꧒꧑꧗. ꦠꦶꦕꦷꦮꦫꦴꦤꦸꦗꦴꦤꦤꦴ

꧓꧔꧖. ꦄꦡ ꦑꦺꦴ ꦨꦒꦮꦴ ꦫꦴꦗꦒꦲꦺ ꦪꦡꦴꦨꦶꦫꦤ꧀ꦠꦁ ꦮꦶꦲꦫꦶꦠ꧀ꦮꦴ ꦪꦺꦤ ꦮꦺꦱꦴꦭꦷ ꦠꦺꦤ ꦕꦴꦫꦶꦏꦁ ꦥꦏ꧀ꦏꦴꦩꦶ. ꦄꦢ꧀ꦢꦱ ꦑꦺꦴ ꦨꦒꦮꦴ ꦄꦤ꧀ꦠꦫꦴ ꦕ ꦫꦴꦗꦒꦲꦁ ꦄꦤ꧀ꦠꦫꦴ ꦕ ꦮꦺꦱꦴꦭꦶꦁ ꦄꦢ꧀ꦣꦴꦤꦩꦒ꧀ꦒꦥ꧀ꦥꦛꦶꦥꦤ꧀ꦤꦺꦴ ꦱꦩ꧀ꦧꦲꦸꦭꦺ ꦨꦶꦏ꧀ꦑꦹ ꦕꦷꦮꦫꦺꦲꦶ ꦈꦧ꧀ꦨꦟ꧀ꦝꦶꦠꦺ [ꦈꦧ꧀ꦨꦟ꧀ꦝꦷꦏꦠꦺ (ꦱ꧀ꦪꦴ.)] ꦱꦷꦱꦺꦥꦶ ꦕꦷꦮꦫꦨꦶꦱꦶꦁ ꦏꦫꦶꦠ꧀ꦮꦴ ꦑꦤ꧀ꦣꦺꦥꦶ ꦕꦷꦮꦫꦨꦶꦱꦶꦁ ꦏꦫꦶꦠ꧀ꦮꦴ ꦏꦛꦶꦪꦴꦥꦶ ꦕꦷꦮꦫꦨꦶꦱꦶꦁ ꦏꦫꦶꦠ꧀ꦮꦴ ꦄꦴꦒꦕ꧀ꦖꦤ꧀ꦠꦺ, ꦢꦶꦱ꧀ꦮꦴꦤ ꦨꦒꦮꦠꦺꦴ ꦌꦠꦢꦲꦺꦴꦱꦶ – ‘‘ꦄꦠꦶꦭꦲꦸꦁ ꦑꦺꦴ ꦆꦩꦺ ꦩꦺꦴꦓꦥꦸꦫꦶꦱꦴ ꦕꦷꦮꦫꦺ ꦧꦴꦲꦸꦭ꧀ꦭꦴꦪ ꦄꦴꦮꦠ꧀ꦠꦴ. ꦪꦁꦤꦹꦤꦴꦲꦁ ꦨꦶꦏ꧀ꦑꦹꦤꦁ ꦕꦷꦮꦫꦺ ꦱꦷꦩꦁ ꦧꦤ꧀ꦣꦺꦪ꧀ꦪꦁ, ꦩꦫꦶꦪꦴꦢꦁ ꦜꦥꦺꦪ꧀ꦪ’’ꦤ꧀ꦠꦶ. ꦄꦡ ꦑꦺꦴ ꦨꦒꦮꦴ ꦄꦤꦸꦥꦸꦧ꧀ꦧꦺꦤ ꦕꦴꦫꦶꦏꦁ ꦕꦫꦩꦴꦤꦺꦴ ꦪꦺꦤ ꦮꦺꦱꦴꦭꦷ ꦠꦢꦮꦱꦫꦶ. ꦠꦠ꧀ꦫ ꦱꦸꦢꦁ ꦨꦒꦮꦴ ꦮꦺꦱꦴꦭꦶꦪꦁ ꦮꦶꦲꦫꦠꦶ ꦒꦺꦴꦠꦩꦏꦺ ꦕꦺꦠꦶꦪꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦒꦮꦴ ꦱꦷꦠꦴꦱꦸ ꦲꦺꦩꦤ꧀ꦠꦶꦏꦴꦱꦸ ꦫꦠ꧀ꦠꦷꦱꦸ ꦄꦤ꧀ꦠꦫꦛ꧀ꦜꦏꦴꦱꦸ ꦲꦶꦩꦥꦴꦠꦱꦩꦪꦺ ꦫꦠ꧀ꦠꦶꦁ ꦄꦗ꧀ꦙꦺꦴꦏꦴꦱꦺ ꦌꦏꦕꦷꦮꦫꦺꦴ ꦤꦶꦱꦷꦢꦶ. ꦤ ꦨꦒꦮꦤ꧀ꦠꦁ ꦱꦷꦠꦁ ꦄꦲꦺꦴꦱꦶ. ꦤꦶꦏ꧀ꦑꦤ꧀ꦠꦺ ꦥꦜꦩꦺ ꦪꦴꦩꦺ ꦱꦷꦠꦁ ꦨꦒꦮꦤ꧀ꦠꦁ ꦄꦲꦺꦴꦱꦶ. ꦢꦸꦠꦶꦪꦁ ꦨꦒꦮꦴ ꦕꦷꦮꦫꦁ ꦥꦴꦫꦸꦥꦶ. ꦤ ꦨꦒꦮꦤ꧀ꦠꦁ ꦱꦷꦠꦁ ꦄꦲꦺꦴꦱꦶ. ꦤꦶꦏ꧀ꦑꦤ꧀ꦠꦺ ꦩꦗ꧀ꦙꦶꦩꦺ ꦪꦴꦩꦺ ꦱꦷꦠꦁ ꦨꦒꦮꦤ꧀ꦠꦁ ꦄꦲꦺꦴꦱꦶ. ꦠꦠꦶꦪꦁ ꦨꦒꦮꦴ ꦕꦷꦮꦫꦁ ꦥꦴꦫꦸꦥꦶ. ꦤ ꦨꦒꦮꦤ꧀ꦠꦁ ꦱꦷꦠꦁ ꦄꦲꦺꦴꦱꦶ. ꦤꦶꦏ꧀ꦑꦤ꧀ꦠꦺ ꦥꦕ꧀ꦖꦶꦩꦺ ꦪꦴꦩꦺ ꦈꦢ꧀ꦣꦱ꧀ꦠꦺ ꦄꦫꦸꦟꦺ ꦤꦤ꧀ꦢꦶꦩꦸꦑꦶꦪꦴ ꦫꦠ꧀ꦠꦶꦪꦴ ꦱꦷꦠꦁ ꦨꦒꦮꦤ꧀ꦠꦁ ꦄꦲꦺꦴꦱꦶ. ꦕꦠꦸꦠ꧀ꦡꦁ ꦨꦒꦮꦴ ꦕꦷꦮꦫꦁ ꦥꦴꦫꦸꦥꦶ. ꦤ ꦨꦒꦮꦤ꧀ꦠꦁ ꦱꦷꦠꦁ ꦄꦲꦺꦴꦱꦶ. ꦄꦡ ꦑꦺꦴ ꦨꦒꦮꦠꦺꦴ ꦌꦠꦢꦲꦺꦴꦱꦶ – ‘‘ꦪꦺꦥꦶ ꦑꦺꦴ ꦠꦺ ꦏꦸꦭꦥꦸꦠ꧀ꦠꦴ ꦆꦩꦱ꧀ꦩꦶꦁ ꦣꦩ꧀ꦩꦮꦶꦤꦪꦺ ꦱꦷꦠꦴꦭꦸꦏꦴ ꦱꦷꦠꦨꦷꦫꦸꦏꦴ ꦠꦺꦥꦶ ꦱꦏ꧀ꦏꦺꦴꦤ꧀ꦠꦶ ꦠꦶꦕꦷꦮꦫꦺꦤ ꦪꦴꦥꦺꦠꦸꦁ. ꦪꦁꦤꦹꦤꦴꦲꦁ ꦨꦶꦏ꧀ꦑꦹꦤꦁ ꦕꦷꦮꦫꦺ ꦱꦷꦩꦁ ꦧꦤ꧀ꦣꦺꦪ꧀ꦪꦁ, ꦩꦫꦶꦪꦴꦢꦁ ꦜꦥꦺꦪ꧀ꦪꦁ, ꦠꦶꦕꦷꦮꦫꦁ ꦄꦤꦸꦗꦴꦤꦺꦪ꧀ꦪ’’ꦤ꧀ꦠꦶ. ꦄꦡ ꦑꦺꦴ ꦨꦒꦮꦴ ꦌꦠꦱ꧀ꦩꦶꦁ ꦤꦶꦢꦴꦤꦺ ꦌꦠꦱ꧀ꦩꦶꦁ ꦥꦏꦫꦟꦺ ꦣꦩ꧀ꦩꦶꦁ ꦏꦡꦁ ꦏꦠ꧀ꦮꦴ ꦨꦶꦏ꧀ꦑꦹ ꦄꦴꦩꦤ꧀ꦠꦺꦱꦶ – ‘‘ꦆꦣꦴꦲꦁ, ꦨꦶꦏ꧀ꦑꦮꦺ, ꦄꦤ꧀ꦠꦫꦴ ꦕ ꦫꦴꦗꦒꦲꦁ ꦄꦤ꧀ꦠꦫꦴ ꦕ ꦮꦺꦱꦴꦭꦶꦁ ꦄꦢ꧀ꦣꦴꦤꦩꦒ꧀ꦒꦥ꧀ꦥꦛꦶꦥꦤ꧀ꦤꦺꦴ ꦄꦢ꧀ꦢꦱꦁ ꦱꦩ꧀ꦧꦲꦸꦭꦺ ꦨꦶꦏ꧀ꦑꦹ ꦕꦷꦮꦫꦺꦲꦶ ꦈꦧ꧀ꦨꦟ꧀ꦝꦶꦠꦺ ꦱꦷꦱꦺꦥꦶ ꦕꦷꦮꦫꦨꦶꦱꦶꦁ ꦏꦫꦶꦠ꧀ꦮꦴ ꦑꦤ꧀ꦣꦺꦥꦶ ꦕꦷꦮꦫꦨꦶꦱꦶꦁ ꦏꦫꦶꦠ꧀ꦮꦴ ꦏꦛꦶꦪꦴꦥꦶ ꦕꦷꦮꦫꦨꦶꦱꦶꦁ ꦏꦫꦶꦠ꧀ꦮꦴ ꦄꦴꦒꦕ꧀ꦖꦤ꧀ꦠꦺ, ꦢꦶꦱ꧀ꦮꦴꦤ ꦩꦺ ꦌꦠꦢꦲꦺꦴꦱꦶ – ‘ꦄꦠꦶꦭꦲꦸꦁ ꦑꦺꦴ ꦆꦩꦺ ꦩꦺꦴꦓꦥꦸꦫꦶꦱꦴ ꦕꦷꦮꦫꦺ ꦧꦴꦲꦸꦭ꧀ꦭꦴꦪ ꦄꦴꦮꦠ꧀ꦠꦴ. ꦪꦁꦤꦹꦤꦴꦲꦁ ꦨꦶꦏ꧀ꦑꦹꦤꦁ ꦕꦷꦮꦫꦺ ꦱꦷꦩꦁ ꦧꦤ꧀ꦣꦺꦪ꧀ꦪꦁ, ꦩꦫꦶꦪꦴꦢꦁ ꦜꦥꦺꦪ꧀ꦪ’ꦤ꧀ꦠꦶ. ꦆꦣꦴꦲꦁ, ꦨꦶꦏ꧀ꦑꦮꦺ, ꦱꦷꦠꦴꦱꦸ ꦲꦺꦩꦤ꧀ꦠꦶꦏꦴꦱꦸ ꦫꦠ꧀ꦠꦷꦱꦸ ꦄꦤ꧀ꦠꦫꦛ꧀ꦜꦏꦴꦱꦸ ꦲꦶꦩꦥꦴꦠꦱꦩꦪꦺ ꦫꦠ꧀ꦠꦶꦁ ꦄꦗ꧀ꦙꦺꦴꦏꦴꦱꦺ ꦌꦏꦕꦷꦮꦫꦺꦴ ꦤꦶꦱꦷꦢꦶꦁ. ꦤ ꦩꦁ ꦱꦷꦠꦁ ꦄꦲꦺꦴꦱꦶ. ꦤꦶꦏ꧀ꦑꦤ꧀ꦠꦺ ꦥꦜꦩꦺ ꦪꦴꦩꦺ ꦱꦷꦠꦁ ꦩꦁ ꦄꦲꦺꦴꦱꦶ. ꦢꦸꦠꦶꦪꦴꦲꦁ ꦕꦷꦮꦫꦁ ꦥꦴꦫꦸꦥꦶꦁ. ꦤ ꦩꦁ ꦱꦷꦠꦁ ꦄꦲꦺꦴꦱꦶ. ꦤꦶꦏ꧀ꦑꦤ꧀ꦠꦺ ꦩꦗ꧀ꦙꦶꦩꦺ ꦪꦴꦩꦺ ꦱꦷꦠꦁ ꦩꦁ ꦄꦲꦺꦴꦱꦶ. ꦠꦠꦶꦪꦴꦲꦁ ꦕꦷꦮꦫꦁ ꦥꦴꦫꦸꦥꦶꦁ. ꦤ ꦩꦁ ꦱꦷꦠꦁ ꦄꦲꦺꦴꦱꦶ. ꦤꦶꦏ꧀ꦑꦤ꧀ꦠꦺ ꦥꦕ꧀ꦖꦶꦩꦺ ꦪꦴꦩꦺ ꦈꦢ꧀ꦣꦱ꧀ꦠꦺ ꦄꦫꦸꦟꦺ ꦤꦤ꧀ꦢꦶꦩꦸꦑꦶꦪꦴ ꦫꦠ꧀ꦠꦶꦪꦴ ꦱꦷꦠꦁ ꦩꦁ ꦄꦲꦺꦴꦱꦶ. ꦕꦠꦸꦠ꧀ꦡꦴꦲꦁ ꦕꦷꦮꦫꦁ ꦥꦴꦫꦸꦥꦶꦁ. ꦤ ꦩꦁ ꦱꦷꦠꦁ ꦄꦲꦺꦴꦱꦶ. ꦠꦱ꧀ꦱ ꦩꦪ꧀ꦲꦁ, ꦨꦶꦏ꧀ꦑꦮꦺ, ꦌꦠꦢꦲꦺꦴꦱꦶ – ‘‘ꦪꦺꦥꦶ ꦑꦺꦴ ꦠꦺ ꦏꦸꦭꦥꦸꦠ꧀ꦠꦴ ꦆꦩꦱ꧀ꦩꦶꦁ ꦣꦩ꧀ꦩꦮꦶꦤꦪꦺ ꦱꦷꦠꦴꦭꦸꦏꦴ ꦱꦷꦠꦨꦷꦫꦸꦏꦴ ꦠꦺꦥꦶ ꦱꦏ꧀ꦏꦺꦴꦤ꧀ꦠꦶ ꦠꦶꦕꦷꦮꦫꦺꦤ ꦪꦴꦥꦺꦠꦸꦁ. ꦪꦁꦤꦹꦤꦴꦲꦁ ꦨꦶꦏ꧀ꦑꦹꦤꦁ ꦕꦷꦮꦫꦺ ꦱꦷꦩꦁ ꦧꦤ꧀ꦣꦺꦪ꧀ꦪꦁ, ꦩꦫꦶꦪꦴꦢꦁ ꦜꦥꦺꦪ꧀ꦪꦁ, ꦠꦶꦕꦷꦮꦫꦁ ꦄꦤꦸꦗꦴꦤꦺꦪ꧀ꦪ’ꦤ꧀ꦠꦶ. ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦠꦶꦕꦷꦮꦫꦁ – ꦢꦶꦒꦸꦟꦁ ꦱꦔ꧀ꦓꦴꦛꦶꦁ, ꦌꦏꦕ꧀ꦕꦶꦪꦁ ꦈꦠ꧀ꦠꦫꦴꦱꦔ꧀ꦒꦁ, ꦌꦏꦕ꧀ꦕꦶꦪꦁ ꦄꦤ꧀ꦠꦫꦮꦴꦱꦏ’’ꦤ꧀ꦠꦶ.

ꦠꦶꦕꦷꦮꦫꦴꦤꦸꦗꦴꦤꦤꦴ ꦤꦶꦛ꧀ꦜꦶꦠꦴ.