꧒꧐꧗. ꦥꦗ꧀ꦗꦺꦴꦠꦫꦴꦗꦮꦠ꧀ꦡꦸ

꧓꧓꧔. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦫꦚ꧀ꦚꦺꦴ [ꦈꦗ꧀ꦗꦺꦤꦶꦪꦁ ꦫꦚ꧀ꦚꦺꦴ (ꦱ꧀ꦪꦴ.)] ꦥꦗ꧀ꦗꦺꦴꦠꦱ꧀ꦱ ꦥꦟ꧀ꦝꦸꦫꦺꦴꦒꦴꦧꦴꦣꦺꦴ ꦲꦺꦴꦠꦶ. ꦧꦲꦹ ꦩꦲꦤ꧀ꦠꦴ ꦩꦲꦤ꧀ꦠꦴ ꦢꦶꦱꦴꦥꦴꦩꦺꦴꦏ꧀ꦑꦴ ꦮꦺꦗ꧀ꦗꦴ ꦄꦴꦒꦤ꧀ꦠ꧀ꦮꦴ ꦤꦴꦱꦏ꧀ꦑꦶꦁꦱꦸ ꦄꦫꦺꦴꦒꦁ ꦏꦴꦠꦸꦁ. ꦧꦲꦸꦁ ꦲꦶꦫꦚ꧀ꦚꦁ ꦄꦴꦢꦴꦪ ꦄꦒꦩꦁꦱꦸ. ꦄꦡ ꦑꦺꦴ ꦫꦴꦗꦴ ꦥꦗ꧀ꦗꦺꦴꦠꦺꦴ ꦫꦚ꧀ꦚꦺꦴ ꦩꦴꦒꦣꦱ꧀ꦱ ꦱꦺꦤꦶꦪꦱ꧀ꦱ ꦧꦶꦩ꧀ꦧꦶꦱꦴꦫꦱ꧀ꦱ ꦱꦤ꧀ꦠꦶꦏꦺ ꦢꦹꦠꦁ ꦥꦴꦲꦺꦱꦶ – ‘‘ꦩꦪ꧀ꦲꦁ ꦑꦺꦴ ꦠꦴꦢꦶꦱꦺꦴ ꦄꦴꦧꦴꦣꦺꦴ, ꦱꦴꦣꦸ ꦢꦺꦮꦺꦴ ꦗꦷꦮꦏꦁ ꦮꦺꦗ꧀ꦗꦁ ꦄꦴꦟꦴꦥꦺꦠꦸ, ꦱꦺꦴ ꦩꦁ ꦠꦶꦏꦶꦕ꧀ꦖꦶꦱ꧀ꦱꦠꦷ’’ꦠꦶ. ꦄꦡ ꦑꦺꦴ ꦫꦴꦗꦴ ꦩꦴꦒꦣꦺꦴ ꦱꦺꦤꦶꦪꦺꦴ ꦧꦶꦩ꧀ꦧꦶꦱꦴꦫꦺꦴ ꦗꦷꦮꦏꦁ ꦏꦺꦴꦩꦴꦫꦨꦕ꧀ꦕꦁ ꦄꦴꦟꦴꦥꦺꦱꦶ – ‘‘ꦒꦕ꧀ꦖ, ꦨꦟꦺ ꦗꦷꦮꦏ; ꦈꦗ꧀ꦗꦺꦤꦶꦁ ꦒꦤ꧀ꦠ꧀ꦮꦴ ꦫꦴꦗꦴꦤꦁ ꦥꦗ꧀ꦗꦺꦴꦠꦁ ꦠꦶꦏꦶꦕ꧀ꦖꦴꦲꦷ’’ꦠꦶ. ‘‘ꦌꦮꦁ, ꦢꦺꦮꦴ’’ꦠꦶ ꦑꦺꦴ ꦗꦷꦮꦏꦺꦴ ꦏꦺꦴꦩꦴꦫꦨꦕ꧀ꦕꦺꦴ ꦫꦚ꧀ꦚꦺꦴ ꦩꦴꦒꦣꦱ꧀ꦱ ꦱꦺꦤꦶꦪꦱ꧀ꦱ ꦧꦶꦩ꧀ꦧꦶꦱꦴꦫꦱ꧀ꦱ ꦥꦛꦶꦱ꧀ꦱꦸꦠ꧀ꦮꦴ ꦈꦗ꧀ꦗꦺꦤꦶꦁ ꦒꦤ꧀ꦠ꧀ꦮꦴ ꦪꦺꦤ ꦫꦴꦗꦴ ꦥꦗ꧀ꦗꦺꦴꦠꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦫꦚ꧀ꦚꦺꦴ ꦥꦗ꧀ꦗꦺꦴꦠꦱ꧀ꦱ ꦮꦶꦏꦴꦫꦁ ꦱꦭ꧀ꦭꦏ꧀ꦑꦺꦠ꧀ꦮꦴ ꦫꦴꦗꦴꦤꦁ ꦥꦗ꧀ꦗꦺꦴꦠꦁ ꦌꦠꦢꦮꦺꦴꦕ – ‘‘ꦱꦥ꧀ꦥꦶꦁ ꦢꦺꦲꦶ [ꦆꦢꦁ ꦥꦢꦢ꧀ꦮꦪꦁ ꦱꦷ. ꦱ꧀ꦪꦴ. ꦥꦺꦴꦠ꧀ꦡꦏꦺꦱꦸ ꦤꦠ꧀ꦡꦶ], ꦱꦥ꧀ꦥꦶꦁ ꦢꦺꦮ, ꦤꦶꦥ꧀ꦥꦕꦶꦱ꧀ꦱꦴꦩꦶ. ꦠꦁ ꦢꦺꦮꦺꦴ ꦥꦶꦮꦶꦱ꧀ꦱꦠꦷ’’ꦠꦶ. ‘‘ꦄꦭꦁ, ꦨꦟꦺ ꦗꦷꦮꦏ, ꦪꦁ ꦠꦺ ꦱꦏ꧀ꦏꦴ ꦮꦶꦤꦴ ꦱꦥ꧀ꦥꦶꦤꦴ ꦄꦫꦺꦴꦒꦁ ꦏꦴꦠꦸꦁ ꦠꦁ ꦏꦫꦺꦴꦲꦶ. ꦗꦺꦒꦸꦕ꧀ꦖꦁ ꦩꦺ ꦱꦥ꧀ꦥꦶ, ꦥꦛꦶꦏꦹꦭ’’ꦤ꧀ꦠꦶ. ꦄꦡ ꦑꦺꦴ ꦗꦷꦮꦏꦱ꧀ꦱ ꦏꦺꦴꦩꦴꦫꦨꦕ꧀ꦕꦱ꧀ꦱ ꦌꦠꦢꦲꦺꦴꦱꦶ – ‘‘ꦆꦩꦱ꧀ꦱ ꦑꦺꦴ ꦫꦚ꧀ꦚꦺꦴ ꦠꦴꦢꦶꦱꦺꦴ ꦄꦴꦧꦴꦣꦺꦴ, ꦤ ꦱꦏ꧀ꦏꦴ ꦮꦶꦤꦴ ꦱꦥ꧀ꦥꦶꦤꦴ ꦄꦫꦺꦴꦒꦁ ꦏꦴꦠꦸꦁ. ꦪꦁꦤꦹꦤꦴꦲꦁ ꦱꦥ꧀ꦥꦶꦁ ꦤꦶꦥ꧀ꦥꦕꦺꦪ꧀ꦪꦁ ꦏꦱꦴꦮꦮꦟ꧀ꦟꦁ ꦏꦱꦴꦮꦒꦤ꧀ꦣꦁ ꦏꦱꦴꦮꦫꦱ’’ꦤ꧀ꦠꦶ. ꦄꦡ ꦑꦺꦴ ꦗꦷꦮꦏꦺꦴ ꦏꦺꦴꦩꦴꦫꦨꦕ꧀ꦕꦺꦴ ꦤꦴꦤꦴꦨꦺꦱꦗ꧀ꦗꦺꦲꦶ ꦱꦥ꧀ꦥꦶꦁ ꦤꦶꦥ꧀ꦥꦕꦶ ꦏꦱꦴꦮꦮꦟ꧀ꦟꦁ ꦏꦱꦴꦮꦒꦤ꧀ꦣꦁ ꦏꦱꦴꦮꦫꦱꦁ. ꦄꦡ ꦑꦺꦴ ꦗꦷꦮꦏꦱ꧀ꦱ ꦏꦺꦴꦩꦴꦫꦨꦕ꧀ꦕꦱ꧀ꦱ ꦌꦠꦢꦲꦺꦴꦱꦶ – ‘‘ꦆꦩꦱ꧀ꦱ ꦑꦺꦴ ꦫꦚ꧀ꦚꦺꦴ ꦱꦥ꧀ꦥꦶ ꦥꦷꦠꦁ ꦥꦫꦶꦟꦴꦩꦺꦤ꧀ꦠꦁ ꦈꦢ꧀ꦢꦺꦏꦁ ꦢꦱ꧀ꦱꦠꦶ. ꦕꦟ꧀ꦝꦺꦴꦪꦁ ꦫꦴꦗꦴ ꦓꦴꦠꦴꦥꦺꦪ꧀ꦪꦴꦥꦶ ꦩꦁ. ꦪꦁꦤꦹꦤꦴꦲꦁ ꦥꦛꦶꦏꦕ꧀ꦕꦺꦮ ꦄꦴꦥꦸꦕ꧀ꦖꦺꦪ꧀ꦪ’’ꦤ꧀ꦠꦶ. ꦄꦡ ꦑꦺꦴ ꦗꦷꦮꦏꦺꦴ ꦏꦺꦴꦩꦴꦫꦨꦕ꧀ꦕꦺꦴ ꦪꦺꦤ ꦫꦴꦗꦴ ꦥꦗ꧀ꦗꦺꦴꦠꦺꦴ ꦠꦺꦤꦸꦥꦱꦔ꧀ꦏꦩꦶ, ꦈꦥꦱꦔ꧀ꦏꦩꦶꦠ꧀ꦮꦴ ꦫꦴꦗꦴꦤꦁ ꦥꦗ꧀ꦗꦺꦴꦠꦁ ꦌꦠꦢꦮꦺꦴꦕ – ‘‘ꦩꦪꦁ ꦑꦺꦴ, ꦢꦺꦮ, ꦮꦺꦗ꧀ꦗꦴ ꦤꦴꦩ ꦠꦴꦢꦶꦱꦺꦤ ꦩꦸꦲꦸꦠ꧀ꦠꦺꦤ ꦩꦹꦭꦴꦤꦶ ꦈꦢ꧀ꦣꦫꦴꦩ ꦨꦺꦱꦗ꧀ꦗꦴꦤꦶ ꦱꦁꦲꦫꦴꦩ. ꦱꦴꦣꦸ ꦢꦺꦮꦺꦴ ꦮꦴꦲꦤꦴꦒꦴꦫꦺꦱꦸ ꦕ ꦢ꧀ꦮꦴꦫꦺꦱꦸ ꦕ ꦄꦴꦟꦴꦥꦺꦠꦸ – ꦪꦺꦤ ꦮꦴꦲꦤꦺꦤ ꦗꦷꦮꦏꦺꦴ ꦆꦕ꧀ꦖꦠꦶ ꦠꦺꦤ ꦮꦴꦲꦤꦺꦤ ꦒꦕ꧀ꦖꦠꦸ, ꦪꦺꦤ ꦢ꧀ꦮꦴꦫꦺꦤ ꦆꦕ꧀ꦖꦠꦶ ꦠꦺꦤ ꦢ꧀ꦮꦴꦫꦺꦤ ꦒꦕ꧀ꦖꦠꦸ, ꦪꦁ ꦏꦴꦭꦁ ꦆꦕ꧀ꦖꦠꦶ ꦠꦁ ꦏꦴꦭꦁ ꦒꦕ꧀ꦖꦠꦸ, ꦪꦁ ꦏꦴꦭꦁ ꦆꦕ꧀ꦖꦠꦶ ꦠꦁ ꦏꦴꦭꦁ ꦥꦮꦶꦱꦠꦹ’’ꦠꦶ. ꦄꦡ ꦑꦺꦴ ꦫꦴꦗꦴ ꦥꦗ꧀ꦗꦺꦴꦠꦺꦴ ꦮꦴꦲꦤꦴꦒꦴꦫꦺꦱꦸ ꦕ ꦢ꧀ꦮꦴꦫꦺꦱꦸ ꦕ ꦄꦴꦟꦴꦥꦺꦱꦶ – ‘‘ꦪꦺꦤ ꦮꦴꦲꦤꦺꦤ ꦗꦷꦮꦏꦺꦴ ꦆꦕ꧀ꦖꦠꦶ ꦠꦺꦤ ꦮꦴꦲꦤꦺꦤ ꦒꦕ꧀ꦖꦠꦸ, ꦪꦺꦤ ꦢ꧀ꦮꦴꦫꦺꦤ ꦆꦕ꧀ꦖꦠꦶ ꦠꦺꦤ ꦢ꧀ꦮꦴꦫꦺꦤ ꦒꦕ꧀ꦖꦠꦸ, ꦪꦁ ꦏꦴꦭꦁ ꦆꦕ꧀ꦖꦠꦶ ꦠꦁ ꦏꦴꦭꦁ ꦒꦕ꧀ꦖꦠꦸ, ꦪꦁ ꦏꦴꦭꦁ ꦆꦕ꧀ꦖꦠꦶ ꦠꦁ ꦏꦴꦭꦁ ꦥꦮꦶꦱꦠꦹ’’ꦠꦶ.

ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦫꦚ꧀ꦚꦺꦴ ꦥꦗ꧀ꦗꦺꦴꦠꦱ꧀ꦱ ꦨꦢ꧀ꦢꦮꦠꦶꦏꦴ ꦤꦴꦩ ꦲꦠ꧀ꦡꦶꦤꦶꦏꦴ ꦥꦚ꧀ꦚꦴꦱꦪꦺꦴꦗꦤꦶꦏꦴ ꦲꦺꦴꦠꦶ. ꦄꦡ ꦑꦺꦴ ꦗꦷꦮꦏꦺꦴ ꦏꦺꦴꦩꦴꦫꦨꦕ꧀ꦕꦺꦴ ꦫꦚ꧀ꦚꦺꦴ ꦥꦗ꧀ꦗꦺꦴꦠꦱ꧀ꦱ ꦱꦥ꧀ꦥꦶꦁ [ꦠꦁ ꦱꦥ꧀ꦥꦶꦁ (ꦱ꧀ꦪꦴ.)] ꦈꦥꦤꦴꦩꦺꦱꦶ – ‘‘ꦏꦱꦴꦮꦁ ꦢꦺꦮꦺꦴ ꦥꦶꦮꦠꦹ’’ꦠꦶ. ꦄꦡ ꦑꦺꦴ ꦗꦷꦮꦏꦺꦴ ꦏꦺꦴꦩꦴꦫꦨꦕ꧀ꦕꦺꦴ ꦫꦴꦗꦴꦤꦁ ꦥꦗ꧀ꦗꦺꦴꦠꦁ ꦱꦥ꧀ꦥꦶꦁ ꦥꦴꦪꦺꦠ꧀ꦮꦴ ꦲꦠ꧀ꦡꦶꦱꦴꦭꦁ ꦒꦤ꧀ꦠ꧀ꦮꦴ ꦨꦢ꧀ꦢꦮꦠꦶꦏꦴꦪ ꦲꦠ꧀ꦡꦶꦤꦶꦏꦴꦪ ꦤꦒꦫꦩ꧀ꦲꦴ ꦤꦶꦥ꧀ꦥꦠꦶ.

ꦄꦡ ꦑꦺꦴ ꦫꦚ꧀ꦚꦺꦴ ꦥꦗ꧀ꦗꦺꦴꦠꦱ꧀ꦱ ꦠꦁ ꦱꦥ꧀ꦥꦶ ꦥꦷꦠꦁ ꦥꦫꦶꦟꦴꦩꦺꦤ꧀ꦠꦁ ꦈꦢ꧀ꦢꦺꦏꦁ ꦄꦢꦴꦱꦶ. ꦄꦡ ꦑꦺꦴ ꦫꦴꦗꦴ ꦥꦗ꧀ꦗꦺꦴꦠꦺꦴ ꦩꦤꦸꦱ꧀ꦱꦺ ꦌꦠꦢꦮꦺꦴꦕ – ‘‘ꦢꦸꦛ꧀ꦜꦺꦤ, ꦨꦟꦺ, ꦗꦷꦮꦏꦺꦤ ꦱꦥ꧀ꦥꦶꦁ ꦥꦴꦪꦶꦠꦺꦴꦩ꧀ꦲꦶ. ꦠꦺꦤ ꦲꦶ, ꦨꦟꦺ, ꦗꦷꦮꦏꦁ ꦮꦺꦗ꧀ꦗꦁ ꦮꦶꦕꦶꦤꦡꦴ’’ꦠꦶ. ‘‘ꦨꦢ꧀ꦢꦮꦠꦶꦏꦴꦪ, ꦢꦺꦮ, ꦲꦠ꧀ꦡꦶꦤꦶꦏꦴꦪ ꦤꦒꦫꦩ꧀ꦲꦴ ꦤꦶꦥ꧀ꦥꦠꦶꦠꦺꦴ’’ꦠꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦫꦚ꧀ꦚꦺꦴ ꦥꦗ꧀ꦗꦺꦴꦠꦱ꧀ꦱ ꦏꦴꦏꦺꦴ ꦤꦴꦩ ꦢꦴꦱꦺꦴ ꦱꦛ꧀ꦜꦶꦪꦺꦴꦗꦤꦶꦏꦺꦴ ꦲꦺꦴꦠꦶ, ꦄꦩꦤꦸꦱ꧀ꦱꦺꦤ ꦥꦛꦶꦕ꧀ꦕ ꦗꦴꦠꦺꦴ. ꦄꦡ ꦑꦺꦴ ꦫꦴꦗꦴ ꦥꦗ꧀ꦗꦺꦴꦠꦺꦴ ꦏꦴꦏꦁ ꦢꦴꦱꦁ ꦄꦴꦟꦴꦥꦺꦱꦶ – ‘‘ꦒꦕ꧀ꦖ, ꦨꦟꦺ ꦏꦴꦏ, ꦗꦷꦮꦏꦁ ꦮꦺꦗ꧀ꦗꦁ ꦤꦶꦮꦠ꧀ꦠꦺꦲꦶ – ꦫꦴꦗꦴ ꦠꦁ, ꦄꦴꦕꦫꦶꦪ, ꦤꦶꦮꦠ꧀ꦠꦴꦥꦺꦠꦷꦠꦶ. ꦌꦠꦺ ꦑꦺꦴ, ꦨꦟꦺ ꦏꦴꦏ, ꦮꦺꦗ꧀ꦗꦴ ꦤꦴꦩ ꦧꦲꦸꦩꦴꦪꦴ. ꦩꦴ ꦕꦱ꧀ꦱ ꦏꦶꦚ꧀ꦕꦶ ꦥꦛꦶꦒ꧀ꦒꦲꦺꦱꦷ’’ꦠꦶ.

ꦄꦡ ꦑꦺꦴ ꦏꦴꦏꦺꦴ ꦢꦴꦱꦺꦴ ꦗꦷꦮꦏꦁ ꦏꦺꦴꦩꦴꦫꦨꦕ꧀ꦕꦁ ꦄꦤ꧀ꦠꦫꦴꦩꦒ꧀ꦒꦺ ꦏꦺꦴꦱꦩ꧀ꦧꦶꦪꦁ ꦱꦩ꧀ꦨꦴꦮꦺꦱꦶ

ꦥꦴꦠꦫꦴꦱꦁ ꦏꦫꦺꦴꦤ꧀ꦠꦁ. ꦄꦡ ꦑꦺꦴ ꦏꦴꦏꦺꦴ ꦢꦴꦱꦺꦴ ꦗꦷꦮꦏꦁ ꦏꦺꦴꦩꦴꦫꦨꦕ꧀ꦕꦁ ꦌꦠꦢꦮꦺꦴꦕ – ‘‘ꦫꦴꦗꦴ ꦠꦁ, ꦄꦴꦕꦫꦶꦪ, ꦤꦶꦮꦠ꧀ꦠꦴꦥꦺꦠꦷ’’ꦠꦶ. ‘‘ꦄꦴꦒꦩꦺꦲꦶ, ꦨꦟꦺ ꦏꦴꦏ, ꦪꦴꦮ ꦨꦸꦚ꧀ꦗꦴꦩ [ꦨꦸꦚ꧀ꦗꦴꦩꦶ (ꦱꦷ. ꦱ꧀ꦪꦴ.)]. ꦲꦤ꧀ꦢ, ꦨꦟꦺ ꦏꦴꦏ, ꦨꦸꦚ꧀ꦗꦱ꧀ꦱꦹ’’ꦠꦶ. ‘‘ꦄꦭꦁ, ꦄꦴꦕꦫꦶꦪ, ꦫꦚ꧀ꦚꦴꦩ꧀ꦲꦶ ꦄꦴꦟꦠ꧀ꦠꦺꦴ – ꦌꦠꦺ ꦑꦺꦴ, ꦨꦟꦺ ꦏꦴꦏ, ꦮꦺꦗ꧀ꦗꦴ ꦤꦴꦩ ꦧꦲꦸꦩꦴꦪꦴ, ꦩꦴ ꦕꦱ꧀ꦱ ꦏꦶꦚ꧀ꦕꦶ ꦥꦛꦶꦒ꧀ꦒꦲꦺꦱꦷ’’ꦠꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦗꦷꦮꦏꦺꦴ ꦏꦺꦴꦩꦴꦫꦨꦕ꧀ꦕꦺꦴ ꦤꦑꦺꦤ ꦨꦺꦱꦗ꧀ꦗꦁ ꦎꦭꦸꦩ꧀ꦥꦺꦠ꧀ꦮꦴ ꦄꦴꦩꦭꦏꦚ꧀ꦕ ꦑꦴꦢꦠꦶ ꦥꦴꦤꦷꦪꦚ꧀ꦕ ꦥꦶꦮꦠꦶ. ꦄꦡ ꦑꦺꦴ ꦗꦷꦮꦏꦺꦴ ꦏꦺꦴꦩꦴꦫꦨꦕ꧀ꦕꦺꦴ ꦏꦴꦏꦁ ꦢꦴꦱꦁ ꦌꦠꦢꦮꦺꦴꦕ – ‘‘ꦲꦤ꧀ꦢ, ꦨꦟꦺ ꦏꦴꦏ, ꦄꦴꦩꦭꦏꦚ꧀ꦕ ꦑꦴꦢ ꦥꦴꦤꦷꦪꦚ꧀ꦕ ꦥꦶꦮꦱ꧀ꦱꦹ’’ꦠꦶ. ꦄꦡ ꦑꦺꦴ ꦏꦴꦏꦺꦴ ꦢꦴꦱꦺꦴ – ꦄꦪꦁ ꦑꦺꦴ ꦮꦺꦗ꧀ꦗꦺꦴ ꦄꦴꦩꦭꦏꦚ꧀ꦕ ꦑꦴꦢꦠꦶ ꦥꦴꦤꦷꦪꦚ꧀ꦕ ꦥꦶꦮꦠꦶ, ꦤ ꦄꦫꦲꦠꦶ ꦏꦶꦚ꧀ꦕꦶ ꦥꦴꦥꦏꦁ ꦲꦺꦴꦠꦸꦤ꧀ꦠꦶ – ꦈꦥꦝ꧀ꦞꦴꦩꦭꦏꦚ꧀ꦕ ꦑꦴꦢꦶ ꦥꦴꦤꦷꦪꦚ꧀ꦕ ꦄꦥꦴꦪꦶ. ꦠꦱ꧀ꦱ ꦠꦁ ꦈꦥꦝ꧀ꦞꦴꦩꦭꦏꦁ ꦑꦴꦢꦶꦠꦁ ꦠꦠ꧀ꦡꦺꦮ ꦤꦶꦕ꧀ꦖꦴꦫꦺꦱꦶ. ꦄꦡ ꦑꦺꦴ ꦏꦴꦏꦺꦴ ꦢꦴꦱꦺꦴ ꦗꦷꦮꦏꦁ ꦏꦺꦴꦩꦴꦫꦨꦕ꧀ꦕꦁ ꦌꦠꦢꦮꦺꦴꦕ – ‘‘ꦄꦠ꧀ꦡꦶ ꦩꦺ, ꦄꦴꦕꦫꦶꦪ, ꦗꦷꦮꦶꦠ’’ꦤ꧀ꦠꦶ? ‘‘ꦩꦴ, ꦨꦟꦺ ꦏꦴꦏ, ꦨꦴꦪꦶ, ꦠ꧀ꦮꦁ ꦕꦺꦮ ꦄꦫꦺꦴꦒꦺꦴ ꦨꦮꦶꦱ꧀ꦱꦱꦶ ꦫꦴꦗꦴ ꦕ. ꦕꦟ꧀ꦝꦺꦴ ꦱꦺꦴ ꦫꦴꦗꦴ ꦓꦴꦠꦴꦥꦺꦪ꧀ꦪꦴꦥꦶ ꦩꦁ, ꦠꦺꦤꦴꦲꦁ ꦤ ꦤꦶꦮꦠ꧀ꦠꦴꦩꦷ’’ꦠꦶ ꦨꦢ꧀ꦢꦮꦠꦶꦏꦁ ꦲꦠ꧀ꦡꦶꦤꦶꦏꦁ ꦏꦴꦏꦱ꧀ꦱ ꦤꦶꦪ꧀ꦪꦴꦢꦺꦠ꧀ꦮꦴ ꦪꦺꦤ ꦫꦴꦗꦒꦲꦁ ꦠꦺꦤ ꦥꦏ꧀ꦏꦴꦩꦶ. ꦄꦤꦸꦥꦸꦧ꧀ꦧꦺꦤ ꦪꦺꦤ ꦫꦴꦗꦴ ꦩꦴꦒꦣꦺꦴ ꦱꦺꦤꦶꦪꦺꦴ ꦧꦶꦩ꧀ꦧꦶꦱꦴꦫꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦫꦚ꧀ꦚꦺꦴ ꦩꦴꦒꦣꦱ꧀ꦱ ꦱꦺꦤꦶꦪꦱ꧀ꦱ ꦧꦶꦩ꧀ꦧꦶꦱꦴꦫꦱ꧀ꦱ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦶ. ‘‘ꦱꦸꦛ꧀ꦜꦸ, ꦨꦟꦺ ꦗꦷꦮꦏ, ꦄꦏꦴꦱꦶ ꦪꦩ꧀ꦥꦶ ꦤ ꦤꦶꦮꦠ꧀ꦠꦺꦴ, ꦕꦟ꧀ꦝꦺꦴ ꦱꦺꦴ ꦫꦴꦗꦴ ꦓꦴꦠꦴꦥꦺꦪ꧀ꦪꦴꦥꦶ ꦠ’’ꦤ꧀ꦠꦶ. ꦄꦡ ꦑꦺꦴ ꦫꦴꦗꦴ ꦥꦗ꧀ꦗꦺꦴꦠꦺꦴ ꦄꦫꦺꦴꦒꦺꦴ ꦱꦩꦴꦤꦺꦴ ꦗꦷꦮꦏꦱ꧀ꦱ ꦏꦺꦴꦩꦴꦫꦨꦕ꧀ꦕꦱ꧀ꦱ ꦱꦤ꧀ꦠꦶꦏꦺ ꦢꦹꦠꦁ ꦥꦴꦲꦺꦱꦶ – ‘‘ꦄꦴꦒꦕ꧀ꦖꦠꦸ ꦗꦷꦮꦏꦺꦴ, ꦮꦫꦁ ꦢꦱ꧀ꦱꦴꦩꦷ’’ꦠꦶ. ‘‘ꦄꦭꦁ, ꦄꦪ꧀ꦪꦺꦴ [ꦢꦺꦮ (ꦱ꧀ꦪꦴ.)], ꦄꦣꦶꦏꦴꦫꦁ ꦩꦺ ꦢꦺꦮꦺꦴ ꦱꦫꦠꦹ’’ꦠꦶ.

ꦥꦗ꧀ꦗꦺꦴꦠꦫꦴꦗꦮꦠ꧀ꦡꦸ ꦤꦶꦛ꧀ꦜꦶꦠꦁ.