦶꦁ ꦠꦱ꧀ꦱ, ꦨꦶꦏ꧀ꦑꦮꦺ, ꦨꦶꦏ꧀ꦑꦸꦤꦺꦴ ꦄꦴꦧꦴꦣꦺꦴ’’ꦠꦶ? ‘‘ꦠꦱ꧀ꦱ, ꦨꦤ꧀ꦠꦺ, ꦄꦴꦪꦱ꧀ꦩꦠꦺꦴ ꦏꦸꦕ꧀ꦖꦶꦮꦶꦏꦴꦫꦴꦧꦴꦣꦺꦴ’’ꦠꦶ. ‘‘ꦄꦠ꧀ꦡꦶ ꦥꦤ, ꦨꦶꦏ꧀ꦑꦮꦺ, ꦠꦱ꧀ꦱ ꦨꦶꦏ꧀ꦑꦸꦤꦺꦴ ꦈꦥꦛ꧀ꦜꦴꦏꦺꦴ’’ꦠꦶ? ‘‘ꦤꦠ꧀ꦡꦶ, ꦨꦒꦮꦴ’’ꦠꦶ. ‘‘ꦏꦶꦱ꧀ꦱ ꦠꦁ ꦨꦶꦏ꧀ꦑꦹ ꦤ ꦈꦥꦛ꧀ꦜꦺꦤ꧀ꦠꦷ’’ꦠꦶ? ‘‘ꦌꦱꦺꦴ, ꦨꦤ꧀ꦠꦺ, ꦨꦶꦏ꧀ꦑꦸ ꦨꦶꦏ꧀ꦑꦹꦤꦁ ꦄꦏꦴꦫꦏꦺꦴ; ꦠꦺꦤ ꦠꦁ ꦨꦶꦏ꧀ꦑꦹ ꦤ ꦈꦥꦛ꧀ꦜꦺꦤ꧀ꦠꦷ’’ꦠꦶ. ‘‘ꦤꦠ꧀ꦡꦶ ꦮꦺꦴ, ꦨꦶꦏ꧀ꦑꦮꦺ, ꦩꦴꦠꦴ, ꦤꦠ꧀ꦡꦶ ꦥꦶꦠꦴ, ꦪꦺ ꦮꦺꦴ ꦈꦥꦛ꧀ꦜꦲꦺꦪ꧀ꦪꦸꦁ. ꦠꦸꦩ꧀ꦲꦺ ꦕꦺ, ꦨꦶꦏ꧀ꦑꦮꦺ, ꦄꦚ꧀ꦚꦩꦚ꧀ꦚꦁ ꦤ ꦈꦥꦛ꧀ꦜꦲꦶꦱ꧀ꦱꦡ, ꦄꦡ ꦏꦺꦴ ꦕꦫꦲꦶ ꦈꦥꦛ꧀ꦜꦲꦶꦱ꧀ꦱꦠꦶ? ꦪꦺꦴ, ꦨꦶꦏ꧀ꦑꦮꦺ, ꦩꦁ ꦈꦥꦛ꧀ꦜꦲꦺꦪ꧀ꦪ ꦱꦺꦴ ꦒꦶꦭꦴꦤꦁ ꦈꦥꦛ꧀ꦜꦲꦺꦪ꧀ꦪ. ꦱꦕꦺ ꦈꦥꦗ꧀ꦙꦴꦪꦺꦴ ꦲꦺꦴꦠꦶ, ꦈꦥꦗ꧀ꦙꦴꦪꦺꦤ ꦪꦴꦮꦗꦷꦮꦁ ꦈꦥꦛ꧀ꦜꦴꦠꦧ꧀ꦧꦺꦴ; ꦮꦸꦛ꧀ꦜꦴꦤꦩꦱ꧀ꦱ ꦄꦴꦒꦩꦺꦠꦧ꧀ꦧꦁ. ꦱꦕꦺ ꦄꦴꦕꦫꦶꦪꦺꦴ ꦲꦺꦴꦠꦶ, ꦄꦴꦕꦫꦶꦪꦺꦤ ꦪꦴꦮꦗꦷꦮꦁ ꦈꦥꦛ꧀ꦜꦴꦠꦧ꧀ꦧꦺꦴ; ꦮꦸꦛ꧀ꦜꦴꦤꦩꦱ꧀ꦱ ꦄꦴꦒꦩꦺꦠꦧ꧀ꦧꦁ. ꦱꦕꦺ ꦱꦢ꧀ꦣꦶꦮꦶꦲꦴꦫꦶꦏꦺꦴ ꦲꦺꦴꦠꦶ, ꦱꦢ꧀ꦣꦶꦮꦶꦲꦴꦫꦶꦏꦺꦤ ꦪꦴꦮꦗꦷꦮꦁ ꦈꦥꦛ꧀ꦜꦴꦠꦧ꧀ꦧꦺꦴ; ꦮꦸꦛ꧀ꦜꦴꦤꦩꦱ꧀ꦱ ꦄꦴꦒꦩꦺꦠꦧ꧀ꦧꦁ. ꦱꦕꦺ ꦄꦤ꧀ꦠꦺꦮꦴꦱꦶꦏꦺꦴ ꦲꦺꦴꦠꦶ, ꦄꦤ꧀ꦠꦺꦮꦴꦱꦶꦏꦺꦤ ꦪꦴꦮꦗꦷꦮꦁ ꦈꦥꦛ꧀ꦜꦴꦠꦧ꧀ꦧꦺꦴ; ꦮꦸꦛ꧀ꦜꦴꦤꦩꦱ꧀ꦱ ꦄꦴꦒꦩꦺꦠꦧ꧀ꦧꦁ. ꦱꦕꦺ ꦱꦩꦴꦤꦸꦥꦗ꧀ꦙꦴꦪꦏꦺꦴ ꦲꦺꦴꦠꦶ, ꦱꦩꦴꦤꦸꦥꦗ꧀ꦙꦴꦪꦏꦺꦤ ꦪꦴꦮꦗꦷꦮꦁ ꦈꦥꦛ꧀ꦜꦴꦠꦧ꧀ꦧꦺꦴ; ꦮꦸꦛ꧀ꦜꦴꦤꦩꦱ꧀ꦱ ꦄꦴꦒꦩꦺꦠꦧ꧀ꦧꦁ. ꦱꦕꦺ ꦱꦩꦴꦤꦴꦕꦫꦶꦪꦏꦺꦴ ꦲꦺꦴꦠꦶ, ꦱꦩꦴꦤꦴꦕꦫꦶꦪꦏꦺꦤ ꦪꦴꦮꦗꦷꦮꦁ ꦈꦥꦛ꧀ꦜꦴꦠꦧ꧀ꦧꦺꦴ; ꦮꦸꦛ꧀ꦜꦴꦤꦩꦱ꧀ꦱ ꦄꦴꦒꦩꦺꦠꦧ꧀ꦧꦁ. ꦱꦕꦺ ꦤ ꦲꦺꦴꦠꦶ ꦈꦥꦗ꧀ꦙꦴꦪꦺꦴ ꦮꦴ ꦄꦴꦕꦫꦶꦪꦺꦴ ꦮꦴ ꦱꦢ꧀ꦣꦶꦮꦶꦲꦴꦫꦶꦏꦺꦴ ꦮꦴ ꦄꦤ꧀ꦠꦺꦮꦴꦱꦶꦏꦺꦴ ꦮꦴ ꦱꦩꦴꦤꦸꦥꦗ꧀ꦙꦴꦪꦏꦺꦴ ꦮꦴ ꦱꦩꦴꦤꦴꦕꦫꦶꦪꦏꦺꦴ ꦮꦴ ꦱꦔ꧀ꦓꦺꦤ ꦈꦥꦛ꧀ꦜꦴꦠꦧ꧀ꦧꦺꦴ. ꦤꦺꦴ ꦕꦺ ꦈꦥꦛ꧀ꦜꦲꦺꦪ꧀ꦪ, ꦄꦴꦥꦠ꧀ꦠꦶ ꦢꦸꦏ꧀ꦏꦛꦱ꧀ꦱ’’.

꧓꧖꧖. ꦥꦚ꧀ꦕꦲꦶ, ꦨꦶꦏ꧀ꦑꦮꦺ, ꦄꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦴ ꦒꦶꦭꦴꦤꦺꦴ ꦢꦹꦥꦛ꧀ꦜꦺꦴ ꦲꦺꦴꦠꦶ – ꦄꦱꦥ꧀ꦥꦴꦪꦏꦴꦫꦷ ꦲꦺꦴꦠꦶ, ꦱꦥ꧀ꦥꦴꦪꦺ ꦩꦠ꧀ꦠꦁ ꦤ ꦗꦴꦤꦴꦠꦶ, ꦨꦺꦱꦗ꧀ꦗꦁ ꦤ ꦥꦛꦶꦱꦺꦮꦶꦠꦴ ꦲꦺꦴꦠꦶ, ꦄꦠ꧀ꦡꦏꦴꦩꦱ꧀ꦱ ꦒꦶꦭꦴꦤꦸꦥꦛ꧀ꦜꦴꦏꦱ꧀ꦱ ꦪꦡꦴꦨꦹꦠꦁ ꦄꦴꦧꦴꦣꦁ ꦤꦴꦮꦶꦏꦠ꧀ꦠꦴ ꦲꦺꦴꦠꦶ ‘ꦄꦨꦶꦏ꧀ꦏꦩꦤ꧀ꦠꦁ ꦮꦴ ꦄꦨꦶꦏ꧀ꦏꦩꦠꦷꦠꦶ, ꦥꦛꦶꦏ꧀ꦏꦩꦤ꧀ꦠꦁ ꦮꦴ ꦥꦛꦶꦏ꧀ꦏꦩꦠꦷꦠꦶ, ꦜꦶꦠꦁ ꦮꦴ ꦜꦶꦠꦺꦴ’ꦠꦶ, ꦈꦥ꧀ꦥꦤ꧀ꦤꦴꦤꦁ ꦱꦴꦫꦷꦫꦶꦏꦴꦤꦁ ꦮꦺꦢꦤꦴꦤꦁ ꦢꦸꦏ꧀ꦑꦴꦤꦁ ꦠꦶꦧ꧀ꦧꦴꦤꦁ ꦑꦫꦴꦤꦁ ꦏꦛꦸꦏꦴꦤꦁ ꦄꦱꦴꦠꦴꦤꦁ ꦄꦩꦤꦴꦥꦴꦤꦁ ꦥꦴꦟꦲꦫꦴꦤꦁ ꦄꦤꦣꦶꦮꦴꦱꦏꦗꦴꦠꦶꦏꦺꦴ ꦲꦺꦴꦠꦶ. ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦲꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦴ ꦒꦶꦭꦴꦤꦺꦴ ꦢꦹꦥꦛ꧀ꦜꦺꦴ ꦲꦺꦴꦠꦶ.

ꦥꦚ꧀ꦕꦲꦶ, ꦨꦶꦏ꧀ꦑꦮꦺ, ꦄꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦴ ꦒꦶꦭꦴꦤꦺꦴ ꦱꦹꦥꦛ꧀ꦜꦺꦴ ꦲꦺꦴꦠꦶ – ꦱꦥ꧀ꦥꦴꦪꦏꦴꦫꦷ ꦲꦺꦴꦠꦶ, ꦱꦥ꧀ꦥꦴꦪꦺ ꦩꦠ꧀ꦠꦁ ꦗꦴꦤꦴꦠꦶ, ꦨꦺꦱꦗ꧀ꦗꦁ ꦥꦛꦶꦱꦺꦮꦶꦠꦴ ꦲꦺꦴꦠꦶ, ꦄꦠ꧀ꦡꦏꦴꦩꦱ꧀ꦱ ꦒꦶꦭꦴꦤꦸꦥꦛ꧀ꦜꦴꦏꦱ꧀ꦱ ꦪꦡꦴꦨꦹꦠꦁ ꦄꦴꦧꦴꦣꦁ ꦄꦴꦮꦶꦏꦠ꧀ꦠꦴ ꦲꦺꦴꦠꦶ ‘ꦄꦨꦶꦏ꧀ꦏꦩꦤ꧀ꦠꦁ ꦮꦴ ꦄꦨꦶꦏ꧀ꦏꦩꦠꦷꦠꦶ, ꦥꦛꦶꦏ꧀ꦏꦩꦤ꧀ꦠꦁ ꦮꦴ ꦥꦛꦶꦏ꧀ꦏꦩꦠꦷꦠꦶ, ꦜꦶꦠꦁ ꦮꦴ ꦜꦶꦠꦺꦴ’ꦠꦶ, ꦈꦥ꧀ꦥꦤ꧀ꦤꦴꦤꦁ ꦱꦴꦫꦷꦫꦶꦏꦴꦤꦁ ꦮꦺꦢꦤꦴꦤꦁ ꦢꦸꦏ꧀ꦑꦴꦤꦁ ꦠꦶꦧ꧀ꦧꦴꦤꦁ ꦑꦫꦴꦤꦁ ꦏꦛꦸꦏꦴꦤꦁ ꦄꦱꦴꦠꦴꦤꦁ ꦄꦩꦤꦴꦥꦴꦤꦁ ꦥꦴꦟꦲꦫꦴꦤꦁ ꦄꦣꦶꦮꦴꦱꦏꦗꦴꦠꦶꦏꦺꦴ ꦲꦺꦴꦠꦶ. ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦲꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦴ ꦒꦶꦭꦴꦤꦺꦴ ꦱꦹꦥꦛ꧀ꦜꦺꦴ ꦲꦺꦴꦠꦶ.

ꦥꦚ꧀ꦕꦲꦶ, ꦨꦶꦏ꧀ꦑꦮꦺ, ꦄꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦴ ꦒꦶꦭꦴꦤꦸꦥꦛ꧀ꦜꦴꦏꦺꦴ ꦤꦴꦭꦁ ꦒꦶꦭꦴꦤꦁ ꦈꦥꦛ꧀ꦜꦴꦠꦸꦁ – ꦤ ꦥꦛꦶꦧꦭꦺꦴ ꦲꦺꦴꦠꦶ ꦨꦺꦱꦗ꧀ꦗꦁ ꦱꦁꦮꦶꦣꦴꦠꦸꦁ, ꦱꦥ꧀ꦥꦴꦪꦴꦱꦥ꧀ꦥꦴꦪꦁ ꦤ ꦗꦴꦤꦴꦠꦶ, ꦄꦱꦥ꧀ꦥꦴꦪꦁ ꦈꦥꦤꦴꦩꦺꦠꦶ ꦱꦥ꧀ꦥꦴꦪꦁ ꦄꦥꦤꦴꦩꦺꦠꦶ, ꦄꦴꦩꦶꦱꦤ꧀ꦠꦫꦺꦴ ꦒꦶꦭꦴꦤꦁ ꦈꦥꦛ꧀ꦜꦴꦠꦶ ꦤꦺꦴ ꦩꦺꦠ꧀ꦠꦕꦶꦠ꧀ꦠꦺꦴ, ꦗꦺꦒꦸꦕ꧀ꦖꦷ ꦲꦺꦴꦠꦶ ꦈꦕ꧀ꦕꦴꦫꦁ ꦮꦴ ꦥꦱ꧀ꦱꦴꦮꦁ ꦮꦴ ꦑꦺꦭ꦳ꦁ ꦮꦴ ꦮꦤ꧀ꦠꦁ ꦮꦴ ꦤꦷꦲꦴꦠꦸꦁ, ꦤ ꦥꦛꦶꦧꦭꦺꦴ ꦲꦺꦴꦠꦶ ꦒꦶꦭꦴꦤꦁ ꦏꦴꦭꦺꦤ ꦏꦴꦭꦁ ꦣꦩ꧀ꦩꦶꦪꦴ ꦏꦡꦴꦪ ꦱꦤ꧀ꦢꦱ꧀ꦱꦺꦠꦸꦁ ꦱꦩꦴꦢꦥꦺꦠꦸꦁ ꦱꦩꦸꦠ꧀ꦠꦺꦗꦺꦠꦸꦁ ꦱꦩ꧀ꦥꦲꦁꦱꦺꦠꦸꦁ. ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦲꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦴ ꦒꦶꦭꦴꦤꦸꦥꦛ꧀ꦜꦴꦏꦺꦴ ꦤꦴꦭꦁ ꦒꦶꦭꦴꦤꦁ ꦈꦥꦛ꧀ꦜꦴꦠꦸꦁ.

ꦥꦚ꧀ꦕꦲꦶ, ꦨꦶꦏ꧀ꦑꦮꦺ, ꦄꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦴ ꦒꦶꦭꦴꦤꦸꦥꦛ꧀ꦜꦴꦏꦺꦴ ꦄꦭꦁ ꦒꦶꦭꦴꦤꦁ ꦈꦥꦛ꧀ꦜꦴꦠꦸꦁ – ꦥꦛꦶꦧꦭꦺꦴ ꦲꦺꦴꦠꦶ ꦨꦺꦱꦗ꧀ꦗꦁ ꦱꦁꦮꦶꦣꦴꦠꦸꦁ, ꦱꦥ꧀ꦥꦴꦪꦴꦱꦥ꧀ꦥꦴꦪꦁ ꦗꦴꦤꦴꦠꦶ, ꦄꦱꦥ꧀ꦥꦴꦪꦁ ꦄꦥꦤꦴꦩꦺꦠꦶ ꦱꦥ꧀ꦥꦴꦪꦁ ꦈꦥꦤꦴꦩꦺꦠꦶ, ꦩꦺꦠ꧀ꦠꦕꦶꦠ꧀ꦠꦺꦴ ꦒꦶꦭꦴꦤꦁ ꦈꦥꦛ꧀ꦜꦴꦠꦶ ꦤꦺꦴ ꦄꦴꦩꦶꦱꦤ꧀ꦠꦫꦺꦴ, ꦄꦗꦺꦒꦸꦕ꧀ꦖꦷ ꦲꦺꦴꦠꦶ ꦈꦕ꧀ꦕꦴꦫꦁ ꦮꦴ ꦥꦱ꧀ꦱꦴꦮꦁ ꦮꦴ ꦑꦺꦭ꦳ꦁ ꦮꦴ ꦮꦤ꧀ꦠꦁ ꦮꦴ ꦤꦷꦲꦴꦠꦸꦁ, ꦥꦛꦶꦧꦭꦺꦴ ꦲꦺꦴꦠꦶ ꦒꦶꦭꦴꦤꦁ ꦏꦴꦭꦺꦤ ꦏꦴꦭꦁ ꦣꦩ꧀ꦩꦶꦪꦴ ꦏꦡꦴꦪ ꦱꦤ꧀ꦢꦱ꧀ꦱꦺꦠꦸꦁ ꦱꦩꦴꦢꦥꦺꦠꦸꦁ ꦱꦩꦸꦠ꧀ꦠꦺꦗꦺꦠꦸꦁ ꦱꦩ꧀ꦥꦲꦁꦱꦺꦠꦸꦁ. ꦆꦩꦺꦲꦶ ꦑꦺꦴ, ꦨꦶꦏ꧀ꦑꦮꦺ, ꦥꦚ꧀ꦕꦲꦔ꧀ꦒꦺꦲꦶ ꦱꦩꦤ꧀ꦤꦴꦒꦠꦺꦴ ꦒꦶꦭꦴꦤꦸꦥꦛ꧀ꦜꦴꦏꦺꦴ ꦄꦭꦁ ꦒꦶꦭꦴꦤꦁ ꦈꦥꦛ꧀ꦜꦴꦠꦸꦤ꧀ꦠꦶ.

ꦒꦶꦭꦴꦤꦮꦠ꧀ꦡꦸꦏꦡꦴ ꦤꦶꦛ꧀ꦜꦶꦠꦴ.