꧑꧘꧐. ꦩꦺꦟ꧀ꦝꦏꦒꦲꦥꦠꦶꦮꦠ꧀ꦡꦸ

꧒꧙꧖. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦢ꧀ꦢꦶꦪꦤꦒꦫꦺ ꦩꦺꦟ꧀ꦝꦏꦺꦴ ꦒꦲꦥꦠꦶ ꦥꦛꦶꦮꦱꦠꦶ. ꦠꦱ꧀ꦱ ꦌꦮꦫꦹꦥꦺꦴ ꦆꦢ꧀ꦣꦴꦤꦸꦨꦴꦮꦺꦴ ꦲꦺꦴꦠꦶ – ꦱꦷꦱꦁ ꦤꦲꦴꦪꦶꦠ꧀ꦮꦴ ꦣꦚ꧀ꦚꦴꦒꦴꦫꦁ ꦱꦩ꧀ꦩꦗ꧀ꦗꦴꦥꦺꦠ꧀ꦮꦴ ꦧꦲꦶꦢ꧀ꦮꦴꦫꦺ ꦤꦶꦱꦷꦢꦠꦶ, ꦄꦤ꧀ꦠꦭꦶꦏ꧀ꦑꦴ ꦣꦚ꧀ꦚꦱ꧀ꦱ ꦣꦴꦫꦴ ꦎꦥꦠꦶꦠ꧀ꦮꦴ ꦣꦚ꧀ꦚꦴꦒꦴꦫꦁ ꦥꦹꦫꦺꦠꦶ. ꦨꦫꦶꦪꦴꦪ ꦌꦮꦫꦹꦥꦺꦴ ꦆꦢ꧀ꦣꦴꦤꦸꦨꦴꦮꦺꦴ ꦲꦺꦴꦠꦶ – ꦌꦏꦁꦪꦺꦮ ꦄꦴꦭ꦳꧀ꦲꦏꦡꦴꦭꦶꦏꦁ ꦈꦥꦤꦶꦱꦷꦢꦶꦠ꧀ꦮꦴ ꦌꦏꦚ꧀ꦕ ꦱꦹꦥꦨꦶꦚ꧀ꦗꦤꦏꦁ [ꦱꦹꦥꦨꦶꦚ꧀ꦗꦫꦏꦁ (ꦱꦷ.)] ꦢꦴꦱꦏꦩ꧀ꦩꦏꦫꦥꦺꦴꦫꦶꦱꦁ ꦨꦠ꧀ꦠꦺꦤ ꦥꦫꦶꦮꦶꦱꦠꦶ, ꦤ ꦠꦴꦮ ꦠꦁ ꦑꦶꦪ꧀ꦪꦠꦶ [ꦑꦷꦪꦠꦶ (ꦱꦷ. ꦱ꧀ꦪꦴ.)] ꦪꦴꦮ ꦱꦴ ꦤ ꦮꦸꦛ꧀ꦜꦴꦠꦶ. ꦥꦸꦠ꧀ꦠꦱ꧀ꦱ ꦌꦮꦫꦹꦥꦺꦴ ꦆꦢ꧀ꦣꦴꦤꦸꦨꦴꦮꦺꦴ ꦲꦺꦴꦠꦶ – ꦌꦏꦁꦪꦺꦮ ꦱꦲꦱ꧀ꦱꦡꦮꦶꦏꦁ ꦒꦲꦺꦠ꧀ꦮꦴ ꦢꦴꦱꦏꦩ꧀ꦩꦏꦫꦥꦺꦴꦫꦶꦱꦱ꧀ꦱ ꦖꦩꦴꦱꦶꦏꦁ ꦮꦺꦠꦤꦁ ꦢꦺꦠꦶ, ꦤ ꦠꦴꦮ ꦠꦁ ꦑꦶꦪ꧀ꦪꦠꦶ ꦪꦴꦮꦱ꧀ꦱ ꦲꦠ꧀ꦡꦒꦠꦴ. ꦱꦸꦟꦶꦱꦴꦪ ꦌꦮꦫꦹꦥꦺꦴ ꦆꦢ꧀ꦣꦴꦤꦸꦨꦴꦮꦺꦴ ꦲꦺꦴꦠꦶ – ꦌꦏꦁꦪꦺꦮ ꦕꦠꦸꦢꦺꦴꦟꦶꦏꦁ ꦥꦶꦛꦏꦁ ꦈꦥꦤꦶꦱꦷꦢꦶꦠ꧀ꦮꦴ ꦢꦴꦱꦏꦩ꧀ꦩꦏꦫꦥꦺꦴꦫꦶꦱꦱ꧀ꦱ ꦖꦩꦴꦱꦶꦏꦁ ꦨꦠ꧀ꦠꦁ ꦢꦺꦠꦶ, ꦤ ꦠꦴꦮ ꦠꦁ ꦑꦶꦪ꧀ꦪꦠꦶ ꦪꦴꦮ ꦱꦴ ꦤ ꦮꦸꦛ꧀ꦜꦴꦠꦶ. ꦢꦴꦱꦱ꧀ꦱ ꦌꦮꦫꦹꦥꦺꦴ ꦆꦢ꧀ꦣꦴꦤꦸꦨꦴꦮꦺꦴ ꦲꦺꦴꦠꦶ – ꦌꦏꦺꦤ ꦤꦔ꧀ꦒꦭꦺꦤ ꦏꦱꦤ꧀ꦠꦱ꧀ꦱ ꦱꦠ꧀ꦠ ꦱꦷꦠꦴꦪꦺꦴ ꦒꦕ꧀ꦖꦤ꧀ꦠꦶ.

ꦄꦱ꧀ꦱꦺꦴꦱꦶ ꦑꦺꦴ ꦫꦴꦗꦴ ꦩꦴꦒꦣꦺꦴ ꦱꦺꦤꦶꦪꦺꦴ ꦧꦶꦩ꧀ꦧꦶꦱꦴꦫꦺꦴ – ‘‘ꦄꦩ꧀ꦲꦴꦏꦁ ꦏꦶꦫ ꦮꦶꦗꦶꦠꦺ ꦨꦢ꧀ꦢꦶꦪꦤꦒꦫꦺ ꦩꦺꦟ꧀ꦝꦏꦺꦴ ꦒꦲꦥꦠꦶ ꦥꦛꦶꦮꦱꦠꦶ. ꦠꦱ꧀ꦱ ꦌꦮꦫꦹꦥꦺꦴ ꦆꦢ꧀ꦣꦴꦤꦸꦨꦴꦮꦺꦴ – ꦱꦷꦱꦁ ꦤꦲꦴꦪꦶꦠ꧀ꦮꦴ ꦣꦚ꧀ꦚꦴꦒꦴꦫꦁ ꦱꦩ꧀ꦩꦗ꧀ꦗꦴꦥꦺꦠ꧀ꦮꦴ ꦧꦲꦶꦢ꧀ꦮꦴꦫꦺ ꦤꦶꦱꦷꦢꦠꦶ, ꦄꦤ꧀ꦠꦭꦶꦏ꧀ꦑꦴ ꦣꦚ꧀ꦚꦱ꧀ꦱ ꦣꦴꦫꦴ ꦎꦥꦠꦶꦠ꧀ꦮꦴ ꦣꦚ꧀ꦚꦴꦒꦴꦫꦁ ꦥꦹꦫꦺꦠꦶ. ꦨꦫꦶꦪꦴꦪ ꦌꦮꦫꦹꦥꦺꦴ ꦆꦢ꧀ꦣꦴꦤꦸꦨꦴꦮꦺꦴ – ꦌꦏꦁꦪꦺꦮ ꦄꦴꦭ꦳꧀ꦲꦏꦡꦴꦭꦶꦏꦁ ꦈꦥꦤꦶꦱꦷꦢꦶꦠ꧀ꦮꦴ ꦌꦏꦚ꧀ꦕ ꦱꦹꦥꦨꦶꦚ꧀ꦗꦤꦏꦁ ꦢꦴꦱꦏꦩ꧀ꦩꦏꦫꦥꦺꦴꦫꦶꦱꦁ ꦨꦠ꧀ꦠꦺꦤ ꦥꦫꦶꦮꦶꦱꦠꦶ, ꦤ ꦠꦴꦮ ꦠꦁ ꦑꦶꦪ꧀ꦪꦠꦶ ꦪꦴꦮ ꦱꦴ ꦤ ꦮꦸꦛ꧀ꦜꦴꦠꦶ. ꦥꦸꦠ꧀ꦠꦱ꧀ꦱ ꦌꦮꦫꦹꦥꦺꦴ ꦆꦢ꧀ꦣꦴꦤꦸꦨꦴꦮꦺꦴ – ꦌꦏꦁꦪꦺꦮ ꦱꦲꦱ꧀ꦱꦡꦮꦶꦏꦁ ꦒꦲꦺꦠ꧀ꦮꦴ ꦢꦴꦱꦏꦩ꧀ꦩꦏꦫꦥꦺꦴꦫꦶꦱꦱ꧀ꦱ ꦖꦩꦴꦱꦶꦏꦁ ꦮꦺꦠꦤꦁ ꦢꦺꦠꦶ, ꦤ ꦠꦴꦮ ꦠꦁ ꦑꦶꦪ꧀ꦪꦠꦶ ꦪꦴꦮꦱ꧀ꦱ ꦲꦠ꧀ꦡꦒꦠꦴ. ꦱꦸꦟꦶꦱꦴꦪ ꦌꦮꦫꦹꦥꦺꦴ ꦆꦢ꧀ꦣꦴꦤꦸꦨꦴꦮꦺꦴ – ꦌꦏꦁꦪꦺꦮ ꦕꦠꦸꦢꦺꦴꦟꦶꦏꦁ ꦥꦶꦛꦏꦁ ꦈꦥꦤꦶꦱꦷꦢꦶꦠ꧀ꦮꦴ ꦢꦴꦱꦏꦩ꧀ꦩꦏꦫꦥꦺꦴꦫꦶꦱꦱ꧀ꦱ ꦖꦩꦴꦱꦶꦏꦁ ꦨꦠ꧀ꦠꦁ ꦢꦺꦠꦶ, ꦤ ꦠꦴꦮ ꦠꦁ ꦑꦶꦪ꧀ꦪꦠꦶ ꦪꦴꦮ ꦱꦴ ꦤ ꦮꦸꦛ꧀ꦜꦴꦠꦶ. ꦢꦴꦱꦱ꧀ꦱ ꦌꦮꦫꦹꦥꦺꦴ ꦆꦢ꧀ꦣꦴꦤꦸꦨꦴꦮꦺꦴ – ꦌꦏꦺꦤ ꦤꦔ꧀ꦒꦭꦺꦤ ꦏꦱꦤ꧀ꦠꦱ꧀ꦱ ꦱꦠ꧀ꦠ ꦱꦷꦠꦴꦪꦺꦴ ꦒꦕ꧀ꦖꦤ꧀ꦠꦷ’’ꦠꦶ. ꦄꦡ ꦑꦺꦴ ꦫꦴꦗꦴ ꦩꦴꦒꦣꦺꦴ ꦱꦺꦤꦶꦪꦺꦴ ꦧꦶꦩ꧀ꦧꦶꦱꦴꦫꦺꦴ ꦄꦚ꧀ꦚꦠꦫꦁ ꦱꦧ꧀ꦧꦠ꧀ꦡꦏꦁ ꦩꦲꦴꦩꦠ꧀ꦠꦁ ꦄꦴꦩꦤ꧀ꦠꦺꦱꦶ – ‘‘ꦄꦩ꧀ꦲꦴꦏꦁ ꦏꦶꦫ, ꦨꦟꦺ, ꦮꦶꦗꦶꦠꦺ ꦨꦢ꧀ꦢꦶꦪꦤꦒꦫꦺ ꦩꦺꦟ꧀ꦝꦏꦺꦴ ꦒꦲꦥꦠꦶ ꦥꦛꦶꦮꦱꦠꦶ. ꦠꦱ꧀ꦱ ꦌꦮꦫꦹꦥꦺꦴ ꦆꦢ꧀ꦣꦴꦤꦸꦨꦴꦮꦺꦴ – ꦱꦷꦱꦁ ꦤꦲꦴꦪꦶꦠ꧀ꦮꦴ ꦣꦚ꧀ꦚꦴꦒꦴꦫꦁ ꦱꦩ꧀ꦩꦗ꧀ꦗꦴꦥꦺꦠ꧀ꦮꦴ ꦧꦲꦶꦢ꧀ꦮꦴꦫꦺ ꦤꦶꦱꦷꦢꦠꦶ, ꦄꦤ꧀ꦠꦭꦶꦏ꧀ꦑꦴ ꦣꦚ꧀ꦚꦱ꧀ꦱ ꦣꦴꦫꦴ ꦎꦥꦠꦶꦠ꧀ꦮꦴ ꦣꦚ꧀ꦚꦴꦒꦴꦫꦁ ꦥꦹꦫꦺꦠꦶ. ꦨꦫꦶꦪꦴꦪ…ꦥꦺ… ꦥꦸꦠ꧀ꦠꦱ꧀ꦱ… ꦱꦸꦟꦶꦱꦴꦪ… ꦢꦴꦱꦱ꧀ꦱ ꦌꦮꦫꦹꦥꦺꦴ ꦆꦢ꧀ꦣꦴꦤꦸꦨꦴꦮꦺꦴ, ꦌꦏꦺꦤ ꦤꦔ꧀ꦒꦭꦺꦤ ꦏꦱꦤ꧀ꦠꦱ꧀ꦱ ꦱꦠ꧀ꦠ ꦱꦷꦠꦴꦪꦺꦴ ꦒꦕ꧀ꦖꦤ꧀ꦠꦷꦠꦶ. ꦒꦕ꧀ꦖ, ꦨꦟꦺ, ꦗꦴꦤꦴꦲꦶ. ꦪꦡꦴ ꦩꦪꦴ ꦱꦴꦩꦁ ꦢꦶꦛ꧀ꦜꦺꦴ, ꦌꦮꦁ ꦠꦮ ꦢꦶꦛ꧀ꦜꦺꦴ ꦨꦮꦶꦱ꧀ꦱꦠꦷ’’ꦠꦶ.

꧒꧙꧗. ꦌꦮꦁ, ꦢꦺꦮꦴꦠꦶ ꦑꦺꦴ ꦱꦺꦴ ꦩꦲꦴꦩꦠ꧀ꦠꦺꦴ ꦫꦚ꧀ꦚꦺꦴ ꦩꦴꦒꦣꦱ꧀ꦱ ꦱꦺꦤꦶꦪꦱ꧀ꦱ ꦧꦶꦩ꧀ꦧꦶꦱꦴꦫꦱ꧀ꦱ ꦥꦛꦶꦱ꧀ꦱꦸꦟꦶꦠ꧀ꦮꦴ ꦕꦠꦸꦫꦔ꧀ꦒꦶꦤꦶꦪꦴ ꦱꦺꦤꦴꦪ ꦪꦺꦤ ꦨꦢ꧀ꦢꦶꦪꦁ ꦠꦺꦤ ꦥꦴꦪꦴꦱꦶ. ꦄꦤꦸꦥꦸꦧ꧀ꦧꦺꦤ ꦪꦺꦤ ꦨꦢ꧀ꦢꦶꦪꦁ ꦪꦺꦤ ꦩꦺꦟ꧀ꦝꦏꦺꦴ ꦒꦲꦥꦠꦶ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦩꦺꦟ꧀ꦝꦏꦁ ꦒꦲꦥꦠꦶꦁ ꦌꦠꦢꦮꦺꦴꦕ – ‘‘ꦄꦲꦚ꧀ꦲꦶ, ꦒꦲꦥꦠꦶ, ꦫꦚ꧀ꦚꦴ ꦄꦴꦟꦠ꧀ꦠꦺꦴ ‘ꦄꦩ꧀ꦲꦴꦏꦁ ꦏꦶꦫ, ꦨꦟꦺ, ꦮꦶꦗꦶꦠꦺ ꦨꦢ꧀ꦢꦶꦪꦤꦒꦫꦺ ꦩꦺꦟ꧀ꦝꦏꦺꦴ ꦒꦲꦥꦠꦶ ꦥꦛꦶꦮꦱꦠꦶ, ꦠꦱ꧀ꦱ ꦌꦮꦫꦹꦥꦺꦴ ꦆꦢ꧀ꦣꦴꦤꦸꦨꦴꦮꦺꦴ, ꦱꦷꦱꦁ ꦤꦲꦴꦪꦶꦠ꧀ꦮꦴ…ꦥꦺ… ꦨꦫꦶꦪꦴꦪ… ꦥꦸꦠ꧀ꦠꦱ꧀ꦱ… ꦱꦸꦟꦶꦱꦴꦪ… ꦢꦴꦱꦱ꧀ꦱ ꦌꦮꦫꦹꦥꦺꦴ ꦆꦢ꧀ꦣꦴꦤꦸꦨꦴꦮꦺꦴ, ꦌꦏꦺꦤ ꦤꦔ꧀ꦒꦭꦺꦤ ꦏꦱꦤ꧀ꦠꦱ꧀ꦱ ꦱꦠ꧀ꦠ ꦱꦷꦠꦴꦪꦺꦴ ꦒꦕ꧀ꦖꦤ꧀ꦠꦷ’ꦠꦶ, ꦒꦕ꧀ꦖ, ꦨꦟꦺ, ꦗꦴꦤꦴꦲꦶ. ꦪꦡꦴ ꦩꦪꦴ ꦱꦴꦩꦁ ꦢꦶꦛ꧀ꦜꦺꦴ, ꦌꦮꦁ ꦠꦮ ꦢꦶꦛ꧀ꦜꦺꦴ ꦨꦮꦶꦱ꧀ꦱꦠꦷ’ꦠꦶ. ꦥꦱ꧀ꦱꦴꦩ ꦠꦺ, ꦒꦲꦥꦠꦶ, ꦆꦢ꧀ꦣꦴꦤꦸꦨꦴꦮ’’ꦤ꧀ꦠꦶ. ꦄꦡ ꦑꦺꦴ ꦩꦺꦟ꧀ꦝꦏꦺꦴ ꦒꦲꦥꦠꦶ ꦱꦷꦱꦁ ꦤꦲꦴꦪꦶꦠ꧀ꦮꦴ ꦣꦚ꧀ꦚꦴꦒꦴꦫꦁ ꦱꦩ꧀ꦩꦗ꧀ꦗꦴꦥꦺꦠ꧀ꦮꦴ ꦧꦲꦶꦢ꧀ꦮꦴꦫꦺ ꦤꦶꦱꦷꦢꦶ, ꦄꦤ꧀ꦠꦭꦶꦏ꧀ꦑꦴ ꦣꦚ꧀ꦚꦱ꧀ꦱ ꦣꦴꦫꦴ ꦎꦥꦠꦶꦠ꧀ꦮꦴ ꦣꦚ꧀ꦚꦴꦒꦴꦫꦁ ꦥꦹꦫꦺꦱꦶ. ‘‘ꦢꦶꦛ꧀ꦜꦺꦴ ꦠꦺ, ꦒꦲꦥꦠꦶ, ꦆꦢ꧀ꦣꦴꦤꦸꦨꦴꦮꦺꦴ. ꦨꦫꦶꦪꦴꦪ ꦠꦺ ꦆꦢ꧀ꦣꦴꦤꦸꦨꦴꦮꦁ ꦥꦱ꧀ꦱꦶꦱ꧀ꦱꦴꦩꦴ’’ꦠꦶ. ꦄꦡ ꦑꦺꦴ ꦩꦺꦟ꧀ꦝꦏꦺꦴ ꦒꦲꦥꦠꦶ ꦨꦫꦶꦪꦁ ꦄꦴꦟꦴꦥꦺꦱꦶ – ‘‘ꦠꦺꦤ ꦲꦶ ꦕꦠꦸꦫꦔ꧀ꦒꦶꦤꦶꦁ ꦱꦺꦤꦁ ꦨꦠ꧀ꦠꦺꦤ ꦥꦫꦶꦮꦶꦱꦴ’’ꦠꦶ. ꦄꦡ ꦑꦺꦴ ꦩꦺꦟ꧀ꦝꦏꦱ꧀ꦱ ꦒꦲꦥꦠꦶꦱ꧀ꦱ ꦨꦫꦶꦪꦴ ꦌꦏꦁꦪꦺꦮ ꦄꦴꦭ꦳꧀ꦲꦏꦡꦴꦭꦶꦏꦁ ꦈꦥꦤꦶꦱꦷꦢꦶꦠ꧀ꦮꦴ ꦌꦏꦚ꧀ꦕ ꦱꦹꦥꦨꦶꦚ꧀ꦗꦤꦏꦁ ꦕꦠꦸꦫꦔ꧀ꦒꦶꦤꦶꦁ ꦱꦺꦤꦁ ꦨꦠ꧀ꦠꦺꦤ ꦥꦫꦶꦮꦶꦱꦶ, ꦤ ꦠꦴꦮ ꦠꦁ ꦑꦶꦪ꧀ꦪꦠꦶ, ꦪꦴꦮ ꦱꦴ ꦤ ꦮꦸꦛ꧀ꦜꦴꦠꦶ. ‘‘ꦢꦶꦛ꧀ꦜꦺꦴ ꦠꦺ, ꦒꦲꦥꦠꦶ, ꦨꦫꦶꦪꦴꦪꦥꦶ ꦆꦢ꧀ꦣꦴꦤꦸꦨꦴꦮꦺꦴ. ꦥꦸꦠ꧀ꦠꦱ꧀ꦱ ꦠꦺ ꦆꦢ꧀ꦣꦴꦤꦸꦨꦴꦮꦁ ꦥꦱ꧀ꦱꦶꦱ꧀ꦱꦴꦩꦴ’’ꦠꦶ. ꦄꦡ ꦑꦺꦴ ꦩꦺꦟ꧀ꦝꦏꦺꦴ ꦒꦲꦥꦠꦶ ꦥꦸꦠ꧀ꦠꦁ ꦄꦴꦟꦴꦥꦺꦱꦶ – ‘‘ꦠꦺꦤ ꦲꦶ ꦕꦠꦸꦫꦔ꧀ꦒꦶꦤꦶꦪꦴ ꦱꦺꦤꦴꦪ ꦖꦩꦴꦱꦶꦏꦁ ꦮꦺꦠꦤꦁ ꦢꦺꦲꦷ’’ꦠꦶ. ꦄꦡ ꦑꦺꦴ ꦩꦺꦟ꧀ꦝꦏꦱ꧀ꦱ ꦒꦲꦥꦠꦶꦱ꧀ꦱ ꦥꦸꦠ꧀ꦠꦺꦴ ꦌꦏꦁꦪꦺꦮ ꦱꦲꦱ꧀ꦱꦡꦮꦶꦏꦁ ꦒꦲꦺꦠ꧀ꦮꦴ ꦕꦠꦸꦫꦔ꧀ꦒꦶꦤꦶꦪꦴ ꦱꦺꦤꦴꦪ ꦖꦩꦴꦱꦶꦏꦁ ꦮꦺꦠꦤꦁ ꦄꦢꦴꦱꦶ, ꦤ ꦠꦴꦮ ꦠꦁ ꦑꦶꦪ꧀ꦪꦠꦶ, ꦪꦴꦮꦱ꧀ꦱ ꦲꦠ꧀ꦡꦒꦠꦴ. ‘‘ꦢꦶꦛ꧀ꦜꦺꦴ ꦠꦺ, ꦒꦲꦥꦠꦶ, ꦥꦸꦠ꧀ꦠꦱ꧀ꦱꦥꦶ ꦆꦢ꧀ꦣꦴꦤꦸꦨꦴꦮꦺꦴ. ꦱꦸꦟꦶꦱꦴꦪ ꦠꦺ ꦆꦢ꧀ꦣꦴꦤꦸꦨꦴꦮꦁ ꦥꦱ꧀ꦱꦶꦱ꧀ꦱꦴꦩꦴ’’ꦠꦶ. ꦄꦡ ꦑꦺꦴ ꦩꦺꦟ꧀ꦝꦏꦺꦴ ꦒꦲꦥꦠꦶ ꦱꦸꦟꦶꦱꦁ ꦄꦴꦟꦴꦥꦺꦱꦶ – ‘‘ꦠꦺꦤ ꦲꦶ ꦕꦠꦸꦫꦔ꧀ꦒꦶꦤꦶꦪꦴ ꦱꦺꦤꦴꦪ ꦖꦩꦴꦱꦶꦏꦁ ꦨꦠ꧀ꦠꦁ ꦢꦺꦲꦷ’’ꦠꦶ. ꦄꦡ ꦑꦺꦴ ꦩꦺꦟ꧀ꦝꦏꦱ꧀ꦱ ꦒꦲꦥꦠꦶꦱ꧀ꦱ ꦱꦸꦟꦶꦱꦴ ꦌꦏꦁꦪꦺꦮ ꦕꦠꦸꦢꦺꦴꦟꦶꦏꦁ ꦥꦶꦛꦏꦁ ꦈꦥꦤꦶꦱꦷꦢꦶꦠ꧀ꦮꦴ ꦕꦠꦸꦫꦔ꧀ꦒꦶꦤꦶꦪꦴ ꦱꦺꦤꦴꦪ ꦖꦩꦴꦱꦶꦏꦁ ꦨꦠ꧀ꦠꦁ ꦄꦢꦴꦱꦶ, ꦤ ꦠꦴꦮ ꦠꦁ ꦑꦶꦪ꧀ꦪꦠꦶ ꦪꦴꦮ ꦱꦴ ꦤ ꦮꦸꦛ꧀ꦜꦴꦠꦶ. ‘‘ꦢꦶꦛ꧀ꦜꦺꦴ ꦠꦺ, ꦒꦲꦥꦠꦶ, ꦱꦸꦟꦶꦱꦴꦪꦥꦶ ꦆꦢ꧀ꦣꦴꦤꦸꦨꦴꦮꦺꦴ. ꦢꦴꦱꦱ꧀ꦱ ꦠꦺ ꦆꦢ꧀ꦣꦴꦤꦸꦨꦴꦮꦁ ꦥꦱ꧀ꦱꦶꦱ꧀ꦱꦴꦩꦴ’’ꦠꦶ. ‘‘ꦩꦪ꧀ꦲꦁ ꦑꦺꦴ, ꦱꦴꦩꦶ, ꦢꦴꦱꦱ꧀ꦱ ꦆꦢ꧀ꦣꦴꦤꦸꦨꦴꦮꦺꦴ ꦑꦺꦠ꧀ꦠꦺ ꦥꦱ꧀ꦱꦶꦠꦧ꧀ꦧꦺꦴ’’ꦠꦶ. ‘‘ꦄꦭꦁ, ꦒꦲꦥꦠꦶ, ꦢꦶꦛ꧀ꦜꦺꦴ ꦠꦺ ꦢꦴꦱꦱ꧀ꦱꦥꦶ ꦆꦢ꧀ꦣꦴꦤꦸꦨꦴꦮꦺꦴ’’ꦠꦶ. ꦄꦡ ꦑꦺꦴ ꦱꦺꦴ ꦩꦲꦴꦩꦠ꧀ꦠꦺꦴ ꦕꦠꦸꦫꦔ꧀ꦒꦶꦤꦶꦪꦴ ꦱꦺꦤꦴꦪ ꦥꦸꦤꦢꦺꦮ ꦫꦴꦗꦒꦲꦁ ꦥꦕ꧀ꦕꦴꦒꦚ꧀ꦖꦶ. ꦪꦺꦤ ꦫꦴꦗꦴ ꦩꦴꦒꦣꦺꦴ ꦱꦺꦤꦶꦪꦺꦴ ꦧꦶꦩ꧀ꦧꦶꦱꦴꦫꦺꦴ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦫꦚ꧀ꦚꦺꦴ ꦩꦴꦒꦣꦱ꧀ꦱ ꦱꦺꦤꦶꦪꦱ꧀ꦱ ꦧꦶꦩ꧀ꦧꦶꦱꦴꦫꦱ꧀ꦱ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦶ.

꧒꧙꧘. ꦄꦡ ꦑꦺꦴ ꦨꦒꦮꦴ ꦮꦺꦱꦴꦭꦶꦪꦁ ꦪꦡꦴꦨꦶꦫꦤ꧀ꦠꦁ ꦮꦶꦲꦫꦶꦠ꧀ꦮꦴ ꦪꦺꦤ ꦨꦢ꧀ꦢꦶꦪꦁ ꦠꦺꦤ ꦕꦴꦫꦶꦏꦁ ꦥꦏ꧀ꦏꦴꦩꦶ ꦩꦲꦠꦴ ꦨꦶꦏ꧀ꦑꦸꦱꦔ꧀ꦓꦺꦤ ꦱꦢ꧀ꦣꦶꦁ ꦄꦝ꧀ꦞꦠꦺꦭꦱꦺꦲꦶ ꦨꦶꦏ꧀ꦑꦸꦱꦠꦺꦲꦶ. ꦄꦡ ꦑꦺꦴ ꦨꦒꦮꦴ ꦄꦤꦸꦥꦸꦧ꧀ꦧꦺꦤ ꦕꦴꦫꦶꦏꦁ ꦕꦫꦩꦴꦤꦺꦴ ꦪꦺꦤ ꦨꦢ꧀ꦢꦶꦪꦁ ꦠꦢꦮꦱꦫꦶ. ꦠꦠ꧀ꦫ ꦱꦸꦢꦁ ꦨꦒꦮꦴ ꦨꦢ꧀ꦢꦶꦪꦺ ꦮꦶꦲꦫꦠꦶ ꦗꦴꦠꦶꦪꦴ ꦮꦤꦺ. ꦄꦱ꧀ꦱꦺꦴꦱꦶ ꦑꦺꦴ ꦩꦺꦟ꧀ꦝꦏꦺꦴ ꦒꦲꦥꦠꦶ – ‘‘ꦱꦩꦟꦺꦴ ꦑꦭꦸ ꦨꦺꦴ ꦒꦺꦴꦠꦩꦺꦴ ꦱꦏ꧀ꦪꦥꦸꦠ꧀ꦠꦺꦴ ꦱꦏ꧀ꦪꦏꦸꦭꦴ ꦥꦧ꧀ꦧꦗꦶꦠꦺꦴ ꦨꦢ꧀ꦢꦶꦪꦁ ꦄꦤꦸꦥ꧀ꦥꦠ꧀ꦠꦺꦴ ꦨꦢ꧀ꦢꦶꦪꦺ ꦮꦶꦲꦫꦠꦶ ꦗꦴꦠꦶꦪꦴ ꦮꦤꦺ. ꦠꦁ ꦑꦺꦴ ꦥꦤ ꦨꦒꦮꦤ꧀ꦠꦁ ꦒꦺꦴꦠꦩꦁ ꦌꦮꦁ ꦏꦭ꧀ꦪꦴꦟꦺꦴ ꦏꦶꦠ꧀ꦠꦶꦱꦢ꧀ꦢꦺꦴ ꦄꦧ꧀ꦨꦸꦒ꧀ꦒꦠꦺꦴ – ‘ꦆꦠꦶꦥꦶ ꦱꦺꦴ ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦮꦶꦗ꧀ꦗꦴꦕꦫꦟꦱꦩ꧀ꦥꦤ꧀ꦤꦺꦴ ꦱꦸꦒꦠꦺꦴ ꦭꦺꦴꦏꦮꦶꦢꦹ ꦄꦤꦸꦠ꧀ꦠꦫꦺꦴ ꦥꦸꦫꦶꦱꦢꦩ꧀ꦩꦱꦴꦫꦡꦶ ꦱꦠ꧀ꦡꦴ ꦢꦺꦮꦩꦤꦸꦱ꧀ꦱꦴꦤꦁ ꦧꦸꦢ꧀ꦣꦺꦴ ꦨꦒꦮꦴ’ [ꦨꦒꦮꦴꦠꦶ (ꦏ.)]. ꦱꦺꦴ ꦆꦩꦁ ꦭꦺꦴꦏꦁ ꦱꦢꦺꦮꦏꦁ ꦱꦩꦴꦫꦏꦁ ꦱꦧ꧀ꦫꦲ꧀ꦩꦏꦁ ꦱꦱ꧀ꦱꦩꦟꦧ꧀ꦫꦴꦲ꧀ꦩꦟꦶꦁ ꦥꦗꦁ ꦱꦢꦺꦮꦩꦤꦸꦱ꧀ꦱꦁ ꦱꦪꦁ ꦄꦨꦶꦚ꧀ꦚꦴ ꦱꦕ꧀ꦖꦶꦏꦠ꧀ꦮꦴ ꦥꦮꦺꦢꦺꦠꦶ. ꦱꦺꦴ ꦣꦩ꧀ꦩꦁ ꦢꦺꦱꦺꦠꦶ ꦄꦴꦢꦶꦏꦭ꧀ꦪꦴꦟꦁ ꦩꦗ꧀ꦙꦺꦏꦭ꧀ꦪꦴꦟꦁ ꦥꦫꦶꦪꦺꦴꦱꦴꦤꦏꦭ꧀ꦪꦴꦟꦁ ꦱꦴꦠ꧀ꦡꦁ ꦱꦧ꧀ꦪꦚ꧀ꦗꦤꦁ ꦏꦺꦮꦭꦥꦫꦶꦥꦸꦟ꧀ꦟꦁ ꦥꦫꦶꦱꦸꦢ꧀ꦣꦁ ꦧ꧀ꦫꦲ꧀ꦩꦕꦫꦶꦪꦁ ꦥꦏꦴꦱꦺꦠꦶ. ꦱꦴꦣꦸ ꦑꦺꦴ ꦥꦤ ꦠꦡꦴꦫꦹꦥꦴꦤꦁ ꦄꦫꦲꦠꦁ ꦢꦱ꧀ꦱꦤꦁ ꦲꦺꦴꦠꦷ’’ꦠꦶ. ꦄꦡ ꦑꦺꦴ ꦩꦺꦟ꧀ꦝꦏꦺꦴ ꦒꦲꦥꦠꦶ ꦨꦢ꧀ꦫꦴꦤꦶ ꦨꦢ꧀ꦫꦴꦤꦶ ꦪꦴꦤꦴꦤꦶ ꦪꦺꦴꦗꦴꦥꦺꦠ꧀ꦮꦴ ꦨꦢ꧀ꦫꦁ ꦨꦢ꧀ꦫꦁ ꦪꦴꦤꦁ ꦄꦨꦶꦫꦸꦲꦶꦠ꧀ꦮꦴ ꦨꦢ꧀ꦫꦺꦲꦶ ꦨꦢ꧀ꦫꦺꦲꦶ ꦪꦴꦤꦺꦲꦶ ꦨꦢ꧀ꦢꦶꦪꦴ ꦤꦶꦪ꧀ꦪꦴꦱꦶ ꦨꦒꦮꦤ꧀ꦠꦁ ꦢꦱ꧀ꦱꦤꦴꦪ. ꦄꦢ꧀ꦢꦱꦁꦱꦸ ꦑꦺꦴ ꦱꦩ꧀ꦧꦲꦸꦭꦴ ꦠꦶꦠ꧀ꦡꦶꦪꦴ ꦩꦺꦟ꧀ꦝꦏꦁ ꦒꦲꦥꦠꦶꦁ ꦢꦹꦫꦠꦺꦴꦮ ꦄꦴꦒꦕ꧀ꦖꦤ꧀ꦠꦁ, ꦢꦶꦱ꧀ꦮꦴꦤ ꦩꦺꦟ꧀ꦝꦏꦁ ꦒꦲꦥꦠꦶꦁ ꦌꦠꦢꦮꦺꦴꦕꦸꦁ – ‘‘ꦏꦲꦁ ꦠ꧀ꦮꦁ, ꦒꦲꦥꦠꦶ, ꦒꦕ꧀ꦖꦱꦷ’’ꦠꦶ? ‘‘ꦒꦕ꧀ꦖꦴꦩꦲꦁ, ꦨꦤ꧀ꦠꦺ, ꦨꦒꦮꦤ꧀ꦠꦁ [ꦆꦢꦁ ꦥꦢꦁ ꦱꦷ. ꦱ꧀ꦪꦴ. ꦥꦺꦴꦠ꧀ꦡꦏꦺꦱꦸ ꦤꦠ꧀ꦡꦶ] ꦱꦩꦟꦁ ꦒꦺꦴꦠꦩꦁ ꦢꦱ꧀ꦱꦤꦴꦪꦴ’’ꦠꦶ. ‘‘ꦏꦶꦁ ꦥꦤ ꦠ꧀ꦮꦁ, ꦒꦲꦥꦠꦶ, ꦏꦶꦫꦶꦪꦮꦴꦢꦺꦴ ꦱꦩꦴꦤꦺꦴ ꦄꦏꦶꦫꦶꦪꦮꦴꦢꦁ ꦱꦩꦟꦁ ꦒꦺꦴꦠꦩꦁ ꦢꦱ꧀ꦱꦤꦴꦪ ꦈꦥꦱꦔ꧀ꦏꦩꦶꦱ꧀ꦱꦱꦶ? ꦱꦩꦟꦺꦴ ꦲꦶ, ꦒꦲꦥꦠꦶ, ꦒꦺꦴꦠꦩꦺꦴ ꦄꦏꦶꦫꦶꦪꦮꦴꦢꦺꦴ ꦄꦏꦶꦫꦶꦪꦴꦪ ꦣꦩ꧀ꦩꦁ ꦢꦺꦱꦺꦠꦶ, ꦠꦺꦤ ꦕ ꦱꦴꦮꦏꦺ ꦮꦶꦤꦺꦠꦷ’’ꦠꦶ. ꦄꦡ ꦑꦺꦴ ꦩꦺꦟ꧀ꦝꦏꦱ꧀ꦱ ꦒꦲꦥꦠꦶꦱ꧀ꦱ ꦌꦠꦢꦲꦺꦴꦱꦶ – ‘‘ꦤꦶꦱ꧀ꦱꦁꦱꦪꦁ, ꦑꦺꦴ ꦱꦺꦴ ꦨꦒꦮꦴ ꦄꦫꦲꦁ ꦱꦩ꧀ꦩꦴꦱꦩ꧀ꦧꦸꦢ꧀ꦣꦺꦴ ꦨꦮꦶꦱ꧀ꦱꦠꦶ, ꦪꦡꦪꦶꦩꦺ ꦠꦶꦠ꧀ꦡꦶꦪꦴ ꦈꦱꦹꦪꦤ꧀ꦠꦷ’’ꦠꦶ. ꦪꦴꦮꦠꦶꦏꦴ ꦪꦴꦤꦱ꧀ꦱ ꦨꦹꦩꦶ, ꦪꦴꦤꦺꦤ ꦒꦤ꧀ꦠ꧀ꦮꦴ ꦪꦴꦤꦴ ꦥꦕ꧀ꦕꦺꦴꦫꦺꦴꦲꦶꦠ꧀ꦮꦴ ꦥꦠ꧀ꦠꦶꦏꦺꦴꦮ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶ, ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦱ꧀ꦱ ꦑꦺꦴ ꦩꦺꦟ꧀ꦝꦏꦱ꧀ꦱ ꦒꦲꦥꦠꦶꦱ꧀ꦱ ꦨꦒꦮꦴ ꦄꦤꦸꦥꦸꦧ꧀ꦧꦶꦁ ꦏꦡꦁ ꦏꦡꦺꦱꦶ, ꦱꦺꦪ꧀ꦪꦡꦶꦢꦁ – ꦢꦴꦤꦏꦡꦁ…ꦥꦺ… ꦄꦥꦫꦥ꧀ꦥꦕ꧀ꦕꦪꦺꦴ ꦱꦠ꧀ꦡꦸꦱꦴꦱꦤꦺ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦄꦨꦶꦏ꧀ꦏꦤ꧀ꦠꦁ, ꦨꦤ꧀ꦠꦺ…ꦥꦺ… ꦈꦥꦴꦱꦏꦁ ꦩꦁ ꦨꦒꦮꦴ ꦣꦴꦫꦺꦠꦸ ꦄꦗ꧀ꦗꦠꦒ꧀ꦒꦺ ꦥꦴꦟꦸꦥꦺꦠꦁ ꦱꦫꦟꦁ ꦒꦠꦁ. ꦄꦣꦶꦮꦴꦱꦺꦠꦸ ꦕ ꦩꦺ, ꦨꦤ꧀ꦠꦺ, ꦨꦒꦮꦴ ꦱ꧀ꦮꦴꦠꦤꦴꦪ ꦨꦠ꧀ꦠꦁ ꦱꦢ꧀ꦣꦶꦁ ꦨꦶꦏ꧀ꦑꦸꦱꦔ꧀ꦓꦺꦤꦴ’’ꦠꦶ. ꦄꦣꦶꦮꦴꦱꦺꦱꦶ ꦨꦒꦮꦴ ꦠꦸꦟ꧀ꦲꦷꦨꦴꦮꦺꦤ. ꦄꦡ ꦑꦺꦴ ꦩꦺꦟ꧀ꦝꦏꦺꦴ ꦒꦲꦥꦠꦶ ꦨꦒꦮꦠꦺꦴ ꦄꦣꦶꦮꦴꦱꦤꦁ ꦮꦶꦢꦶꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦥꦢꦏ꧀ꦑꦶꦟꦁ ꦏꦠ꧀ꦮꦴ ꦥꦏ꧀ꦏꦴꦩꦶ.

ꦄꦡ ꦑꦺꦴ ꦩꦺꦟ꧀ꦝꦏꦺꦴ ꦒꦲꦥꦠꦶ ꦠꦱ꧀ꦱꦴ ꦫꦠ꧀ꦠꦶꦪꦴ ꦄꦕ꧀ꦕꦪꦺꦤ ꦥꦟꦷꦠꦁ ꦑꦴꦢꦤꦷꦪꦁ ꦨꦺꦴꦗꦤꦷꦪꦁ ꦥꦛꦶꦪꦴꦢꦴꦥꦺꦠ꧀ꦮꦴ ꦨꦒꦮꦠꦺꦴ ꦏꦴꦭꦁ ꦄꦴꦫꦺꦴꦕꦴꦥꦺꦱꦶ – ‘‘ꦏꦴꦭꦺꦴ, ꦨꦤ꧀ꦠꦺ, ꦤꦶꦛ꧀ꦜꦶꦠꦁ ꦨꦠ꧀ꦠ’’ꦤ꧀ꦠꦶ. ꦄꦡ ꦑꦺꦴ ꦨꦒꦮꦴ ꦥꦸꦧ꧀ꦧꦟ꧀ꦲꦱꦩꦪꦁ ꦤꦶꦮꦴꦱꦺꦠ꧀ꦮꦴ ꦥꦠ꧀ꦠꦕꦷꦮꦫꦩꦴꦢꦴꦪ ꦪꦺꦤ ꦩꦺꦟ꧀ꦝꦏꦱ꧀ꦱ ꦒꦲꦥꦠꦶꦱ꧀ꦱ ꦤꦶꦮꦺꦱꦤꦁ ꦠꦺꦤꦸꦥꦱꦔ꧀ꦏꦩꦶ; ꦈꦥꦱꦔ꧀ꦏꦩꦶꦠ꧀ꦮꦴ ꦥꦚ꧀ꦚꦠ꧀ꦠꦺ ꦄꦴꦱꦤꦺ ꦤꦶꦱꦷꦢꦶ ꦱꦢ꧀ꦣꦶꦁ ꦨꦶꦏ꧀ꦑꦸꦱꦔ꧀ꦓꦺꦤ. ꦄꦡ ꦑꦺꦴ ꦩꦺꦟ꧀ꦝꦏꦱ꧀ꦱ ꦒꦲꦥꦠꦶꦱ꧀ꦱ ꦨꦫꦶꦪꦴ ꦕ ꦥꦸꦠ꧀ꦠꦺꦴ ꦕ ꦱꦸꦟꦶꦱꦴ ꦕ ꦢꦴꦱꦺꦴ ꦕ ꦪꦺꦤ ꦨꦒꦮꦴ ꦠꦺꦤꦸꦥꦱꦔ꧀ꦏꦩꦶꦁꦱꦸ, ꦈꦥꦱꦔ꧀ꦏꦩꦶꦠ꧀ꦮꦴ ꦨꦒꦮꦤ꧀ꦠꦁ ꦄꦨꦶꦮꦴꦢꦺꦠ꧀ꦮꦴ ꦌꦏꦩꦤ꧀ꦠꦁ ꦤꦶꦱꦷꦢꦶꦁꦱꦸ. ꦠꦺꦱꦁ ꦨꦒꦮꦴ ꦄꦤꦸꦥꦸꦧ꧀ꦧꦶꦁ ꦏꦡꦁ ꦏꦡꦺꦱꦶ, ꦱꦺꦪ꧀ꦪꦡꦶꦢꦁ – ꦢꦴꦤꦏꦡꦁ…ꦥꦺ… ꦄꦥꦫꦥ꧀ꦥꦕ꧀ꦕꦪꦴ ꦱꦠ꧀ꦡꦸꦱꦴꦱꦤꦺ ꦨꦒꦮꦤ꧀ꦠꦁ ꦌꦠꦢꦮꦺꦴꦕꦸꦁ – ‘‘ꦄꦨꦶꦏ꧀ꦏꦤ꧀ꦠꦁ, ꦨꦤ꧀ꦠꦺ…ꦥꦺ… ꦌꦠꦺ ꦩꦪꦁ, ꦨꦤ꧀ꦠꦺ, ꦨꦒꦮꦤ꧀ꦠꦁ ꦱꦫꦟꦁ ꦒꦕ꧀ꦖꦴꦩ ꦣꦩ꧀ꦩꦚ꧀ꦕ ꦨꦶꦏ꧀ꦑꦸꦱꦔ꧀ꦓꦚ꧀ꦕ. ꦈꦥꦴꦱꦏꦺ ꦤꦺꦴ ꦨꦒꦮꦴ ꦣꦴꦫꦺꦠꦸ ꦄꦗ꧀ꦗꦠꦒ꧀ꦒꦺ ꦥꦴꦟꦸꦥꦺꦠꦺ ꦱꦫꦟꦁ ꦒꦠꦺ’’ꦠꦶ. ꦄꦡ ꦑꦺꦴ ꦩꦺꦟ꧀ꦝꦏꦺꦴ ꦒꦲꦥꦠꦶ ꦧꦸꦢ꧀ꦣꦥ꧀ꦥꦩꦸꦑꦁ ꦨꦶꦏ꧀ꦑꦸꦱꦔ꧀ꦓꦁ ꦥꦟꦷꦠꦺꦤ ꦑꦴꦢꦤꦷꦪꦺꦤ ꦨꦺꦴꦗꦤꦷꦪꦺꦤ ꦱꦲꦠ꧀ꦡꦴ ꦱꦤ꧀ꦠꦥ꧀ꦥꦺꦠ꧀ꦮꦴ ꦱꦩ꧀ꦥꦮꦴꦫꦺꦠ꧀ꦮꦴ ꦨꦒꦮꦤ꧀ꦠꦁ ꦨꦸꦠ꧀ꦠꦴꦮꦶꦁ ꦎꦤꦷꦠꦥꦠ꧀ꦠꦥꦴꦟꦶꦁ ꦌꦏꦩꦤ꧀ꦠꦁ ꦤꦶꦱꦷꦢꦶ. ꦌꦏꦩꦤ꧀ꦠꦁ ꦤꦶꦱꦶꦤ꧀ꦤꦺꦴ ꦑꦺꦴ ꦩꦺꦟ꧀ꦝꦏꦺꦴ ꦒꦲꦥꦠꦶ ꦨꦒꦮꦤ꧀ꦠꦁ ꦌꦠꦢꦮꦺꦴꦕ – ‘‘ꦪꦴꦮ, ꦨꦤ꧀ꦠꦺ, ꦨꦒꦮꦴ ꦨꦢ꧀ꦢꦶꦪꦺ ꦮꦶꦲꦫꦠꦶ ꦠꦴꦮ ꦄꦲꦁ ꦧꦸꦢ꧀ꦣꦥ꧀ꦥꦩꦸꦑꦱ꧀ꦱ ꦨꦶꦏ꧀ꦑꦸꦱꦔ꧀ꦓꦱ꧀ꦱ ꦣꦸꦮꦨꦠ꧀ꦠꦺꦤꦴ’’ꦠꦶ. ꦄꦡ ꦑꦺꦴ ꦨꦒꦮꦴ ꦩꦺꦟ꧀ꦝꦏꦁ ꦒꦲꦥꦠꦶꦁ ꦣꦩ꧀ꦩꦶꦪꦴ ꦏꦡꦴꦪ ꦱꦤ꧀ꦢꦱ꧀ꦱꦺꦠ꧀ꦮꦴ ꦱꦩꦴꦢꦥꦺꦠ꧀ꦮꦴ ꦱꦩꦸꦠ꧀ꦠꦺꦗꦺꦠ꧀ꦮꦴ ꦱꦩ꧀ꦥꦲꦁꦱꦺꦠ꧀ꦮꦴ ꦈꦛ꧀ꦜꦴꦪꦴꦱꦤꦴ ꦥꦏ꧀ꦏꦴꦩꦶ.

ꦩꦺꦟ꧀ꦝꦏꦒꦲꦥꦠꦶꦮꦠ꧀ꦡ ꦤꦶꦛ꧀ꦜꦶꦠꦁ.