꧑꧖꧖. ꦥꦛꦶꦒ꧀ꦒꦲꦶꦠꦴꦢꦶꦄꦤꦸꦗꦴꦤꦤꦴ

꧒꧗꧗. [ꦥꦴꦕꦶ. ꧒꧙꧕] ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦠꦺꦴ ꦈꦥꦤꦤ꧀ꦢꦱ꧀ꦱ ꦱꦏ꧀ꦪꦥꦸꦠ꧀ꦠꦱ꧀ꦱ ꦈꦥꦛ꧀ꦜꦴꦏꦏꦸꦭꦁ ꦱꦔ꧀ꦓꦱ꧀ꦱꦠ꧀ꦡꦴꦪ ꦑꦴꦢꦤꦷꦪꦁ ꦥꦴꦲꦺꦱꦶ – ꦄꦪ꧀ꦪꦱ꧀ꦱ ꦈꦥꦤꦤ꧀ꦢꦱ꧀ꦱ ꦢꦱ꧀ꦱꦺꦠ꧀ꦮꦴ ꦱꦔ꧀ꦓꦱ꧀ꦱ ꦢꦴꦠꦧ꧀ꦧꦤ꧀ꦠꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ ꦒꦴꦩꦁ ꦥꦶꦟ꧀ꦝꦴꦪ ꦥꦮꦶꦛ꧀ꦜꦺꦴ ꦲꦺꦴꦠꦶ. ꦄꦡ ꦑꦺꦴ ꦠꦺ ꦩꦤꦸꦱ꧀ꦱꦴ ꦄꦴꦫꦴꦩꦁ ꦒꦤ꧀ꦠ꧀ꦮꦴ ꦨꦶꦏ꧀ꦑꦹ ꦥꦸꦕ꧀ꦖꦶꦁꦱꦸ – ‘‘ꦏꦲꦁ, ꦨꦤ꧀ꦠꦺ, ꦄꦪ꧀ꦪꦺꦴ ꦈꦥꦤꦤ꧀ꦢꦺꦴ’’ꦠꦶ? ‘‘ꦌꦱꦴꦮꦸꦱꦺꦴ, ꦄꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ ꦒꦴꦩꦁ ꦥꦶꦟ꧀ꦝꦴꦪ ꦥꦮꦶꦛ꧀ꦜꦺꦴ’’ꦠꦶ. ‘‘ꦆꦢꦁ, ꦨꦤ꧀ꦠꦺ, ꦑꦴꦢꦤꦷꦪꦁ ꦄꦪ꧀ꦪꦱ꧀ꦱ ꦈꦥꦤꦤ꧀ꦢꦱ꧀ꦱ ꦢꦱ꧀ꦱꦺꦠ꧀ꦮꦴ ꦱꦔ꧀ꦓꦱ꧀ꦱ ꦢꦴꦠꦧ꧀ꦧ’’ꦤ꧀ꦠꦶ. ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦠꦺꦤ ꦲꦶ, ꦨꦶꦏ꧀ꦑꦮꦺ, ꦥꦛꦶꦒ꧀ꦒꦲꦺꦠ꧀ꦮꦴ ꦤꦶꦏ꧀ꦑꦶꦥꦡ ꦪꦴꦮ ꦈꦥꦤꦤ꧀ꦢꦺꦴ ꦄꦴꦒꦕ꧀ꦖꦠꦷꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦈꦥꦤꦤ꧀ꦢꦺꦴ ꦱꦏ꧀ꦪꦥꦸꦠ꧀ꦠꦺꦴ ꦥꦸꦫꦺꦨꦠ꧀ꦠꦁ ꦏꦸꦭꦴꦤꦶ ꦥꦪꦶꦫꦸꦥꦴꦱꦶꦠ꧀ꦮꦴ ꦢꦶꦮꦴ ꦄꦴꦒꦕ꧀ꦖꦠꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦹ ꦢꦸꦧ꧀ꦨꦶꦏ꧀ꦑꦺ ꦄꦥ꧀ꦥꦩꦠ꧀ꦠꦏꦺꦥꦶ ꦥꦮꦴꦫꦺꦤ꧀ꦠꦶ, ꦥꦛꦶꦱꦔ꧀ꦑꦴꦥꦶ ꦥꦛꦶꦏ꧀ꦑꦶꦥꦤ꧀ꦠꦶ, ꦱꦧ꧀ꦧꦺꦴ ꦕ ꦱꦔ꧀ꦓꦺꦴ ꦥꦮꦴꦫꦶꦠꦺꦴ ꦲꦺꦴꦠꦶ, ꦨꦶꦏ꧀ꦑꦹ ꦏꦸꦏ꧀ꦏꦸꦕ꧀ꦕꦴꦪꦤ꧀ꦠꦴ ꦤ ꦥꦛꦶꦒ꧀ꦒꦟ꧀ꦲꦤ꧀ꦠꦶ. ꦥꦛꦶꦒ꧀ꦒꦟ꧀ꦲꦡ, ꦨꦶꦏ꧀ꦑꦮꦺ, ꦥꦫꦶꦨꦸꦚ꧀ꦗꦡ. ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦥꦸꦫꦺꦨꦠ꧀ꦠꦁ ꦥꦛꦶꦒ꧀ꦒꦲꦶꦠꦁ ꦨꦸꦠ꧀ꦠꦴꦮꦶꦤꦴ ꦥꦮꦴꦫꦶꦠꦺꦤ ꦄꦤꦠꦶꦫꦶꦠ꧀ꦠꦁ ꦥꦫꦶꦨꦸꦚ꧀ꦗꦶꦠꦸꦤ꧀ꦠꦶ.

꧒꧗꧘. ꦄꦡ ꦑꦺꦴ ꦨꦒꦮꦴ ꦫꦴꦗꦒꦲꦺ ꦪꦡꦴꦨꦶꦫꦤ꧀ꦠꦁ ꦮꦶꦲꦫꦶꦠ꧀ꦮꦴ ꦪꦺꦤ ꦱꦴꦮꦠ꧀ꦡꦶ ꦠꦺꦤ ꦕꦴꦫꦶꦏꦁ ꦥꦏ꧀ꦏꦴꦩꦶ. ꦄꦤꦸꦥꦸꦧ꧀ꦧꦺꦤ ꦕꦴꦫꦶꦏꦁ ꦕꦫꦩꦴꦤꦺꦴ ꦪꦺꦤ ꦱꦴꦮꦠ꧀ꦡꦶ ꦠꦢꦮꦱꦫꦶ. ꦠꦠ꧀ꦫ ꦱꦸꦢꦁ ꦨꦒꦮꦴ ꦱꦴꦮꦠ꧀ꦡꦶꦪꦁ ꦮꦶꦲꦫꦠꦶ ꦗꦺꦠꦮꦤꦺ ꦄꦤꦴꦡꦥꦶꦟ꧀ꦝꦶꦏꦱ꧀ꦱ ꦄꦴꦫꦴꦩꦺ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦏꦴꦪꦝꦴꦲꦴꦧꦴꦣꦺꦴ ꦲꦺꦴꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ ꦪꦺꦤꦴꦪꦱ꧀ꦩꦴ ꦱꦴꦫꦶꦥꦸꦠ꧀ꦠꦺꦴ ꦠꦺꦤꦸꦥꦱꦔ꧀ꦏꦩꦶ, ꦈꦥꦱꦔ꧀ꦏꦩꦶꦠ꧀ꦮꦴ ꦄꦴꦪꦱ꧀ꦩꦤ꧀ꦠꦁ ꦱꦴꦫꦶꦥꦸꦠ꧀ꦠꦁ ꦌꦠꦢꦮꦺꦴꦕ – ‘‘ꦥꦸꦧ꧀ꦧꦺ ꦠꦺ, ꦄꦴꦮꦸꦱꦺꦴ ꦱꦴꦫꦶꦥꦸꦠ꧀ꦠ, ꦏꦴꦪꦝꦴꦲꦴꦧꦴꦣꦺꦴ ꦏꦺꦤ ꦦꦴꦱꦸ ꦲꦺꦴꦠꦷ’’ꦠꦶ? ‘‘ꦨꦶꦱꦺꦲꦶ ꦕ ꦩꦺ, ꦄꦴꦮꦸꦱꦺꦴ, ꦩꦸꦭ꦳ꦴꦭꦶꦏꦴꦲꦶ ꦕꦴ’’ꦠꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ ꦱꦺꦪ꧀ꦪꦡꦴꦥꦶ ꦤꦴꦩ ꦧꦭꦮꦴ ꦥꦸꦫꦶꦱꦺꦴ ꦱꦩ꧀ꦩꦶꦚ꧀ꦗꦶꦠꦁ ꦮꦴ ꦧꦴꦲꦁ ꦥꦱꦴꦫꦺꦪ꧀ꦪ, ꦥꦱꦴꦫꦶꦠꦁ ꦮꦴ ꦧꦴꦲꦁ ꦱꦩꦶꦚ꧀ꦗꦺꦪ꧀ꦪ, ꦌꦮꦩꦺꦮ ꦗꦺꦠꦮꦤꦺ ꦄꦤ꧀ꦠꦫꦲꦶꦠꦺꦴ ꦩꦤ꧀ꦢꦴꦏꦶꦤꦶꦪꦴ ꦥꦺꦴꦏ꧀ꦑꦫꦟꦶꦪꦴ ꦠꦷꦫꦺ ꦥꦴꦠꦸꦫꦲꦺꦴꦱꦶ. ꦄꦢ꧀ꦢꦱꦴ ꦑꦺꦴ ꦄꦚ꧀ꦚꦠꦫꦺꦴ ꦤꦴꦒꦺꦴ ꦄꦴꦪꦱ꧀ꦩꦤ꧀ꦠꦁ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦁ ꦢꦹꦫꦠꦺꦴꦮ ꦄꦴꦒꦕ꧀ꦖꦤ꧀ꦠꦁ, ꦢꦶꦱ꧀ꦮꦴꦤ ꦄꦴꦪꦱ꧀ꦩꦤ꧀ꦠꦁ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦁ ꦌꦠꦢꦮꦺꦴꦕ – ‘‘ꦌꦠꦸ ꦑꦺꦴ, ꦨꦤ꧀ꦠꦺ, ꦄꦪ꧀ꦪꦺꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ. ꦱ꧀ꦮꦴꦒꦠꦁ, ꦨꦤ꧀ꦠꦺ, ꦄꦪ꧀ꦪꦱ꧀ꦱ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦱ꧀ꦱ. ꦏꦺꦤ, ꦨꦤ꧀ꦠꦺ, ꦄꦪ꧀ꦪꦱ꧀ꦱ ꦄꦠ꧀ꦡꦺꦴ; ꦏꦶꦁ ꦢꦩ꧀ꦩꦷ’’ꦠꦶ? ‘‘ꦨꦶꦱꦺꦲꦶ ꦕ ꦩꦺ, ꦄꦴꦮꦸꦱꦺꦴ, ꦄꦠ꧀ꦡꦺꦴ, ꦩꦸꦭ꦳ꦴꦭꦶꦏꦴꦲꦶ ꦕꦴ’’ꦠꦶ. ꦄꦡ ꦑꦺꦴ ꦱꦺꦴ ꦤꦴꦒꦺꦴ ꦄꦚ꧀ꦚꦠꦫꦁ ꦤꦴꦒꦁ ꦄꦴꦟꦴꦥꦺꦱꦶ – ‘‘ꦠꦺꦤ ꦲꦶ, ꦨꦟꦺ, ꦄꦪ꧀ꦪꦱ꧀ꦱ ꦨꦶꦱꦺ ꦕ ꦩꦸꦭ꦳ꦴꦭꦶꦏꦴꦪꦺꦴ ꦕ ꦪꦴꦮꦢꦠ꧀ꦡꦁ ꦢꦺꦲꦷ’’ꦠꦶ. ꦄꦡ ꦑꦺꦴ ꦱꦺꦴ ꦤꦴꦒꦺꦴ ꦩꦤ꧀ꦢꦴꦏꦶꦤꦶꦁ ꦥꦺꦴꦏ꧀ꦑꦫꦟꦶꦁ ꦎꦒꦴꦲꦺꦠ꧀ꦮꦴ, ꦱꦺꦴꦟ꧀ꦝꦴꦪ ꦨꦶꦱꦚ꧀ꦕ ꦩꦸꦭ꦳ꦴꦭꦶꦏꦚ꧀ꦕ ꦄꦧ꧀ꦧꦴꦲꦶꦠ꧀ꦮꦴ, ꦱꦸꦮꦶꦏ꧀ꦑꦴꦭꦶꦠꦁ ꦮꦶꦏ꧀ꦑꦴꦭꦺꦠ꧀ꦮꦴ, ꦨꦟ꧀ꦝꦶꦏꦁ ꦧꦤ꧀ꦣꦶꦠ꧀ꦮꦴ ꦪꦺꦤꦴꦪꦱ꧀ꦩꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ ꦠꦺꦤꦸꦥꦱꦔ꧀ꦏꦩꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ – ꦱꦺꦪ꧀ꦪꦡꦴꦥꦶ ꦤꦴꦩ ꦧꦭꦮꦴ ꦥꦸꦫꦶꦱꦺꦴ ꦱꦩꦶꦚ꧀ꦗꦶꦠꦁ ꦮꦴ ꦧꦴꦲꦁ ꦥꦱꦴꦫꦺꦪ꧀ꦪ, ꦥꦱꦴꦫꦶꦠꦁ ꦮꦴ ꦧꦴꦲꦁ ꦱꦩꦶꦚ꧀ꦗꦺꦪ꧀ꦪ, ꦌꦮꦩꦺꦮ – ꦩꦤ꧀ꦢꦴꦏꦶꦤꦶꦪꦴ ꦥꦺꦴꦏ꧀ꦑꦫꦟꦶꦪꦴ ꦠꦷꦫꦺ ꦄꦤ꧀ꦠꦫꦲꦶꦠꦺꦴ ꦗꦺꦠꦮꦤꦺ ꦥꦴꦠꦸꦫꦲꦺꦴꦱꦶ. ꦱꦺꦴꦥꦶ ꦑꦺꦴ ꦤꦴꦒꦺꦴ ꦩꦤ꧀ꦢꦴꦏꦶꦤꦶꦪꦴ ꦥꦺꦴꦏ꧀ꦑꦫꦟꦶꦪꦴ ꦠꦷꦫꦺ ꦄꦤ꧀ꦠꦫꦲꦶꦠꦺꦴ ꦗꦺꦠꦮꦤꦺ ꦥꦴꦠꦸꦫꦲꦺꦴꦱꦶ. ꦄꦡ ꦑꦺꦴ ꦱꦺꦴ ꦤꦴꦒꦺꦴ ꦄꦴꦪꦱ꧀ꦩꦠꦺꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦱ꧀ꦱ ꦨꦶꦱꦺ ꦕ ꦩꦸꦭ꦳ꦴꦭꦶꦏꦴꦪꦺꦴ ꦕ ꦥꦛꦶꦒ꧀ꦒꦲꦴꦥꦺꦠ꧀ꦮꦴ ꦗꦺꦠꦮꦤꦺ ꦄꦤ꧀ꦠꦫꦲꦶꦠꦺꦴ ꦩꦤ꧀ꦢꦴꦏꦶꦤꦶꦪꦴ ꦥꦺꦴꦏ꧀ꦑꦫꦟꦶꦪꦴ ꦠꦷꦫꦺ ꦥꦴꦠꦸꦫꦲꦺꦴꦱꦶ. ꦄꦡ ꦑꦺꦴ ꦄꦴꦪꦱ꧀ꦩꦴ ꦩꦲꦴꦩꦺꦴꦒ꧀ꦒꦭ꧀ꦭꦴꦤꦺꦴ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦨꦶꦱꦺ ꦕ ꦩꦸꦭ꦳ꦴꦭꦶꦏꦴꦪꦺꦴ ꦕ ꦈꦥꦤꦴꦩꦺꦱꦶ. ꦄꦡ ꦑꦺꦴ ꦄꦴꦪꦱ꧀ꦩꦠꦺꦴ ꦱꦴꦫꦶꦥꦸꦠ꧀ꦠꦱ꧀ꦱ ꦨꦶꦱꦺ ꦕ ꦩꦸꦭ꦳ꦴꦭꦶꦏꦴꦪꦺꦴ ꦕ ꦨꦸꦠ꧀ꦠꦱ꧀ꦱ ꦏꦴꦪꦝꦴꦲꦴꦧꦴꦣꦺꦴ ꦥꦛꦶꦥ꧀ꦥꦱ꧀ꦱꦩ꧀ꦨꦶ. ꦧꦲꦹ ꦨꦶꦱꦴ ꦕ ꦩꦸꦭ꦳ꦴꦭꦶꦏꦴꦪꦺꦴ ꦕ ꦄꦮꦱꦶꦛ꧀ꦜꦴ ꦲꦺꦴꦤ꧀ꦠꦶ. ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦨꦶꦏ꧀ꦑꦹ ꦢꦸꦧ꧀ꦨꦶꦏ꧀ꦑꦺ ꦄꦥ꧀ꦥꦩꦠ꧀ꦠꦏꦺꦥꦶ ꦥꦮꦴꦫꦺꦤ꧀ꦠꦶ, ꦥꦛꦶꦱꦔ꧀ꦑꦴꦥꦶ ꦥꦛꦶꦏ꧀ꦑꦶꦥꦤ꧀ꦠꦶ, ꦱꦧ꧀ꦧꦺꦴ ꦕ ꦱꦔ꧀ꦓꦺꦴ ꦥꦮꦴꦫꦶꦠꦺꦴ ꦲꦺꦴꦠꦶ. ꦨꦶꦏ꧀ꦑꦹ ꦏꦸꦏ꧀ꦏꦸꦕ꧀ꦕꦴꦪꦤ꧀ꦠꦴ ꦤ ꦥꦛꦶꦒ꧀ꦒꦟ꧀ꦲꦤ꧀ꦠꦶ. ꦥꦛꦶꦒ꧀ꦒꦟ꧀ꦲꦡ, ꦨꦶꦏ꧀ꦑꦮꦺ, ꦥꦫꦶꦨꦸꦚ꧀ꦗꦡ. ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦮꦤꦛ꧀ꦜꦁ ꦥꦺꦴꦏ꧀ꦑꦫꦛ꧀ꦜꦁ ꦨꦸꦠ꧀ꦠꦴꦮꦶꦤꦴ ꦥꦮꦴꦫꦶꦠꦺꦤ ꦄꦤꦠꦶꦫꦶꦠ꧀ꦠꦁ ꦥꦫꦶꦨꦸꦚ꧀ꦗꦶꦠꦸꦤ꧀ꦠꦶ.

ꦠꦺꦤ ꦑꦺꦴ ꦥꦤ ꦱꦩꦪꦺꦤ ꦱꦴꦮꦠ꧀ꦡꦶꦪꦁ ꦧꦲꦸꦁ ꦦꦭꦑꦴꦢꦤꦷꦪꦁ ꦈꦥ꧀ꦥꦤ꧀ꦤꦁ ꦲꦺꦴꦠꦶ, ꦏꦥ꧀ꦥꦶꦪꦏꦴꦫꦏꦺꦴ ꦕ ꦤ ꦲꦺꦴꦠꦶ. ꦨꦶꦏ꧀ꦑꦹ ꦏꦸꦏ꧀ꦏꦸꦕ꧀ꦕꦴꦪꦤ꧀ꦠꦴ ꦦꦭꦁ ꦤ ꦥꦫꦶꦨꦸꦚ꧀ꦗꦤ꧀ꦠꦶ. ꦨꦒꦮꦠꦺꦴ ꦌꦠꦩꦠ꧀ꦡꦁ ꦄꦴꦫꦺꦴꦕꦺꦱꦸꦁ. ꦄꦤꦸꦗꦴꦤꦴꦩꦶ, ꦨꦶꦏ꧀ꦑꦮꦺ, ꦄꦧꦷꦗꦁ ꦤꦶꦧ꧀ꦧꦠ꧀ꦠꦧꦷꦗꦁ [ꦤꦶꦧ꧀ꦧꦛ꧀ꦛꦧꦷꦗꦁ (ꦱꦷ.), ꦤꦶꦧ꧀ꦧꦛꦧꦷꦗꦁ (ꦱ꧀ꦪꦴ.), ꦤꦶꦥ꧀ꦥꦛ꧀ꦛꦧꦷꦗꦁ (ꦏ.)] ꦄꦏꦠꦏꦥ꧀ꦥꦁ ꦦꦭꦁ ꦥꦫꦶꦨꦸꦚ꧀ꦗꦶꦠꦸꦤ꧀ꦠꦶ.

ꦥꦛꦶꦒ꧀ꦒꦲꦶꦠꦴꦢꦶ ꦄꦤꦸꦗꦴꦤꦤꦴ ꦤꦶꦛ꧀ꦜꦶꦠꦴ.